MBETƐ ANTO AMBEKI
WEKELO 12
Onga la dihonga
Tɔndɔ: “Esɔ la malashi w’opumu ngɛnyangɛnyaka otema; ngasɔ mbele ɔngɛnyi wakosha dako dia l’otema ɔtɔi.”—Tok. 27:9.
Kɛnɛ kakasale Yeso
1. Enda VIDƐO kana adia Makɔ 10:17-22. Oma laasɔ, kana yimba lo ambola wayela anɛ:
Naa waonga w’amɛna wakɛnyi Yeso le owandji w’ɔlɔngɔlɔngɔ ɔsɔ?
Lande na kakahombe Yeso monga la ngandji ndo la dihonga dia mbisha pami kɛsɔ dako?
Wetshelo akɔna wakondjaso oma le Yeso?
2. Sho pombaka sawolaka l’ambeki aso la ngandji tshɛ, koko mbahonolɛ awui hwe dia vɔ mpama lo nyuma.
Okoya Yeso
3. Kimanyiya ombeki ayɛ dia ndjadjɛ ndo nkotsha eyango.
Kamba l’etenyi ka “Oyango” kele lo wekelo tshɛ wa dibuku Ngɛnangɛnaka la lɔsɛnɔ pondjo pondjo!
Kimanyiya ombeki dia mbeya kɛnɛ kahombande nsala dia ndjadjɛ eyango wa nshi nyɛ ndo wa lo nshi yayaye.
Andolakande mbala la mbala l’ehamelo watandasale.
4. Eya kɛnɛ kooshimba dia mpama ndo kimanyiyande dia ntondoya okakatanu akɔ.
Yambola ɔnɛ:
‘Naka ombeki hahame polo lo batisimu, kakɔna kawodjɛ wekamu?’
‘Akokami nsala dia mbokimanyiya?’
Lɔmba dia monga la dihonga dia nsawola l’ombeki ayɛ la ngandji, koko mbohonolɛ hwe kɛnɛ kahombande nsala.
5. Totetemalake mbeka l’onto lahahame.
Yashikikɛ dia kana ombeki ayɛ wa Bible ekɔ lo tahame lo ndjambola ɔnɛ:
‘Onde ombeki ami ekɔ lo nkamba la kɛnɛ kekande?’
‘Onde nde ekɔ lo mbɔtɔ nsanganya ya l’etshumanelo ndo ekɔ lo mbewoya anto akina kɛnɛ kekande?’
‘L’ɔkɔngɔ wa mbeka l’etena kɛmɔtshi, onde nde nangaka nkoma Ɔmɛnyi wa Jehowa?’
Naka ombeki wa Bible halange mpama:
Mbolande dia nde kotɛ kɛnɛ koshimba dia mpama.
La ngandji tshɛ, lembetshiyande lande na kayangayɛ memɛ wekelo.
Tɛnde ehamelo wahombande nsala la ntondo ka nyu ndjokalolɛ nto wekelo.