Ngande wasambishaso lokumu l’ɔlɔlɔ?

Keem’edja, Jehowa ayanga nkamba la Diolelo diande dia minya ekakatanu aso tshɛ. Lokumu l’ɔlɔlɔ lɔsɔ lekɔ dimɛna, diakɔ diahombaso liewoya oseka onto tshɛ. Yeso akalangaka di’ambeki ande nsambisha onto tshɛ losango lɔsɔ. (Mateo 28:19, 20) Ngande wakitanyiya Ɛmɛnyi wa Jehowa didjango dia Yeso sɔ?

1. Ngande wakotshama Mateo 24:14 ɛlɔ kɛnɛ?

Yeso akate ate: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo.” (Mateo 24:14) Ɛmɛnyi wa Jehowa wekɔ l’ɔngɛnɔngɛnɔ dia mbisha lonya l’olimu w’ohomba ɔsɔ. Tekɔ lo nsambisha lokumu l’ɔlɔlɔ l’andja w’otondo l’ɛtɛkɛta ndekana 1 000! Olimu wa woke ɔsɔ nɔmbaka dia sho mbidja welo efula ndo dia nkongɛ akambo dimɛna. Vɔ hawokoke salema aha l’ekimanyielo ka Jehowa.

2. Welo akɔna wadjaso dia nsambisha anto?

Sho sambishaka dihole tshɛ diakokaso ntana anto. L’ɛnyɛlɔ k’Akristo wa lo ntambe ka ntondo, sho sambishaka “lo luudu la luudu.” (Etsha 5:42) Yoho y’esambishelo yoleki dimɛna shɔ tokimanyiyaka dia nsambisha miliyɔ y’anto ɔnɔnyi tshɛ. Lam’ele aha mbala tshɛ mbatanema anto lawakawɔ, sho sambishaka nto l’ahole wa lo sɛkɛ. Sho nyangaka mbala tshɛ waaso wa mbutɛ anto akambo wendana la Jehowa ndo l’asangwelo ande.

3. Ele l’ɔkɛndɛ wa nsambisha lokumu l’ɔlɔlɔ?

Akristo wa mɛtɛ tshɛ wekɔ l’ɔkɛndɛ wa nsambisha anto akina lokumu l’ɔlɔlɔ. Sho mbɔsaka ɔkɛndɛ aso ɔsɔ la nɛmɔ di’efula. Sho sambishaka lo yɛdikɔ yɛdimi l’akoka aso nɛ dia sho mbeyaka dia nsɛnɔ y’anto yekɔ lo waale. (Adia 1 Timɔte 4:16.) Sho hatofutama l’olimu ɔsɔ, nɛ dia Bible mbutaka ɔnɛ: “Nyakalongola olongolalongola, nyotokimɔ okimɔkimɔ.” (Mateo 10:7, 8) Aha onto tshɛ mbetawɔ losango laso. Koko sho tetemalaka nsambisha nɛ dia esambishelo kekɔ etenyi kɛmɔtshi k’ɔtɛmwɛlɔ aso ndo tɔ ngɛnyangɛnyaka Jehowa.

NYOMOTSHIMOLA

4. Sho salaka la wolo dia nsambisha anto tshɛ

VIDƐO: Esambishelo ka “l’ahole woleki etale wa lo nkɛtɛ” (7:33)

• Kakɔna kakambiya lo dikambo dia welo wadja Ɛmɛnyi wa Jehowa dia nsambisha?

Nyadia Mateo 22:39 ndo Rɔmɔ 10:13-15, ndo oma laasɔ, nyɔkɛtshanya ambola anɛ:

• Ngande wɛnya olimu aso dia sho nangaka wanyaso anto?

• Ngande wayaoka Jehowa lo dikambo dia wanɛ wasambisha lokumu l’ɔlɔlɔ?​—Enda divɛsa 15.

5. Tekɔ ekambi kaamɛ la Nzambi

Awui efula weta mɛnyaka dia Jehowa mbalɔmbɔla olimu aso. Ɛnyɛlɔ, la Nouvelle-Zélande, ɔnangɛso ɔmɔtshi lelɛwɔ Paul akahomana la womoto ɔmɔtshi l’esambishelo ka lo luudu la luudu l’ɔkɔngɔ a midi ɔmɔtshi. La pindju ka lushi lɔsɔ, womoto ɔsɔ akalɔmbɛ Nzambi, lo nkamba la lokombo la Nzambi, Jehowa. Nde akɔlɔmbɛ dia mbotomɛ onto ɔmɔtshi dia ndjowenda. Paul mbutaka ate: “Wenya esato l’ɔkɔngɔ, dimi lakakome la soko diande dia luudu.”

Nyadia 1 Kɔrɛtɔ 3:9, ndo oma laasɔ, nyɔkɛtshanya dimbola nɛ:

• Ngande wɛnya awui weta, ɛnyɛlɔ kɛnɛ kakete la Nouvelle-Zélande dia Jehowa mbalɔmbɔla olimu w’esambishelo?

Nyadia Etsha 1:8, ndo oma laasɔ, nyɔkɛtshanya dimbola nɛ:

• Lande na keso l’ohomba w’ekimanyielo ka Jehowa dia nsambisha?

Onde wɛ akeyaka?

Lomingu tshɛ, lo losanganya laso la l’atei wa lomingu, sho nongolaka olowanyelo watokimanyiya dia nsambisha. Naka wɛ ambɔtɔka lo losanganya lɔmɔtshi, akanyiyayɛ di’olowanyelo washama ɔsɔ?

6. Sho kitanyiyaka didjango diaki Nzambi diatotɛ dia nsambisha

Lo ntambe ka ntondo, andɔshi wakahembe dia nshimba ambeki wa Yeso dia nsambisha. Akristo wa ntondo wakaamɛ lotshungɔ lele lawɔ la nsambisha lo “nshikikɛ lokumu l’ɔlɔlɔ laka lɛɛta.” (Filipɛ 1:7) Ɛlɔ kɛnɛ, Ɛmɛnyi wa Jehowa salaka woho akɔ wamɛ.a

VIDƐO: Tekɔ lo mamɛ lokumu l’ɔlɔlɔ laka lɛɛta (2:28)

Nyadia Etsha 5:27-42, ndo oma laasɔ, nyɔkɛtshanya dimbola nɛ:

• Lande na kahatatotshika nsambisha?​—Enda divɛsa 29, 38 ndo 39.

LO TSHENA PE

Yeso akadjangɛ ambeki ande dia nsambisha lokumu l’ɔlɔlɔ lo wedja tshɛ. Jehowa ekɔ lo nkimanyiya ekambi ande dia nkamba olimu ɔsɔ.

Ovuswelo

• Ngande wasambishaso lokumu l’ɔlɔlɔ l’andja w’otondo?

• Ngande wɛnya olimu aso dia sho nangaka wanyaso anto?

• Onde wɛ fɔnyaka di’olimu w’esambishelo koka tosha ɔngɛnɔngɛnɔ? Lande na?

SALA EYANGELO

Enda woho wasambisha Ɛmɛnyi wa Jehowa l’esomba wa weke.

Esambishelo ka laande ka lo sɛkɛ kakasalema la Paris (5:11)

Ngande wakakimanyiya Ɛmɛnyi wa Jehowa anto waki lo dawo?

Wakashidiya mposa k’akambo wa lo nyuma k’ase dawo (5:59)

Hokamɛ woho walembetshiya onto ɔmɔtshi ɔngɛnɔngɛnɔ wele lande lo woho wayashande l’esambishelo.

Lekɔ l’ɔngɛnɔngɛnɔ lo woho wakamasɔnɛ olimu ɔnɛ (6:29)

Eka awui wendana la etshumba wambotodja laka lɛɛta wambɔtɔla olimu w’esambishelo ka lokumu l’ɔlɔlɔ otsha la ntondo.

“Apandjudi wa Diolelo ndjaamɛka la ntondo la tuminadi” (Diolelo diaki Nzambi diekɔ lo mbolɛ!, tshapita 13)