Nzambi akatonge olongo la nkɛtɛ

Jehowa Nzambi kele otungi aso. Nde mbakatonge diangɔ tshɛ, diangɔ diakokaso mɛna ndo diangɔ diahatakoke mɛna. La ntondo ka nde ntonga diangɔ diakokaso mɛna, nde akatonge lokema la andjelo. Onde wɛ mbeyaka andjelo ewɔ? Andjelo wekɔ anto wakatonge Jehowa wele oko nde. Hatokoke mbowaɛna oko wahatakoke mɛna Nzambi. Ondjelo wa ntondo wakatonge Jehowa akakome okimanyedi ande. Ondjelo ɔsɔ akakimanyiya Jehowa etena kakandatonge tɔɔtɔ, waa planɛtɛ ndo diangɔ dikina tshɛ. Planɛtɛ kɛmɔtshi l’atei ayɔ ele nkɛtɛ, kele edjaselo kaso k’olangala efula.

Oma laasɔ, Jehowa akalɔngɔsɔla nkɛtɛ dia anto la waa nyama mbidjasɛ. Nde akatonge wonya dia ngamulaka osase la nkɛtɛ. Nde akatonge akona, ndjale ndo ɛkɛdi.

Kakɔna kakayosalemaka oma laasɔ? Jehowa akate ate: ‘Dimi layanga ntonga adiyo, tombatomba ndo esongo.’ Weho w’elowa efula wotshikitanyi, tombatomba ndo alɛmbɔlɛmbɔ wakatatɛ ntomba. Oma laasɔ, Jehowa akatonge weho wa nyama tshɛ, nyama ya mfumbɔ, yakɛndakɛnda l’ashi, yakɛndakɛnda l’ekolo ɛnɛi ndo yayakotola. Nde akatonge nyama ya totshitshɛ yele oko etomba ndo ya weke yele oko ndjɔvu. Nyama kakɔna kalekayɛ nanga?

Oma laasɔ, Jehowa akatɛ ondjelo wa ntondo ate: “Tosale onto.” Anto wakahombe ntshikitana la waa nyama. Vɔ kokaka nsala diangɔ. Vɔ kokaka ntɛkɛta, mbɔla ndo nɔmba. Vɔ mbakahombe nɔngɔsɔla nkɛtɛ ndo nkokɛ waa nyama. Onde wɛ mbeyaka onto la ntondo aakinde? Ɛsɔ tende.