KIOMBO YA WETSHELO 14A

Wetshelo wakondjaso oma lo ɛnɛlɔ ka tɛmpɛlɔ kakɛnyi Ɛzɛkiyɛlɛ

Okanda wa l'akatshi

Diagramɛ diɛnya awui w’ohomba wa lo tɛmpɛlɔ kakɛnyi Ɛzɛkiyɛlɛ l’ɛnɛlɔ. Mbidja ndo: 1. Dikona di’otale. 2. Ehele ka lokombo. 3. Dihole dia tshɛnɛkɔ diodingi tɛmpɛlɔ. 4. Ɔkɛdi wakɛla oma lo tɛmpɛlɔ k’ekila. 5. Asoko wa l’andja. 6. Ehele ka tɛmpɛlɔ. 7. Sɛkɛ dia l’andja. 8. Mvudu y’oleelo ya l’andja. 9. Asoko wa l’atei. 10. Sɛkɛ dia l’etei. 11. Elambwelo. 12. Dihole di’ekila dia lo tɛmpɛlɔ. Aviyɔ wa woke wɛmba anto wele l’otale wa mɛtrɛ oko 75 wekɔ tshitshɛ efula lo mbɛdika la lokombo la lo wedi tshɛ wa tɛmpɛlɔ lele l’otale wa mɛtrɛ 1 555. Dia mimɔ l’osato ko mbeta lo efundelo, klikɛ lo butɔ “Mode text.”

Ɔtɛmwɛlɔ wa pudipudi wambodiyama ndo wambokokamɛ

Tɛmpɛlɔ ka lo ɛnɛlɔ kambodiyama lo “lo dikona di’otale efula” 1). Onde tambodiya ɔtɛmwɛlɔ wa pudipudi lo mbokitsha lo dihole dioleki tshɛ laadiko lo lɔsɛnɔ laso?

Ehele ka lokombo 2), kakadinge tɛmpɛlɔ kaki l’atei atei wa dihole dia tshɛnɛkɔ 3), toholaka dia hatohombe pondjo mbetawɔ dia ɛngɔ kɛmɔtshi mbidja ɔtɛmwɛlɔ watɛmɔlaso Jehowa mindo. Naka kaanga diangɔ ‘diele bu ekila’ pombaka kakitɔna etale l’ɔtɛmwɛlɔ wa pudipudi, kete hoke lɔkɛwɔ la mindo, shi lɔ pombaka mimɔ lo lɔsɛnɔ l’ɔtɛmɔdi wa Jehowa ɛlɔ kɛnɛ?—Ɛzk. 42:20.

Ɛtshɔkɔ wa pondjo

Kiɔkɔ y’ashi yekɔ lo nkɛla oma lo tɛmpɛlɔ k’ekila, yɔ yambokoma ɔkɛdi wa woke ndo wekɔ lo nsala dia nkɛtɛ ntondja diangɔ ndo monga ɛtɛtɔ 4). Ɛtshɔkɔ ɛsɔ mbayotɔsɛdingola lo tshapita ya 19 ya dibuku nɛ.

Atɔndɔ akɔ waamɛ le anto tshɛ

Asoko w’etale wa l’andja 5) ndo asoko wa l’etei 9) toholaka dia Jehowa ekɔ l’atɔndɔ wa laadiko wendana la lɔkɛwɔ le anto tshɛ walanga ndjasha l’ɔtɛmwɛlɔ wa pudipudi. Tolembete dia asoko wa l’andja ndo wa la l’etei wekɔ woho ɔtɔi lo tshɛ. Ekɔ ngasɔ nɛ dia wadjango wosembwe waki Jehowa wekɔ woho ɔtɔi le ekambi ande tshɛ, oyadi dihole kana akoka wele lawɔ l’olimu wokambɛwɔ.

Mbo ya ndɛ lo mɛsa wa Jehowa

Mvudu y’oleelo 8) toholaka dia lo nshi y’edjedja, anto wakakokaka ndɛ yema mɔtshi oma lo kɛnɛ kakawalambolaka lo tɛmpɛlɔ, laasɔ ekɔ oko vɔ wakalɛka la Jehowa kaamɛ. Kɛsɔ ntshikitana la tɛmpɛlɔ ka lo nyuma, lɛnɛ atɛmɔla Akristo ɛlɔ kɛnɛ nɛ dia “olambo ɔtɔi” wamboshilaka kimɔma. (Hɛb. 10:12) Koko, tekɔ lo nambola olambo aso wa lotombo.—Hɛb. 13:15.

Eshikikelo k’oma le Nzambi

Wɛ koka mɛna dia awui tshɛ wendana la wɛdikelo wa l’ɛnɛlɔ kɛnɛ koka kotshindja wɔɔngɔ. Koko vɔ wekɔ la wetshelo w’ohomba ɔnɛ: Vɔ shikikɛka dia sangwelo dia Jehowa dia nkaloya ɔtɛmwɛlɔ wa pudipudi ekɔ dui dia mɛtɛ ndo diahakoke mbidja taamu, ndo diɔ diekɔ shikaa ndo hatshikitana oko wele awui wendana la wɛdikelo. Kaanga mbele Ɛzɛkiyɛlɛ hate dia nde ekɔ lo mɛna anto l’ɛnɛlɔ kande, nde totɛka alako wa Jehowa wa wolo otsha le ɛlɔmbɛdi, ewandji ndo anto. Ekambi tshɛ wa Nzambi pombaka nkitanyiya atɔndɔ ande wosembwe.

Tshapita 14, odingɔ 13, 14