Anto Wekɔ L’ohomba W’ewo Ka Nzambi
“We ayulimbitela woma wa [Jehowa], ayukundja [ewo ka Nzambi, “NW”].”—TUKEDI 2:5.
WONYA watɛkɛtaso ɔnɛ, awui w’anto suke la 5 600 000 000 wekɔ lo tokola lanɛ la nkɛtɛ. Lushi la lushi, dui diayɛ hita tokolaka mbala 100 000 ndo fufaka yɛdikɔ ya litɛlɛ 7 600 ya dikila dieteta kilɔmɛtɛlɛ 100 000 l’atei w’esandji k’ɛlɔnda wa dikila wa lo demba diayɛ. Ndoko omunyi okina wakamba lotumu la wolo loleki lɔnɛ lakamba ɛngɔ kɛsɔ ka diambo kakatonge Nzambi.
2 Ekɔ ndo etema wa didjidji 5 600 000 000 wakamba olimu lanɛ la nkɛtɛ. L’otema aso wa didjidji mbodjashi solo diaso, mposa yaso ndo saki yaso. Vɔ mbele etshina ka tokanyi taso, yimba yaso ndo nango yaso. Otema wa didjidji kokaka monga la lotamanya kana ndjakitshakitsha, la lonyangu kana l’ɔngɛnɔngɛnɔ, vɔ kokaka monga lo wodjima kana l’osase.—Nehemiya 2:2; Tukedi 16:5; Mateu 11:29; Etsha 14:17; 2 Koreto 4:6; Efeso 1:16-18.
3 Jehowa Nzambi kokaka mbala otema w’onto. Tukedi 17:3 mbutaka ɔnɛ: “Puki keko dia ndelola fesa, khuka ka ntshula paunyi. Keli [Jehowa katɔsɛdingolaka, NW] etema.” Koko, lo dihole dia nde mbalaka tsho l’otema w’oseka onto tshɛ ko mbɔ̂sɛ tɛdikɔ tɔmɔtshi, Jehowa ekɔ lo kamba l’Ɛmɛnyi ande dia munanda etema w’anto la lokumu l’ɔlɔlɔ. Dikambo sɔ mbɔtɔnɛka l’ɛtɛkɛta ɛnɛ waki ɔpɔstɔlɔ Paulo: “Untu tshe [layɔtɛndɛ lokombo la Jehowa, NW], ayushimbamela. Keli, ukundi ayuweya [tɛndɛ, NW] one lahawatetawo? Ukundi eyawo mbêtawo, lam’ahawatuki lukumu landi? Ukundi eyawo mbuka, lam’ahawo la usambisha? Ukundi eyawo nsambisha, lam’ahawatatumama? Uku akafundama ati: Ndi amena weli ekulu a wane wasambisha lukumu l’ololo [l’akambo w’ɛlɔlɔ, NW] li!”—Romo 10:13-15.
4 Jehowa akɛnyi ɔlɔlɔ dia toma Ɛmɛnyi ande lo tokoma ta nkɛtɛ dia ‘tasambishaka lokumu l’ɔlɔlɔ l’akambo w’ɛlɔlɔ’ ndo dia totana anto wele l’etema wodihwami hwe. Ɛlɔ kɛnɛ, taya anto ndekana 5 000 000—yɛdikɔ y’Ɔmɛnyi wa Jehowa ɔtɔi l’anto suke la 1 200 wa lanɛ la nkɛtɛ. Munanda etema wa miliyara y’anto la lokumu l’ɔlɔlɔ kema dikambo dia wɔdu. Koko Nzambi ekɔ lo nɔmbɔla olimu ɔsɔ lo tshimbo ya Yeso Kristo ndo ekɔ lo kotola anto w’etema ɛlɔlɔ. Ɔsɔku mbakotshama pɔlɔfɛsi kofundami l’Isaya 60:22 kata ɔnɛ: “One leli tshitshe ayuyala kinunu, ona one luleki tshitshe wudja a wulu. Dimi, [Jehowa], layusamanya dikambu ne l’etena kadio.”
5 Etena kakɔ kɛsɔ tɔ kɛnɛ, ndo dikambo dimɔtshi diekɔ lo mɛnama hwe—miliyɔ y’anto wa lanɛ la nkɛtɛ wekɔ l’ohomba w’ewo. Lo mɛtɛ mɛtɛ, ewo kɛdikɛdi tshelo ya mbekesanɛ l’akambo oma lo diewo, oma l’ɔsɛdingwelo, kana oma lo wekelo. Andja ɔnɛ waya la ewo k’efula. Wambohama l’akambo wele oko wɛmbɛlɔ, l’akambo w’aseka enganga, ndo wa mbewoyana nsango. Ko onde, ewo ka l’andja ɔnɛ mbele anto latɔ ohomba oka? Atonga na! Ata, ɛhɛnyɔhɛnyɔ, elando, ndo nyɔi yekɔ lo tetemala mɛnya anto pâ. Mbala efula, lomba la l’andja ɔnɛ lekɔ oko ditshu diatɛmbama la lɔpɛpɛ la l’oswe.
6 Dia sho shihodia dikambo sɔ, tɔ̂shi ɛnyɛlɔ kɛnɛ: Ambeta oko ɛnɔnyi nkama hiende, wakikɔ la mbekelo ka mɔmɔlaka dikila di’ɔkɔnyi ɔnɛ kele nde akɔnɔ. Wakɔmɔlaka George Washington, ɔnɔmbɔdi wa ntondo wa wodja w’États-Unis, dikila mbala la mbala lam’akinde suke la nyɔi. Wonya ɔmɔtshi nde akayotaka ate: “Nyotshike mvu ki; dimi hatokoka tshikala edja nto.” Nde akate mɛtɛ, nɛ dia nde akavu ko lushi lakɔ lâmɛ—lo Diɛla Woke 14, 1799. Ɛlɔ kɛnɛ, lo dihole dia vɔ mɔmɔlaka dikila di’ɛkɔnyi, wôleka tɛtɛ lo dikambo dia mbidjaka dikila lo demba di’onto. Tosambu tɔsɔ tohende konyaka anto woho w’anyanya lo nyɔi. Koko l’edja kɛsɔ tshɛ, Dui dia Nzambi diekɔ lo mbuta ɔnɛ: “Nyoseke . . . dikila.” (Etsha 15:29) Ewo ka Nzambi kekɔ nshi tshɛ ɔlɔlɔ, mɛtɛ, ndo tɔ hashile nɛmɔ.
7 Tɔ̂shi ɛnyɛlɔ kekina kɛnya ɔnɛ ekɔ anyanya ndjaɛkɛ lo lomba la l’andja ɔnɛ. L’edja k’ɛnɔnyi efula, wa nomb’ewo y’endana la eongelo ka yimba y’onto wakâmɛka dipanda di’ana, koko ɔmɔtshi a l’atei a wanɛ wakâmɛka dipanda sɔ akayetawɔka l’ɔkɔngɔ diko ate ɔsɔ aki munga. Tshunda di’Ase Allemagne di’Endana la Wekelo w’Ɛtɛkɛta diakate lushi lɔmɔtshi ɔnɛ dipanda sɔ diekɔ “lo yoho mɔtshi ndo lo tshimbo mɔtshi l’onongo lo dikambo di’ekakatanu wele lam’asaso sho l’ɛlɔngɔlɔngɔ nshi nyɛ.” Lomba la l’andja ɔnɛ tekekɔka wate kana oko ɛngɔ katɛmbama la lɔpɛpɛ, koko ewo k’oshika ka l’Afundelo hasukasukaka kânga yema. Bible mbishaka alako w’eshika lo dikambo dia diodielo di’ana. Tukedi 29:17 mbutaka ɔnɛ: “Uhangwelaki on’aye dia mbungula, ku ndi ayukusha ki; ee, ndi ayongenyangenya utema aye.” Ohokwelo wa ngasɔ pombaka mbishama la ngandji, nɛ dia Paulo akafunde ate: “Nyu washi, tanyutshaki ananyu kele, keli nyuwaudia lu elembe la lu wetshelu wa [Jehowa].”—Efeso 6:4.
“Ewo ka Nzambi”
8 Kânga mbakɔtɔ Paulo kalasa efula, nde akate ate: “Naka untu ambukana ati: Dimi la yimba l’atei anyu, ndi ayali enginya, dia ndi ndjala la yimba, ne dia [lomba l’andja ɔnɛ lekɔ enginya lo asho wa Nzambi, NW].” (1 Koreto 3:18, 19) Paka Nzambi oto mbakoka mbisha anto ewo kele lawɔ ohomba mɛtɛ. Tukedi 2:1-6 mbutaka ɔnkɔnɛ lo dikambo sɔ: “On’ami, naka we ayulunga aui ami, ndu ayulama elembe ami; naka we ayuhuke tui lu [lomba, NW], ndu ayediya utema aye lu ewu, ee, lam’ayuyulelela yimba, ndu lam’ayuyuwelela ewu; naka we ayukiyanga uku fesa, ndu ayukiyanga wulu uku eumbelu kushami, ku we ayulimbitela woma wa [Jehowa], ayukundja [ewo ka Nzambi, NW]. [Jehowa] atushaka antu [lomba, NW]. Yimba la ewu watutumbaka uma l’unyo andi.”
9 Wanɛ watshutshuyama l’etema w’ɛlɔlɔ mpokɛka lotui dia kondja lomba lam’akambawɔ la ewo k’oma le Nzambi lo yoho y’ɔlɔlɔ. Vɔ mbɛdiyaka etema awɔ otsha l’ɛsɛdingwelo, lam’asɛdingolawɔ akambo wekawɔ la yambalo tshɛ. Mɛtɛ, vɔ mbelɛwelɛka yimba, mbuta ate dikoka dia mɛna woho wɔtɔnɛ tenyi dia dikambo dimɔtshi. Anto w’etema ɛlɔlɔ salaka akambo wate kana oko wanɛ watshima fɛsa ndo wayanga diangɔ di’oshinga wolo dioshami. Ko naa ɛngɔ k’oshinga wolo katana wanɛ wele l’etema wodihwami hwe na? Toko “ewo ka Nzambi.” Ewo kakɔ kɛsɔ kɛdikɛdi na? Lo tshena pe, kɛdikɛdi ewo katanema l’atei wa Bible, Dui dia Nzambi.
10 Ewo ka Nzambi kekɔ pudipudi, kekɔ shikaa, ndo tɔ mbishaka lɔsɛnɔ. Tɔ mbishaka onto demba dia wolo lo nyuma. Paulo akakeketsha Timɔtɛ ate: “Ukimeli yediko ya aui w’ololo wakayuki le mi, lu mbetawo la ngandji keli le Kristu Jesu.” (2 Timote 1:13, sho mbɛnganyisha alɛta ango.) Ɔtɛkɛta wekɔ la yɛdikɔ y’awui kana tɔtɛkɛta tɔmɔtshi. Woho akɔ wâmɛ mbele, “ɔtɛkɛta wa pudipudi,” mbuta ate mɛtɛ ya l’Afundelo, wekɔ la “yediko ya aui w’ololo,” awui wele l’etshina kawɔ paka lo ɔtɛ a dui wa lo Bible, ɔtɛ a dui akɔ ko oyindjelo wa lowandji laki Jehowa lo tshimbo ya Diolelo. (Zɛfaniya 3: 9, NW) Sho pombaka nama yɛdikɔ shɔ y’awui w’ɔlɔlɔ lo yimba ndo l’otema aso. Naka sho nangaka mbewɔ di’otema aso wa didjidji tata hemɔ ndo tshikalaka la demba dia wolo lo nyuma, kete sho pombaka ndjelaka awui wa lo Bible lo lɔsɛnɔ laso la lushi la lushi ndo ndɛka wa mma tshɛ wa lo nyuma watosha Nzambi lo tshimbo y’“ɔhɔmbɔ wa kɔlamelo ndo wa kɛsɔ.” (Mateo 24:45-47, NW; Tito 2:2) Tôhɔke nshi tshɛ ɔnɛ: tekɔ l’ohomba w’ewo ka Nzambi dia sho ndjâla la demba dia wolo lo nyuma.
11 Tênde ɛkɔkɔ ekina wɛnya ɔnɛ miliyara y’anto wa lanɛ la nkɛtɛ wekɔ l’ohomba w’ewo ka Nzambi. Onde vɔ tshɛ mbeyaka woho wakatongama nkɛtɛ la anto? Kema, vɔ haweye. Onde anto tshɛ mbeyaka Nzambi ka mɛtɛ la Ɔnande? Onde oseka onto tshɛ mbeyaka wembola wakunyiya Satana lo kɛnɛ k’endana la lowandji laki Nzambi ndo la kɔlamelo y’onto? Atonga na. Onde anto tshɛ mbeyaka lande na katshundaso ndo kavɔso? Atonga yakɔ na. Onde anto tshɛ wodjashi lanɛ la nkɛtɛ mbeyaka ɔnɛ Diolelo diaki Nzambi diekɔ lo mbolɛ nshi nyɛ ndo ɔnɛ tekɔ lo sɛna lo nshi y’ekomelo? Onde vɔ mbeyaka weolo wa nyuma ya kɔlɔ? Onde anto tshɛ wekɔ l’ewo k’oshika k’endana la woho wa monga la lɔsɛnɔ l’ɔngɛnɔngɛnɔ lo nkumbo? Onde anto mbeyaka ɔnɛ sangwelo di’Otungi le wanɛ wele l’okitanyiya ele dia vɔ monga la lɔsɛnɔ l’ɔngɛnɔngɛnɔ lo Paradiso? Lo wembola ɛsɔ nto, okadimwelo wekɔ ɔnɛ kema. Lâsɔ mɛtɛ, anto wekɔ l’ohomba w’ewo ka Nzambi.
12 Anto wekɔ nto l’ohomba w’ewo ka Nzambi l’ɔtɛ wa kɛnɛ kakate Yeso lo dɔmbɛlɔ, l’otsho wa komelo lo lɔsɛnɔ lande la lanɛ la nkɛtɛ. Etema w’apɔstɔlɔ ande wakanandema efula lam’akawawoke ata ate: “Lumu la pundju lone, eli [wêke dia, NW] nkêya, weme [Nzambi ɔtɔi ka, NW] mete, la Jesu Kristu, lakayatumi.” (Joani 17:3) Paka lo kamba la ewo kɛsɔ keto mbakokaso tɛmɔla Nzambi lo yoho yetawɔnde. Yeso akate ate: “[Nzambi, NW] eko [n]yuma. Wane watôtemolaka, dieli la wo dia mbôtemola lu [n]yuma la lu mete.” (Joani 4:24) Sho tɛmɔlaka Nzambi “lu [n]yuma” lam’atshutshuyamaso l’etema woludi la mbetawɔ ndo la ngandji. Woho akɔna wɔ̂tɛmɔlaso ‘lo mɛtɛ’ na? Ele lam’ekaso Dui diande ndo wɔ̂tɛmɔlaso lo ndjela mɛtɛ kande koshwami—“ewo ka Nzambi.”
13 Nunu di’anto mumɛka tɛmɔla Jehowa ɔnɔnyi tshɛ. Ko onde pombaka mbekaka Bible la wanɛ walanga l’edja k’ɔlɔlɔ, kana kokaka anto w’etema ɛlɔlɔ nongola batismu esadi eto? Tênde kɛnɛ kakakomɛ olami wa lokanu nde la nkumbo kande, oko wofundamidiɔ lo Etsha 16:25-34. Paulo nde la Silasi wakadjama lo lokanu la Filipi, koko l’atei a deke, didimu dia nkɛtɛ dia wolo diakasalema ko asoko wa luudu la lokanu wakadihɔ. Oko wakandakanyiyaka ɔnɛ ase lokanu tshɛ wambolawɔ ndo ɔnɛ wayowosha dilanya dia wolo, olami wa lokanu akayange ndjadiaka ko Paulo akawotɛ ɔnɛ sho tshɛ tekɔ. Paulo nde la Silasi “wakawutela diui dia [Jehowa], ndi la wane waki lu luudu landi tshe.” Olami wa lokanu ɔsɔ nde la nkumbo kande kombeyaka Afundelo w’Ekila kânga yema tshitshɛ. Koko, l’otsho akɔ wâmɛ, vɔ wakayala ambetawudi. Lâdiko dia lâsɔ, “ndi akabatizama, ndu antu andi tshe.” Akambo wa ngasɔ kosalemaka tena efula, koko anto asɔ w’eyoyo waketshama mɛtɛ ya ntondotondo, ko l’ɔkɔngɔ diko, vɔ wakayekaka akambo akina lo nsanganya ya l’etshumanelo. Dikambo dia woho ɔsɔ kokaka salema ndo ɛlɔ kɛnɛ.
Dinela Diekɔ Woke!
14 Ayonga ɔlɔlɔ naka Ɛmɛnyi wa Jehowa mbekaka l’anto efula Bible lo nshi ngana tsho. Ekɔ ohomba efula sala dikambo sɔ. Oko ɛnyɛlɔ, lo wedja wa l’Erɔpɛ wa l’Ehotwelo ka Wonya, anto pombaka fundja nkombo yawɔ l’ɔnɔngɔ ko kokanga dia vɔ ndjeka Bible. Dikambo sɔ salemaka nto ndo l’ahole akina. L’osomba ɔmɔtshi wa lo République dominicaine, anto efula wakalɔmbaka Ɛmɛnyi wa Jehowa etanu dia vɔ mbeka lawɔ Bible, koko vɔ kokoka mbeka lawɔ vɔ tshɛ. Kakɔna kakawasale na? Vɔ wakakeketsha wanɛ waki la saki dia vɔ mbɔtɔka lo nsanganya lo Mbalasa ka Diolelo ndo fundja nkombo yawɔ l’ɔnɔngɔ ko kongɛka dia vɔ ndjeka lawɔ Bible. Dikambo dia woho ɔsɔ diasalemakɔ ndo l’ahole efula wa lo nkɛtɛ k’otondo.
15 Bɛtshi dia nkɛtɛ dia weke—dikambɔ dia weke dia dinela—diambodihɔ hwe lo dikambo di’anto wa Nzambi. Kânga mbatoma Jehowa, “Owandji wa Dinela,” ekambi efula, olimu wa sala wekekɔ efula. (Mateo 9:37, 38, NW) Ɔnkɔnɛ, dia dianganya ewo ka Nzambi esadi esadi, ‘ɔhɔmbɔ wa kɔlamelo’ akatondja yangɔ mɔtshi yele l’awui w’eshika wofundami lo tshena pe ɔnɛ kele ambeki wa Bible watahamaka lo nyuma lo wekelo tshɛ. Ɔsɔ ekɔ dibuku di’oyoyo diakokaso mbeka l’onto Bible lakande ko dishidiya esadi eto—ondo lo ngɔndɔ mɔtshi tsho. Ndo diɔ kokaka mbɔtɔ lo totapatapa taso ta totshitshɛ, lo totapatapa taso takimɛso l’anya, kânga lo abenga w’ahɔndɔ aso! Lo losanganya la distrikɛ l’Ɛmɛnyi wa Jehowa laki l’ɔtɛ a dui w’ɔnɛ: “Totombole Nzambi l’Ɔngɛnɔngɛnɔ,” anto nunu nkama waki lâwɔ waki l’ɔngɛnɔngɛnɔ wa mamba dia nongola dibuku sɔ di’oyoyo diele la ndjɛkɛ 192 dielɛwɔ ɔnɛ: Ewo Katɔla Otsha lo Lɔsɛnɔ la Pondjo.
16 Afundji wa lo wedja wotshikitanyi wakalɔngɔsɔla awui wakayodjamaka la yambalo tshɛ lo ɛnamelo ka komelo lo dibuku Ewo. Ɔnkɔnɛ, dibuku sɔ pombaka ngɛnyangɛnya anto wa l’andja w’otondo. Ko onde, ayonga edja la ntondo ka dibuku di’oyoyo sɔ ndjotomba l’ɛtɛkɛta w’anto wa l’andja w’otondo? Kema, nɛ dia dibuku diele la ndjɛkɛ 192 kokaka kadimwama esadi eto oleki abuku wa weke. Oya lo Kɔlɛkɔlɛ, 1995, Kɔmite k’Ofundelo kaki Olui Walɔmbɔla aketawɔ dia dibuku sɔ kadimwama oma l’Angɛlɛ otsha l’ɛtɛkɛta ndekana 130.
17 Awui watanema lo tshapita la tshapita ya lo dibuku Ewo pombaka kimanyiya ambeki wa Bible dia vɔ pama esadi esadi lo nyuma. Dibuku sɔ nembetshiyaka mɛtɛ ya l’Afundelo lo yoho yakeketsha onto. Diɔ hadiolembetshiya wetshelo wa kashi l’ɔm’ɔmɔ. Ɔtɛkɛta wokɛma hwe ndo woho wɔmbwami tokanyi l’ɔnɔngɔ mbetɛka dibuku sɔ wɔdu di’onto kamba ladiɔ dia mbeka l’anto Bible ndo kimanyiya anto akina dia vɔ shihodia ewo ka Nzambi. Lâdiko di’avɛsa woshilami, ekɔ ndo avɛsa akina wofundami wakoka ombeki mboka sso lam’alɔngɔsɔlande wekelo. Avɛsa asɔ kokaka mbalema wonya wa wekelo naka etena kekɔ, koko kema ɔlɔlɔ ndja l’awui akina wahatɛkɛtami lo dibuku diakɔ wakoka ndjodinyadinya atshina w’akambo wa lɔkɔ. Lo dihole dia sala ɔsɔku, wanɛ weka l’anto Bible pombaka ndjâtshutshuya dia sɛdingola ndo dia nembetshiya ombeki kɛnɛ kata dibuku diakɔ sɔ lo tshapita la tshapita. Kɛdikɛdi, ombetsha pombaka mbeka la yambalo tshɛ, woho wa nde shihodia tokanyi toleki ohomba.
18 Woho akɔna wakoka dibuku Ewo Katɔla Otsha lo Lɔsɛnɔ la Pondjo kɛndjakɛndja olimu wa mbetɛ anto ambeki na? Dibuku sɔ diele la ndjɛkɛ 192 kokaka mbekama lo tshenyi ya wonya tsho, ndo “wanɛ wakayalɔngɔsɔla ɔlɔlɔ dia kondja lɔsɛnɔ la pondjo” kokaka mbeka akambo efula lo tshimbo ya wekelo adiɔ dia ndjakimɔ le Jehowa ndo nongola batismu. (Etsha 13:48, NW) Ɔnkɔnɛ, nyɛsɔ tokambake la dibuku Ewo lo yoho y’ɔlɔlɔ l’olimu w’esambishelo. Naka ombeki ɔmɔtshi wa Bible amboshilaka mbeka etenyi koleki woke ka dibuku dikina, kete ayonga ɔlɔlɔ dishidiya. Ko naka aha ɔsɔku, kete ekɔ ɔlɔlɔ nyu kadimɔ esadi eto dia mumɛ mbeka lo dibuku Ewo. L’ɔkɔngɔ wa wɛ shidiya la mbeka dibuku nɛ di’oyoyo wɛ l’ombeki ayɛ, kema ohomba mbeka lande dibuku dikina dia hende. Wanɛ wetawɔ mɛtɛ kokaka ndowanya ewo kawɔ lam’ayowɔtɔka lo nsanganya y’Ɛmɛnyi wa Jehowa ndo lam’ayowâlaka Bible la abuku akina w’Akristo lo yoho yawɔ vamɛ.—2 Joani 1.
19 Dibuku Ewo diakafundama l’oyango wa kimanyiya onto dia nde kadimola lo wembola tshɛ watovusolaka dikumanyi vɔ la wanɛ walanga nongola batismu oko Ɛmɛnyi wa Jehowa. Omalɔkɔ, la ntondo ka wɛ mumɛ mbeka Bible wɛ l’ombeki ayɛ lo dibuku sɔ di’oyoyo, ekɔ ɔlɔlɔ wɛ tɔ̂shi wenya ɛmɔtshi lo sɛdingola wembola wele lo lɛkɛ 11 polo 63, lo biukubuku yelɛwɔ ɔnɛ Atshina a Wetshelo w’Oma lo Bible.a Dikambo sɔ diayokokimanyiya dia tɔtɔmiya ekadimwelo lo wembola ɛsɔ lam’ayoyekaka Bible wɛ l’onto lo dibuku Ewo.
20 Anto wa l’ahole tshɛ pombaka mboka lokumu l’ɔlɔlɔ. Mɛtɛ, anto wekɔ l’ohomba w’ewo ka Nzambi, ndo Jehowa ekɔ lo kiewoya lo tshimbo y’Ɛmɛnyi ande. Kakianɛ, tambokondja dibuku di’oyoyo diotosha Shɛso lele l’olongo loludi la ngandji lo tshimbo y’ɔhɔmbɔ wa kɔlamelo ndo wa kɛsɔ. Onde wɛ ayokamba ladiɔ dia mbetsha anto akina akambo wa mɛtɛ ndo dia tombola lokombo laki Jehowa l’ekila? Mɛtɛ, Jehowa ayokɔtshɔkɔla lam’ayatshutshuyayɛ lo weoho tshɛ dia mbisha anto efula ewo katɔla otsha lo lɔsɛnɔ la pondjo.
[Footnote]
a Biukubuku shɔ yakatondjama oma le Watchtower Bible and Tract Society of New York, Inc.
[Study Questions]
1. Lande na kakokaso mbuta ɔnɛ dui di’onto diekɔ ɛngɔ ka diambo kakatonge Nzambi?
2. Oko le yɛ, otema wa didjidji kɛdikɛdi na?
3, 4. Woho akɔna watanandema etema w’anto la lokumu l’ɔlɔlɔ?
5. Ewo kɛdikɛdi na, ndo kakɔna kakokaso mbuta lo dikambo dia lomba la l’andja ɔnɛ?
6. Ngande wele ewo ka Nzambi naka sho kiɛdika la lomba la l’andja ɔnɛ lo kɛnɛ k’endana la dikila?
7. Ngande wele ewo k’oshika ka l’Afundelo naka sho kiɛdika la lomba la l’andja ɔnɛ lo kɛnɛ k’endana la diodielo di’ana?
8, 9. Woho akɔna wakokayɛ nembetshiya kɛnɛ kata Tukedi 2:1-6 lo dikambo di’ewo kele l’anto ohomba mɛtɛ?
10. Kakɔna kahombaso sala dia sho monga la demba dia wolo lo nyuma?
11. Naa ɛkɔkɔ ɛmɔtshi wɛnya ɔnɛ anto wekɔ l’ohomba w’ewo ka Nzambi?
12. Woho akɔna wakokaso tɛmɔla Nzambi “lu [n]yuma la lu mete”?
13. Dikambo diakɔna diatawɔ l’Etsha 16:25-34, ndo wetshelo akɔna wakokaso kondja oma lɔkɔ?
14. Lande na kele ekɔ ohomba mbeka l’anto efula Bible lo nshi ngana tsho?
15, 16. Engɔ kakɔna kakawatosha dia sho dianganya ewo ka Nzambi esadi eto, ndo naa akambo amɔtshi w’endana l’ɛngɔ kakɔ kɛsɔ?
17. Kakɔna ketɛ dibuku Ewo wɔdu di’onto kamba ladiɔ?
18. Naa alako amɔtshi watoshawɔ lo woho wakokaso kamba olimu la dibuku Ewo?
19. La ntondo ka mbeka l’anto Bible lo dibuku Ewo, lande na kele ekɔ ɔlɔlɔ dia tâvusodi lɛkɛ 11 polo 63 la lo biukubuku yelɛwɔ ɔnɛ Atshina a Wetshelo w’Oma lo Bible?
20. Asangoyayɛ sala la dibuku Ewo Katɔla Otsha lo Lɔsɛnɔ la Pondjo?
[Caption]
[Notɛ ka l’ɛsɛ ka dikatshi]
[Caption]
[Wembola]
[Caption on page 5]
[Diombwɛlo di’osato wa lo lɛkɛ 5]
Ɛkɔkɔ efula wekɔ wɛnya ɔnɛ miliyara y’anto wa lanɛ la nkɛtɛ wekɔ l’ohomba w’ewo ka Nzambi
[Caption on page 8]
Okonde Ayôkadimola Na?
◻ Oko le yɛ, otema wa didjidji kɛdikɛdi na?
◻ Ewo ka Nzambi kɛdikɛdi na?
◻ Lande na kele anto l’ohomba w’ewo ka Nzambi?
◻ Dibuku diakɔna di’oyoyo diambowototondjɛ, ndo kakɔna kasangoyayɛ dia sala ladiɔ?