WEKELO 30
Wakiyɛ wa ngandji wakavu koka nsɛna nto!
Nyɔi mbishaka ɔkɛyi ndo lonyangu efula. Diakɔ dielɛ Bible nyɔi ɔnɛ otunyi. (1 Kɔrɛtɔ 15:26) Lo Wekelo 27, wɛ akeke dia Jehowa ayodja nyɔi otshumba. Ko kakɔna kayokomɛ anto wamboshilaka la mvɔ? Lo wekelo ɔnɛ, wɛ ayeka awui wendana la daka dikina dia diambo efula diaki Jehowa, mbuta ate woho wayondolola miliyara y’anto dia vɔ ndjɔngɛnangɛnaka la lɔsɛnɔ pondjo pondjo. Nde ayowaolola! Onde dui sɔ diayosalema mɛtɛ? Onde vɔ wayolwama dia tɔsɛna l’olongo ko kana la nkɛtɛ?
1. Kakɔna kalanga Jehowa salɛ wakiso wa ngandji wakavu?
Jehowa ekɔ lo nomɔlomɔ dia mbolola wanɛ wavɔ. Jɔbɔ, pami kɛmɔtshi kaki la mbetawɔ aki l’eshikikelo dia Nzambi hatowohɛ etena kayondovɔ. Nde akatɛ Nzambi ate: “Wɛ ayelɛ, ko dimi layokokadimola [oma lo dombo].”—Adia Jɔbɔ 14:13-15.
2. Ngande weyaso dia wanɛ wakavu koka mbolɔ?
Lam’aki Yeso lanɛ la nkɛtɛ, Nzambi akawosha wolo wa mbolola anto. Yeso akolola ɔna womoto laki l’ɛnɔnyi 12 ndo ɔna pami laki wadi aki odo ɔmɔtshi. (Makɔ 5:41, 42; Luka 7:12-15) L’ɔkɔngɔ diko, ɔngɛnyi waki Yeso Lazaro akavu. Kaanga mbakavu Lazaro ndo mbakinde ambokundɛma nshi nyɛi, Yeso akawolola. L’ɔkɔngɔ wa nde nɔmba Nzambi, Yeso akate la dui dia wolo ate: “Lazaro, tomba!” Ko “pami kakavu akatombe” la lɔsɛnɔ oma lo dombo! (Joani 11:43, 44) Ohokanyiya ɔngɛnɔngɛnɔ waki la nkumbo ndo l’angɛnyi waki Lazaro!
3. Elongamelo kakɔna kele layɛ lo dikambo dia wakiyɛ wa ngandji wakavu?
Bible ndakaka ɔnɛ: “Eolwelo . . . kayoyala.” (Etsha 24:15) Anto wakolwama oma le Yeso lo nshi yakete kotshɔ otsha l’olongo. (Joani 3:13) Vɔ waki l’ɔngɛnɔngɛnɔ dia mbolwama lanɛ la nkɛtɛ. Woho akɔ waamɛ mbele, keema edja Yeso ayanga mbolola miliyara y’anto dia vɔ ndjɔngɛnangɛna la lɔsɛnɔ lanɛ la nkɛtɛ. Nde akate dia “wanɛ wele lo waombo wohɔma,” kaanga wanɛ wɛnama di’oko wambohamamɛka, koko wekɔ lo wɔɔngɔ wa Nzambi wayolwama.—Joani 5:28, 29.
NYOMOTSHIMOLA
Sɛdingola tolembetelo t’oma lo Bible tɛnya dia wanɛ wakavu koka mbolwama ndo wayolwama. Eka woho wakoka eolwelo kokeketsha ndo kosha elongamelo.
4. Yeso akɛnya dia nde koka mbolola wanɛ wakavu
Eka awui akina wendana la kɛnɛ kakasalɛ Yeso ɔngɛnyi ande Lazaro. Nyadia Joani 11:14, 38-44, ndo oma laasɔ, nyɔkɛtshanya ambola anɛ:
Ngande weyaso dia Lazaro akavu mɛtɛ?—Enda divɛsa 39.
Naka Lazaro akadɛ otsha l’olongo, onde wɛ fɔnyaka dia Yeso otowolola dia nde ndjɔsɛna la nkɛtɛ?
5. Anto efula wayolwama!
Nyadia Osambo 37:29, ndo oma laasɔ, nyɔkɛtshanya dimbola nɛ:
Lende ayɔsɛna miliyara y’anto yayolwama?
Yeso ayolola anto akina efula, aha paka wanɛ watɛmɔla Jehowa ato. Nyadia Etsha 24:15, ndo oma laasɔ, nyɔkɛtshanya dimbola nɛ:
Onto akɔna ayoyolanga mɛna ambolɔ?
Ohokanyiya dui nɛ: Yeso koka mbolola onto ɔmɔtshi aha l’okakatanu oko wakoka papa kɛmɔtshi memula ɔnande oma lo djɔ
6. Eolwelo koka kosamba ndo kosha elongamelo
Ɔkɔndɔ wa lo Bible wendana l’ɔnaki Jayiro la womoto wambosamba ndo wambokeketsha anto efula wanɛ wambovusha. Nyadia ɔkɔndɔ wa mɛtɛ ɔsɔ wele lo Luka 8:40-42, 49-56.
La ntondo ka nde mbolola ɔnaki Jayiro la womoto, Yeso akatɛ she aki ɔnɔsɔ ate: “Tokake wɔma, onga tsho la mbetawɔ.” (Enda divɛsa 50.) Ngande wakoka kokimanyiya elongamelo ka eolwelo . . .
etena kavushayɛ lakiyɛ ɔmɔtshi la ngandji?
etena kele lɔsɛnɔ layɛ lo waale?
Nyende VIDƐO, ndo oma laasɔ, nyɔkɛtshanya dimbola diayela nɛ:
Ngande wakasambe ndo wakakeketsha elongamelo ka eolwelo ambutshi waki Phelicity?
ANTO AMƆTSHI MBUTAKA ƆNƐ: “Ekɔ dui dia wolo dia mbetawɔ ɔnɛ anto wakavu wayolɔ mɛtɛ.”
Kakɔna kafɔnyayɛ?
Naa divɛsa diakokayɛ nkamba la diɔ dia mɛnya ɔnɛ eolwelo kayonga?
LO TSHENA PE
Bible ndakaka dia miliyara y’anto wakavu wayolwama. Jehowa nangaka vɔ nsɛna nto, ndo nde akasha Yeso wolo wa mbaolola.
Ovuswelo
Ngande wayaoka Jehowa nde la Yeso lo kɛnɛ kendana la mbolola wanɛ wakavu?
Lende ayɔsɛna miliyara y’anto yayolwama, l’olongo ko kana la nkɛtɛ? Lande na kakadimolayɛ ngasɔ?
Kakɔna kaketawoya dia wakiyɛ wa ngandji wakavu kokaka nsɛna nto?
SALA EYANGELO
Enda awui amɔtshi wakokayɛ nsala dia ndɔshana l’ɔkɛyi.
Onde atɔndɔ wa lo Bible koka mɛtɛ nkimanyiya onto ɔmɔtshi lele l’ɔkɛyi?
Ngande wakoka ana ndɔshana l’ɔkɛyi wonga lawɔ etena kavushawɔ lakiwɔ ɔmɔtshi la ngandji?
Onde anto tshɛ wayolwama dia tɔsɛna l’olongo? Ko waa na wahatolwama?