Sukɛ etshumanelo kanyu

L’andja w’otondo, miliyɔ y’anto yekɔ lo ntɛmɔla Jehowa l’ɔngɛnɔngɛnɔ lo nunu dia tshumanelo. Vɔ wekɔ la lowando lo wetshelo ndo l’ɛlɔmbwɛlɔ kalongolawɔ, ndo vɔ sukɛka etshumanelo la waasaso lo toho efula. Onde ngasɔ mbasukɛyɛ etshumanelo kanyu?

1. Naa toho tɔmɔtshi takokayɛ nkamba la wenya ndo la wolo ayɛ dia nsukɛ etshumanelo?

Sho tshɛ koka mbisha lonya l’elimu wa l’etshumanelo. Ɛnyɛlɔ, onde anto amɔtshi wa l’etshumanelo kanyu waya esombe kana wekɔ la dikɔmɔ? Onde wɛ koka mbakimanyiya dia vɔ ndja lo nsanganya? Kana onde wɛ koka mbakimanyiya lo toho tɔmɔtshi ta shikaa, ɛnyɛlɔ mbakimanyiya la nsomba diangɔ, kana l’elimu wa la ngelo? (Adia Jakɔba 1:27.) Sho koka nto mbisha lonya l’osolelo ndo l’ɔlɔngɔswɛlɔ wa Mbalasa kaso ka Diolelo. Ndooko onto latotshutshuya la wolo dia nkamba elimu ɛsɔ. Ngandji kokaso Nzambi ndo anangɛso totshutshuyaka dia ‘ndjakimɔ la lolango.’​—Osambo 110:3.

Ɛmɛnyi wambobatizama koka nsukɛ etshumanelo lo toho tokina. Anangɛso wele l’akoka wa lo nyuma koka nkamba oko ekambi wakimanyiya, ndo l’ɔkɔngɔ diko oko dikumanyi. Anangɛso l’akadiyɛso mbeyaka nsukɛ olimu w’esambishelo l’ohetoheto tshɛ lo nkamba oko ambatshi mboka. Ɛmɛnyi ɛmɔtshi koka mbisha lonya lo nkimanyiya lo wokelo w’ahole w’ɔtɛmwɛlɔ kana lo monɔ otsha l’etshumanelo kɛmɔtshi kele l’ohomba w’ekimanyielo lo toho tokina.

2. Ngande wakokaso nkamba la diangɔ diaso dia l’emunyi dia nsukɛ etshumanelo?

Sho koka ‘nɛmiya Jehowa la diangɔ diaso dia nɛmɔ.’ (Tokedi 3:9) Le so, ekɔ tshondo ya diɛsɛ dia nkimɔ falanga ndo diangɔ dikina dia nsukɛ etshumanelo ndo olimu w’esambishelo wakambema l’andja w’otondo. (Adia 2 Kɔrɛtɔ 9:7.) Weshasha aso kimanyiyaka nto etena katomba mpokoso. Anto efula “mombaka yangɔ mɔtshi” mbala la mbala oko woshasha. (Adia 1 Kɔrɛtɔ 16:2.) Sho koka nkimɔ woshasha lo nkamba la tɔshɛtɛshɛtɛ ta weshasha takitshama l’ahole aso w’ɔtɛmwɛlɔ kana lo tshimbo ya sitɛ kaso k’Ɛtɛrnɛtɛ ka donate.jw.org. Jehowa toshaka diaaso dia mɛnya ngandji kawokaso oma lo yoho yasɔnaso dia nkamba la diangɔ diaso dia l’emunyi.

NYOMOTSHIMOLA

3. Sho koka nkamba la diangɔ diaso dia l’emunyi

Jehowa nangaka ɔnɛ lakimɔ l’ɔngɛnɔngɛnɔ, ndo Yeso nde lawɔ. Ɛnyɛlɔ, Yeso akandola wadi aki odo ɔmɔtshi lo welo wakandadje dia nkimɔ woshasha ɔmɔtshi. Nyadia Luka 21:1-4, ndo oma laasɔ, nyɔkɛtshanya ambola anɛ:

• Onde dia ngɛnyangɛnya Jehowa paka sho mbokimwe woshasha wa woke?

• Ngande wayaoka Jehowa nde la Yeso etena kakimɔso woshasha wa l’otema ɔtɔi?

Dia mbeya woho wakambaso la weshasha aso, nyende VIDƐO. Ndo oma laasɔ, nyɔkɛtshanya dimbola diayela nɛ:

VIDƐO: ‘Woshasha le Jehowa’ (4:47)

• Ngande wakambaso la weshasha aso lo wahɔ wa tshumanelo dia l’andja w’otondo?

4. Sho koka ndjakimɔ la lolango

Lo nshi yakafundamaka Bible, atɛmɔdi wa Jehowa wakakambaka l’ohetoheto tshɛ dia nkokɛ ahole awɔ w’ɔtɛmwɛlɔ. Koko dui sɔ diakendanaka l’awui efula, koko aha tsho kimɔ falanga. Nyadia 2 Ɛkɔndɔ 34:9-11, ndo oma laasɔ, nyɔkɛtshanya dimbola nɛ:

• Ngande wakasha ose Isariyɛlɛ tshɛ ekimanyielo dia nkokɛ luudu la Jehowa, kana dihole di’ɔtɛmwɛlɔ?

Dia mɛna woho wayela Ɛmɛnyi wa Jehowa ɛnyɛlɔ ka lo nshi y’edjedja kɛsɔ, nyende VIDƐO. Ndo oma laasɔ, nyɔkɛtshanya ambola wayela anɛ:

VIDƐO: Tɔlɔngɔsɔlake ahole aso w’ɔtɛmwɛlɔ (3:31)

• Lande na kele ekɔ ohomba namaka Mbalasa kaso ka Diolelo pudipudi ndo kɔmba?

• Naa toho tɔmɔtshi takokayɛ mbisha ekimanyielo?

5. Anangɛso koka nkotsha kɛnɛ kalɔmbama dia mɛmba ɛkɛndɛ efula

Afundelo keketshaka Akristo w’apami dia nkotsha kɛnɛ kalɔmbama dia vɔ nsala kɛnɛ tshɛ kakokawɔ nsala dia nsukɛ etshumanelo. Dia mɛna ɛnyɛlɔ kɛmɔtshi, nyende VIDƐO. Ndo oma laasɔ, nyokadimole lo dimbola diayela nɛ:

VIDƐO: Anangɛso le​—Nyokotsha kɛnɛ kalɔmbama dia nkamba olimu w’ɔlɔlɔ (5:19)

• Lo vidɛo yɛnyiso, ngande wakakotsha Ryan kɛnɛ kalɔmbama dia nsukɛ etshumanelo lo yɛdikɔ y’efula?

Bible nembetshiyaka awui wahomba nkotsha anangɛso wakamba oko ekambi wakimanyiya ndo oko dikumanyi. Nyadia 1 Timɔte 3:1-13, ndo oma laasɔ, nyɔkɛtshanya ambola anɛ:

• Kakɔna kalongamɛwɔ le anangɛso wakotsha kɛnɛ kalɔmbama dia nkamba oko ekambi wakimanyiya ndo oko dikumanyi?

• Kakɔna kalongamɛwɔ le nkumbo yawɔ?​—Enda divɛsa 4 ndo 11.

• Etena kasala anangɛso la wolo dia nkotsha awui walɔmbama asɔ, ngande wakondja ose etshumanelo tshɛ wahɔ?

LO TSHENA PE

Jehowa ngɛnangɛnaka efula welo wadjaso dia nsukɛ etshumanelo, la wenya aso, la wolo aso ndo la diangɔ diaso dia l’emunyi.

Ovuswelo

• Ngande wakokaso nkamba la wenya ndo la wolo aso dia nsukɛ etshumanelo?

• Ngande wakokaso nkamba la diangɔ diaso dia l’emunyi dia nsukɛ etshumanelo?

• Lo toho takɔna takombolayɛ nsukɛ etshumanelo?

SALA EYANGELO

Enda lande na kele Nzambi hayohika atɛmɔdi ande dia nkimɔ etenyi ka dikumi.

“Kakɔna kata Bible lo dikambo dia etenyi ka dikumi?” (Sawo dia l’Ɛtɛrnɛtɛ)

Bible mbishaka apami wambobatizama ɛkɛndɛ ɛmɔtshi. Kakɔna kakoka wamato wambobatizama nsala dia nkimanyiya wanɛ wele lʼɛkɛndɛ ɛsɔ?

“Lowandji lele la dikumanyi letshumanelo” (Tshoto y’Etangelo, Ngɔndɔ ka hende 2021)

Sawola l’Ɛmɛnyi ɛmɔtshi wele la dihonga wayahondja akambo efula dia mɛmbɛ asekawɔ atɛmɔdi ekanda.

Okahanyelo w’ekanda lo Congo (4:25)

Yanga dia mbeya nganɛ wele woho wasukamɛ olimu aso la falanga ntshikitana efula la yoho yasukamɛ atshunda akina w’ɛtɛmwɛlɔ.

“Oma lende aya falanga yakamba l’Ɛmɛnyi wa Jehowa olimu awɔ w’esambishelo?” (Sawo dia l’Ɛtɛrnɛtɛ)