WEKELO 05
Bible kekɔ losango laki Nzambi le so
Jehowa akatosha Bible. Tɔ kekɔ woshasha wa diambo wele la tobukubuku 66. Koko wɛ mbeyaka ndjambola ɔnɛ: ‘Oma lende akaye Bible? Ele kiɔkɔ yatɔ?’ Dia nkadimola ambola asɔ, tɔsɛdingole woho wakayokomaka losango laki Nzambi lele lo Bible le so.
1. Naka anto mbakafunde Bible, lande na kataso dia tɔ ndja oma le Nzambi?
Bible kakafundama oma le anto oko 40, l’edja k’ɛnɔnyi ndekana 1600 oma lo 1513 N.T.D. polo 98 T.D. Afundji atɔ waki la weho wa nsɛnɔ yotshikitanyi. Koko, tenyi dia Bible tshɛ mbɔtɔnɛka. Ngande wakoka dui sɔ salema? Diɔ koka salema dikambo Nzambi mbele kiɔkɔ ya Bible. (Adia 1 Tɛsalɔnika 2:13.) Afundji atɔ kofunda tokanyi tawɔ hita. Koko vɔ “wakate akambo w’oma le Nzambi nɛ dia wakasokoyama oma le nyuma k’ekila.”a (2 Petero 1:21) Nzambi akakambe la nyuma kande k’ekila, dia nsokoya anto dia vɔ mfunda tokanyi tande.—2 Timɔte 3:16.
2. Waa na wakoka nkondja wahɔ oma lo Bible?
“Wedja tshɛ ndo waoho tshɛ ndo ɛtɛkɛta tshɛ ndo weho w’anto tshɛ” koka nkondja wahɔ oma lo nkumu y’ɛlɔlɔ yatanema lo Bible. (Adia Ɛnyɛlɔ 14:6.) Nzambi akasale woho wa Bible tanema l’ɛtɛkɛta efula oleki dibuku dikina tshɛ diakatondjama l’ɔkɔndɔ w’ana w’anto. Suke l’onto tshɛ koka monga la Bible. Dui sɔ diekɔ mɛtɛ oyadi lo dihole diakɔna tshɛ diadjasɛ anto kana ɔtɛkɛta akɔna watɛkɛtawɔ.
3. Ngande wakakokɛ Jehowa Bible?
Bible kakafundama lo diangɔ diahaviya edja diele oko nkoho ya nyama kana papirisɛ. Koko, anto wakalangaka Bible wakasale tshɛ dia kisangola ndo nyomokisangola l’anya. Kaanga mbakayange anto amɔtshi wele la nkudu k’efula dia ndanya Bible, anto akina waki suke dia nshisha kaanga nsɛnɔ yawɔ dia kikokɛ. Jehowa kombetawɔ ntshika onto kana ɛngɔ kɛmɔtshi mbooshimba dia tewoya losango lande. Bible mbutaka ɔnɛ: “Ɔtɛkɛta wa Nzambi kaso tshikalaka pondjo.”—Isaya 40:8.
NYOMOTSHIMOLA
Eka akambo akina wendana la woho wakasambiya Nzambi anto dia mfunda ɔtɛkɛta ande, woho wakandakokɛ ɔtɛkɛta akɔ ndo wakandasale dia vɔ kokanɛ le anto wa l’andja w’otondo.
4. Bible mɛnyaka ɔnɛ lele Kiɔkɔ ya tɔ
Nyende VIDƐO. Ndo nyadia 2 Timɔte 3:16, ndo oma laasɔ, nyɔkɛtshanya ambola wayela anɛ:
Naka anto mbakafunde Bible, lande na kelamɛtɔ Ɔtɛkɛta wa Nzambi?
Onde wɛ mbetawɔka dia aki dui dia lomba dia Nzambi nsambiya tokanyi tande le afundji wa Bible?
Sekeletɛlɛ koka mfunda mukanda, koko tokanyi ta lɔkɔ ndja oma le ɔnɛ lawoka awui akɔ. Woho akɔ waamɛ mbele, anto mbakafunde Bible, koko losango la lɔkɔ ndja oma le Nzambi
5. Bible kakakokamɛ oma l’ɛlɔshamelo
Naka Bible kakaye oma le Nzambi, kete sho mbetawɔka dia nde akakikokɛ. L’edja k’ɔkɔndɔ, anto waki la nkudu k’efula wakayange dia nanya Bible. Ewandji w’ɛtɛmwɛlɔ wakahembe dia kishɛ. Koko kaanga mbakawalɔsha ndo mbakawawanɛ dia mbadaka, anto efula wakadje nsɛnɔ yawɔ lo waale dia nkokɛ Bible. Dia mbeya awui wendana la ɔmɔtshi l’atei awɔ, nyende VIDƐO, ndo oma laasɔ, nyɔkɛtshanya ambola wayela anɛ:
Onde woho wamboyeya dia awui efula wakasalema dia nkokɛ Bible koshaka mposa ka kiada? Ko lande na?
Nyadia Osambo 119:97, ndo oma laasɔ, nyɔkɛtshanya dimbola nɛ:
Kakɔna kakatshutshuya anto efula dia mbidja nsɛnɔ yawɔ lo waale dia nkadimola ndo nkahanya Bible?
6. Dibuku di’anto tshɛ
Lo ndjela ɔkɔndɔ, Bible mbele dibuku diamboleka kadimɔma ndo kahanyema l’andja w’otondo. Nyadia Etsha 10:34, 35, ndo oma laasɔ, nyɔkɛtshanya ambola anɛ:
Lande na kalanga Nzambi di’Ɔtɛkɛta ande kadimɔma ndo kahanyema l’andja w’otondo?
Kakɔna kakɔngɛnyangɛnya lo Bible?
Suke la
100%
y’anto wa l’andja w’otondo
wekɔ la Bible lo ɔtɛkɛta awɔ wa lootɔ kana l’ɔtɛkɛta wokawɔ
Bible kaya l’ɛtɛkɛta ndekana
3 000
la otondo kana etenyi
5 000 000 000
Lofulo la kɔpi ya Bible yambotondjama lekɔ oko
lofulo lɔsɔ ndeka oseka dibuku dikina tshɛ
ANTO AMƆTSHI MBUTAKA ƆNƐ: “Bible kekɔ tsho dibuku di’edjedja diakafundama oma le anto.”
Kakɔna kafɔnyayɛ?
Djembetelo yakɔna yɛnya dia Bible kekɔ Ɔtɛkɛta wa Nzambi?
LO TSHENA PE
Bible kekɔ Ɔtɛkɛta wa Nzambi, ndo nde nangaka di’anto tshɛ monga la tɔ.
Ovuswelo
Etena kataso ɔnɛ Nzambi akasokoya anto la nyuma kande k’ekila dia mfunda Bible, kakɔna kalembetshiya dui sɔ?
Kakɔna kakambiya lo woho wakahandɔ Bible ndo lo kɛnɛ kendana l’okadimwelo ndo l’okahanyelo atɔ?
Ngande wayaokayɛ lo mbeya dia Nzambi akasale la wolo dia tosambiyɛ ɔtɛkɛta ande?
SALA EYANGELO
Adia ɔkɔndɔ wendana la Bible, oma lo efundelo w’edjedja wa l’anya polo lo dikadimwelo dia nshi nyɛ.
“Woho wakakome Bible le so” (Emɔ!, Ngɔndɔ ka dikumi l’ɔtɔi 2007)
Eka dia mbeya woho wakakokamɛ Bible oma lo waale esato wa weke.
“Ɔkɔndɔ wɛnya woho wakakokamɛ Bible” (Tshoto y’Etangelo No. 4 2016)
Enda woho wakadje anto amɔtshi nsɛnɔ yawɔ lo waale dia nkadimola Bible.
Bible kakasangɔma ndo kakakadimɔma mbala efula. Ngande wakokayɛ ndjashikikɛ dia losango laki Nzambi kotshikitanyema?
“Onde awui wa lo Bible wakatshikitanyema?” (Sawo dia l’Ɛtɛrnɛtɛ)