Kakɔna kakotshutshuya dia kambela Nzambi?
“Ulangi [Jehowa Nzambi kayɛ, “NW”] l’utema aye tshe, la lumu laye tshe, la yimba yaye tshe, ndu la wulu aye tshe.”—MAKO 12:30.
1, 2. Akambo akɔna wa diambo wele lo tasalema lo kɛnɛ k’endana l’olimu w’esambishelo?
NƐMƆ dia mutuka hashikikɛma oma lo ɛnamelo kawɔ kito. Mokubu wokitami lâdiko mbeyaka nɔngɔsɔla ɛnamelo kawɔ ka l’andja, ndo sango dimɔtshi dia dimɛna efula mbeyaka kotola osumbi; koko diangɔ dioleki ohomba ele nɛ diahɛnama esadi eto—diangɔ diakɔ ko mɔtɛrɛ wakɛndjakɛndja motuka la mbolo kina yɔ̂lɔmbɔla.
2 Woho akɔ wâmɛ mbele ndo olimu wakambɛ Okristo Nzambi. Ɛmɛnyi wa Jehowa wekɔ lo sala elimu efula wɔtɔnɛ la lolango la Nzambi. Ɔnɔnyi l’ɔnɔnyi, vɔ kimɔka wenya olekanyi miliyara ɔtɔi l’olimu w’esambishelo ka lokumu l’ɔlɔlɔ la Diolelo diaki Nzambi. Lâdiko dia lâsɔ, vɔ wekɔ lo nɔmbɔla miliyɔ efula y’ambeki wa Bible, ndo wanɛ wabatizama komaka lo lofulo la kama ya nunu. Naka wɛ ekɔ opandjudi wa lokumu l’ɔlɔlɔ, kete wɛ akadje lonya ndo wɛ lawɔ—koyanga lo yɛdikɔ ya tshitshɛ—lo etombelo ɛsɔ wa diambo. Ndo wɛ kokaka ndjashikikɛ ɔnɛ: “[Nzambi, NW] kema kolo, dia ndi mbuhela ulimu anyu la ngandji kakanyenya antu lu lukumbu lande.”—Heberu 6:10.
3. Lâdiko di’etsha, kakɔna kahomba Akristo ndjakiyanya efula na?
3 Koko, nɛmɔ di’olimu wakambaso—oyadi l’olui kana l’onto ndo l’onto—hadiɛdikama lo lofulo loto. Oko wakate Samuɛlɛ: “Untu atendaka kene kenandi lu ashu, keli [Jehowa] atendaka utema.” (1 Samuele 16:7) Eelo, kɛnɛ keso l’atei w’otema mbele ohomba lo asho wa Nzambi. Mɛtɛ, etsha wekɔ ohomba. Etsha wɛnya ɔnɛ onto ɔnɛ mamemaka Nzambi nɔngɔsɔlaka wetshelo waki Jehowa ndo kotolaka ambeki efula. (Mateu 5:14-16; Tito 2:10; 2 Petero 3:11) Koko, etsha aso hawoshola kɛnɛ tshɛ keso. L’ɔkɔngɔ wa nde mbolɔ, Yeso akanyange lo dikambo di’etshumanelo ka l’Ɛfɛsɔ—koyanga mbakitɔ la lokumu l’etsha w’ɛlɔlɔ. Nde akatela etshumanelo kakɔ ate: “Dimi mbeyaka etsha aye, . . . Keli dimi la ye dikambu! ne dia we akakimo ngandji kaye ka ntundu.”—Enyelo 2:1-4.
4. (a) Lo woho akɔna wokoki olimu wakambɛso Nzambi ndjonga oko nsɛlɛmɔnyi kɛmɔtshi kasalaso l’ɔtɛ w’ɔnɛ wakatodjangɛ? (b) Bonde kele eko ohomba onto ndjasɛdingola na?
4 Wâle ɔmɔtshi wekɔ. L’edjedja ka wonya, olimu wakambɛso Nzambi mbeyaka ndjoyala oko nsɛlɛmɔnyi kɛmɔtshi katshaso l’ɔtɛ w’ɔnɛ wakatodjangɛ dia sala. Woho ɔnɛ mbakalembetshiya Okristo ɔmɔtshi wa omoto dikambo diakokomɛ: “Dimi lakatshɔkaka l’olimu w’esambishelo, lo sanganya, lakekaka, lakalɔmbaka—koko lakatshaka akambo asɔ tshɛ oko onto lasala dikambo dimɔtshi aha la nde monga ndo la saki.” Mɛtɛ, ekambi wa Nzambi wayaoka dia vɔ ‘wambombama’ kana ‘wambɔkɔshama la kɛtɛ’ koko wekɔ lo tetemala ndjatshutshuya la wolo awɔ tshɛ, pombaka mandolama. (2 Koreto 4:9; 7:6) Koyanga mbediɔ ɔsɔku, naka elimu aso w’Okristo wamboyala oko ohowɔ oto, kete sho pombaka sɛdingola mɔtɛrɛ, lo yoho ya didjidji. Oyadi motuka woleki ɔlɔlɔ tshɛ pombamaka nɔngɔswamaka tena la tena; woho akɔ wâmɛ mbahomba ndo Akristo tshɛ ndjasɛdingolaka tena tshɛ. (2 Koreto 13:5) Anto akina mbeyaka mɛna elimu aso koko hawokoke mbeya kɛnɛ katotshutshuya. Diɔ diakɔ diele, onto l’onto la l’atei aso pombaka ndjambola dimbola nɛ: ‘Kakɔna katshutshuya dia kambela Nzambi?’
Wekamu lo Etshutshuyelo Wasungana
5. Lo ndjela kɛnɛ kakate Yeso, ɔlɛmbɛ akɔna woleki woke?
5 Lam’akawawombola ɔnɛ ɔlɛmbɛ akɔna woleki woke l’atei w’ɛlɛmbɛ wakawasha Ase Isariyɛlɛ, Yeso akashile ɔlɛmbɛ waka epole ɔsɛkɛ lo saki yaso ya l’etei k’otema, koko aha lo ɛnamelo ka l’andja. “Ulangi [Jehowa Nzambi kayɛ, NW] l’utema aye tshe, la lumu laye tshe, la yimba yaye tshe, ndu la wulu aye tshe.” (Mako 12:28-30) Ɔnkɔnɛ, Yeso akɛnya dikambo diahomba totshutshuya dia sho kambɛ Nzambi olimu—dikambo diakɔ ele ngandji.
6, 7. (a) Woho akɔna watɔsɔmbwɛka Satana nkumbo la lokeso tshɛ, ndo lande na? (2 koreto 2:11) (b) Woho akɔna wele diodielo di’ana kokaka monga la shɛngiya lo dionga diele l’onto otsha lo lowandji la Nzambi?
6 Satana nangaka toshimba di’aha sho monga la ngandji, dionga di’ohomba efula. Dia kotsha oyango ande, woho ɔmɔtshi watondotshaka ele mbɔtwɛ nkumbo. Lande na? Nɛ dia lɔkɔ mbɔ̂tɔ amama wa ntondo ndo wa pondjo w’endana la ngandji. Satana shihodiaka didjango dia lo Bible diɛnya ɔnɛ kɛnɛ keka ɔna lo nshi yande ya dikɛnda mbeyaka monga ohomba lo nshi yande y’opalanga. (Tukedi 22:6) Nde atohembaka la lokeso dia fukutanya kanyi yaso lo kɛnɛ k’endana la ngandji oma ko dikɛnda. Oko wende “nzambi ka dikongɛ di’akambo nɛ,” Satana mɛnaka ɔnɛ eyango ande wekɔ lo kotshama dimɛna lam’ele ana efula mbolaka l’atei a nkumbo yele kema la ngandji, koko yekɔ oko dihole dia ta, dia lɔkɔnyɔ, dia nkɛlɛ, ndo di’ɛtɛkɛta wa mindo.—2 Koreto 4:4, NW; Efeso 4:31, 32; 6:4; Kolosai 3:21.
7 Dibuku dia Comment s’assurer une vie de famille heureuse mɛnyaka ɔnɛ woho wɛmba ombutshi wa pami ɔkɛndɛ ande “mbeyaka monga la shɛngiya y’edja efula lo dionga diayoyonga l’an’ande otsha lo lowandji l’anto ndo la Nzambi.”a Okristo ɔmɔtshi wa pami wakole lo lowandji la hiadi laki ombutshi wa pami aketawɔ ate: “Le mi, kitanyiya awui wa Jehowa ekɔ wɔdu; koko mbôka ngandji ekɔ okakatanu woleki wolo.” Mɛtɛ, okitanyiya ekɔ ohomba efula, nɛ dia lo asho wa Nzambi, “ukitanyia ndeka ulambu ololo.” (1 Samuele 15:22) Ko kakɔna kokoki tokimanyiya dia sho tamba olelo wa monga l’okitshanyiya oto dia sho mboka Jehowa ngandji woho wa ngandji kakɔ totshutshuya dia sho mbɔtɛmɔla?
“Ngandji ka Kristu [Totshutshuyaka, NW]”
8, 9. Ngande wokoki olambo wa Yeso w’etshungwelo tshutshuya ngandji kaso otsha le Jehowa?
8 Dikambo dioleki woke diatotshutshuya dia sho mboka Jehowa ngandji k’oma ka tshina di’otema ele lowando l’olambo wa Yeso w’etshungwelo. “Dia dikambu ne mbakenama ngandji ka [Nzambi, NW] le su, ne dia [Nzambi, NW] akatumi On’andi etoi la kete, dia shu ndjala la lumu uma le ndi.” (1 Joani 4:9) Lam’ashihodiaso kɛnɛ kele olambo ɔsɔ ndo monga la lowando lɔkɔ, tshelo shɔ ya ngandji totshutshuyaka dia sho monga la ngandji ndo sho lawɔ. “shu tatûlangaka, ne dia [Jehowa] akatulangi ntundu.”—1 Joani 4:19.
9 L’otema ɔtɔi, Yeso aketawɔ ɔkɛndɛ wa monga Oshimbedi w’anto. “Dia dikambu ne, mbeyasu ngandji, ne dia ndi akatukimwela lumu.” (1 Joani 3:16; Joani 15:13) Ngandji katoka Yeso aha la nyanga wahɔ, pombaka totshutshuya dia sho ndjâla la lowando. Tɔsɛ ɛnyɛlɔ kɛnɛ: ohokanyiya dia wɛ akayangi mvɔ l’ashi, koko wakayokoshimbɛ. Onde wɛ kanyiyaka dia wɛ kokaka ntshɔ otsha lakayɛ, ndjasasola demba, aha la sala ndoko dikambo dikina lâdiko dia lâsɔ, ko mbohɛ dikambo sɔ oka? Kema, aha ɔsɔku! Wɛ ayoyaoka dia wɛ ekɔ la dibasa otsha le onto lakakoshimbedi. Nɛ dia, oma le nde, mbeyɛ la lɔsɛnɔ. Onde sho kema la dibasa le Jehowa Nzambi la le Yeso Kristo? Otondoyala aha tshungo, tshike sho tshɛ totɔkɛla l’ashi lo yoho mɔtshi, mbuta ate: kɛla lo pɛkato la lo nyɔi. Koko, oma lo tshelo shɔ ya dimɛna ya ngandji mbeso l’elongamelo ka nsɛna pondjo pondjo la kɛtɛ kayokadimɔ paradiso.—Romo 5:12, 18; 1 Petero 2:24.
10. (a) Ngande wakokaso mbɔsa tshungo oko dikambo di’endana laso? (b) Ngande watotshutshuya ngandji ka Kristo?
10 Tokanake yimba lo dikambo dia tshungo. Toyaɔshi di’oko tshungo diakɔ diakakimɔma dikambo diaso, oko wakadisale Paulo, nde akate ate: “Lumu leli la mi kakiane lu dimba leko uma lu mbetawo le On’a [Nzambi, NW], ako lakanangi, ndu lakayakimo dikambu diami.” (Ngalatiya 2:20) Ekanelo ka yimba k’ɔsɔku kayotosha saki y’ɛlɔlɔ l’otema aso, lo ndjela kɛnɛ kakafundɛ Paulo Ase Kɔrɛtɔ ate: “Ne dia ngandji ka Kristu [totshutshuyaka, NW], ne dia. . . Ndi akavwela tshe, ne dia waku weli la lumu, tawuyalaki la lumu dia dikambu diawo vame, keli dia one lakâvwela, lakulwama dikambo diawo.” (2 Koreto 5:14, 15) Bible de Jerusalem mbutaka ɔnɛ ngandji ka Kristo “topusaka.” Lam’asɛdingolaso ngandji ka Kristo, sho ndjaokaka dia tambotshutshuyama, tambotomama la wolo, tambopusama. Dikambo sɔ munandaka otema aso ndo totshutshuyaka dia ntsha awui amɔtshi. Lo ndjela ekadimwelo kaki John Philips ka l’Angɛlɛ, “kiɔkɔ y’etsha aso, ele ngandji ka Kristo.” Ɛnyɛlɔ k’Afarisɛ mɛnyaka ɔnɛ ndoko dikambo dikina diatotshutshuya oma lâdiko dia sɔ diakoka tɔsha elowa w’ɛlɔlɔ le so.
“Nyewo Edya k’Afarise”
11. Otote dionga di’Afarisɛ lo kɛnɛ k’endana l’etsha w’ondjashi Nzambi?
11 Afarisɛ wakasuwolaka ɔtɛmwɛlɔ wakawatɛmɔlaka Nzambi. L’ɔtɛ wa vɔ mbika epole ɔsɛkɛ lo dikambo dia ngandji k’otsha le Nzambi, vɔ wakakaka epole ɔsɛkɛ ɔnɛ lonyuma l’onto mbɛdikamaka oma l’etsha ande. L’andja, vɔ wakɛnamaka oko anto w’ɛlɔlɔ nɛ dia vɔ wakamamemaka oseka djɛmbɛlɛmbɛ tshɛ, koko l’etei, vɔ ‘wakalole tɔ la weka wa edo w’anto ndo la mindo tshɛ.’—Mateu 23:27.
12. L’ɔkɔngɔ wa Yeso kɔnɔla pami kɛmɔtshi, kakɔna kakasale Afarisɛ kɛnya ɔnɛ vɔ waki la lonyû l’etema?
12 Lushi lɔmɔtshi, Yeso akoke pami kaki la lonya lamboma kɛtshi ko nde akɔkɔnɔya. Ande ɔngɛnɔngɛnɔ waki la pami kɛsɔ dia mɛna ɛkɔnwɛlɔ ka shashimuya oma lo hemɔ kande kakɔhɛnyahɛnyaka lo demba ndo lo tokanyi lee! Koko, Afarisɛ kɔngɛnangɛna kâmɛ lande. Lo dihole dia vɔ ngɛnangɛna, vɔ wakɔnyɔla Yeso wɔnyɔla ɔnyɔla ɔnɛ nde ambɔkɔnɔya onto lushi la Sabato. Oko akawaleke ndjasha l’okadimwelo w’Ɛlɛmbɛ lo yoho yawɔ vɔamɛ, Afarisɛ wakohɛ oyango w’ɛlɛmbɛ akɔ. Diɔ diakɔ mɛtɛ ‘diakanyange Yeso l’ɔtɛ wa lonyû l’etema awɔ.’ (Mako 3:1-5) Lâdiko dia lâsɔ, nde akewola ambeki ande ate: “Nyendi ololo! Nyewo edya ka Afarise la Asaduke.” (Mateu 16:6) Bible ekɔ lo mɛnya etsha la kɛwɔ yawɔ woho wa sho mbeka ko kondja wahɔ.
13. Wetshelo akɔna wakondjaso oma lo ɛnyɛlɔ k’Afarisɛ?
13 Ɛnyɛlɔ k’Afarisɛ toshaka wetshelo w’ɔnɛ sho pombaka monga la kanyi yasungana lo kɛnɛ k’endana l’etsha. Mɛtɛ, etsha wekɔ ohomba efula, nɛ dia “mbetawo kaha la etsha mvokaka.” (Jakoba 2:26) Koko, anto wele kema kokele watolangaka dia mbɛdikola anto akina oma lo kɛnɛ kasalawɔ oleki oma lo kɛnɛ kewɔ. Esangɔ ɛmɔtshi, sho mbeyaka ndjoyaɛdikola ɔsɔku. Sho mbeyaka ndjoyakiyanya ɔtɛkɔya lo dikambo di’etsha aso wate kana oko vɔ amɛ ato mbele dikambo dioleki ohomba lo lonyuma laso. Sho mbeyaka ndjohɛ ohomba wa sɛdingolaka kɛnɛ katotshutshuya. (Ɛdika la 2 Koreto 5:12.) Sho mbeyaka ndjoyala oko akanga wa dɛmbɛlɛmbɛ, oko wanɛ ‘watɔlɛkɔlaka tofumbɔfumbɔ lo djongɔ koko mbetshaka kamɛlɔ,’ lo kitanyiyaka paka afundelo w’ɛlɛmbɛ ato koko mɔnyɔlaka oyango awɔ.—Mateu 23:24.
14. Woho akɔna waki Afarisɛ oko dikɔhɔ kana oko dɔnga dia mindo?
14 Kɛnɛ kaki Afarisɛ koshihodiaka tɔ kɛnɛ: naka onto mbokaka Jehowa ngandji mɛtɛ, kete ndamɛ ayotsha etsha wɔtɔnɛ la lolango la Nzambi. Lonyuma latoyakaka oma l’etei dia lɔ ndjɛnama l’andja. La dihonga tshɛ, Yeso akânya tokanyi ta kɔlɔ taki l’Afarisɛ lo dikambo sɔ, ata ate: “Fono kayayi le nyu, afundji la Afarise, akanga a lukesu! ne dia nyu nyatotshaka l’andja a dikoho la donga, keli l’etei awo ambulula too la dihotwanelu la dishi. We Ufarise a tshungu! utaotshisha l’etei a dikoho la donga, okone ndu l’andja ayuyala pudipudi.”—Mateu 23:25, 26.
15. Shila bɛnyɛlɔ diɛnya ɔnɛ Yeso mɛnaka ndo l’edia ka kɛnɛ kɛnama.
15 Ɛnamelo ka l’andja a dikɔhɔ, dɔnga, koyanga ka luudu, hashola oseka ema tshɛ kele lɔkɔ. Ambeki wa Yeso wakambiama oma lo dimɛna dia tɛmpɛlɔ ka Jerusalɛma, koko Yeso akakielɛ ɔnɛ: “Wuku w’apotodi” nɛ dia kɛnɛ kakasalemaka l’atei atɔ. (Mako 11:17; 13:1) Oko wɛnya ɔkɔndɔ wa Lokristokristo, kɛnɛ kakasalemaka lo tɛmpɛlɔ kekɔ lo salema ndo le miliyɔ y’Akristo wa l’ɛlɔmɔ. Yeso akate ɔnɛ nde ayɔsa wanɛ wakatshaka “akambu wa mamba” lo lokombo lande oko “[amɔnyɔdi w’ɛlɛmbɛ, NW].” (Mateu 7:22, 23) Lo yoho yotshikitanyi efula, nde akate dikambo dia wadi’aki odo lakakimɔ yema falanga tshitshɛ lo tɛmpɛlɔ ate: “Wadi aki udu one, kanga wula, ambudja ushasha wuleki wudjisha akina tshe lu ekitshelu. . . . ndi, uma lu wula andi, mbudjishandi kene tshe kaki la ndi, kakandahumbi ndjakimanyia.” (Mako 12:41-44) Onde ɔsɔ ekɔ tokanyi talɔshana oka? Kema, aha ɔsɔku. Lo diɛnyɛlɔ diakɔ dihende, Yeso akɛnyaka kanyi yele la Jehowa. (Joani 8:16) Nde akɛnaka kɛnɛ kakatshutshuyaka anto dia vɔ sala etsha ɛsɔ tshɛ, ndo nde akawaɔsaka lo ndjela akambo akɔ wakâtshutshuyaka.
“Le Untu l’Untu [lo Ndjela Akoka Ande, NW]”
16. Lande na kele ndoko ohomba sho mbɛdikola olimu aso la wɔnɛ w’Okristo okina?
16 Naka tokanyi tatotshutshuya tekɔ pudipudi, kete ndoko ohomba wa sho ndjaɛdikaka nshi tshɛ l’anto akina. Oko ɛnyɛlɔ: kema ɔlɔlɔ, oma lo yimba ya shɛmanedi, nyanga dia nkimɔ lofulo la wenya oko lɔnɛ l’Okristo okina kana nyanga dia monga lande popo l’olimu w’esambishelo. Yeso akate dia nanga Jehowa l’otema, la yimba, la lumu ndo la wolo ayɛ tshɛ—koko aha l’otema, la yimba, la lumu, ndo la wolo w’onto okina. Akoka, wolo ndo lɔsɛnɔ l’onto l’onto tshikitana. Naka wɛ ekɔ la diaaso, kete ngandji kayokotshutshuya dia wɛ nkimɔ wenya efula l’olimu w’Okristo—koyanga mbɔsa olimu wa lo tena ndo lo tena, oko wɔnɛ w’ombatshi mboka. Koko, naka hemɔ kɛmɔtshi kekɔ lo kɔhɛnyahɛnya, kete wɛ ayokimɔ wenya yema tshitshɛ, lo yɛdikɔ yahayakombola. Koyanga mbediɔ ɔsɔku, tɔkɔmɔke. Kɔlamelo y’onto le Nzambi hɛdikama oma lo wenya wakimɔnde l’olimu. Naka wɛ ekɔ la tokanyi ta pudipudi, kete wɛ ekɔ l’ɔkɔkɔ wa wɛ ngɛnangɛna. Paulo akafunde ate: “Keli untu l’untu ediki ulimu andi, ku ndi ayuyala la dikambu dia ndjatumbula ndame, aha lu dikambu dia [onto okina, NW].”—Ngalatiya 6:4.
17. L’ɛtɛkɛta wayɛ wɛmɛ, kɔndɔla lo tshena pe wɛla wa talata.
17 Tɔsɛdingole wɛla wa Yeso wa talata, oko wofundamiwɔ lo Mateu 25:14-30. Onto ɔmɔtshi aki suke la ntshɔ otsha lo wodja okina, nde akete ekambi ande ko akâtshikela diangɔ diande. “Ndi akasha omotshi talata tshanu, ukina talata hyendi, ukina talata otoi, le untu l’untu [lo ndjela akoka ande, NW].” Lam’akakalola owandji dia ndjâla diangɔ nde l’ɛhɔmbɔ ande, kakɔna kakandatane na? Ɔhɔmbɔ wakalongola talata tshanu, akatokondja talata kina tshanu lâdiko. Woho akɔ wâmɛ mbaki ndo ɔhɔmbɔ wakalongola talata hiende, nde akatokondja talata kina hiende. Ɔhɔmbɔ wakalongola lotalata ɔtɔi akatolikundɛ lo kɛtɛ ndo kosala ndoko dikambo ɔtɔi dia mfudia ɔngɔnyi wa kumɛnde. Ngande wakɛnyi owandji ande dikambo sɔ na?
18, 19. (a) Lande na kele owandji kɔmbɛdika ɔhɔmbɔ wakalongola talata hiende la wɔnɛ wakalongola talata tshanu? (b) Wetshelo akɔna wakondjaso lo wɛla wa talata lo kɛnɛ k’endana la lowando ndo la waɛdikelo? (c) Lande na kele ɔhɔmbɔ wa sato akayaonɛ onongo ndamɛ?
18 Ntondotondo, nyɛsɔ tende dikambo di’ɛhɔmbɔ wakalongola onto l’onto, ɔnɛ talata tshanu okina talata hiende. Owandji akatela onto l’onto ate: “Kawo, [wɛ ɔhɔmbɔ w’ɔlɔlɔ ndo wa kɔlamelo, NW].” Onde nde ototela ɔhɔmbɔ wakalongola talata tshanu woho wakandawotela otondoyala nde akakondja talata hiende tsho lâdiko? Kema! Lo wedi okina, nde kombutela ɔhɔmbɔ wakolongola talata hiende ate: ‘Na bonde kele wɛ kokondjelɛmi talata tshanu? Wɛ hɛnyi onyayɛ ɔhɔmbɔ kɛnɛ kakandakondjela!’ Kema, owandji ɔsɔ wa kɛtshi, wele didjidji dia Yeso, kombaɛdika. Nde akasha talata “le untu l’untu [lo ndjela akoka ande, NW],” ndo nde konongamelaka ndoko ɛngɔ oma le onto, onyake paka kɛnɛ kakandakoke nkimɔ. Ɛhɔmbɔ akɔ ehende wakandolama popo, nɛ dia vɔ akɔ ahende wakakambela owandji awɔ olimu l’anima awɔ tshɛ. Sho tshɛ mbeyaka kondja wetshelo oma lo dikambo sɔ.
19 Mɛtɛ, ɔhɔmbɔ wa sato komandolama. Omalɔkɔ, nde akakadjema lo wodjima wa l’andja. Nde akalongola lotalata ɔtɔi, vɔ kombɔlɔmba dia nde sala oko akasale ɔhɔmbɔ wakalongola talata tshanu. Ndo, nde kopemba kânga pemba! Ndamɛ akayaonɛ onongo nɛ dia nde aki l’otema wa “kolo la shuasua,” dikambo sɔ diakɛnyaka ɔnɛ nde kombokaka owandji ande ngandji efula.
20. Ngande wɔsa Jehowa wekamu watokomɛ na?
20 Mɛtɛ, Jehowa tɔlɔmbaka di’onto l’onto la l’atei aso mbolanga la wolo ande tshɛ, ko ande ekeketshelo dia mbeya ɔnɛ “ndi mbeyaka uma lu na akatatungama. Ndi atuhoka ati: ditshu mbesu”! (Osambu 103:14) Tukedi 21:2 mbutaka ɔnɛ: “[Jehowa] atedikaka etema”—koko aha lofulo. Nde mbeyaka wekamu watokomɛ, aha la lolango laso, oyadi ekakatanu w’akambo w’ekundji, wa demba, wa lo tokanyi, koyanga weoho ekina w’ekakatanu. (Isaya 63:9) Koko, nde ekɔ lo tɔlɔmba dia sho kamba la kɛnɛ tshɛ kele laso lo yoho yoleki ɔlɔlɔ. Jehowa ekɔ kokele, koko nde halɔmbɛ atɛmɔdi ande wele kema kokele ɔnɛ wayale kokele ndo vɔ lawɔ. Nde kema enginya lo kɛnɛ kasalɛnde ekambi ande ndo nde hâlɔmbɛ kɛnɛ kahawakoke sala.
21. Naka olimu wakambɛso Nzambi tshutshuyamaka oma lo ngandji, etombelo akɔna w’ɔlɔlɔ wayoyala?
21 Ngandji kokaso Jehowa l’otema aso tshɛ, l’anima aso tshɛ, la yimba yaso tshɛ, ndo la wolo aso tshɛ “ndeka elambu tshe la elambu tshe wa lutshumba ololo.” (Mako 12:33) Naka tekɔ lo tshutshuyama la ngandji, kete tayosala kɛnɛ tshɛ kakokaso sala l’olimu wa Nzambi. Petero akafunde ate naka waonga wɔtɔnɛ la lolango la Nzambi, mbidja ndo ngandji, “wambuhama lu etema anyu, vo hawunyete tusuasua kana uku antu wahato elua dia nimbitela Khumesu Jesu Kristu.”—2 Petero 1:8.
[Footnote]
a Dibuku diakatondja Watchtower Bible and Tract Society of New York, Inc.
Ovuswelo
◻ Kakɔna kahomba totshutshuya dia sho kambɛ Nzambi na?
◻ Woho akɔna watotshutshuya ngandji ka Kristo dia sho kambela Jehowa na?
◻ Lokanyi lakɔna la Afarisɛ lahombaso tona?
◻ Lande na kele kema ɔlɔlɔ tetemala la mbɛdikola olimu aso la wɔnɛ w’Okristo okina?
[Caption]
Akoka, wolo ndo lɔsɛnɔ l’onto l’onto tshikitana