Eolwelo k’anto w’ɔlɔlɔ kayoyala
“Dimi lambulungamela [Nzambi, “NW”], . . . Eulwelu k’antu w’ololo la antu wa kolo uma lu nyoi kayuyala.”—ETSHA 24:15.
1. Dikambo diakɔna diatokomɛ anto tshɛ tatɛ oma lam’akakɔ Adama l’Eva na?
“KENE tshe kayena lunya laye dia ntsha, kukitshi la wulu aye; ne dia nduku ulimu kuyanga kanyi, ewu kuyanga yimba, yeli lu Dihuli di’Edu, lene atayatshu.” (Undaki 9:10) Oma lo yema y’ɛtɛkɛta ɛsɔ wɔsɔnwami l’ɔlɔlɔ tshɛ, Sɔlɔmɔna, nkumekanga ka lomba, ekɔ lo kɔndɔla dikambo diatokomɛ nɔnga tshɛ y’anto tatɛ oma l’ɔkwɛlɔ w’ambutshi aso wa ntondo, Adama l’Eva. Onto tshɛ pombaka mvɔ aha ndoko l’otshikitanu—oyadi kanga ɔngɔnyi kana ose wola, nkumekanga kana onto k’onto, ombetawudi kana opanganu. Mɛtɛ, nyɔi “akolɛ oko nkumekanga.”—Romo 5:17, NW.
2. Lande na kakakoke anto amɔtshi wa kɔlamelo monga la lonyangu l’etena kɛnɛ k’ekomelo na?
2 Koyanga mbambohama akambo w’enganga nshi hiende nyɛ, nyɔi akatatetemala la mbolɛ oko nkumekanga polo ndo ɛlɔ kɛnɛ. Kânga mbele ɔsɔ kema dikambo dia mamba, ondo amɔtshi wakanyange yema lam’akawayotokomɛ otunyi ɔsɔ w’edjedja. Lande na? Nɛ dia, l’ɔkɔngɔ w’ɛnɔnyi 1920, la Société Watch Tower akahandjola losango l’ɔnɛ: “Miliyɔ y’anto yele la lɔsɛnɔ etena kɛnɛ hawovɔkaki.” Wa na wakahombe monga miliyɔ y’anto shɔ na? Ele “ekoko” wakatɛkɛta Yeso lo wɛla w’endana l’ɛkɔkɔ la mbudi. (Mateu 25:31-46) Nde akate di’anto asɔ wɔfɔnyi l’ɛkɔkɔ wayoyala l’edja k’etena k’ekomelo, ndo wayoyala l’elongamelo ka monga la lɔsɛnɔ la pondjo lo paradiso ka la kɛtɛ. L’edjedja ka wonya, anto wa Nzambi wakaleke shihodia dihole diele l’“ekoko” ɛsɔ l’asangwelo waki Jehowa. Wakayohotɔka ɔnɛ: anto asɔ wele l’okitanyiya wakahombe kakitolama la “mbudi” ya lohokotui, ndo l’ɔkɔngɔ w’elanyelo ka mbudi yakɔ, ɛkɔkɔ wayokita kɛtɛ kakalɔngɔswama lo dikambo diawɔ oma le Diolelo.
Otshumanyelo w’Anto Wɔfɔnyi l’Ɛkɔkɔ
3. Lo lotumu lakɔna lakayasha anto wa Nzambi tatɛ oma l’ɔnɔnyi 1935 na?
3 Tatɛ oma l’ɔnɔnyi 1935, “ɔhɔmbɔ wa kɔlamelo” akayatshutshuya dia tana anto wa ngasɔ wɔfɔnyi l’ɛkɔkɔ ndo mbaɔtshiya l’ɔlɔngɔswamelo waki Jehowa. (Mateu 24:45, NW; Joani 10:16) Akristo asɔ wele la saki ka ndakanyema wakayeyaka ɔnɛ: Yeso akatatɛ la mbolɛ lo Diolelo diaki Jehowa dia l’olongo ndo ekomelo ka dikongɛ di’akambo wa kɔlɔ nɛ kaya ka suke kâmɛ ndo oyelo w’andja w’oyoyo, lɛnɛ ahomba losembwe ndjâla. (2 Petero 3:13; Enyelo 12:10) L’andja w’oyoyo ɔsɔ mbayokotshama ɛtɛkɛta ɛnɛ w’ekeketshelo waki Isaya: “Nde ayonya nyɔi pondjo pondjo.”—Isaya 25:8, NW.
4. Kânga mbakawalongamɛka l’otema ɔtɔi dia mɛna oyindjamelo wa lowandji laki Jehowa l’Aramagɛdɔ, kakɔna kakakomɛ efula ka l’atei w’ɛkɔkɔ ekina na?
4 Lam’ele ekomelo k’andja waki Satana kaya ka suke, Akristo wɔfɔnyi l’ɛkɔkɔ kombolaka efula dia monga la lɔsɛnɔ polo ndo lam’ayoyindjama lowandji la Jehowa l’etena ka fɔnu kayaye le Babilɔna ka Woke ndo le tenyi dikina di’andja waki Satana. (Enyelo 19:1-3, 19-21) Le anto efula, akambo kombeta oko woho wakawalongamɛka. Efula ka wanɛ wakalongamɛka dia ndjâla l’atei wa “miliyɔ y’anto” wahavɔkaki, wakayovɔka mɛtɛ. Amɔtshi wakadiakema, l’ɔkɔkɔ wa mɛtɛ, lo kanu ndo lo pango ya kanu ya wolo kana l’anya w’ase ɛtɛmwɛlɔ a lohehe. Akina wakavu lo wâle ɛmɔtshi kana lo nyɔi kokovɔka anto tshɛ—mbuta ate nyɔi k’oma lo hemɔ kana oma lo lotshundu. (Osambu 90:9, 10; Ondaki 9:11) Aha la tamu, akina wayovɔ la ntondo k’ekomelo ndja. Ko woho akɔna wayowɛna ekotshamelo ka daka di’andja w’oyoyo lɛnɛ ahomba losembwe ndjâla na?
Elongamelo k’Eolwelo
5, 6. Naa nshi yayaye yambowolamɛ wanɛ wele l’elongamelo ka la kɛtɛ, wanɛ wavɔ la ntondo k’Armagɛdɔ na?
5 Ɔpɔstɔlɔ Paulo akasha okadimwelo lam’akandatɛkɛtaka la ntondo ka Felika, ɔnɔmbɔdi w’ase Rɔmɔ. Oko wofundamidiɔ l’Etsha 24:15, Paulo akate la dihonga ate: “Dimi lambulungamela [Nzambi, NW], . . . Eulwelu k’antu w’ololo la antu wa kolo uma lu nyoi kayuyala.” Elongamelo k’eolwelo tokeketshaka la ntondo k’ekakatanu a wolo efula. Oma l’elongamelo kɛsɔ mbele anangɛso l’akadiyɛso wa ngandji wandama la hemɔ ndo watokaka ɔnɛ vɔ waya suke la mvɔ, hawotɔkɔmɔka ɔtɛkɔya. Oyadi kakɔna tshɛ kakoka tomba, vɔ mbeyaka dia vɔ wayolongola difuto dia kɔlamelo yawɔ. Oma l’elongamelo k’eolwelo, anangɛso l’akadiyɛso wele la dihonga, watotokomɛka nyɔi l’anya w’asoyanyi, mbeyaka ɔnɛ: asoyanyi akɔ hawokoke mbadja otshumba. (Mateu 10:28) Etena katovɔka onto ɔmɔtshi l’atei w’etshumanelo, sho tatoyalaka la lonyangu efula nɛ dia tambôshisha. Koko l’etena kakɔ kâmɛ, naka nde ekɔ ɔtɔi ɔmɔtshi a l’atei w’ɛkɔkɔ ekina, kete sho tatɔngɛnangɛnaka nɛ dia onyaso ombetawudi akɛnya kɔlamelo yande polo ndo l’ekomelo ndo ekɔ lo mumuya ɛlɔ kɛnɛ, ele ndo l’eshikikelo ka mbɔtɔ l’andja waki Nzambi w’oyoyo lo nshi yayaye.—1 Tesalonika 4:13.
6 Eelo, elongamelo k’eolwelo kekɔ djembetelo y’ohomba lo mbetawɔ kaso. Ko lande na kakeketala mbetawɔ kaso lo eolwelo ngasɔ, ndo wa na wele l’elongamelo kɛsɔ ndo vɔ lawɔ na?
7. Eolwelo kɛdikɛdi na, ndo naa avɛsa amɔtshi washikikɛ dikambo diakɔ sɔ na?
7 Tshɛkɛta ya lo Grɛkɛ yokadimwami ɔnɛ “eolwelo” ko a·naʹsta·sis, tshɛkɛta shɔ nembetshiyaka “wemalelo.” Yɔ ndekaka tɛkɛta dikambo dia mbetɔ oma l’edo. Tolembete dia tshɛkɛta “eolwelo” hayotanema l’Afundelo wa lo Heberu, koko elongamelo ka eolwelo kakɛnyama hwe lɔkɔ. Ɛnyɛlɔ, sho mɛnaka dikambo diakɔ l’ɛtɛkɛta wakate Jɔbɔ lam’akinde l’atei w’asui ate: “Utuyetawo mbishemi lu Dihuli di’Edu, . . . Utuyetawo nshikike etena ka we mbuhomi li!” (Jobo 14:13) Woho akɔ wâmɛ mbâlaso lo Hosea 13:14 ɔnɛ: “Undi, dimi layâtshungula, Uma lu wulu w’udimu a Pengandu? Dimi layâshimbela uma le Nyoi? We Nyoi, lend’eli asui aye? Udimu a Pengandu, elanyelu kaye eto?” Lo 1 Koreto 15:55, ɔpɔstɔlɔ Paulo akavusola ɛtɛkɛta ɛsɔ dia mɛnya ɔnɛ otshumba wakalakema dia nyɔi mbidjama wayokotshama oma lo tshimbo y’eolwelo. (Mɛtɛ, lo divɛsa sɔ Paulo aki lo tɛkɛta dikambo di’eolwelo k’otsha l’olongo.)
Ambetawudi ‘Wambetama Akanga a Losembwe’
8, 9. (a) Woho akɔna wakoka anto wele kema kokele mbolɔ l’eolwelo k’anto w’ɔlɔlɔ na? (b) Oma lo dikambo diakɔna dieso l’elongamelo ka kondja lɔsɛnɔ lele nyɔi halikumiyaki na?
8 L’ɛtɛkɛta wakandatɛ Felika, wofundami lo palagalafɛ 5, Paulo akate ɔnɛ eolwelo k’anto w’ɔlɔlɔ l’anto wa kɔlɔ kayoyala. Wa na akɔna wele anto w’ɔlɔlɔ wayolɔ na? Mɛtɛ, ndoko onto lakotɔ ɔlɔlɔ oma k’otema. Sho tshɛ tekɔ atshi wa pɛkato oma k’eotwelo kaso, ndo sho salaka pɛkato lo lɔsɛnɔ laso l’otondo—diɔ diakɔ dieso ɛhɔmbɔ wa nyɔi l’ɛkɔkɔ ehende a weke. (Romo 5:12; 6:23) Koko, l’atei a Bible, sho tanaka tshɛkɛta yata ɔnɛ: ‘mbetama kanga losembwe.’ (Romo 3:28) Tshɛkɛta shɔ mendanaka l’anto wele, kânga mbewɔ ekokele, Jehowa ambodimanyiya pɛkato yawɔ.
9 Tshɛkɛta shɔ ndeka tɛkɛtama lo dikambo di’Akristo w’akitami, wanɛ wele l’elongamelo k’otsha l’olongo. Lo Romo 5:1, ɔpɔstɔlɔ Paulo ekɔ lo mbuta ate: “Okone shu [tambetama akanga a losembwe, “NW”] uma lu mbetawo, mbesu la ki lasasu la [Nzambi, NW] uma le Khumesu Jesu Kristu.” Akristo tshɛ w’akitami wambetama akanga a losembwe oma lo mbetawɔ. Oma lo mbetawɔ le na? Oko wadilembetshiya Paulo l’ɔm’ɔmɔ lo mukanda wakandafundɛ ase Rɔmɔ, ele oma lo mbetawɔ le Yeso Kristo. (Romo 10:4, 9, 10) Yeso akavu onto la kokele, ko l’ɔkɔngɔ diko, nde akolwama oma l’edo ndo akadɛ l’olongo dia tokimɔ nɛmɔ dia lɔsɛnɔ lande l’onto lo dikambo diaso. (Heberu 7:26, 27; 9:11, 12) Etena kaketawɔ Jehowa olambo ɔsɔ, mɛtɛ Yeso akatshungola dioho di’anto oma lo lɔhɔmbɔ la pɛkato la nyɔi. Wanɛ wɛnya mbetawɔ lo yɛdikɔ shɔ kondjaka ɛlɔlɔ efula oma lɔkɔ. (1 Koreto 15:45) Oma lo yɛdikɔ shɔ, apami la amato wa kɔlamelo wekɔ l’elongamelo ka sangola lɔsɛnɔ lahakomiyamaki oma le nyɔi, otunyi wa kɔlɔ efula.—Joani 3:16.
10, 11. (a) Eolwelo kakɔna kakongɛ Akristo wa kɔlamelo w’akitami na? (b) Woho akɔna w’eolwelo kakalongamelaka atɛmɔdi waki la ntondo ka Kristo mbotɔ na?
10 Diɛsɛ oma l’olambo wa tshungo dia Yeso, mbele akitami wa kɔlamelo, wanɛ waketama akanga a losembwe, l’elongamelo ka mɛtɛ ka mbolɔ oko ditongami dia lo nyuma diahavu, oko Yeso. (Enyelo 2:10) Eolwelo kawɔ tɛkɛtama lo Enyelo 20:6, ɔnkɔnɛ: “Wane wakulo uma lu nyoi lu eulwelu ka ntundu, weko la otshoko ndu ekila! Nyoi ka hendi huyala wulu le wo, keli vo wayuyala elombedi wa [Nzambi, NW] la wa Kristu; vo wayulela kame la ndi deku kinunu.” Ɔsɔ ekɔ eolwelo k’otsha l’olongo mbatɛkɛtama lanɛ. Koko, tolembete dia Bible kielɛka ɔnɛ “eulwelu ka ntundu,” dui sɔ nembetshiyaka ɔnɛ anto akina wahomba mbolɔ ndo vɔ lawɔ wekɔ.
11 Lo Heberu tshapita 11, Paulo akatɛkɛta dikambo di’ɔlɔndji w’otale w’ekambi a Nzambi waki la ntondo ka Kristo mbotɔ, wanɛ wakɛnya mbetawɔ ka nge le Jehowa Nzambi. Anto asɔ waki la mbetawɔ lo eolwelo ndo vɔ lawɔ. Lo divɛsa 35 dia tshapita yakɔ, Paulo ekɔ lo tɛkɛta dikambo dia waolwelo wakasalema l’ahindo l’ɔkɔndɔ w’Isariyɛlɛ, ata ate: “Amantu wakalungula asikawo wakavu, wakulwama uma lu nyoi. Akina wakakomwama wulu, kumbetawo ntshungwama, ne dia vo nungula eulwelu kuleki ololo.” Ɛmɛnyi ɛsɔ wa kɔlamelo wa lo nshi y’edjedja wakakongɛka eolwelo k’ɔlɔlɔ koleki ndo kɛnɛ kakasalema oma le Elidja nde la Elisha. (1 Nkumi ya Dikanga 17:17-22; 2 Nkumi ya Dikanga 4:32-37; 13:20, 21) Vɔ wakalongamɛka mbolɔ l’andja wahotosoyamaka ekambi wa Nzambi l’ɔtɛ wa mbetawɔ kawɔ, andja wele amato hawototovusha wakiwɔ wa ngandji. Eelo, vɔ wakalongamelaka dia mbolɔ oma l’edo l’andja akɔ w’oyoyo walongamelaso. (Isaya 65:17-25) Jehowa kombasholɛ akambo efula oko wambondotosholɛ lo kɛnɛ k’endana l’andja akɔ ɔsɔ w’oyoyo. Koko, vɔ wakeyaka ɔnɛ andja akɔ w’oyoyo wekɔ lo ndjaye, ndo vɔ wakalangaka mbɔtɔ lɔkɔ.
Eolwelo ka la Kɛtɛ
12. Onde anto wa kɔlamelo waki la ntondo ka Kristo mbotɔ waketama ɔnɛ: akanga a losembwe? Lembetshiya dikambo diakɔ.
12 Onde sho pombaka kanyiya ɔnɛ, l’andja w’oyoyo, eolwelo k’anto asɔ wa kɔlamelo waki la ntondo ka Kristo kayoyala l’atei w’eolwelo k’anto w’ɔlɔlɔ oka? Eelo mɛtɛ, nɛ dia Bible mbaelɛka ɔnɛ akanga a losembwe. Ɛnyɛlɔ, ombeki Jakɔba ekɔ lo tɛkɛta dikambo dia pami kɛmɔtshi la omoto ɔmɔtshi wa lo nshi y’edjedja, wanɛ waketama ɔnɛ akanga a losembwe. Pami kakɔ aki Abarahama, lokombakomba l’ase Heberu. Sho mbalaka dikambo diande ɔnkɔnɛ: “Abarahama aketawo [Nzambi, NW]. Wakawadiya mbetawo kandi uku ololo andi; wakaweti vati: Ongenyi a [Nzambi, NW].” Omoto akɔ lokombo lande Rahaba, nde aki omoto l’ose wodja lakɛnya mbetawɔ kande le Jehowa. Nde “[aketama kanga losembwe, NW]” ndo akayala ɔtɔi ɔmɔtshi a lo wodja w’ase Heberu. (Jakoba 2:23-25) Ɔnkɔnɛ, apami la amato wa lo nshi ya ntondo, wanɛ wakɛnya mbetawɔ ka nge le Jehowa ndo l’alaka ande, ndo wakatshikala la kɔlamelo polo ndo lo nyɔi, Jehowa akawaelɛ ɔnɛ akanga a losembwe oma lo mbetawɔ kawɔ, ndo, aha la tamu, vɔ wayolɔ ‘l’eolwelo k’anto w’ɔlɔlɔ.’
13, 14. (a) Woho akɔna weyaso ɔnɛ Akristo wele l’elongamelo ka la kɛtɛ kokaka mbetama ɔnɛ akanga a losembwe na? (b) Dikambo sɔ alembetshiyadiɔ le wɔ na?
13 Ko kayotota lo dikambo di’anto wa lo nshi nyɛ wɔfɔnyi l’ɛkɔkɔ, wanɛ wele l’elongamelo ka la kɛtɛ, wamboyalambola le Jehowa ndo wavɔ la kɔlamelo l’etena kɛnɛ k’ekomelo na? Onde vɔ wayolɔ l’eolwelo k’anto w’ɔlɔlɔ oka? Ɔsɔku mbediɔ lo menda la asho. Ɔpɔstɔlɔ Joani akɛnyi olui a woke w’anto wa kɔlamelo wa ngasɔ l’ɛnɛlɔ kakandɛnyi. Tolembete woho wakɔndɔlande olui akɔ: “Dimi lakendi, lakenyi ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe, wemadi la ntundu ka kiti ka diulelu [ndo la ntondo, NW] ka Ona-Okoko, wolotshi [ekutu w’etale, NW] a wema, la wanga w’atuku l’anya awo. Ku vo wakahangohango la diui dia wulu vati: Panda keko ka [Nzambi kaso, NW], latudjaseka lu kiti ka diulelu, ndu ka Ona-Okoko!”—Enyelo 7:9, 10.
14 Tolembete dia anto asɔ wele l’okitshakitsha wamboyashikikɛ dia vɔ wayokondja panda, ndo panda kakɔ vɔ mbeyaka ɔnɛ wayokikondja oma le Jehowa Nzambi la oma le Yeso, “Ona-Okoko.” Lâdiko dia lâsɔ, vɔ memala la ntondo ka Jehowa ndo la ntondo ka Ɔn’Ɔkɔkɔ, vɔ tshɛ wɔlɔtshi ahɔndɔ a wɛma. Lande na kɔlɔtshiwɔ ahɔndɔ a wɛma na? Etongami kɛmɔtshi ka l’olongo akatɛ Joani ate: “Vo . . . wakotsha [ekutu awɔ w’etale, NW], wakawaedia la dikila dia Ona-Okoko.” (Enyelo 7:14) Lo Bible, wɛma ekɔ djembetelo ya pudipudi ndo ya losembwe. (Osambu 51:7; Danyele 12:10; Enyelo 19:8) Woho wakɛnama olui a woke wɔlɔtshi ahɔndɔ a wɛma nembetshiyaka ɔnɛ: Jehowa mbaɔsaka oko akanga a losembwe. Woho akɔna okoki dikambo sɔ salema na? Nɛ dia, lo didjidji, vɔ wakɔtsha ekutu awɔ w’etale lo dikila dia Ɔn’Ɔkɔkɔ. Vɔ wekɔ lo mɛnya mbetawɔ kawɔ lo dikila diaki Yeso Kristo diakatshulwama, ɔnkɔnɛ, vɔ wambetama ɔnɛ akanga a losembwe oko angɛnyi wa Nzambi la kanyi ya ndjokondja eko lo fɔnu ka woke. Omalɔkɔ, Okristo tshɛ wa kɔlamelo wamboyakimɔka le Jehowa, wele ɔtɔi ɔmɔtshi a l’atei wa “ului a wuki” kakianɛ, wavɔ la ntondo ka fɔnu ka woke ndja, kokaka ndjashikikɛ dia nde ayolɔ l’eolwelo ka la kɛtɛ k’anto w’ɔlɔlɔ.
15. Lam’ele oyadi anto w’ɔlɔlɔ kana anto wa kɔlɔ wayolɔ, naa wahɔ wele lo eolwelo k’anto w’ɔlɔlɔ na?
15 Eolwelo kɛsɔ kɔndwama lo Enyelo tshapita 20, divɛsa 13, l’ɛtɛkɛta ɛnɛ: “Ashi a waki wakatundja edu waki loko; ndu Nyoi la Udimu a Pengandu wakatundja edu waki loko. Wakalumbuya untu l’untu uku aki etsha andi.” Ɔnkɔnɛ, l’edja ka Lushi la woke l’Elombwelo laki Jehowa, layoviya ɛnɔnyi kinunu, wanɛ tshɛ wele lo yimba yaki Nzambi wayolɔ—oyadi anto w’ɔlɔlɔ kana anto wa kɔlɔ. (Etsha 17:31) Koko, ayoleka ɔlɔlɔ tanema l’atei w’anto w’ɔlɔlɔ! Vɔ wambotayalaki la lɔsɛnɔ oma lo mbetawɔ. Vɔ wambotayalaki la diokanelo dia ma ma vɔ la Jehowa ndo wambotongaki la wɛkamu l’ekotshamelo k’asangwelo ande. Ɛmɛnyi wa losembwe waki la ntondo ka Kristo wayemɔ oma lo nyɔi la saki kalomɔlomɔ ka mbeya woho wakakotshama alaka wa Jehowa w’endana l’Osangɔ. (1 Petero 1:10-12) Ɛkɔkɔ ekina wambɛnama oko akanga a losembwe lo asho wa Jehowa lo nshi yaso nyɛ, wayotomba oma lo waombo la mposa k’efula ka mɛna kɛtɛ kambokadimɔ Paradiso kakawatɛkɛtaka lam’akawatasambishaka lokumu l’ɔlɔlɔ lo dikongɛ di’akambo nɛ. Ande etena k’ɔngɛnɔngɛnɔ kayoyala lee!
16. Kakɔna kakokaso mbuta lo dikambo dia eolwelo, l’edja ka Lushi l’Elombwelo, lo kɛnɛ k’endana la wanɛ wavɔ lo nshi yaso nyɛ na?
16 L’edja ka Lushi l’Elombwelo l’ɛnɔnyi kinunu, etena kakɔna mɛtɛ kayolɔ wanɛ wakavu la kɔlamelo l’ɛnɔnyi ɛnɛ wa komelo wa lo dikongɛ di’akambo diaki Satana na? Bible hashikikɛ etena kakɔ. Ko, onde kema ɔlɔlɔ dia kana ɔnɛ anto w’ɔlɔlɔ wavɔ lo nshi yaso nyɛ wayolɔ esadi dia ndjokamba kâmɛ l’olui a woke w’ehandɔ wa l’Armagɛdɔ olimu wa nongolaka nɔnga ya ntondo yayolɔka oma l’edo oka? Ɔsɔku mbediɔ mɛtɛ!
Elongamelo Kasha Ekeketshelo
17, 18. (a) Ekeketshelo kakɔna kakondjaso oma l’elongamelo k’eolwelo na? (b) Kakɔna katshutshuyamaso dia nsanya lo dikambo dia Jehowa na?
17 Elongamelo k’eolwelo mbishaka Akristo tshɛ wolo ndo ekeketshelo ɛlɔ kɛnɛ. Naka sho tshikala la kɔlamelo, kete ndoko tena l’akambo wa shashimuya, ndoko otunyi, wayokoka tohondja difuto diaso. Ɛnyɛlɔ, lo Annuaire des Témoins de Jéhovah 1992, lo lɛkɛ 177, tanemaka fɔtɔ y’Akristo w’ahonga waki l’Ethiopie, wanɛ wakavu l’ɔtɛ wakiwɔ konanga nengola mbetawɔ kawɔ. Sho mbalaka ɔnkɔnɛ lo diɔmbwɛlɔ di’alɛdi awɔ: “Dungi dialongamelaso ndjɛna nto lo eolwelo.” Ande diɛsɛ diayoyala dia ndjeyana l’anto wa ngasɔ ndo la lemba lokina laheyama mbadia l’anto wakɛnya kɔlamelo ya ngasɔ la ntondo ka nyɔi lee!
18 Kayotota lo dikambo dia wakiso wa ngandji ndo anangɛso l’akadiyɛso wele, l’ɔtɛ wa lotshundu kana l’ɔtɛ wa hemɔ kɛmɔtshi, hawototenyanya fɔnu ka woke na? Oma l’elongamelo k’eolwelo, nshi yayaye y’ɔngɛnɔngɛnɔ yekɔ lo mbakongɛ naka vɔ tshikala la kɔlamelo. Ndo sho lawɔ nto, naka sho mɛnya mbetawɔ kaso lo tshungo di’olambo a Yeso la dihonga tshɛ, kete nshi yayaye y’ɔngɛnɔngɛnɔ efula yekɔ lo tokongɛ. Lande na? Nɛ dia, oko Paulo, tekɔ lo nongamɛ “Eulwelu k’antu w’ololo la antu wa kolo uma lu nyoi.” L’otema ɔtɔi mbakaloyaso Jehowa losaka lo dikambo di’elongamelo kɛsɔ. Mɛtɛ, tɔ totshutshuyaka dia sho pandjola ɛtɛkɛta w’omembi w’esambu ɔnɛ: “Nyusanyaki lutumbu landi l’atei a wedja, la elimu andi wa mamba l’atei antu tshe. [Jehowa] keli wuki, ndi kukuki ntumbwama efula.”—Osambu 96:3, 4.
Onde Wɛ Kokaka Nembetshiya?
◻ Avɛsa akɔna watokimanyiya dia sho ndjashikikɛ dia elongamelo kaso lo eolwelo ka la kɛtɛ na?
◻ Oma lo dikambo diakɔna diambetama Akristo ɛlɔ kɛnɛ ɔnɛ: akanga a losembwe na?
◻ Woho akɔna watosha elongamelo k’eolwelo ekeketshelo la dihonga na?
[Caption]
Oko Paulo, Akristo w’akitami wekɔ lo nongamɛ eolwelo k’otsha l’olongo