Wambetshama oma le Jehowa polo ndo lo nshi nyɛ
“Jehowa ndamɛ ambombisha lolemi l’anto wambetshama.”—ISAYA 50:4, NW.
1, 2. (a) Jehowa akalɔngɔsɔla ombeki ande walangande efula dia nde sala dikambo diakɔna, ndo etombelo akɔna wakayala? (b) Woho akɔna wakɛnya Yeso ɔnɛ nde akeyaka Kiɔkɔ ya wetshelo ande?
JEHOWA NZAMBI ekɔ nshi tshɛ Ombetsha tatɛ oma lam’akandayala Ombutshi. L’etena kɛmɔtshi l’ɔkɔngɔ w’an’ande amɔtshi tɔmbɔkɔ, nde akalɔngɔsɔla ombeki ande walangande efula, Ɔn’ande l’Enondo, dia nde ndjokamba olimu lanɛ la kɛtɛ. (Tukedi 8:30) Isaya tshapita 50 tɛkɛtaka dikambo di’ombeki ɔsɔ lo pɔlɔfɛsi ɔnɛ: “Khumadiondjo [Jehowa ambombisha lolemi l’anto wambetshama, NW] la dimi mbeya ndakanya one lambokomo.” (Isaya 50:4) Etombelo wakayala oma lo woho wakakitanyiyaka Yeso wetshelo waki She lanɛ la kɛtɛ ele, nde aki kiɔkɔ y’ekeketshelo le wanɛ tshɛ ‘wakakɔmɔ ndo waki la wetsho.’—Mateu 11:28-30.
2 Yeso akasale akambo wa diambo efula l’edja k’eleko ka ntondo. Nde akasɛnya asho w’akanga a tutshungu ndo akolola kânga edo, koko anto waki la lɔsɛnɔ lo nshi yande wakaleke mbêya oko ombetsha. Ambeki ande la atunyi ande wakawelɛka ɔnɛ ombetsha. (Mateu 8:19; 9:11; 12:38; 19:16; Joani 3:2) Yeso kondjasɛma ndoko lushi lo dikambo dia kɛnɛ kakandetshaka, koko nde aketawɔ la ndjakitshakitsha ate: “Wetshelu ami aha wami, keli wa one lakantumi.” “Latutaka akambu wakambetsha Papa.”—Joani 7:16; 8:28; 12:49.
Diokanelo di’Oshika dia l’Asa Ombetsha l’Ombeki
3. Woho akɔna wɛnya pɔlɔfɛsi k’Isaya ɔnɛ Jehowa ndjashaka le wanɛ wetshande?
3 Ombetsha w’ɔlɔlɔ atoyashaka la tshondo, l’otema ande tshɛ, ndo la ngandji tshɛ le ambeki ande. Isaya tshapita 50 mɛnyaka dia Jehowa Nzambi ekɔ lo ndjasha woho ɔsɔ le wanɛ wetshande. Pɔlɔfɛsi kɛsɔ mɛnyaka ɔnɛ: “[Nde] atumbetulaka pindju tshe, atudihulaka atui ami dia vo mbuka ololo.” (Isaya 50:4) Ɛtɛkɛta wofundami lanɛ mɛnyaka ombetsha wemula ambeki ande la pindju ka pɛ dia nde mbaetsha. Lam’akandalembetshiyaka ekotshamelo ka pɔlɔfɛsi kɛsɔ, nomb’ewo kɛmɔtshi k’akambo wa lo Bible akɛnya ɔnɛ: “Kanyi yele lanɛ mɛnyaka ɔnɛ Otshungudi ayoyala . . . onto lɔtɔ lo kalasa kaki Nzambi, lo yoho ya didjidji; ndo ayolowanyema dia mbetsha anto akina. . . . Mɛsiya ayolowanyema efula la wetshelo w’oma le Nzambi woho wa nde monga ombetsha w’anto wa l’andja w’otondo.”
4. Yeso akandasale la wetshelo wa She?
4 Ambeki tokitanyiyaka wetshelo w’ombetsha awɔ. Yeso akandasale la wetshelo waki She na? Kɛnɛ kakandasale la wetshelo akɔ akɔtɔnɛ la kɛnɛ kâlaso lo Isaya 50:5 ɔnɛ: “Khumadiondjo, [Jehowa] akandjihula atui. Dimi kumbuhedia, kuyanga nkalula ekongokongo.” Eelo, Yeso aki la saki k’efula ka mbeka. Nde akahokamɛka l’atui akɔ ahende. Lâdiko dia lâsɔ, nde akalangaka sala kɛnɛ tshɛ kakɔlɔmbaka She. Nde kɔtɔmbɔkɔ; koko, nde akate ate: “Lolango layɛ latshame, koko aha lami.”—Luka 22:42, NW.
5. (a) Kakɔna kɛnya ɔnɛ, la ntondo ka nde ndja, Yeso akeyaka asui wakandahombe ndjosowa lanɛ la kɛtɛ? (b) Woho akɔna wakakotshama pɔlɔfɛsi kofundami l’Isaya 50:6?
5 Pɔlɔfɛsi kɛsɔ mɛnyaka ɔnɛ wakatewuyisha Ɔna etombelo wa kɔlɔ wakahombe mbokomɛ oma lo woho wasalande lolango la Nzambi. Dikambo sɔ mɛnyamaka oma lo kɛnɛ kata ɔnɛ laketshama ate: “Dimi lakalungi okongo le wane wakankomolaka, la luwanga le wane wakambikulaka ndedu. Dimi kuminya elundji kami uma lu sonyi, la uma lu soi yakawampongwelaka.” (Isaya 50:6) Oko wadiɛnya pɔlɔfɛsi kɛsɔ, Yeso akahɛnyahɛnyama efula lanɛ la kɛtɛ. Ɔpɔstɔlɔ Mateo akafunde ɔnɛ: “Vo wakohongwela soi l’elundji, wakôkomola mbala.” (Mateu 26:67) Dikambo sɔ diakasalema oma le ewandji w’ɛtɛmwɛlɔ, l’otsho wa Pasaka ka l’ɔnɔnyi wa 33 T.D. La wedi a pindju, Yeso akalongɛ ɔkɔngɔ ande le ankɔmɔdi, lam’akɔkɔmɔlaka asɔlayi w’Ase Rɔmɔ, aha la kɛtshi, la ntondo ka mbohanɛ l’otamba dia nde mvɔ.—Joani 19:1-3, 16-23.
6. Kakɔna kɛnya ɔnɛ ndoko lushi lakanya Yeso wɛkamu ande oma le Ombetsha ande, ndo woho akɔna wakakondja wɛkamu ande difuto?
6 Oko wakandetshama ɔlɔlɔ la ntondo, Ɔna koshisha ndoko wɛkamu le Ombetsha ande. Dikambo sɔ mɛnyamaka oma lo kɛnɛ kakandayota nto lo ndjela pɔlɔfɛsi ate: “Khumadiondjo, [Jehowa] atunkimanyiaka, diako [diahamatoka sɔnyi, NW].” (Isaya 50:7) Wɛkamu wakakitshaka Yeso lo ekimanyielo k’oma le Ombetsha ande akokondjiyɛ difuto dia woke. She akawodiya, akɔtshɔkɔla lo mbosha dihole diele lâdiko di’ekambi wa Nzambi tshɛ. (Filipi 2:5-11) Ɛtshɔkɔ wa mamba wekɔ lo tokongɛ ndo sho lawɔ naka sho mamema wetshelo waki Jehowa la wɔlamu tshɛ aha la ‘kalola ɛkɔngɔkɔngɔ.’ Kakianɛ, nyɛsɔ tende woho washama wetshelo akɔ ɔsɔ polo ndo lo nshi yaso nyɛ.
Ekongelo ka Woke ka Wetshelo
7. Woho akɔna wakatetemala ndakanyema wetshelo waki Jehowa lanɛ la kɛtɛ?
7 Oko wakatadioki, Jehowa akakambe la Yeso Kristo, Otomami wakandatome oya la kɛtɛ, dia nde ndjodianganya wetshelo w’oma le Nzambi l’eleko ka ntondo. (Joani 16:27, 28) Tena tshɛ, Yeso akashilaka Dui dia Nzambi oko diɔ mbaki la lowandji lâdiko dia wetshelo ande, ɔsɔku mbakandatshike ɛnyɛlɔ k’ɔlɔlɔ le wanɛ wakandetshaka. (Mateu 4:4, 7, 10; 21:13; 26:24, 31) L’ɔkɔngɔ diko, wetshelo waki Jehowa wakatetemala la ndakanyema lanɛ la kɛtɛ oma lo tshimbo y’olimu w’anto wa ngasɔ wambetshama. Ohɔ dia Yeso akawadjangɛ ate: “Okone nyutshu, nyete wedja tshe ambeki, . . . Nyuwaetshaki dia ntsha akambu tshe wamumunyutela.” (Mateu 28:19, 20, Sho mbɛnganyisha alɛta ango.) Lam’akayala anto ambeki, vɔ wakayala l’atei wa “luudu la [Nzambi, NW] . . . ekelizia ka [Nzambi ka, NW] lumu.” (1 Timote 3:15) Vɔ wakakengaka tshumanelo, lo tshumanelo diakɔ mbakawetshamaka oma le Jehowa. (Etsha 14:23; 15:41; 16:5; 1 Koreto 11:16) Onde wetshelo w’oma le Nzambi wekɔ lo tetemala lo yoho shɔ polo ndo lo nshi yaso nyɛ?
8. Woho akɔna wakɛnya Yeso ɔnɛ olimu w’esambishelo wayɔlɔmbwama lanɛ la kɛtɛ la ntondo k’ekomelo ndja?
8 Eelo! Nshi shato la ntondo ka nde mvɔ, Yeso akatatshi ɔnɛ la ntondo k’ekomelo ka dikongɛ di’akambo nɛ, olimu a woke w’esambishelo wayosalema. Nde akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” Yeso akatetemala la nembetshiya ehomɔ kayokambema olimu dia nɔmbɔla olimu wa l’andja w’otondo w’esambishelo ndo ekongelo ka wetshelo. Nde akatɛkɛta dia “[ɔhɔmbɔ wa kɔlamelo ndo wa kɛsɔ, NW]” wayoyala oko ehɔmɔ kayoshaka ekambi Ande mma dia lo nyuma. (Mateu 24:14, 45-47) Jehowa Nzambi ekɔ lo kamba la “ɔhɔmbɔ” ɔsɔ dia nama wahɔ wa Diolelo lo kɛtɛ k’otondo.
9. Wa na wakenga ɔhɔmbɔ wa kɔlamelo ndo wa kɛsɔ?
9 Ɛlɔ kɛnɛ, ɔhɔmbɔ wa kɔlamelo ndo wa kɛsɔ kengama la atshikadi w’ekitɔ wa Diolelo. Ekitɔ ɛsɔ kɛdikɛdi Akristo w’akitami, atshikadi wa l’olui w’anto 144 000 weke lanɛ la kɛtɛ, wanɛ wele “waki Kristo” ndo wele l’atei w’“osangɔ w’Abarahama.” (Ngalatiya 3:16, 29, NW; Enyelo 14:1-3) Woho akɔna wakokayɛ mbeya ɔhɔmbɔ wa kɔlamelo ndo wa kɛsɔ? Wɛ kokaka mbêya djekoleko oma l’olimu wasalawɔ ndo oma lo woho wamamemawɔ Bible, Dui dia Nzambi.
10. Dihomɔ diakɔna diakamba l’olui w’ɔhɔmbɔ dia pamia wetshelo waki Jehowa?
10 Jehowa ekɔ lo kamba la “ɔhɔmbɔ” ɔsɔ oko ehɔmɔ ketsha anto ande ɛlɔ kɛnɛ. Wanɛ wele l’atei w’olui akɔ w’ɔhɔmbɔ wakɔshi lokombo l’Ɛmɛnyi wa Jehowa l’ɔnɔnyi wa 1931. Oma k’etena kɛsɔ, miliyɔ y’anto wakɔtɔ l’ɔnɔngɔ awɔ, waketawɔ lokombo lɔsɔ ndo wakasangana l’olimu w’esambishelo ka Diolelo diaki Nzambi. Periodikɛ kɛnɛ, Tshoto y’Etangelo Mbewoyaka Diolelo Diaki Jehowa, mbele ehomɔ ka woke kakamba la “ɔhɔmbɔ” akɔ l’olimu wa mbetsha anto. Koko, ekanda ekina wekɔ lo kambema olimu ndo vɔ lawɔ, abuku, tobukubuku, tokatshikatshi ndo periodikɛ kelɛwɔ ɔnɛ Réveillez-vous!
11. Kalasa yakɔna yalɔmbɔla “ɔhɔmbɔ,” ndo kalasa la kalasa kekɔ l’oyango akɔna?
11 Lâdiko dia lâsɔ, “ɔhɔmbɔ” ɔsɔ ekɔ lo nɔmbɔla weoho wa kalasa yotshikitanyi. L’atei wa kalasa yakɔ, ekɔ Kalasa ka Bible ka Galadɛ kaki la Société, lo kalasa kakɔ, vɔ mbishaka wetshelo wa ngɔndɔ tshanu walɔngɔsɔla ekambi weke ɛlɔngɔlɔngɔ dia vɔ tokamba olimu oko wa misiyɔnɛrɛ lo wedja ekina, ndo Kalasa k’Olowanyelo w’Ekambi kele la wetshelo wa ngɔndɔ hiende, lo kalasa kakɔ, vɔ ndowanyaka dikumanyi la ekambi wahatatshukana dia vɔ kondja ɛkɛndɛ ɛmɔtshi wa lânde wa lo Teokrasi. Ekɔ nto Kalasa k’Olimu wa Diolelo, lo kalasa kakɔ, vɔ mbetshaka dikumanyi di’Akristo la ekambi w’elimu tena la tena dia vɔ kotsha ɛkɛndɛ awɔ wa l’atei w’etshumanelo, ndo Kalasa k’Olimu w’Ombatshi Mboka kasha esambisha wa lo tena ndo lo tena mbuta ate ambatshi mboka, akoka wa vɔ ndjâla tomanamana l’olimu awɔ w’esambishelo.
12. Lo ndjela ekongelo ka wetshelo, kakɔna kasalema lomingu la lomingu?
12 Woho okina w’ekongelo ka wetshelo ele sanganya tshanu ya lomingu la lomingu yasala tshumanelo olekanyi 75 500 di’ekambi wa Jehowa wa l’andja w’otondo. Onde wɛ ekɔ lo kondja wahɔ tshɛ oma lo sanganya shɔ? Oma lo woho wahokɛyɛ lotui lo wetshelo washama, onde wɛ mɛnyaka ɔnɛ wɛ ekɔ lo kalasa kaki Nzambi, lo yoho ya didjidji? Onde ehamelo kayɛ ka lo nyuma mɛnyaka anto akina ɔnɛ wɛ mɛtɛ ekɔ la “lolemi l’anto wambetshama”?—Isaya 50:4, NW; 1 Timote 4:15, 16.
Wambetshama lo Sanganya ya l’Etshumanelo
13. (a) Naa yoho mɔtshi y’ohomba efula yetsha Jehowa anto ande ɛlɔ kɛnɛ? (b) Woho akɔna wakokaso mɛnya lowando lele laso lo dikambo dia Tshoto y’Etangelo?
13 Jehowa mbetshaka anto ande lo yoho ya lânde oma lo tshimbo ya wekelo wa Bible wa lomingu la lomingu, oma l’ekimanyielo ka Tshoto y’Etangelo. Onde wɛ mbɔsaka losanganya lɔsɔ oko dihole diakokayɛ mbetshama oma le Jehowa? Kânga mbele Isaya 50:4 kotshamaka ntondotondo le Yeso, divɛsa sɔ kokaka kotshama ndo le wanɛ tshɛ wayakimanyiya la tɛdikɔ takɔshi Nzambi dia vɔ nongola “lolemi l’anto wambetshama.” Yoho mɔtshi yakokayɛ mɛnya ɔnɛ wɛ mbɔsaka Tshoto y’Etangelo la nɛmɔ ele lo mbalaka numɛlɔ tshɛ kam’akikondjayɛ aha la tshimbatshimba. Ndo nto, etena kekama Tshoto y’Etangelo l’etshumanelo, wɛ kokaka mɛnya lowando lele layɛ le Jehowa lam’ayoyonga lo losanganya lakɔ, ndo lam’ayoyoyalɔngɔsɔlaka dia sala wotelo wa lo sɛkɛ w’elongamelo kayɛ.—Heberu 10:23.
14. (a) Lande na kele mbisha kɔmatɛrɛ lo sanganya ekɔ tshondo ya diɛsɛ di’ohomba? (b) Naa weoho ɛmɔtshi wa kɔmatɛrɛ y’oma le ana w’akɛnda yaleka keketsha anto?
14 Onde wɛ mbeyaka ɔnɛ oma lo kɔmatɛrɛ yayɛ lo sanganya wɛ kokaka mbisha lonya lo ekongelo ka woke ka wetshelo waki Jehowa? Mɛtɛ, mbisha kɔmatɛrɛ lo sanganya ekɔ yoho y’ohomba efula yakokaso tshutshuyana onto la onyande “lu ngandji la lu elimu w’ololo.” (Heberu 10:24, 25) Onde ana w’akɛnda kokaka mbisha lonya lo ekongelo ka wetshelo ndo vɔ lawɔ? Eelo, vɔ kokaka. Kɔmatɛrɛ y’oma ka tshina di’otema yasha ana w’akɛnda keketshaka epalanga mbala efula. Tena dimɔtshi, eyoyo waya lo sanganya yaso wakatshutshuyama oma lo kɔmatɛrɛ y’ana w’akɛnda dia vɔ ndeka mbidja mɛtɛ ka lo Bible yimba. Ana amɔtshi w’akɛnda mongaka la mbekelo ka mbalaka kɔmatɛrɛ woho wofundamitɔ lo odingɔ ɔmɔtshi kana vusolaka kɛnɛ kawotɛ opalanga ɔmɔtshi lo hiɔtɛhɔtɛ. Koko, anto keketshamaka efula etena kalɔngɔswama kɔmatɛrɛ yawɔ dimɛna efula. Kɔmatɛrɛ ya ngasɔ mɛtɛ mbishaka Ombetsha aso a Woke nɛmɔ ndo nɛmiyaka ekongelo kande ka wetshelo ka lâdiko.—Isaya 30:20, 21.
15. Kakɔna kakoka ambutshi sala dia vɔ kimanyiya an’awɔ woho wa vɔ mbishaka kɔmatɛrɛ y’ɛlɔlɔ?
15 Ekɔ ɔngɛnɔngɛnɔ dia mɛna ana walanga dia tombola Nzambi kaso ndo vɔ lawɔ. Yeso akɔsaka lotombo la ngasɔ l’oma le ana w’akɛnda la nɛmɔ. (Mateu 21:15, 16) Ekumanyi kɛmɔtshi k’Okristo ekɔ lo mbuta ate: “Lam’akimi leke dikɛnda, dimi lakalangaka mbisha kɔmatɛrɛ lo Wekelo wa Tshoto y’Etangelo. L’ɔkɔngɔ wa nde kimanyiyami lo nɔngɔsɔla kɔmatɛrɛ kɛmɔtshi, papa akanɔmbaka dia dimi vusola kɔmatɛrɛ kakɔ olekanyi mbala esambele.” Ondo lam’asalanyu wekelo anyu wa Bible wa l’atei a nkumbo, nyu ambutshi kokaka kimanyiya an’anyu dia vɔ nɔngɔsɔla kɔmatɛrɛ l’ɛtɛkɛta awɔ hita lo edingɔ ɛmɔtshi wa lo Tshoto y’Etangelo. Nyowakimanyiya dia vɔ shihodia diɛsɛ dia woke diele lawɔ dia mbisha lonya lo ekongelo ka wetshelo waki Jehowa.
16. Ɛlɔlɔ akɔna wakondjama oma lo Kalasa k’Olimu wa Teokrasi, ndo wa na wakoka fundja nkombo yawɔ lo kalasa kɛsɔ?
16 Oyadi wanɛ wele la diɛsɛ dia sala asawo amɔtshi kana wanɛ wahokamɛ awui watama, vɔ pombaka mbidja yimba lo wetshelo wa lo weoho ekina wa sanganya y’Akristo. L’edja k’olekanyi ɛnɔnyi 50 polo ndo kakianɛ, Jehowa ekɔ lo kamba la Kalasa k’Olimu wa Teokrasi ka lomingu la lomingu dia mbetsha miliyɔ y’apami la amato dia vɔ sambisha losango la Diolelo lo yoho y’ɔlɔlɔ. Ase etshumanelo kokaka fundja nkombo yawɔ lo kalasa kakɔ kɛsɔ, ndo anto weke oma la tatɛ la mbɔtɔ lo sanganya kokaka fundja nkombo yawɔ lɔkɔ naka vɔ wekɔ la lɔsɛnɔ lɔtɔnɛ la adjango w’Okristo.
17. (a) L’oyango akɔna wa lânde wakalɔngɔswama Losanganya la lo Sɛkɛ? (b) Akambo akɔna wahomba ombahemi a loseke wa lo dako dia lo sɛkɛ mbohɔka?
17 Yoho mɔtshi yaya edja efula y’ekongelo ka wetshelo ele Losanganya la lo Sɛkɛ. Oko wadiɛnya lokombo la losanganya lakɔ, losanganya lɔsɔ lakalɔngɔswama dia mbewoya djekoleko wanɛ wele kema Ɛmɛnyi wa Jehowa atshina a wetshelo w’oma lo Bible. Ɔnkɔnɛ, onto lasha dako sɔ pombaka tɛkɛta awui akɔ lo yoho yakokawɔ mbokɛma le wanɛ woka losango mbala ka ntondo. Kɛdikɛdi, vɔ pombaka nembetshiya tɔtɛkɛta tele oko: “ekoko ekina,” “anangɛso,” la “atshikadi,” nɛ dia mbeyaka monga ko wanɛ wele kema Ɛmɛnyi wa Jehowa hawoshihodia tɔtɛkɛta tɔsɔ. Lam’ele wanɛ wɔtɔ lo Losanganya la lo Sɛkɛ mbeyaka monga la tokanyi ndo la waonga wahɔtɔnɛ l’Afundelo—kânga mbetawɔma waonga asɔ lo atshunda w’anto wa nshi nyɛ—ombahemi a loseke pombaka monga la yewo nshi tshɛ ndo nde hahombe mɔnyɔla tokanyi kana waonga wa ngasɔ ndoko lushi ɔtɔi.—Ɛdika la 1 Koreto 9:19-23.
18. Naa sanganya kina ya l’etshumanelo yasalema lomingu la lomingu, ndo oyango akɔna wele layɔ?
18 Losanganya lɔmɔtshi ekɔ Wekelo wa Dibuku wa l’Etshumanelo, lo losanganya lakɔ, ekanda wakalɔngɔswama oma le ɔhɔmbɔ wa kɔlamelo ndo wa kɛsɔ mbekamaka lomingu tshɛ kâmɛ la Bible. Dibuku La Révélation: le grand dénouement est proche! mbele dibuku diekama nshi nyɛ lo wedja efula. Losanganya l’Olimu lakalɔngɔswama dia kimanyiya anto wa Jehowa woho wa vɔ ndjâla l’akoka wa kamba olimu efula l’esambishelo ka lokumu l’ɔlɔlɔ la Diolelo ndo dia mbetɛ anto ambeki.—Mateu 28:19, 20; Mako 13:10.
Wambetshama lo Sanganya ya Weke
19. Naa sanganya ya weke yalɔngɔsɔla “ɔhɔmbɔ” ɔnɔnyi l’ɔnɔnyi?
19 Aya edja kolekanyi ɛnɔnyi lokama, ‘ɔhɔmbɔ wa kɔlamelo’ ekɔ lo nɔngɔsɔla sanganya ya weke la nyɛ yoleki weke dia mbetsha ndo dia keketsha Akristo wa mɛtɛ lo yoho ya lânde. Nshi nyɛ, weoho esato wa sanganya ya weke ya ngasɔ yekɔ lo salema ɔnɔnyi l’ɔnɔnyi. Olui ɔmɔtshi wa tshumanelo diakenga otshimbedi mbɔtɔka lo losanganya la woke lasalema lushi ɔtɔi. L’ɔnɔnyi tshɛ, otshimbedi tshɛ salaka losanganya lɔmɔtshi la nshi hiende lelɛwɔ ɔnɛ losanganya l’otshimbedi. Lâdiko dia lâsɔ, elui ɛmɔtshi w’etshimbedi salaka losanganya lokina lelɛwɔ ɔnɛ losanganya la distrikɛ. Lo ɛnɔnyi ɛmɔtshi, sanganya mɔtshi ya wedja efula salemaka. Sanganya shɔ yɔ̂tɔ ndo Ɛmɛnyi wa Jehowa woye oma lo wedja ekina keketshaka mbetawɔ k’anto wa Jehowa mɛtɛ!—Ɛdika la Euhwelu k’Elembe 16:16.
20. Lo sanganya ya weke y’Ɛmɛnyi wa Jehowa, vɔ tokaka epole ɔsɛkɛ nshi tshɛ lo dikambo diakɔna?
20 L’ɔnɔnyi 1922, lam’akatshumana suke l’anto 10 000 la Cedar Point, Ohio, lo wodja w’États-Unis d’Amérique, asolo w’ase losanganya wakalokɔlokɔ lam’akâkeketsha ombahemi a loseke ate: “Lushi l’ɛlɔ lekɔ oma nshi. Hanyɛnyi, he Nkumekanga ekɔ lo mbolɛ! Nyu nyekɔ atɛkɛtshi ande. Omalɔkɔ, nyosambisha, nyosambisha, nyosambisha, Nkumekanga la diolelo diande.” Sanganya ya weke ya ngasɔ tetemalaka mbika epole ɔsɛkɛ l’olimu w’esambishelo. Oko ɛnyɛlɔ, lo losanganya la wedja efula lakasalema l’Osomba wa New York l’ɔnɔnyi 1953, diewoyelo diakashama lo kɛnɛ k’endana l’ekongelo kakasalema lo tshumanelo tshɛ dia mbetshaka apandjudi w’eyoyo wahatekesanɛ l’olimu woho wa vɔ sambisha lo luudu la luudu. Oma lo woho wakawakitanyiyaka alako wa lo ekongelo kɛsɔ, etombelo w’ɛlɔlɔ efula w’oma l’olimu w’esambishelo ka Diolelo wakayala lo wedja efula.
Wambetshama Oma le Nzambi dia Vɔ Mbetsha Anto Akina
21. Diɛsɛ diakɔna dialangaso kondja, aha la pandja oyango adiɔ?
21 Mɛtɛ, Jehowa ekɔ l’ekongelo ka dimɛna efula ka wetshelo lanɛ la kɛtɛ ɛlɔ kɛnɛ! Wanɛ tshɛ wayakimanyiya l’ekongelo kakɔ kokaka mbetshama oma le Nzambi, eelo, vɔ kokaka monga l’atei a wanɛ wakalongola “lolemi l’anto wambetshama.” Ande diɛsɛ dia mbɔtɔ lo kalasa kaki Nzambi, lo yoho ya didjidji lee! Koko, lam’etawɔso diɛsɛ sɔ, hatohombe mbohɛ oyango adiɔ. Jehowa aketsha Yeso dia nde mbetsha anto akina, ndo Yeso aketsha ambeki ande dia vɔ sala olimu akɔ wâmɛ oko wakandasalaka, koko lo yɛdikɔ yoleki woke. Woho akɔ wâmɛ mbele, tekɔ lo mbetshama lo ekongelo ka woke ka wetshelo waki Jehowa l’oyango wa mbetsha anto akina.—Joani 6:45; 14:12; 2 Koreto 5:20, 21; 6:1; 2 Timote 2:2.
22. (a) Okakatanu akɔna waki la Mɔsɛ nde la Jeremiya, ko woho akɔna wakakandolama okakatanu akɔ? (b) Naa eshikikelo kakoka monga laso ɔnɛ Nzambi ayolama di’olimu w’esambishelo ka Diolelo kotshama?
22 Onde wɛ mbutaka oko wakate Mɔsɛ ɔnɛ: ‘Dimi haladja ntɛkɛta,’ kana oko wakate Jeremiya ɔnɛ: “Dimi haleyi nteketa”? Jehowa ayokokimanyiya ndo wɛ oko wakandâkimanyiya. Nde akatɛ Mɔsɛ ate: “Dimi layuyala la unyo aye.” Nde akatɛ Jeremiya ate: ‘Tokake wɔma . . . Dimi lekɔ kâmɛ la yɛ.’ (Etumbelu 4:10-12; Jeremiya 1:6-8) Lam’akalange ewandji w’ɛtɛmwɛlɔ nɛmbɔhaya ambeki ande, Yeso akate ate: “Naka vo wayolembohala, ave wayuhangohango.” (Luka 19:40) Koko, ave kopangɔhangɔ l’etena kɛsɔ, ndo vɔ kema l’ohomba wa mpangɔhangɔ nshi nyɛ nɛ dia Jehowa ekɔ lo kamba la nemi y’anto wambondetsha dia vɔ mbewoya losango lande la Diolelo.
[Caption]
Kɔmatɛrɛ y’oma ka tshina di’otema yasha ana w’akɛnda keketshaka epalanga mbala efula
Onde Wɛ Kokaka Kadimola?
◻ Naa diokanelo di’oshika dia l’asa Ombetsha l’ombeki diɛnyama lo Isaya tshapita 50?
◻ Woho akɔna watetemala Jehowa kɛndjakɛndja ekongelo ka woke ka wetshelo?
◻ Naa weoho ɛmɔtshi w’ekongelo ka wetshelo waki Jehowa?
◻ Lande na kele ekɔ diɛsɛ dia mamba dia mbisha lonya l’ekongelo ka wetshelo waki Jehowa?