“Lekɔ Ohomba Efula Le Jehowa!”
EKAMBI efula wa Jehowa wa kɔlamelo wekɔ lo ndɔshɛ lo “tena dia wulu” nɛ la tokanyi ta ndjaokaka oko anto wele kema ohomba. (2 Timote 3:1) Ɔsɔ kema dikambo dia diambo nɛ dia ɔtɔi ɔmɔ wa l’atei w’‘etsha wa lokeso’ wa Satana ele dia sala woho wa sho ndjaoka ɔnɛ ndoko latolanga koyanga ndo Otungi aso! (Efeso 6:11) Tshoto y’Etangelo ya Mɔmbi 1, 1995, yaki l’asawo ahende wa wekelo wa l’etshumanelo wele l’ɛtɛ w’awui wasungana la dikambo sɔ w’ɔnɛ: “Wɛ Ekɔ Ohomba Efula lo Asho wa Nzambi!” la “Woho Akɔna Wakokaso Tshutshuyana lo Ngandji la l’Elimu w’Ɔlɔlɔ Na?” Asawo asɔ wakafundama dia tohola ɔnɛ Jehowa mbɔsaka weolo tshɛ wadjaso la nɛmɔ. Ɛtɛkɛta ɛmɔtshi wa lowando wakatalongola ɛnɛ:
“Layami Ɔmɛnyi wa Jehowa, ɔnɔnyi wa 27 ɔnɛ latokaka periodikɛ kamunanda l’evɔ ngasɔ. Dimi kokoka mbikikɛ delo—lo menda ekeketshelo kakambela asawo anɛ. Kakianɛ loyaoka dia Jehowa nangakami efula. Ekɔ watekana oko oshikɔ waki l’ahɛka wambomimwɛ.”—C. H.
“Lo lushi ɔtɔi, lakadia periodikɛ kɛnɛ esangɔ ɛnɛi. Lakangɛnangɛna woho wakatama lo sawo diakɔ ɔnɛ: wakaketsha akambo a kashi naka wɛ kanyiyaka ɔnɛ wɛ kema ohomba. Layanga tatɛ takambaka la sawo nɛ dia kimanyiya ɛkɔkɔ ndo l’esambishelo ka lo soko la soko.”—M. P.
“Satana kambaka olimu wa wolo lam’asalande dia koyanga wanɛ walanga Jehowa ndjaoka dia vɔ kema ohomba ndo hawokoke mbokama ngandji. Dikambo dimɔtshi dia l’atei a wanɛ woleki mbisha ekeketshelo diakatohola olui w’‘ɔhɔmbɔ wa kɔlamelo’ diakamâle ele di’ɔnɛ Jehowa tolangaka efula ndo mandolaka tokambokambo tshɛ tawosalɛso. L’edja k’ɛnɔnyi efula laki lo ndjaoka paka oko woho wakanyatɛkɛta l’asawo anɛ. Latayaokaka di’ɔnɛ dimi kokaka mbokama ngandji oma le Jehowa, ɔnkɔnɛ lakahembaka kamba woho w’anyanya l’olimu ande ɔnɛ kana lokamaka ngandji kɛsɔ. Koko lakatshutshuyamaka oma l’onongo la sɔnyi. Ko ndoko dikambo, oyadi efula ka wenya wakametsha l’olimu, kana efula k’anto wakamakimanyiya, lakoke dia kɛsɔ katakoke. Lakɛnaka paka ɔnɛ leke l’ohomba w’ema kɛmɔtshi. Kakianɛ etena kakambɛmi Jehowa la ngandji, lekɔ lo kana dia nde ekɔ lo mɔnamɔna ndo ekɔ la nɛmɔ l’ɔtɛ ami. Kɛsɔ kaleka fudia ngandji kami otsha le nde, ngandji katshambandeko tomakami dia nyomoleka nanga kamba. Kakianɛ laya l’ɔngɛnɔngɛnɔ oma l’olimu wakambɛmi Jehowa.”—R. M.
“Lo mɛtɛ wanɛ wekɔ asawo wahamatalaka, woleki amɛna tshɛ, waleka mbisha ekeketshelo, eelo, vɔ minandaka etema aso! Aya ɛnɔnyi 55 wemi lo mbala Tshoto y’Etangelo, ndo numɛlɔ efula y’amɛna yakatombaka. Koko, numɛlɔ kɛnɛ amboleka oseka ema tshɛ kakatakondja dia mbɔladia ekiyanu aso, eokelo, wɛɔma w’ɔnɛ sho ‘kema ohomba’ ndo ‘hatolangema’ ndo hatokokaki sala woho wa ‘mbokama’ ngandji ka Jehowa. Tshoto y’Etangelo nyɛ yekɔ la woho w’ekimanyielo ka lo nyuma kahomba anangɛso. Lokanyi lami ele dia kamba l’asawo anɛ mbala la mbala lanɛ watamembola ɛkɔkɔ.”—F. K.
“Le wanɛ wa l’atei aso walɔshanya la tokanyi ta ndjaɔsaka oko ema k’anyanya, koyanga woho wa ndjaɔnyɔlaka, mbeyaka monga wolo efula dia ntshumanya weolo aso ko tetemala lo mɛtɛ. Sawo nɛ diekɔ oko yoho mɔtshi ya tôka kɛtshi ndo ndjadja lo dihole diaso, diɔ diaki oko onto lambɔnɔ okanga watutsha kandji l’asolo. Ande ekeketshelo dia mbala tɔtɛkɛta ta nganɛ lo Tshoto y’Etangelo lee! ndo dia mbeya aha la tâmu ɔnɛ: Jehowa mɛtɛ mbokaka mɛtɛ! Losaka lo woho watoholanyu ɔnɛ Jehowa hatshutshuya anto ande l’ɔtɛ w’onongo, sɔnyi kana wɔma. Koyanga mbele olambo ami l’olimu w’esambishelo kema efula l’ɔtɛ wa pâ y’akambo wa falanga ndo akambo a yonge lo nkumbo kaso, lekɔ lo tatane ekotshamelo lo kɛnɛ kakokami sala. Lambɛna dia lekɔ l’ɔngɛnɔngɛnɔ efula l’olimu lanɛ wahembami dia tshika ngandji onge wolo watshutshuya.”—D. M.
“Laki oma la shidiya mbala sawo diata ɔnɛ: ‘Wɛ Ekɔ Ohomba Efula lo Asho wa Nzambi!’ Asɔyi akatatombaka lakamatalaka oseka odingɔ tshɛ. Lakôtɔ lo nkumbo kaki kombokanaka ngandji efula. Lakɔnyɔamaka, lakahɛnyahɛnyamaka ndo lakɔlamaka. Ɔnkɔnɛ oma ko dikɛnda lakayaokaka oko dimi kema ohomba. Polo ndo kakianɛ lekɔ paka la tokanyi takimi latɔ ntondo, tɔ mbapɛnyahɛnya lanɛ wahomanami la dikambo dia wâle. Lanɛ wakamatshike kamba oko ekumanyi l’atei w’etshumanelo, lakoke oko lambondja oko wokomondjɛka—Nzambi, nkumbo kami, ndo anangɛmi wa l’atei w’etshumanelo. Tokanyi tɔnɛ hatoshila esadi, koko sawo nɛ diambokoma l’etena k’ɔlɔlɔ diambokimanyia dia dimi monga la lokanyi lakoka la lonto lami. Lɔ lamboyɔlɔngɔsɔla ɛnɛlɔ kami k’akambo.”—D. L.
“Losaka lo sawo diata ɔnɛ: ‘Wɛ Ekɔ Ohomba Efula lo Asho wa Nzambi!’ Lekɔ lo ndɔshɛ la nsaki ya ndjahetshaka ndo la tokanyi ta ndjaokaka di’ɔnɛ dimi kema ohomba, akambo asɔ wekɔ l’etshina oma l’ɔhɛnyɛhɛnyɛlɔ w’oma lo dikɛnda. Mɛnamaka mɛtɛ ɔnɛ lokanyi la kɔlɔ lɔsɔ lekɔ tshêlo ya kɔlɔ ya Satana ndamɛ. Lɔ mbeyaka koyanga toma onto dia nde ndjadiaka. Lo mɛtɛ dimi la dia kambaka oseka lushi tshɛ dia mbika ekolo la ntondo ka kashi k’ɔnɛ dimi halokoke mbokama ngandji. Sawo nɛ diekɔ l’ohomba le mi woho wahanyakoke mbeya.”—C.F.
“Ɛlɔ kɛnɛ, djekoleko anangɛso, wekɔ lo mbetawɔ lokanyi l’ɔnɛ Jehowa mandolaka etsha wasokoyama oma lo ngandji oleki wɛnɛ wasalema la wolo. Wekelo wa lonto laki Jehowa loludi la ngandji, woho wayashande le anto ande l’onto ndo l’onto, ndo woho wôkanande ngandji ndo wayakimɔnde tokeketshaka ndo totshutshuyaka. Lo menda dikambo sɔ, kanɛ wakatalongola sawo diata ɔnɛ: ‘Wɛ Ekɔ Ohomba Efula lo Asho wa Nzambi!’ efula wakɛnya lowando lawɔ. Mɛnamaka dia oko wambodihwela anto efula mboka dia vɔ ndeka keketsha lɔngɛnyi lawɔ lasawɔ la Jehowa. Dimi la wadiɛmi tambolanga dia mɛnya lowando lo woho wakafundama periodikɛ Tshoto y’Etangelo yatomba nshi nyɛ la wangasanu wa ngasɔ. Tekɔ lo ndɔshɛ dia kamba l’akambo anɛ etena katatembola tshumanelo.”—Oma le omendji w’eteta ɔmɔtshi.
“Lekɔ ombadi wa kɔlamelo suke l’ɛnɔnyi 30, koko latalaka ndoko dikambo diasalanganya otema w’onto ɔnkɔnɛ ndo dialembetshiya awui dimɛna nganɛ. Afundelo w’amɛna ndo wele la wolo wakakimanyiya dia dimi monola kashi yakonɛma lo tokanyi tami, ko mbishami diaaso dia mamema Jehowa. L’edja k’ɛnɔnyi efula lakakambɛka Jehowa la nkum’otema ka kɔlɔ. Laki paka l’eokelo ka lo yimba keto lo kɛnɛ k’endana la tshungo ndo la ngandji ka Nzambi. Losaka heyama lo asawo anyu wa lomba ndo wele la tokanyi t’amɛna. Lekɔ lo nongamɛ dia mbala asawo efula wele oko vɔ.”—M. S.
“L’ɛnɔnyi 29 akɔ tshɛ wemi lo mɛtɛ, halohɔ dia ekɔ sawo dimɔtshi diakamunanda l’evɔ ndo tshutshuyami dia mboka losaka ndo demba vu vu ngasɔ. Koyanga mbakamôtɔ l’atei a nkumbo kaki la yambalo ndo la ngandji k’efula, latokaka ohomba wa monga la lɔsɛnɔ, kana monga la dihonga dia ndjaoka oko ɔnɛ lakoka kambɛ Jehowa. L’ɔkɔngɔ wa mbala sawo nɛ, lakakusɛ adwe, ndo l’asɔi efula lo washo lakasha Jehowa losaka. Layɔngɛnangɛnaka sawo nɛ pondjo pondjo. Layotatɛ ndjaɔsa woho wotshikitanyi nɛ dia kakianɛ lamboka di’ɔnɛ lekɔ ohomba efula le Jehowa.”—D. B.