Wamboka oma lo fɔnu ka woke
“Vo weli wane wambuya uma lu [ fɔnu ka woke, “NW”], wakotsha [ekutu awɔ w’etale, “NW”], wakawaedia la dikila dia Ona-Okoko.”—ENYELO 7:14.
1. Wa na wayolongola anto wayolɔ la kɛtɛ na?
ETENA kayolɔ lokema la miliyɔ y’anto lo ‘eolwelo k’anto w’ɔlɔlɔ la k’anto wa kɔlɔ,’ vɔ hawotolɔ dia ndjɔsɛna lo kɛtɛ kele kema ndoko l’ɛngɔ. (Etsha 24:15) Vɔ wayolɔ dia ndjɔsɛna lo dihole dia dimɛna efula diakalɔngɔswama ndo wayoyɛna ɔnɛ: mvudu ya mbidjasɛ, ahɔndɔ, ndo lokema la mbo ya ndɛ yambotalɔngɔswamaki lo dikambo diawɔ. Wa na wayɔlɔngɔsɔla diangɔ sɔ tshɛ na? Aha la tamu, anto wayonga la lɔsɛna l’andja w’oyoyo la ntondo k’eolwelo ka la kɛtɛ tatɛ mbayosala akambo asɔ. Wa na wayowoyala na? Bible mɛnyaka dia vɔ wayoyala ehandɔ w’oma lo fɔnu ka woke kayaye. Aha la tamu, l’atei a wetshelo tshɛ wele lo Bible, ɔsɔ ekɔ ɔtɔi ɔmɔtshi a wetshelo woleki ngɛnyangɛnya anto—wetshelo w’ɔnɛ: anto amɔtshi wa kɔlamelo wayoshimbamela oma lo fɔnu ka woke ndo hawovɔkaki pondjo. Elongamelo kɛsɔ kakashikikɛma l’atei w’Afundelo w’Ekila.
Oko Waki lo Nshi ya Nɔa
2, 3. (a) Nshi ya Nɔa fɔnaka l’etena kaso kɛnɛ l’akambo akɔna na? (b) Woho wakake Nɔa nde la nkumbo kande lo Mvula k’Elola mɛnyaka dikambo diakɔna na?
2 Lo Mateu 24:37-39, Yeso akɛdika nshi ya Nɔa la nshi y’ekomelo yasɛnaso nyɛ. Nde akate ate: “Uku aki lu nshi ya Noa, mbayuyala eyelu ka On’a untu. Lu nshi yako, la ntundu ka elula atayi, antu wakalekaka, wakanokaka, wakatshukanaka, wakatshukamaka, edja ndu lushi lakoto Noa lu watu a luudu. Vo kumbeya, edja ndu lam’akayi elula, akawakhumela tshe. Osoku mbayuyala eyelu ka On’a untu.”
3 Mvula k’Elola kakalɔ lo kɛtɛ k’otondo kakakumɛ wanɛ tshɛ waki kombidja yimba lo diewoyelo diaki Nzambi dia lɔhɛmɔ. Koko, tɔ kombukumɛ Nɔa nde la nkumbo kande. Oko wakate Yeso, vɔ ‘wakɔtɔ lo wâto a luudu.’ Oma lo dilɛmiɛlɔ diakawashaka Nzambi, Jehowa akawasha yoho mɔtshi ya vɔ pandɔ. Lo 2 Petero 2:5, 9 ɔpɔstɔlɔ ekɔ lo tɛkɛta dikambo dia eko ka Nɔa nde la nkumbo kande ate: “Ndi [Nzambi] . . . akashimbela Noa, umvutshi w’akambu w’ololo, la antu akina esambeli, lam’akandatumi elula ka wuki le antu wa kolo waki la kete; Ku [Jehowa] mbeyaka wuhu wa nshimbela antu w’ololo uma l’ehimba.” Yeso akɛdika nshi ya Nɔa la nshi y’ekomelo dia mɛnya ɔnɛ: anto efula hawotodja yimba lo diewoyelo diaki Nzambi. Koko, lo dikambo sɔ, nde akashikikɛ nto ɔnɛ: Nɔa nde la nkumbo kande wakakitanyiya awui wa Jehowa Nzambi, wakɔtɔ lo wâto a luudu, ndo wakake lo Mvula k’Elola. Woho wakake Nɔa nde la nkumbo kande mɛnyaka ɔnɛ ekambi a Nzambi wa kɔlamelo wayoka l’ekomelo k’andja ɔnɛ.
Ɛnyɛlɔ ka l’Eleko ka Ntondo
4. Dia kotsha ɛtɛkɛta wa Yeso, akambo akɔna wakela elanyelo ka Jerusalɛma l’ɔnɔnyi 70 T.D. na?
4 Yeso akatɛkɛta nto dia kɛnɛ k’endana l’akambo wayosalema l’ekomelo k’andja ɔnɛ. Lo Mateu 24:21, 22, sho mbalaka ɔnkɔnɛ: “L’okongo diku, [fɔnu ka woke, NW] kayuya, wuhu wahatayala uma k’etatelu k’andja edja ndu kakiane, ndu wuhu wahayalaki pundju. Utunduyala nshi sho kunsusama, tshiki nduku untu lutushimbamela. Keli wayususa nshi sho ne dia esonami.” Ɛtɛkɛta ɛsɔ wakakotshama mbala ka ntondo l’eleko ka ntondo ka lo Tena Diaso nɛ. L’ɔnɔnyi 66 T.D., alembe w’ase Rɔmɔ wakalɔmbwama oma le Cestius Gallus wakadinge osomba wa Jerusalɛma. Asɔlayi w’ase Rɔmɔ waki suke la mbitola pele dia tɛmpɛlɔ, ndo ase Juda efula wakayalɔngɔsɔla dia ndjâkimɔ l’anya awɔ. Koko, lo shashimoya ndo aha l’ɔkɔkɔ ɔmɔtshi wɛnama, Cestius Gallus akakalola l’asɔlayi ande. Lam’akawɛnyi ɔnɛ ase Rɔmɔ wambokalola, Akristo wakakitanyiya ɛtɛkɛta wa Yeso wakandate ɛnɔnyi efula la ntondo ɔnɛ: “Lam’ayunyena elui w’alimbi wambudinga Jerusalema, kanyeyi nyati: Elanyelu kayo kaya suki. Lushi lako, wane weli la Judiya, kawulawo l’ekungu; wane weli l’atei a ngelu, kawumo; wane weli l’esui; tawuyakaki loko.” (Luka 21:20, 21) Aha la tshimbatshimba, ɛsɔnami, mbuta ate ase Juda wanɛ wakayala Akristo, wakatombe oma lo Jerusalɛma, osomba wakânyema ndo, ɔsɔku mbakawayashimbela oma l’elanyelo ka woke kakaye l’osomba akɔ yema l’ɔkɔngɔ. L’ɔnɔnyi 70 T.D., elui w’alembe w’ase Rɔmɔ wakalɔmbwama oma le Nkumi k’alembe Titus wakaye nto. Vɔ wakahange l’emamu tshɛ wa Jerusalɛma, wakadinge osomba akɔ ndo wakohandjola vɔa.
5. Lo yoho yakɔna yaki fɔnu ka la Jerusalɛma kombiviya l’ɔnɔnyi 70 T.D. na?
5 Josèphe, ombewi w’ɛkɔndɔ w’ose Juda, ekɔ lo kɔndɔla ate: ase Juda 1 100 000 wakavu, suke l’anto 97 000 wakahandɔ ndo wakandama otsha lo lɔhɔmbɔ. Mɛtɛ, ehandɔ ɛsɔ w’ase Juda waki kondjala Akristo komonga “esonami” wa lo pɔlɔfɛsi kaki Yeso. Yeso akatɛ wodja w’ase Juda wakatɔmbɔkɔ ate: “Enda, wambunyutshikela khumbu kanyu anyanya. Dimi lambunyutela nti: Nyu hanyuyomena edja ndu lam’ayunyuta nyati: One layayi lu lukumbu la [Jehowa] eli la otshoko.” (Mateu 23:38, 39) Ndoko ɔkɔndɔ wɛnya ɔnɛ: l’etena ka tshitshɛ kakatshikala, ase Juda asɔ, wanɛ wakandama lo djonga la Jerusalɛma, wakayetawɔka Yeso oko Mɛsiya, wakayoyalaka Akristo ndo wakayetawɔmaka le Jehowa. Koko, fɔnu kakaye la Jɛrusalɛma kombiviya. Mbala ka komelo kakaye alembe w’ase Rɔmɔ dia ndjodinga osomba, vɔ kombiviya. Diɔ diakɔ diakake ase Juda amɔtshi, kânga mbakinde paka dia ntomama oko fumbe otsha lo ngelo efula ya lo Wodja wa Rɔmɔ.
Olui a Woke w’Ehandɔ
6, 7. (a) Naa osomba a woke w’ɛtɛmwɛlɔ wambotshikala wahomba nanyema, ndo lo fɔnu kakɔna kahatayalaka ndoko lushi kayosalema dikambo sɔ na? (b) Pɔlɔfɛsi kakɔna kakate Joani lo kɛnɛ k’endana la fɔnu ka woke kayaye l’andja ɔnɛ na?
6 Kânga mbele elanyelo ka Jerusalɛma l’ɔnɔnyi 70 T.D., akela mɛtɛ “fɔnu ka woke” l’osomba ɔsɔ w’ɛtɛmwɛlɔ, ekotshamelo ka woke k’ɛtɛkɛta wa Yeso kayohomba salema lo nshi yayaye. Osomba w’ɛtɛmwɛlɔ woleki woke, Babilɔna ka Woke, etshumanelo k’ɛtɛmwɛlɔ wa kashi wa l’andja w’otondo, pombaka nanyema lo fɔnu ka woke kayoyelana la fɔnu kahatayalaka ndoko lushi kayoya le tenyi dikina dia lo dikongɛ di’akambo diaki Satana. (Mateu 24:29, 30; Enyelo 18:21) Ambeta oko ɛnɔnyi 26 l’ɔkɔngɔ w’elanyelo ka Jerusalɛma, ɔpɔstɔlɔ Joani akafunde kɛnɛ k’endana la fɔnu ka woke kayoya l’andja w’otondo lo Enyelo 7:9-14.
7 Ehandɔ ɛsɔ, wanɛ welɛwɔ ɔnɛ: “ului a wuki,” wambeyama oma lo tɛdikɔ tɔmɔtshi tɔsawɔ la dihonga. Lo ndjela Enyelo 7:14, ɔtɔi ɔmɔtshi a l’atei a dikumanyi 24 diele l’olongo akatɛ Joani ate: “Vo weli wane wambuya uma lu pa ka wuki, wakotsha [ekutu awɔ w’etale, NW], wakawaedia la dikila dia Ona-Okoko.” Eelo, olui a woke wekɔ lo tombola Jehowa oko wende kiɔkɔ ya panda kawɔ. Vɔ wekɔ lo mɛnya mbetawɔ kawɔ lo dikila dia Yeso diakatshulwama ndo wambɛnama akanga a losembwe la ntondo k’Otungi awɔ ndo la ntondo ka Yeso Kristo, Nkumekanga kakandasɔnɔla.
8. Diɔtɔnɛlɔ diakɔna di’ɔlɔlɔ efula diele l’asa “olui a wuki” l’atshikadi w’anango Yeso w’akitami na?
8 Ɛlɔ kɛnɛ, suke l’anto miliyɔ tshanu watonga olui a woke wekɔ lo sɛna la tshina di’ɛlɔmbwɛlɔ kâsasa kaki Yeso Kristo, Nkumekanga ka l’olongo. Vɔ wekɔ lo ndjakitshakitsha la tshina dia Kristo ndo wekɔ lo kamba kâmɛ l’anango w’akitami wêke la kɛtɛ. Lo ndjela akambo wasalɛ olui a woke akitami asɔ, Yeso akate ate: “Mete kanyutelami nti: Uku akanyatshela otoi omotshi a wane wuleki tshitshe l’atei w’analingu ane, dimi uku akanyatshela.” (Mateu 25:40) Nɛ dia vɔ wekɔ lo kimanyiya anango Kristo w’akitami aha la nyanga wahɔ awɔ hita, anto asɔ wa l’olui a woke wambɔsama oko wakasalɛ Yeso ndamɛ ɔlɔlɔ. Dikambo sɔ mbakimanyiyaka dia vɔ ndjâla la diokanelo di’oshika kâmɛ la Yeso Kristo ndo la Jehowa Nzambi. Vɔ wakakondja diɛsɛ dia sangana kâmɛ l’atshikadi w’akitami lo ndjâla Ɛmɛnyi wa Nzambi ndo amɛmbi wa lokombo lande.—Isaya 43:10, 11; Joele 2:31, 32.
Tosungukalake
9, 10. (a) Kakɔna kahombaso sala dia nama losembwe laso la ntondo k’Ɔna onto na? (b) Kakɔna kahombaso sala dia ‘sungukalaka’ na?
9 Olui a woke pombaka namaka losembwe lawɔ la ntondo k’Ɔna onto aha la mpekɔ, kɛsɔ mbalɔmbaka dia vɔ sungukalaka edja ndo l’ekomelo. Yeso akakɛnɛmɔla dikambo sɔ lam’akandate ate: “Nyulamaki, ne dia etema anyu watukuyala wutshu la dishi, la edjwelu ka wanu la edinganu wa lumu lone. Lushi loso, latukuya le nyu shashimuya, uku shuni ya djunga, ne dia osoku mbayuya lushi lako le antu tshe wudjashi ladiku dia kete. Keli [nyosungukalake, NW], nyolombaki l’osengosengo dia nyu mpanda lu akambu aso tshe wayuya, la dia memala la ntundu ka On’a untu.”—Luka 21:34-36.
10 Dia memala la ntondo k’Ɔna onto, sho pombaka mbetawɔma le nde, ndo hatokoke mbetawɔma le nde naka sho ndjatshikaka dia sɛngiyama la tokanyi ta l’andja ɔnɛ. Tokanyi ta l’andja ɔnɛ kotolaka anto ndo kokaka tshutshuya onto ɔmɔtshi dia nde ndjasha l’ɛngɛnɔngɛnɔ wa l’emunyi kana ndjoyahatanyɛ wetsho w’ekakatanu a lo lɔsɛnɔ edja ndo hayetsha wahɔ wa Diolelo lo dihole dia ntondo. (Mateu 6:33) Lɔkɛwɔ la ngasɔ lalɛmbia onto lo nyuma kokaka mbotshutshuya dia nde minya yimba oma l’ɛkɛndɛ wele lande la ntondo ka Nzambi ndo la ntondo k’anto akina. Nde kokaka ndjoyala shuwasuwa kana ndjolanya dihole diande l’atei w’etshumanelo lam’ayondosala pɛkato ka woke, ko ondo ndjokeketsha otema di’aha ndjatshumuya. Onto tshɛ lele l’atei w’olui a woke pombaka ndjalama ndamɛ. Nde pombaka tetemala kakitwana l’andja ɔnɛ wa mindo ndo la ditshelo dia lɔkɔ.—Joani 17:16.
11. Adjango akɔna wa l’atei w’Afundelo wahombaso kitanyiya dia sho mbika l’Armagɛdɔ na?
11 Dia sala dikambo sɔ, Jehowa akatosha kɛnɛ kele laso ohomba oma l’ekimanyielo ka Dui diande, ka nyuma kande k’ekila, ndo k’ɔlɔngɔswamelo ande wɛnama. Sho pombaka kondja ɛlɔlɔ tshɛ w’oma l’akambo asɔ. Lâdiko dia lâsɔ, sho pombaka nɔmbaka efula ndo kitanyiyaka awui wa Nzambi naka sho nangaka mbetawɔma le nde. Ntondotondo, sho pombaka monga la lohetsho l’efula la kɛnɛ kele kɔlɔ. Omembi w’esambu akate ate: “Dimi hatudjaseka kame l’akanga a kashi, kuyanga mengola kame l’akanga a lukesu. Dimi latuhetshaka lusanganya la waku watutshaka kolo, hatudjaseka kame l’antu wa kolo. Tusanganyaki utema ami kame l’antu wa kolo, kuyanga lumu lami kame l’atomboki.” (Osambu 26:4, 5, 9) L’atei w’etshumanelo k’Akristo, oyadi ɛlɔngɔlɔngɔ kana dikumanyi pombaka mbidjaka olelo lo diakanelo di’asawɔ la wanɛ wahatayakimɔ le Jehowa. Dia mbetawɔma le Nzambi, sho pombaka ndjâtshutshuya di’aha ndjâla l’onongo ndo di’aha mbɔtɔ awadi w’oma l’andja ɔnɛ. (Osambu 26:1-5; Jakoba 1:27; 4:4) Ɔnkɔnɛ, tayoyashikikɛ ɔnɛ: lo Armagɛdɔ, Jehowa hatotodiaka kâmɛ l’anto wa mindo.
Amɔtshi ‘Hawovɔkaki Pondjo’
12, 13. (a) La ntondo ka nde mbolola Lazaro, ɛtɛkɛta akɔna wakate Yeso waki Mata komana fundo na? (b) Kakɔna kaki Yeso konanga mbuta lam’akandate ɔnɛ: amɔtshi ‘hawovɔkaki pondjo’ na?
12 Asolo pahanaka l’ɔlɔ dia monga l’elongamelo ka mbika l’ekomelo ka dikongɛ di’akambo nɛ ndo monga la lɔsɛnɔ la pondjo. Ɔsɔ kele elongamelo kakatosha Yeso. La ntondo ka nde mbolola Lazaro, ɔngɛnyi ande lakavu, Yeso akatɛ Mata, kadiyɛnde la Lazaro ate: “Dimi leko eulwelu la lumu. One lambetawo, kuyanga ndi ayuvo, ayuyala la lumu. One leli la lumu, lambetawo, ndi havu pundju. We mbetawoka diui so?” Mata aki la mbetawɔ lo eolwelo, koko nde koshihodiaka kɛnɛ tshɛ kakataka Yeso.—Joani 11:25, 26.
13 Yeso kombuta ɔnɛ apɔstɔlɔ ande wa kɔlamelo wayotetemalaka la sɛna l’emunyi ndo hawovɔkaki pondjo. Lo yoho yotshikitanyi, nde akayɛnyaka l’ɔkɔngɔ diko ate: ambeki ande wayovɔ. (Joani 21:16-23) Mɛtɛ, woho wakawakitama nyuma k’ekila lo Pɛntɛkɔsta ka l’ɔnɔnyi 33 T.D., akalembetshiyaka ɔnɛ vɔ wayohomba mvɔ dia tolongola sango dia l’olongo oko nkumi ya dikanga la oko ɛlɔmbɛdi. (Enyelo 20:4, 6) Ɔnkɔnɛ, l’edjedja ka wonya, Akristo tshɛ wa l’eleko ka ntondo wakavu. Koko, kɛnɛ kakate Yeso kaki l’oyango ɔmɔtshi. Ɛtɛkɛta ande w’endana la lɔsɛnɔ lahahembolamaki oma le nyɔi wayokotshama.
14, 15. (a) Woho akɔna wayokotshama ɛtɛkɛta wa Yeso w’ɔnɛ: amɔtshi ‘hawovɔkaki pondjo’ na? (b) Ngande wele akambo wasalema l’andja ɔnɛ, ko elongamelo kakɔna kele l’anto wa losembwe na?
14 Lo wedi awɔ, Akristo w’akitami wele la kɔlamelo hawovɔkaki nyɔi ka pondjo. (Enyelo 20:6) Ndo nto, ɛtɛkɛta wa Yeso mɛnyaka etena kakasɔnwama kayekɛ Nzambi lonya lande l’akambo w’anto ndo kayondonya akambo wa kɔlɔ tshɛ oma la kɛtɛ, oko wakandasale lo nshi ya Nɔa. Anto wa kɔlamelo wayowotana wasala lolango la Nzambi hawovɔkaki oma l’elombwelo kaki Nzambi. Koko, lo ndjela ɛnyɛlɔ kaki Nɔa nde la nkumbo kande, vɔ wayokondja diaaso dia panda l’elanyelo k’andja ɔnɛ. Elongamelo ka ngasɔ kekɔ shikaa, tɔ tomba oma lo wetshelo wa l’atei a Bible ndo didjidji di’elongamelo kakɔ diakɛnyama oma lo diɛnyɛlɔ dimɔtshi. (Ɛdika la Heberu 6:19; 2 Petero 2:4-9.) Ekotshamelo ka pɔlɔfɛsi ya lo Bible mɛnyaka ɔnɛ: kem’edja nto, andja ɔnɛ, mbuta ate tshunda di’anto wa kɔlɔ, diayanga nanyema. Akambo wasalema ɛlɔ kɛnɛ hawɔlɔngɔswamaki pondjo, nɛ dia andja ɔnɛ wekɔ la kɔlɔ kahashilaki. Kɛnɛ kakate Nzambi lo dikambo di’andja waki lo nshi ya Nɔa kekɔ lo salema ndo l’andja wa nshi nyɛ. Akambo wa kɔlɔ wambolola l’etema w’anto efula, ndo tokanyi tawɔ taya paka kɔlɔ keto wenya tshɛ.—Etatelo 6:5.
15 Jehowa akatshikɛ anto dihole dia vɔ nɔmbɔla kɛtɛ l’edja ka deko efula aha la nde mbɔtɔ l’akambo awɔ, koko etena kawɔ kaya suke la shila. Kem’edja, Jehowa ayoshila anto wa kɔlɔ tshɛ wele la kɛtɛ oshiki, oko wadita Bible. (Osambu 145:20; Tokedi 2:21, 22) Koko, nde hatolanya anto w’ɔlɔlɔ kâmɛ l’anto wa kɔlɔ. Ndoko lushi lakasale Nzambi dikambo dia ngasɔ! (Ɛdika la Etatelo 18:22, 23, 26.) Lande na katondolanya wanɛ wayatshutshuya dia mbokambɛ la kɔlamelo tshɛ, ndo la wɔma wa Nzambi na? Sunganaka dia sho kanyiya ɔnɛ: atɛmɔdi wa kɔlamelo waki Jehowa wayoyala la lɔsɛnɔ lam’ayotatɛ fɔnu ka woke wayohomɔ lokolo l’ɔlɔ lo asho ande ndo vɔ hawotolanyema, oko waki Nɔa nde la nkumbo kande konanyema lam’akaye ekomelo ka diambo kakalanya andja waki lo nshi yande. (Etatelo 7:23) Nzambi ayowakokɛ ndo vɔ wayoka l’ekomelo k’andja ɔnɛ.
16. Akambo akɔna w’amɛna efula wayosalema l’andja w’oyoyo, ndo kakɔna kayowolembetshiya le ehandɔ na?
16 Kakɔna kayosalema l’ɔkɔngɔ diko na? L’andja w’oyoyo, anto tshɛ wayɔkɔnɔ oma l’ɛlɔlɔ tshɛ wayela olambo wa tshungo dia Yeso. Bible tɛkɛtaka l’ɛtɛkɛta wa didjidji dikambo dia “ndjali k’ashi a lumu, a wema pesopeso uku talatala, watumba uma la tshina dia kiti ka diulelu ka [Nzambi, NW] la ka Ona-Okoko, l’atei w’osese ato. La wedi a ndjali kaki utamba a lumu, wakatokaka wehu dikumi la ehendi w’elua. Vo wakatokaka elua la ngondo la ngondo: akatshi w’utamba waki dia nkonoya wedja.” (Enyelo 22:1, 2) Dikambo di’ɔngɛnɔngɛnɔ efula diakokaso mbuta ko, ‘ɛkɔnwɛlɔ’ kɛsɔ mendanaka l’ɔlɛmbiɛlɔ wa nyɔi k’oma le Adama tɔamɛmɛ! “Khumadiondjo, [Jehowa ayunya, NW] nyoi pundju. Ndi ayukitula asoi tshe uma lu ashu awo.” (Isaya 25:8) Ɔnkɔnɛ, wanɛ wayohandɔ oma lo fɔnu ka woke dia mbɔtɔ l’andja w’oyoyo hawovɔkaki pondjo!
Elongamelo ka Mɛtɛ
17. Onde sho kokaka shikikɛ ɔnɛ anto amɔtshi wayohandɔ l’Armagɛdɔ ndo ‘hawovɔkaki pondjo’?
17 Onde sho ndjashikikɛka ɔnɛ elongamelo kɛsɔ ka diambo kayokotshama oka? Eelo! Yeso akɛnya Mata ɔnɛ: etena kayoyala kayɔsɛna anto aha la mvɔ pondjo. (Joani 11:26) Lâdiko dia lâsɔ, lo tshapita 7 ya lo dibuku di’Enyelo kakasha Yeso Joani, akɛnyama hwe dia olui a woke wakahombe ndja oma lo fɔnu ka woke kohandjiwɔ. Onde sho kokaka mbetawɔ Yeso Kristo ndo ɛkɔndɔ wakɔndɔla dikambo dia Mvula k’Elola ka lo nshi ya Nɔa? Ɔsɔku mbediɔ, aha la tamu! Lâdiko dia kɛsɔ, Bible kekɔ l’ɛkɔndɔ ekina wɛnya tena diakakokɛka Nzambi ekambi ande lo tena di’elombwelo ndo lam’akandalanyaka wedja ɛmɔtshi. Onde sho kokaka nongamɛ ɔnɛ nde hatosala dikambo dia ngasɔ lo tena nɛ di’ekomelo oka? Onde dikambo dimɔtshi diahakoke Nzambi ntsha diekɔ oka?—Ɛdika la Mateu 19:26.
18. Kakɔna kahombaso sala dia ndjâla l’eshikikelo ka monga la lɔsɛnɔ l’andja w’oyoyo wa losembwe waki Jehowa na?
18 Naka sho kambɛ Jehowa la kɔlamelo tshɛ oma ko kakianɛ, kete sho ndjâla l’eshikikelo ka monga la lɔsɛnɔ la pondjo l’andja ande w’oyoyo. Lokema la miliyɔ y’anto wayokondja lɔsɛnɔ l’andja akɔ ɔsɔ w’oyoyo oma lo tshimbo y’eolwelo. Kânga mbediɔ ɔsɔku, lo nshi yaso nyɛ, miliyɔ y’ekambi wa Jehowa—mbuta ate olui a woke wahakoke mbadiema kana mbeyama lofulo lawɔ—wayokondja ɔtɔi akɔ wa diɛsɛ dia mbika oma lo fɔnu ka woke. Ndo vɔ hawovɔkaki pondjo.
Oholembetshiya
◻ Woho akɔna wakɛnyama panda k’anto l’Armagɛdɔ oma lo didjidji dia kɛnɛ kakete lo nshi ya Nɔa na?
◻ Kakɔna kahombaso sala dia sho memala lam’ayoya Yeso dia ndjokotsha dombwelo diaki Jehowa na?
◻ Lande na kakokaso mbuta ɔnɛ ehandɔ w’oma l’Armagɛdɔ ‘hawovɔkaki pondjo’ na?
[Caption]
Akristo wakalawɔ fɔnu ka Jerusalɛma