Olamake Kɔlamelo Yayɛ dia Wɛ Monga la Lɔsɛnɔ!
“OSEKE [Nzambi, NW], ku we ayuvo.” Lohoso la periodikɛ kaso lekɔ lo mɛnya wadi a Jɔbɔ lakɔ̂hɛnyahɛnyaka l’ɛtɛkɛta ɛsɔ. Dikambo sɔ diambeta oko yɛdikɔ y’ɛnɔnyi 3 600. Koko, ɔsɔmbwɛlɔ ɔsɔ wa l’ɛtɛkɛta wakawasɔmbwɛ okambi a Nzambi wa kɔlamelo kɛnɛmɔlaka dimbola diatokomɛ anto tshɛ polo ndo lo nshi nyɛ. Jɔbɔ, kanga kɔlamelo, akashisha diangɔ dia mamba—dongalonga diande, luudu lande, ndo an’ande dikumi. Kakianɛ, demba diande diaki lo sɔkishama la hemɔ kɛmɔtshi ka wolo efula, dikambo sɔ diakahembe Jɔbɔ polo ndo l’ekomelo ka kɛnɛ kakandakokaka mbikikɛ. L’ɔkɔkɔ akɔna na? Otunyi a woke waki Nzambi l’anto, Satana Diabolo, akalangaka mɛnya ɔnɛ anto hawokoke tshikala la kɔlamelo le Nzambi naka vɔ mbidjama l’ehemba a wolo.—Jobo 1:11, 12; 2:4, 5, 9, 10.
Ɛlɔ kɛnɛ, oko waki lo nshi ya Jɔbɔ, “andja w’otondo wekɔ la tshina dia lowandji laki kanga kɔlɔ,” Satana Diabolo. (1 Joani 5:19, NW) Mɛtɛ, dikambo sɔ diamboleka mɛnama lo nshi yaso nyɛ, nɛ dia “[ɔnɛ lelɛwɔ Diabolo ndo Satana, NW], ukeshi a wa la kete tshe,” akakadjema oma l’olongo oya la kɛtɛ. (Enyelo 12:9) Diɔ diakɔ diɛnaso fɔnu ya weke yahɛnyahɛnya anto wa lo kɛtɛ k’otondo lo nshi nyɛ. Ta dia Ntondo di’Andja w’Otondo, diakatombe lo 1914 diakadihola “etatelu k’asui” watatetemala polo ndo l’eleko kɛnɛ ka 20.—Mateu 24:7, 8.
L’atei w’andja ɔnɛ wa ngala ndo wambofukutana, onde ndoko lushi lakayaoke ɔnɛ wɛ ambokoma l’ekomelo ka kɛnɛ kakoka onto mbikikɛ oka? Onde wɛ atayambolaka ndoko lushi wate: ‘Lɔsɛnɔ lekɔ l’oyango ɔmɔtshi oka?’ Ondo Jɔbɔ akayaokaka ngasɔ, koko, kânga mbakandasale munga mɔtshi, nde koshisha mbetawɔ kande le Nzambi. Nde akɛnya eshikikelo kande oma l’ɛtɛkɛta ɛnɛ: “Edja ndu lam’ayumukitshiya, dimi halunya akambu ami w’usimbwi uma le mi.” Nde aki l’eshikikelo k’ɔnɛ Nzambi ‘ayeya kɔlamelo yande.’—Jobo 27:5; 31:6.
Ndo Yeso Kristo, Ɔna Nzambi hita, akahombe tetemala mbikikɛ ehemba lam’akinde lanɛ la kɛtɛ. Satana akahembe Yeso lo weoho wotshikitanyi. Ɛnyɛlɔ, lam’akandohembaka lo dikona, nde akakambe olimu l’ehomba ande wa l’emunyi ko akahembe dia manganya Yeso la Dui dia Nzambi. (Mateu 4:1-11) Nde akahɛnyahɛnya Yeso lam’akandatshutshuya afundji l’Afarise, anto wa kashi, kâmɛ l’anto wakakesamaka oma le wɔ dia vɔ pɛnyahɛnya Yeso, mbohindɛ enongo ndo mbɔtɔ sheke ya nyɔi kande. (Luka 5:21; Joani 5:16-18; 10:36-39; 11:57) Vɔ wakasalɛ Yeso kɔlɔ koleki kɛnɛ kakahomɔ Jɔbɔ oma le angɛnyi ande asato wa kashi wakaye dia ndjôsamba.—Jobo 16:2; 19:1, 2.
Lam’akinde l’ekambɔ ka Ngɛtɛsɛmanɛ, l’etena kakasukana kondoko y’ohemba ande, Yeso akatɛ ambeki ande ate: “[anima ami wambolengalenga polo ndo lo nyɔi, NW].” Ko, “ndi akayakosha ekhukhumadi la kete. Ndi akalombe ati: Papa, naka nkukaka, dikoho ne diamumweli. Keli aha uku alangami, paka uku alangaye.” L’ɔkɔngɔ diko, l’otamba w’asui, nde akakotsha ɛtɛkɛta wa pɔlɔfɛsi wakatama l’Osambu 22:1 lam’akandahangɔhangɔ la dui dia wolo ate: “[Nzambi kami, Nzambi kami, NW], ukundi ansekaye na?” Mɛtɛ, l’ɔtɛ wa kɔlamelo yande ya kokele, Nzambi kombɔsɛka, koko akokitsha oko ɛnyɛlɔ le Akristo tshɛ wa mɛtɛ. Jehowa akafute kɔlamelo ya Yeso lam’akandawolola ndo lam’akandawudiya lo dihole dia lâdiko dia l’olongo. (Mateu 26:38, 39; 27:46; Etsha 2:32-36; 5:30; 1 Petero 2:21) Nzambi ayofuta wanɛ tshɛ wɛnya kɔlamelo ya ngasɔ otsha le nde.
Kɔlamelo ya Yeso kombisha paka okadimwelo wa pondjo oto lo tɔfwɛfwɛ taki Satana, koko olambo wa lɔsɛnɔ lande l’onto la kokele wakakimɔ tshungo, oma lo tshungo diakɔ mbakoka anto wa kɔlamelo kondja lɔsɛnɔ la pondjo. (Mateu 20:28) Yeso akatatɛ la tshumanya “limba la tshitshe l’ekoko,” lemba l’akitami, wanɛ wahomba ndjâla ekitɔ kâmɛ lande lo Diolelo dia l’elongo. (Luka 12:32) L’ɔkɔngɔ w’akambo asɔ, nde akatatɛ la tshumanya “ului a wuki” wayoyohanda lo “pa ka wuki” dia vɔ ndjokondja lɔsɛnɔ la pondjo lo kɛtɛ kayɔlɔmbwama oma lo Diolelo dia Nzambi.—Enyelo 7:9, 14-17.
Jɔbɔ, kanga kɔlamelo, ayoyala l’atei a miliyara y’anto wakavu wayolɔ dia ndjoyala atɔi amɔtshi wa lo tshunda dia wɔladi, kana “kete k’uyuyu.” (2 Petero 3:13; Joani 5:28, 29) Oko wadiɛnya lohoso l’ekomelo la periodikɛ kɛnɛ, Jɔbɔ akalongola difuto oma lo kɔlamelo yande l’etena ‘kakatshɔkɔla Jehowa ekomelo kande oleki etatelo kande.’ Nde akakondja wolo wa lo nyuma, ndo akayala oko onto ‘laki kosala pɛkato l’ɛlɔmɔ ande.’ Nzambi akatalola lɔsɛnɔ lande lo mbokotshɛ ɛnɔnyi 140. Lo kɛnɛ k’endana la diangɔ dia l’emunyi, nde akasha Jɔbɔ diangɔ dioleki nɛ diaki lande ntondo mbala hiende, ndo Jɔbɔ “akayuta ntu ana apami esambeli, la ana amantu asatu,” ana wa amato akɔ asɔ wakaleke amɛna lo kɛtɛ k’otondo. (Jobo 2:10; 42:12-17) Koko, ɔngɔnyi ɔsɔ tshɛ wakɛnyaka ɛtshɔkɔ wayokondja anto wa kɔlamelo lo Paradiso ka lo “kete k’uyuyu.” Ndo wɛ lawɔ kokaka kondja ɔngɛnɔngɛnɔ akɔ oko walembetshiya akatshi wayela!
[Picture on page 4]
Yeso ekɔ ɛnyɛlɔ ka kokele k’onto la kɔlamelo