WEKELO 52
Lande na kele ɔlɔtɔ ndo ɛnamelo kaso kekɔ ohomba?
Sho tshɛ tekɔ la yoho y’ɔlɔtɔ ndo y’ɔlɔngɔswɛlɔ wa divo yalekaso nanga. Naka sho ndjela atɔndɔ amɔtshi wa lo Bible, kete tayɔsɔna kɛnɛ kalangaso ndɔta aha la tɔ nyangiya Jehowa. Nyɛsɔ tɔsɛdingole atɔndɔ amɔtshi l’atei awɔ.
1. Naa atɔndɔ wahomba tɔlɔmbɔla l’ɛsɔnwɛlɔ aso wendana l’ɔlɔtɔ ndo l’ɔlɔngɔswɛlɔ wa divo?
Sho pombaka nsɔna “ɔlɔtɔ wa kɔmba, wele la wɛdimo ndo la yimba y’ɔlɔlɔ,” ndo ntetemala monga la ɛnamelo ka pudipudi kɛnya dia sho ‘mamemaka Nzambi.’ (1 Timɔte 2:9, 10) Tɔsɛdingole atɔndɔ anɛi: 1) Ɔlɔtɔ aso pombaka monga wa “kɔmba.” Oko wakayadiɛnyi lo nsanganya ya l’etshumanelo, ekambi wa Jehowa wekɔ l’ɛlɔtɔ wotshikitanyi, koko yoho yaso ya ndɔta ndo ya nɔngɔsɔla divo mɛnyaka dia sho nɛmiyaka Nzambi katɛmɔlaso. 2) Ndɔta “la wɛdimo” nembetshiyaka dia ɛnamelo kaso hahombe memula nsaki ya demba y’anto akina kana nkotola yambalo y’anto amboleka oya le so. 3) Sho mɛnyaka “yimba y’ɔlɔlɔ” etena kahatokoya yoho y’ɔlɔtɔ kana y’ɔlɔngɔswɛlɔ wa divo yambokokanɛ le anto. 4) Ɛnamelo kaso pombaka mɛnyaka nshi tshɛ dia tekɔ lo “mamema Nzambi,” ndo mɛnya anto akina dia sho tɛmɔlaka Nzambi ka mɛtɛ.—1 Kɔrɛtɔ 10:31.
2. Ngande wakoka ɛnamelo kaso monga la shɛngiya le asekaso ambetawudi?
Kaanga mbeso la lotshungɔ la nsɔna kɛnɛ kahombaso ndɔta, sho pombaka nkanyiya etombelo wakoka monga l’ɛnamelo kaso le anto akina. Sho salaka la wolo aso tshɛ diaha takanya ndooko onto, koko sho ‘ngɛnyangɛnyaka wonyaso onto lo mbosalɛ ɔlɔlɔ ndo lo mbokeketsha.’—Adia Rɔmɔ 15:1, 2.
3. Ngande wakoka ɛnamelo kaso nkotola anto akina oya l’ɔtɛmwɛlɔ wa mɛtɛ?
Kaanga mbasalaso la wolo dia ndɔta la kɔmba lo diaaso tshɛ, sho mbidjaka yimba lo yoho ya laande l’ɔlɔtɔ aso, etena kɔtɔso lo nsanganya ya l’etshumanelo ndo keso l’olimu w’esambishelo. Sho hatekola yimba y’anto oma lo losango laso l’ohomba etena kasawolaso la wɔ. Koko ɛnamelo kaso kokaka nkotola anto akina oya l’akambo wa mɛtɛ ndo “nɛnga wetshelo . . . wa Oshimbedi aso.”—Titɔ 2:10.
NYOMOTSHIMOLA
Tende woho wakokaso ndjashikikɛ dia ɔlɔtɔ ndo ɛnamelo kaso kekɔ kɔmba oko weso Akristo.
Ɛnamelo kaso koka mɛnya dia kana sho nɛmiyaka ewandji w’ana w’anto. Kaanga mbele Jehowa mɛnaka otema aso, ɛnamelo kaso pombaka nkɛnɛmɔla nto dilɛmiɛlɔ diaso otsha le nde
4. Ɛnamelo kaso ka dimɛna mɛnyaka dia sho nɛmiyaka Jehowa
Naa ɔkɔkɔ woleki ohomba watotshutshuya dia ndjakiyanya dikambo di’ɛnamelo kaso? Nyadia Osambo 47:2, ndo oma laasɔ, nyɔkɛtshanya ambola anɛ:
Ngande wele woho weso enyimpala wa Jehowa ekɔ la shɛngiya lo yoho yaso ya ndɔta?
Onde ekɔ dikambo dia lomba sho ndjakiyanya dikambo di’ɛnamelo kaso etena kɔtɔso lo nsanganya ndo keso l’olimu w’esambishelo? Lande na?
5. Woho wa nsala ɛsɔnwɛlɔ w’amɛna lo kɛnɛ kendana l’ɔlɔtɔ ndo l’ɔlɔngɔswɛlɔ wa divo
Oyadi ahɔndɔ aso wekɔ w’eshinga wolo kana bu, vɔ pombaka monga pudipudi ndo kɔmba lo waaso wa shikaa watanemaso. Nyadia 1 Kɔrɛtɔ 10:24 ndo 1 Timɔte 2:9, 10. Ndo oma laasɔ, nyɔkɛtshanya lande na kahombaso mbewɔ dia ndɔta ahɔndɔ wele . . .
bu kɔmba ndo pudipudi.
wasanga demba, watshika tenyi dimɔtshi dia demba l’andja kana wemula nsaki ya dieyanelo.
Kaanga mbele Akristo keema l’ɛse k’Ɛlɛmbɛ wa Mɔsɛ, dui sɔ tosholɛka kanyi ya Jehowa lo dikambo di’ɔlɔtɔ. Nyadia Eohwelo k’Ɛlɛmbɛ 22:5, ndo oma laasɔ, nyɔkɛtshanya dimbola nɛ:
Lande na kahombaso mbewɔ ɔlɔtɔ ndɔ ɔlɔngɔswɛlɔ wa divo wakonya apami dia mɛnama oko wamato ndo wamato mɛnama oko apami?
Nyadia 1 Kɔrɛtɔ 10:32, 33 ndo 1 Joani 2:15, 16, ndo oma laasɔ, nyɔkɛtshanya ambola anɛ:
Lande na kahombaso menda dia kana ɛnamelo kaso nyangiyaka anto amɔtshi wa lo dihole diodjashiso kana wa l’etshumanelo?
Naa toho t’ɛlɔtɔ ndo t’ɔlɔngɔswɛlɔ wa divo tambokokanɛ lo dihole diodjashiyɛ?
Onde wɛ fɔnyaka dia toho tɔmɔtshi l’atei atɔ bu dimɛna le Okristo? Lande na?
Sho koka ndɔta ndo nɔngɔsɔlaka divo lo toho totshikitanyi ndo ntetemala ngɛnyangɛnya Jehowa
ANTO AMƆTSHI MBUTAKA ƆNƐ: “Lekɔ la lotshungɔ la ndɔta kɛnɛ tshɛ kalangami.”
Onde wɛ mbetawɔka dui sɔ? Lande na?
LO TSHENA PE
Etena kasalaso ɛsɔnwɛlɔ w’amɛna lo kɛnɛ kendana l’ɛnamelo kaso, sho mɛnyaka dia sho nɛmiyaka Jehowa ndo anto akina.
Ovuswelo
Lande na kele ɔlɔtɔ ndo ɔlɔngɔswɛlɔ aso wa divo wekɔ ohomba le Jehowa?
Naa atɔndɔ amɔtshi wahomba nɔmbɔla tɛdikɔ taso lo kɛnɛ kendana l’ɛnamelo kaso?
Ngande wakoka ɛnamelo kaso monga la shɛngiya lo yoho yɔsa anto akina ɔtɛmwɛlɔ wa pudipudi?
SALA EYANGELO
Enda kɛnɛ kakoka anto akina nkanyiya lo dikambo diayɛ etena kɛnawɔ ɔlɔtɔ ayɛ.
Enda lande na kele ekɔ dui dia lomba takanyiyisha la ntondo etombelo wayonga la ndjasanga asango lo demba.
“Kakɔna kata Bible lo kɛnɛ kendana la ndjasanga asango lo demba?” (Sawo dia l’Ɛtɛrnɛtɛ)
Tɔsɛdingole atɔndɔ akina wakoka tɔlɔmbɔla l’ɛsɔnwɛlɔ aso.
“Onde yoho yayɛ ya ndɔta tombolaka Nzambi?” (Tshoto y’Etangelo, Ngɔndɔ ka divwa 2016)
Ngande wele mama kɛmɔtshi kakalangaka ngɛnyangɛnya Nzambi, akeke woho wa mbetawɔ yoho yasɔna anto akina dia ndɔta?
“Ɔlɔtɔ ndo ɔlɔngɔswɛlɔ wa divo mbaki otakanya le mi” (Emɔ!, Ngɔndɔ ka dikumi l’ahende 22, 2003)