WEKELO 28
Ɛnya lowando lo kɛnɛ kakakosalɛ Jehowa nde la Yeso
Ngande watoyaokaka etena kakosha ɔngɛnyi ayɛ ɔmɔtshi w’oshasha wa dimɛna efula? Lo mɛtɛ, dui sɔ kɔngɛnyangɛnyaka efula ndo wɛ tolangaka mɛnya ɔngɛnyi ayɛ dia wɛ ekɔ la lowando lo woshasha akɔ. Jehowa nde la Yeso wakatosha woshasha woleki woke. Woshasha akɔna ɔsɔ ndo ngande wakokaso mɛnya lowando laso lo dikambo dia woshasha akɔ?
1. Naa yoho mɔtshi yakokaso mɛnya lowando laso lo kɛnɛ kakatosalɛ Nzambi nde la Kristo?
Bible ndakaka ɔnɛ: “Onto tshɛ longa la mbetawɔ le [Yeso]” kokaka nsɛna pondjo pondjo. (Joani 3:16) Kakɔna kalembetshiya monga la mbetawɔ? Dui sɔ nembetshiyaka awui efula, koko aha tsho monga la mbetawɔ le Yeso. Sho pombaka nto mɛnya mbetawɔ kaso oma l’ɛsɔnwɛlɔ ndo oma l’awui wasalaso. (Jakɔba 2:17) Etena kɛnyaso mbetawɔ kaso oma lo kɛnɛ kasalaso ndo kataso, sho keketshaka lɔngɛnyi lele lam’asaso la Yeso nde la Jehowa, She.—Adia Joani 14:21.
2. Naa dui dia laande diatokimanyiya dia mɛnya lowando laso lo kɛnɛ kakatosalɛ Jehowa nde la Yeso?
La dikɔlɔ dia la ntondo ka nde mvɔ, Yeso akatɛ ambeki ande akambo wendana la yoho kina yakokaso mɛnya lowando laso l’olambo ande. Nde akatatshiya dambo dimɔtshi dia laande dielɛ Bible ɔnɛ “dambo dia dikɔlɔ dia Nkumadiɔndjɔ,” ndo dielamɛ nto ɔnɛ Eohwelo ka nyɔi ka Kristo. (1 Kɔrɛtɔ 11:20) Yeso akatatshiya dambo sɔ woho w’apɔstɔlɔ ande ndo Akristo tshɛ wa mɛtɛ wakahombe ndjɔsɛna l’ɔkɔngɔ mbohɔka dia nde akakimɔ lɔsɛnɔ lande lo dikambo diaso. Lo kɛnɛ kendana la eohwelo kɛsɔ, Yeso akadjanga ate: “Kanyotshake ɔnkɔnɛ dia mbohɔkami.” (Luka 22:19) Etena kɔtɔyɛ lo Eohwelo, wɛ mɛnyaka dia wɛ ekɔ la lowando l’efula lo ngandji k’efula kakatoke Jehowa nde la Yeso.
NYOMOTSHIMOLA
Tɔsɛdingole toho tokina takokaso mɛnya lowando laso lo ngandji k’efula kakatoke Jehowa nde la Yeso. Tende ohomba wele la Eohwelo ka nyɔi ka Kristo.
3. Kakɔna kakokaso nsala dia mɛnya dia tekɔ la lowando l’efula
Ohɔsa dia onto ɔmɔtshi akakotsha lo kotopola oma l’ashi. Onde wɛ ayohɛ kɛnɛ kakakosalɛ onto ɔsɔ? Ko kana wɛ ayoyanga toho ta mbɛnya lowando l’efula lele layɛ lo kɛnɛ kakandakosalɛ kɛsɔ?
Jehowa mbele kiɔkɔ ya lɔsɛnɔ laso. Nyadia 1 Joani 4:8-10, ndo oma laasɔ, nyɔkɛtshanya ambola anɛ:
Lande na kele olambo wa Yeso wekɔ woshasha wa laande?
Ngande wayaokayɛ lo kɛnɛ kakakosalɛ Jehowa nde la Yeso?
Ngande wakokaso mɛnya lowando laso lo kɛnɛ kakatosalɛ Jehowa nde la Yeso? Nyadia 2 Kɔrɛtɔ 5:15 ndo 1 Joani 4:11; 5:3. L’ɔkɔngɔ wa wadielo wa divɛsa tshɛ, nyɔkɛtshanya dimbola nɛ:
Lo ndjela Afundelo, akokaso nsala dia mɛnya lowando laso?
4. Tokoya Yeso
Yoho kina yakokaso mɛnya lowando laso ele lo mbokoya Yeso. Nyadia 1 Petero 2:21, ndo oma laasɔ, nyɔkɛtshanya dimbola nɛ:
Lo toho takɔna takokayɛ ndjela Yeso dimɛna dimɛna lo wanya ande?
Yeso akalangaka Ɔtɛkɛta wa Nzambi, akasambishaka lokumu l’ɔlɔlɔ, ndo akakimanyiyaka anto akina
5. Ɔtɔka lo Eohwelo ka nyɔi ka Kristo
Dia mbeya kɛnɛ kakete lo Dambo dia ntondo dia dikɔlɔ dia Nkumadiɔndjɔ, nyadia Luka 22:14, 19, 20. Ndo oma laasɔ, nyɔkɛtshanya ambola anɛ:
Kakɔna kakete lo Dambo dia dikɔlɔ dia Nkumadiɔndjɔ?
Kakɔna kalembetshiya mapa la vinyɔ?—Enda divɛsa 19 ndo 20.
Yeso akalangaka di’ambeki ande ndjosalaka Eohwelo mbala ɔtɔi l’ɔnɔnyi lo datɛ diakandavu. Ɔnkɔnɛ, Ɛmɛnyi wa Jehowa sanganaka kaamɛ ɔnɔnyi tshɛ dia mbohɔ nyɔi ka Kristo lo yoho yakandadjanga. Dia mbeya awui wendana la dambo di’ohomba sɔ, nyende VIDƐO. Ndo oma laasɔ, nyɔkɛtshanya dimbola diayela nɛ:
Kakɔna kasalema lo Eohwelo?
Mapa la vinyɔ wekɔ didjidji di’ɛngɔ kɛmɔtshi. Mapa wekɔ didjidji dia demba di’onto dia kokele dia Yeso diakandakimɔ oko olambo dikambo diaso. Vinyɔ yekɔ didjidji dia dikila diande
ANTO AMƆTSHI MBUTAKA ƆNƐ: “Tshɛ kahombayɛ nsala dia shimbamɛ ele monga la mbetawɔ le Yeso.”
Ngande wakokayɛ nkamba la Joani 3:16 ndo Jakɔba 2:17 dia mɛnya diaha monga tsho la mbetawɔ, kete ambokoka?
LO TSHENA PE
Sho mɛnyaka lowando laso lo kɛnɛ kakatosalɛ Yeso lo monga la mbetawɔ le nde ndo lo mbɔtɔka lo Eohwelo ka nyɔi kande.
Ovuswelo
Kakɔna kalembetshiya monga la mbetawɔ le Yeso?
Ngande wayoyɛnya lowando layɛ lo kɛnɛ kakakosalɛ Jehowa nde la Yeso?
Lande na kele ekɔ ohomba mbɔtɔka lo Eohwelo ka nyɔi ka Kristo?
SALA EYANGELO
Kakɔna katotshutshuya nyɔi ka Kristo dia nsala?
Eka awui akina wendana la mbetawɔ ndo woho wakokayɛ monga la tɔ.
“Onga la mbetawɔ lo alaka wa Jehowa” (Tshoto y’Etangelo, Ngɔndɔ ka dikumi 2016)
Adia ɔkɔndɔ wɛnya woho wakalowana lɔsɛnɔ la womoto ɔmɔtshi etena kakandashihodia wahɔ waki l’olambo wa Kristo le nde.
“Bible tshikitanyaka nsɛnɔ y’anto” (Tshoto y’Etangelo, Ngɔndɔ k’enanɛi 1, 2011)
Tende lande na kele anto yema tshitshɛ tsho mbalɛ mapa ndo mbanɔ vinyɔ lo Eohwelo.