WOHO WA NTATƐ SAWO L’ONTO
WEKELO 3
Tɛkɛta ndo sala akambo la ɔlɔlɔ tshɛ
Tɔndɔ: “Ngandji ekɔ . . . ɔlɔlɔ.”—1 Kɔr. 13:4.
Kɛnɛ kakasale Yeso
1. Enda VIDƐO kana adia Joani 9:1-7. Oma laasɔ kana yimba lo ambola wayela anɛ:
Kakɔna kakasale Yeso ntondo: Nkɔnɔla pami kakotɔ tshungu kana mbosambisha lokumu l’ɔlɔlɔ?—Enda Joani 9:35-38.
Lande na kele woho wakatatɛ Yeso akakonya dia pami kɛsɔ mbohokamɛ?
Wetshelo akɔna wakondjaso oma le Yeso?
2. Onto ayoleka monga suke dia mpokamɛ losango laso naka nde mɛnaka dia tekɔ lo ndjakiyanya lo dikambo diande.
Okoya Yeso
3. Oka onto kandji. Yanga dia mbeya woho wayaokande.
Yambola ɔnɛ: ‘Kakɔna kayakiyanyande? Kakɔna kayowokimanyiya ndo kayondɔngɛnangɛna?’ Nsala ngasɔ, ayokokimanyiya dia mbooka kɛtshi k’oma k’ɛse otema.
Ɛnya dia wɛ ndjashaka lo kɛnɛ kele ohomba le onto lo mbohokamɛ. Naka nde ambokotɛ woho wayaokande lo dui dimɔtshi kana okakatanu wele lande, tengesolake sawo lo dui dikina.
4. Tɛkɛta la ngandji ndo la dilɛmiɛlɔ. Naka wɛ ekɔ lo mboka onto kɛtshi ndo nangaka mbokimanyiya kete dui sɔ diayokɛma oma l’ɛtɛkɛta ayɛ. Sɔna ɛtɛkɛta ndo dja yimba lo wondjo wa dui wakamba la yɛ. Totondjake ɛtɛkɛta wakoka nyangiya onto.
5. Sha ekimanyielo. Yanga waaso wakokayɛ nkimanyiya onto lo toho ta shikaa. Salɛ onto ɔlɔlɔ koka mbokonya dia mbetawɔ losango laso.