WEKELO 51
Ngande wakokayɛ ngɛnyangɛnya Jehowa oma l’ɛtɛkɛta ayɛ?
Etena kakatotonge Jehowa, nde akatosha woshasha ɔmɔtshi wa diambo efula, mbuta ate dikoka dia ntɛkɛta. Onde yoho yakambaso la woshasha ɔsɔ yekɔ ohomba le nde. Eelo, yekɔ ohomba mɛtɛ! (Adia Jakɔba 1:26.) Laasɔ, ngande wakokaso nkamba la dikoka diaso dia ntɛkɛta lo yoho yayɔngɛnyangɛnya Jehowa?
1. Ngande wakokaso nkamba la woshasha w’ɔtɛkɛta?
Bible totɛka ɔnɛ: “Nyotetemale keketshana onto la wonyande ndo mbodiana onto la wonyande.” (1 Tɛsalɔnika 5:11) Onde wɛ kokaka nkanyiya anto amɔtshi wele l’ohomba w’ekeketshelo? Kakɔna kakokayɛ nsala dia mbaakeketsha? Shikikɛwɔ dia wɛ ndjakiyanyaka dikambo diawɔ. Wɛ koka mbatɛ kɛnɛ kangɛnangɛnayɛ le wɔ. Onde wɛ koka nkanyiya divɛsa dimɔtshi diakoka nkeketsha onto ɔmɔtshi leyayɛ? Ekɔ avɛsa efula wakokayɛ nsɔna dimɔtshi oma l’atei awɔ. Ohɔ nto dia, yoho yatayɛ dui dimɔtshi koka nkeketsha anto akina lo yɛdikɔ y’efula oleki ɛtɛkɛta wakamba la yɛ. Laasɔ, tondjaka mbala tshɛ ɛtɛkɛta w’amɛna ndo wa lotutsha.—Tokedi 15:1.
2. Naa weho w’ɛtɛkɛta wahombaso mbewɔ?
Bible mbutaka ɔnɛ: “Ɛtɛkɛta wa kɔlɔ watotombake oma l’enyɔ anyu.” (Adia Ɛfɛsɔ 4:29.) Kɛsɔ nembetshiyaka dia hatohombe nkamba l’ɛtɛkɛta wa kɔlɔ kana ɛtɛkɛta wakoka mpomuya onto. Sho pombaka nto mbewɔ vate vate ya kɔlɔ ndo emamatanya.—Adia Tokedi 16:28.
3. Kakɔna kayotokimanyiya dia ntɛkɛta lo yoho yakeketsha?
Mbala efula, asawo aso mɛnyaka kɛnɛ kele mɛtɛ l’otema kana lo yimba yaso. (Luka 6:45) Laasɔ, sho pombaka ndjaekiya dia mbikaka washo l’akambo wakeketsha, mbuta ate akambo wosembwe, wele pudipudi, wakoka nangema ndo wasungana mandɔma. (Filipɛ 4:8) Dia mbika washo l’akambo asɔ, sho pombaka nsɔna tɔkɛnyɔ ndo angɛnyi aso la lomba tshɛ. (Tokedi 13:20) Vɔ wayotokimanyiya nto dia kanaka yimba la ntondo ka ntɛkɛta. Sɛdingola etombelo wakoka monga l’ɛtɛkɛta ayɛ le anto akina. Bible mbutaka ɔnɛ: “Ɛtɛkɛta w’otondjatondja watohomuyaka oko lokuwa koko lolemi la kanga lomba lekɔ ɛkɔnwɛlɔ.”—Tokedi 12:18.
NYOMOTSHIMOLA
Eka dia tɛkɛtaka lo yoho yangɛnyangɛnya Jehowa ndo yakeketsha anto akina.
4. Lamaka ɛtɛkɛta ayɛ
Lo ntena dimɔtshi, sho tondjaka ɛtɛkɛta wayotonyangaka l’ɔkɔngɔ. (Jakɔba 3:2) Nyadia Ngalatiya 5:22, 23, ndo oma laasɔ, nyɔkɛtshanya ambola anɛ:
Lo waonga asɔ, diakɔna diakokayɛ nɔmba dia diɔ kokimanyiya dia namaka ɛtɛkɛta ayɛ? Ngande wakoka waonga asɔ kokimanyiya?
Nyadia 1 Kɔrɛtɔ 15:33, ndo oma laasɔ, nyɔkɛtshanya dimbola nɛ:
Ɔsɔnwɛlɔ ayɛ w’angɛnyi ndo wa tɔkɛnyɔ koka monga la shɛngiya yakɔna lo yoho yayɛ ya ntɛkɛta?
Kakɔna kakoka monga la shɛngiya lo yoho yayɛ ya ntɛkɛta?
Nyadia Ondaki 3:1, 7, ndo oma laasɔ, nyɔkɛtshanya dimbola nɛ:
Etena kakɔna kakoka monga dui dia lomba ntshikala ki kana nkonga etena koleki dimɛna ka ndjota dui dimɔtshi?
5. Tɛkɛta dimɛna lo dikambo di’anto akina
Ngande wakokaso mbewɔ dia ntɛnga anto akina kana mbatondjɛ ɛtɛkɛta wa kɔlɔ? Nyende VIDƐO, ndo oma laasɔ, nyɔkɛtshanya ambola wayela anɛ:
Lo vidɛo yɛnyiso, lande na kakalange ɔnangɛso ongo ntshikitanya yoho yande ya ntɛkɛta lo dikambo di’anto akina?
Kakɔna kakandasale dia nsala etshikitanu lo dikambo sɔ?
Nyadia Ondaki 7:16, ndo oma laasɔ, nyɔkɛtshanya dimbola diayela nɛ:
Kakɔna kahombaso mbohɔka naka tambohembama dia ntɛkɛta kɔlɔ lo dikambo di’onto ɔmɔtshi?
Nyadia Ondaki 7:21, 22, ndo oma laasɔ, nyɔkɛtshanya dimbola nɛ:
Ngande wakoka avɛsa anɛ kokimanyiya diaha momalaka amboleka etena katɛkɛta onto ɔmɔtshi kɔlɔ lo lokombo layɛ?
6. Tondjaka ɛtɛkɛta w’amɛna etena katɛkɛtayɛ la nkumbo kayɛ
Jehowa nangaka dia sho sawolaka l’ase nkumbo kaso lo yoho ya dimɛna ndo la ngandji. Nyende VIDƐO, ndo oma laasɔ, nyɔkɛtshanya dimbola diayela nɛ:
Kakɔna kayokokimanyiya dia tɛkɛtaka lo yoho ya dimɛna l’ase nkumbo kayɛ?
Nyadia Ɛfɛsɔ 4:31, 32, ndo oma laasɔ, nyɔkɛtshanya dimbola nɛ:
Weho akɔna w’ɛtɛkɛta wakeketsha nkumbo?
Jehowa akɛnya woho wakandayaokaka lo dikambo di’Ɔnande, Yeso. Nyadia Mateo 17:5, ndo oma laasɔ, nyɔkɛtshanya dimbola nɛ:
Ngande wakokayɛ mbokoya Jehowa lo yoho yatɛkɛtayɛ l’ase nkumbo kayɛ?
Yanga waaso wa mandola anto akina
ANTO AMƆTSHI MBUTAKA ƆNƐ: “Kɛnɛ kandjɛ lo yimba mbatɛkɛtami. Hambete oyadi ɛtɛkɛta ami wayonyangiya anto akina.”
Onde wɛ mbetawɔka dikambo sɔ? Lande na?
LO TSHENA PE
Ɛtɛkɛta wekɔ la shɛngiya ya wolo. Sho pombaka nkana yimba dimɛna lo kɛnɛ kalangaso ntɛkɛta, etena kalangaso kitɛkɛta ndo woho walangaso kitɛkɛta.
Ovuswelo
Naa toho tɔmɔtshi takokayɛ nkamba l’ɛtɛkɛta ayɛ dia nkimanyiya anto akina?
Naa weho w’ɛtɛkɛta wahombayɛ mbewɔ?
Kakɔna kakoka tokimanyiya dia tondjaka nshi tshɛ ɛtɛkɛta w’amɛna ndo wakeketsha?
SALA EYANGELO
Kakɔna kakoka tokimanyiya dia nkeketsha anto akina?
Eka kɛnɛ kakoka kokimanyiya dia mbewɔ dia nkamba l’ɛtɛkɛta wa kɔlɔ.
“Onde mbidja onto mananu ekɔ mɛtɛ kɔlɔ?” (Sawo dia l’Ɛtɛrnɛtɛ)
Enda woho wakokayɛ mbewɔ dia nkɔ lo djonga ya vate vate ya kɔlɔ.
Enda woho wakakimanyiya Jehowa pami kɛmɔtshi kakadje welo dia ntshika tondjanɛ ɛtɛkɛta wa kɔlɔ.
“Lakatatɛ nkanyiya yoho ya lɔsɛnɔ yakamahombe nsɛna” (Tshoto y’Etangelo, Ngɔndɔ k’enanɛi 1, 2013)