Ɛkɔndɔ W’apandjudi a Diolelo

Jehowa Ndeka Atunyi Ande Wolo

DIABOLO nde l’ɛdiɛngɛ ande wokoyangaka nshi tshɛ dia mbekɛ wekamu la ntondo k’esambishelo ka lokumu l’ɔlɔlɔ oma l’ekimanyielo k’ɛtɛmwɛlɔ wa kashi la k’ɔtɛmwɛlɔ w’ɛdiɛngɛ. Bible kɛnɛmɔlaka tokanyi taki Diabolo lo 2 Koreto 4:4 ɔnkɔnɛ: “[Nzambi ka dikongɛ di’akambo nɛ, NW] ambete waku wahetawo uku tutshungu lu tukanyi tawo, ne dia usasi a lukumu l’ololo la lutumbu la Kristu, leli efanelu ka [Nzambi, NW] tawahetelaki.”

Koko Jehowa ndeka Satana wolo. Ndoko kɛnɛ kakoka atunyi wa Jehowa sala dia memadja ekotshamelo ka lolango la Nzambi lele dia “antu tshe nshimbamela ndu nkuma lu [ewo k’oshika ka mɛtɛ, NW].” (1 Timote 2:⁠4) Kɛsɔ mbɛnya ɛkɔndɔ wa mɛtɛ wayela ɛnɛ, ɛkɔndɔ wɔkɔndwami oma le apandjudi wa Diolelo wa l’Australie.

◻ Omoto ɔmɔtshi lakoke ɔtɛmwɛlɔ ɔkɔngɔ l’edja k’ɛnɔnyi 20 akayotatɛka la mbala Bible nto. Woho wakandayoyashaka nto lo Bible akayowelaka wembola efula, ko nde akayomɛka la nɔmba Nzambi dia kondja ekimanyielo dia nde tana ekadimwelo lo wembola akɔ. Nde akakombolaka mbishola mɛtɛ koko nde akeyaka ate nde hokitana naka nde kalola l’ɔtɛmwɛlɔ ande w’edjedja. Ɔnkɔnɛ, nde akatatɛ la nyanga mɛtɛ lam’akandɔtɔ lo butikɛ ɔmɔtshi wasondjawɔ abuku wa l’anya, ko nde akambola kanga butikɛ akɔ kana abuku watɛkɛta akambo w’ɔtɛmwɛlɔ wekɔ.

Kanga butikɛ akohɔ dia nde ekɔ la dibuku diatɛkɛta akambo w’ɔtɛmwɛlɔ la ngelo koko aha lo butikɛ. Ɔtɛ wa dibuku diakɔ aki Vous pouvez vivre éternellement sur une terre qui deviendra un paradis, dibuku diakatombe oma le Ɛmɛnyi wa Jehowa. Omoto akɔ akale dibuku diakɔ l’osalosalo tshɛ ko akakondja ekadimwelo lo wembola efula wakandayambolaka lo dikambo dia Bible. Nde akayange Ɛmɛnyi wa Jehowa l’ekimanyielo ka dibuku diele la numɛlɔ ya telefɔnɛ, nde akɔtɔnɛ lawɔ ko akatatɛ la mbeka Bible mbala la mbala.

◻ Osekaseka ɔmɔtshi akate lo jurunalɛ yatomba lo ngelo kawɔ ɔnɛ: nde ekɔ la mpako ka sondja. Diewoyelo diande diakashikikɛka ɔnɛ: ‘mpako k’ashidi ka wolo efula mbetɔ.’ Ɔmɛnyi wa Jehowa ɔmɔtshi a omoto akɛnyi diewoyelo diakɔ. Nde akɔshi tɛdikɔ dia tɛkɛta l’osekaseka akɔ lo telefɔnɛ dia mbolembetshiya ele kiɔkɔ ya wolo wakandasɛmaka waki la mpako kakɔ. L’ɔkɔngɔ diko, wakasawola dia kɛnɛ kata Bible lo dikambo di’elimu w’ɛdiɛngɛ. Osekaseka akɔ waki la mpako akawotɛ ate: lui kakete nde akalɔmbaka Nzambi dia mbokimanyiya woho wa nde kandola ekakatanu wakoyɛka oma le ɛdiɛngɛ. Opandjudi akɔ a omoto akɔsɛ tɛdikɔ dia sawola lande mbala kekina nto lo telefɔnɛ.

Lam’akandawelɛ, osekaseka akɔ komonga lakawɔ. Nyango akôkadimola lo telefɔnɛ ate: “Dimi haleye kɛnɛ kakayatɛ ɔn’ami la omoto, koko dihindo dia mamba diambotshama!” Nde akawolembetshiya ate: l’ɔkɔngɔ a vɔ tɛkɛta mbala ka ntondo lo telefɔnɛ, ɔn’ande la omoto akakasha pingu yande ndo abuku ande w’ɔtɛmwɛlɔ wa Satana ko nde akatatɛ la mbala Bible.

Kem’edja, tɛdikɔ takɔsama di’onto ɔmɔtshi ayowembolake. Aha la tshimbatshimba, nde aketawɔ dia mbeka Bible l’Ɛmɛnyi wa Jehowa. Ndo nto, nde akatatɛ la sangana l’Ɛmɛnyi lo sanganya yawɔ y’Akristo. Lo ndjela akambo asɔ nto, Jehowa akadje ɛdiɛngɛ otshumba lo ngamula osase wa ewo k’oshika ka mɛtɛ ya lo Bible.