Sɔna angɛnyi ayɛ la lomba

Angɛnyi w’eshika mfudiaka ɔngɛnɔngɛnɔ aso lo ntena di’ɔlɔlɔ ndo vɔ tokeketshaka lo ntena dia wolo. Koko Bible totɛka diaha onto tshɛ mbele ɔngɛnyi w’oshika. Ko laasɔ, ngande wakokayɛ nsɔna angɛnyi w’eshika? Tɔsɛdingole ambola wayela anɛ:

1. Angɛnyi wasɔnayɛ wayonga la shɛngiya yakɔna le yɛ?

Sho mongaka la mbekelo ka monga oko anto wetsha la so wenya kaamɛ. Dui sɔ koka monga dimɛna kana kɔlɔ, ndo dui sɔ diekɔ mɛtɛ oyadi lo waa rɛzo sɔsio mbetshaso la wɔ wenya kana bu. Oko wadita Bible, “ɔnɛ latɛngɔlaka kaamɛ la akanga wa lomba ayonga kanga lomba, koko ɔnɛ lekesanɛ la akanga wa dinginya [wanɛ wahoke Jehowa ngandji] ayokomɛ lo kɔlɔ.” (Tokedi 13:20) Angɛnyi walanga Jehowa ndo wɔtɛmɔla koka kokimanyiya dia wɛ ndjasukanya la nde ndo dia wɛ mbɔsa tɛdikɔ t’amɛna. Koko angɛnyi w’eshika wahoke Jehowa ngandji koka ndjotanganya la nde. Diakɔ diatokeketsha Bible dia nsɔna angɛnyi aso la lomba! Etena kele angɛnyi aso nangaka Nzambi, ndo vɔ ndo sho kondjaka wahɔ. Tekɔ l’akoka wa “[ntetemala] keketshana onto la wonyande ndo mbodiana onto la wonyande.”​—1 Tɛsalɔnika 5:11.

2. Ɔsɔnwɛlɔ ayɛ wayonga la shɛngiya yakɔna le Jehowa?

Jehowa sɔnaka angɛnyi ande la yambalo tshɛ. “Nde ekɔ ɔngɛnyi wa ma ma la anto wosembwe.” (Tokedi 3:32) Ngande wayoyaoka Jehowa naka sho nsɔna angɛnyi wahawoke ngandji? Nde ayonga la lonyangu l’efula! (Adia Jakɔba 4:4.) Lo wedi okina, Jehowa ayɔngɛnangɛna ndo ayotɔsa oko angɛnyi ande, naka sho ntona angɛnyi wa kɔlɔ ndo sho ndjasukanya la nde ndo la wanɛ wolanga.​—Osambo 15:1-4.

NYOMOTSHIMOLA 

3. Onga la yewo diaha nsɔna angɛnyi wa kɔlɔ

Anto wahalange Jehowa ndo ɛlɛmbɛ ande wekɔ angɛnyi wa kɔlɔ. Nyende VIDƐO, ndo oma laasɔ, nyɔkɛtshanya dimbola diayela nɛ:

VIDƐO: Teke woho wa ntona angɛnyi wa kɔlɔ (6:17)

• Ngande wakokaso ntatɛ monga l’angɛnyi wa kɔlɔ aha la sho mbeya?

Nyadia 1 Kɔrɛtɔ 15:33, ndo oma laasɔ, nyɔkɛtshanya ambola anɛ:

• Woho akɔna w’onto wakoka monga ɔngɛnyi wa kɔlɔ le yɛ? Lande na?

Nyadia Osambo 119:63, ndo oma laasɔ, nyɔkɛtshanya dimbola nɛ:

• Kakɔna kayokɛnya ɔnɛ onto kapanda koka monga ɔngɛnyi w’oshika?

4. Anto wotshikitanyi la so koka nkoma angɛnyi aso w’eshika

Bible tɛkɛtaka dia Davidɛ la Jɔnatana, apami ahende wa l’Isariyɛlɛ w’edjedja. Vɔ waki l’ɛnɔnyi ndo la nsɛnɔ yotshikitanyi, koko vɔ waki angɛnyi wa mamba. Nyadia 1 Samuɛlɛ 18:1, ndo oma laasɔ, nyɔkɛtshanya dimbola nɛ:

• Lande na kele angɛnyi aso hawohombe monga paka anto wa lo lɔlɔnga la so kana wanɛ wele la lɔsɛnɔ lele oko la so?

Nyadia Rɔmɔ 1:11, 12, ndo oma laasɔ, nyɔkɛtshanya dimbola nɛ:

• Ngande wakoka angɛnyi woka Jehowa ngandji keketshana lam’asawɔ?

Lo vidɛo yɛnyiso, enda woho wakatane ɔnangɛso ɔmɔtshi l’ɔlɔngɔlɔngɔ angɛnyi l’ahole wakinde konongamɛka. Nyende VIDƐO, ndo oma laasɔ, nyɔkɛtshanya ambola wayela ɔnɛ:

VIDƐO: Wɛ koka nkondja angɛnyi l’ahole wahayalongamɛ (5:06)

• Lo vidɛo yɛnyiso, lande na kakayakiyanyaka ambutshi waki Akil lo dikambo di’angɛnyi ande wa la kalasa?

• Lande na kele l’etatelo, nde akangɛnangɛnaka angɛnyi asɔ?

• Kakɔna kakokimanyiya dia ntondoya diaha nde ndjaoka opoko?

5. Woho wa monga l’angɛnyi w’eshika

VIDƐO: Ɔngɛnyi w’oshika kɛdikɛdi na? (4:14)

Nyadia Tokedi 18:24 ndo 27:17, ndo oma laasɔ, nyɔkɛtshanya ambola anɛ:

• Ngande wakimanyiyana angɛnyi w’eshika lam’asawɔ?

• Onde wɛ ekɔ l’angɛnyi w’eshika wa ngasɔ? Naka bu, ngande wakokayɛ nkondja amɔtshi?

Nyadia Filipɛ 2:4, ndo oma laasɔ, nyɔkɛtshanya dimbola nɛ:

• Dia monga l’angɛnyi w’eshika, wɛ pombaka monga ɔngɛnyi w’oshika. Ngande wakokayɛ nsala dui sɔ?

LO TSHENA PE

Etena kasɔnaso angɛnyi aso la lomba, sho ngɛnyangɛnyaka Jehowa ndo sho ndjakondjiyɛka wahɔ.

Ovuswelo

• Lande na kele ɔsɔnwɛlɔ aso w’angɛnyi wekɔ ohomba efula lo washo wa Jehowa?

• Naa weho w’angɛnyi wahombaso mbewɔ?

• Ngande wakokayɛ nkeketsha lɔngɛnyi lele lam’asayɛ l’anto w’amɛna?

SALA EYANGELO

Enda woho wakoka angɛnyi w’eshika tokimanyiya lo ntena dia wolo.

“Tokeketsha lɔngɛnyi laso la ntondo ka ekomelo ndja” (Tshoto y’Etangelo, Ngɔndɔ ka dikumi l’ɔtɔi 2019)

Enda wanya w’ohomba wakokayɛ ntakola dia monga l’angɛnyi w’eshika.

“Ngande wakokami monga l’angɛnyi w’eshika?” (Les jeunes s’interrogent. Réponses pratiques, volume 1, tshapita 8, lo Falase)

Kakɔna kahombayɛ mbeya lo dikambo di’angɛnyi wa l’Ɛtɛrnɛtɛ?

Onga la yewo lo rɛzo sɔsio 4:12

L’ɔkɔndɔ wata ɔnɛ: “Lakatayangaka dia monga la papa,” enda kɛnɛ kakakonya pami kɛmɔtshi dia nyomɔsɛdingola ɔsɔnwɛlɔ ande w’angɛnyi.

“Bible tshikitanyaka nsɛnɔ y’anto” (Tshoto y’Etangelo, Ngɔndɔ ka nɛi 1, 2012)