Anto Tshɛ Pombaka Mbikoya La Nzambi
“Shu tshe, untu l’untu, tayuyateketela le [Nzambi, “NW”].”—ROMO 14:12.
JEHOWA NZAMBI akatonge Adama l’Eva, ambutshi aso wa ntondo, oko anto wele la lotshungɔ la sala kɛnɛ kalangawɔ. Kânga mbakiwɔ l’ɛse k’andjelo, vɔ waki ditongami diaki la yimba ndo diakakokaka mbɔsa tɛdikɔ t’eshika. (Osambu 8:4, 5) Koko, lotshungɔ lɔsɔ lakawasha Nzambi kombashaka dikimɔ dia vamɛ shikikɛ kɛnɛ kele ɔlɔlɔ kana kɔlɔ. Adama l’Eva waki l’ɔkɛndɛ wa ndjâtɛkɛtɛ le Otungi awɔ, aha vamɛ ato, koko ndo anawɔ tshɛ wekɔ l’ɔkɛndɛ ɔsɔ.
2 Etena kɛnɛ kayaso suke l’ekomelo ka dikongɛ di’akambo nɛ dia kɔlɔ, Jehowa ayokoya la wanɛ wodjashi la nkɛtɛ. (Ɛdika la Romo 9:28.) Ndoko edja nto, anto wɔnyɔla Nzambi wayohomba ndjâtɛkɛtɛ le Jehowa Nzambi lo dikambo dialanyawɔ diangɔ dia lo nkɛtɛ, lɔsɛnɔ l’onto, djekoleko lo dikambo diahɛnyahɛnyawɔ ekambi ande.—Enyelo 6:10; 11:18.
3 Oko weso la ntondo ka ɛnamelo kɛsɔ katshutshuya onto dia kana yimba, ekɔ ɔlɔlɔ sho menda awui wa losembwe wakasalɛka Jehowa ditongami diande lo nshi yakete. Ngande wakoka Afundelo tokimanyiya, l’onto ndo l’onto, dia sho ndjâtɛkɛtɛ dimɛna le Otungi aso? Naa diɛnyɛlɔ diakoka tokimanyiya efula ndo diahatahombe mbokoya?
Andjelo Wekɔ l’Ɔkɛndɛ wa Ndjâtɛkɛtɛ le Nzambi
4 Andjelo, mbuta ate ditongami dia Jehowa diele l’olongo, wekɔ l’ɔkɛndɛ wa ndjâtɛkɛtɛ le Nzambi oko sho anto. La ntondo ka Mvula k’Elola kakalɔ lo nshi ya Nɔa, andjelo amɔtshi wakatɔmbɔkɔ ko wakalɔtɛ alemba wa l’emunyi dia vɔ ndjeyana la amato. Oko wakiwɔ la lotshungɔ la sala kɛnɛ kalangawɔ, ditongami sɔ dia lo nyuma diakakoke mbɔsa yɛdikɔ shɔ, koko Nzambi akahombe ndjokoya la wɔ. Etena kakakalola andjelo asɔ w’ehedia otsha l’olongo, lo dihole dia lo nyuma, Jehowa kombetawɔ vɔ mbɔtɔ nto lo dihole diaki lawɔ l’etatelo. Ombeki Judɛ ekɔ lo totɛ ɔnɛ vɔ ‘wakalamema l’ɛkɔdi wa pondjo lo wodjima wa tshududu lo dikambo di’elombwelo ka lushi la woke.’—Jude 6.
5 Andjelo asɔ w’ehedia, mbuta ate ɛdiɛngɛ, wekɔ l’owandji awɔ: Satana Diabolo. (Mateu 12:24-26) Ondjelo ɔsɔ wa kɔlɔ akatɔmbɔkwɛ Otungi ande ndo akadje tâmu ɔnɛ lowandji la Jehowa bu lowandji la dimɛna. Satana akatshutshuya ambutshi aso wa ntondo dia vɔ sala pɛkato, ko l’ɔkɔngɔ diko, pɛkato kakɔ akayowaelaka nyɔi. (Etatelu 3:1-7, 17-19) Kânga mbaketawɔ Jehowa dia Satana mbɔtɔka l’olongo l’edja k’etena kɛmɔtshi l’ɔkɔngɔ wa nde tɔmbɔkɔ, dibuku dia lo Bible dielɛwɔ Enyelo diakatatshi ɔnɛ l’etena kakashikikɛ Nzambi, kanga kɔlɔ ɔsɔ ayokadjema oya l’emamu wa nkɛtɛ. Tolembetelo mɛnyaka ɔnɛ dui sɔ diakasalema yema l’ɔkɔngɔ wa Yeso Kristo mbahema l’okudi wa Diolelo l’ɔnɔnyi 1914. Edja l’edja, Diabolo nde l’ɛdiɛngɛ ande wayolanyema pondjo pondjo. Naka dikambo dia lowandji diambohembɔma l’ekomelo, lâsɔ kete wamboshila mbikoya la wanɛ wakatɔmbɔkɔ, wayokoya la wɔ la losembwe tshɛ.—Jobo 1:6-12; 2:1-7; Enyelo 12:7-9; 20:10.
Ɔna Nzambi Ekɔ l’Ɔkɛndɛ wa Ndjâtɛkɛtɛ le Nde
6 Ande ɛnyɛlɔ ka dimɛna efula kakatotshikɛ Yeso Kristo, Ɔna Nzambi lee! Lam’akinde oko onto la kokele lɛdimi l’Adama, Yeso akokaka ɔlɔ sala lolango la Nzambi. Nde akangɛnangɛnaka nto vɔ mɛ̂ndja ɔkɛndɛ wa kitanyiyaka ɛlɛmbɛ wa Jehowa. Lo dikambo diande, omembi w’esambu akatatshi ɔnkɔnɛ lo yoho yasungana: “Dimi latongenangenaka dia ntsha lulangu laye, we [Nzambi kami, NW]. Ee, olembe aye ambufundama l’utema ami.”—Osambu 40:8; Heberu 10:6-9.
7 Kânga mbakahomana Yeso l’ekakatanu w’oma le atunyi ande, nde akasale lolango la Nzambi ndo akalame olowanyi ande polo ndo lo nyɔi, nyɔi ka l’otamba w’asui. Lo yoho shɔ mbakandafute oshinga w’etshungwelo dia tshungola anto oma l’etombelo wa nyɔi woye oma lo pɛkato kakasale Adama. (Mateu 20:28) Ɔnkɔnɛ, lam’akinde suke la nyɔi, Yeso akakoke nɔmba l’eshikikelo tshɛ ate: “Dimi lakakutumbula la kete, lakashidiya ulimu wakayambisha wa ntsha. Kakiane, Papa, untumbuli la ntundu kaye la lutumbu laki la mi kame la ye ntundu andja watatungama.” (Joani 17:4, 5) Yeso akakoke mbutɛ She ka l’olongo ɛtɛkɛta ɛsɔ dikambo nde akakotsha ɔkɛndɛ ande le Nzambi l’ɔlɔlɔ tshɛ ndo aketawɔmaka lo asho ande.
8 Yeso Kristo aki onto la kokele, koko sho bu kokele. Kânga mbediɔ ɔsɔku, tekɔ l’ɔkɛndɛ wa ndjâtɛkɛtɛ le Nzambi. Ɔpɔstɔlɔ Paulo akate ate: “Ya we, ukundi alumbuyaye onanyo na? Ukundi w[o]nyolaye onanyo na? Shu tshe tayemala l’elumbwelu la ntundu ka [Nzambi, NW]. Ne dia akafundama ati: [Jehowa] kata ati: Uku wemi la lumu! Adui tshe wayunkhusamela; nimi tshe yayandula [Nzambi, NW]. Okone shu tshe, untu l’untu, tayuyateketela le [Nzambi, NW].” (Romo 14:10-12) Dia sho ndjâtɛkɛtɛ dimɛna ndo mbetawɔma lo asho wa Jehowa, la ngandji tshɛ nde akatosha nkum’otema ndo Bible, Dui diakasambiyama oma le nde, dia diɔ tɔlɔmbɔlaka lo kɛnɛ kataso ndo katshaso. (Romo 2:14, 15; 2 Timote 3:16, 17) Kambaka la mbo ya lo nyuma yatosha Jehowa dia kondja wahɔ tshɛ w’oma lɔkɔ ndo mpokamɛka nkum’otema kaso kolowanyemi l’awui wa lo Bible ayotokimanyiya dia sho mbetawɔma lo asho wa Nzambi. (Mateu 24:45-47) Nyuma k’ekila kaki Jehowa, mbuta ate wolo ande wakamba olimu, ekɔ kiɔkɔ kina yatosha wolo ndo yatɔlɔmbɔla. Naka sho ndjela ɛlɔmbwɛlɔ ka nyuma la kɛnɛ katotɛ nkum’otema kaso kolowanyemi l’awui wa lo Bible, kete tayɛnya ɔnɛ sho ‘hatonya Nzambi yimba,’ nɛ dia nde mbayokoya la so lo dikambo di’etsha aso tshɛ.—1 Tesalonika 4:3-8; 1 Petero 3:16, 21.
Wedja Wekɔ l’Ɔkɛndɛ wa Ndjâtɛkɛtɛ le Nzambi
9 Jehowa nɔmbaka wedja dia vɔ ndjâtɛkɛtɛ le nde lo dikambo di’etsha awɔ. (Jeremiya 25:12-14; Zefaniya 3:6, 7) Tɔ̂shi ɛnyɛlɔ k’Ɛdɔma, diolelo dia lo nshi ya ntondo diele la diko dia nkushi dia Ndjale ka Lɛɛhɔ ndo lo ngɛl’a nkushi ka Diɛngɔ di’Akaba. Ase Ɛdɔma waki wa Semitɛ, vɔ wakotɔka efula l’Ase Isariyɛlɛ. Kânga mbele Esau w’okana w’Abarahama mbaki lɔtshɛtshɛ l’Ase Ɛdɔma, Ase Ɛdɔma kombetawɔ Ase Isariyɛlɛ mbidjɛ lo wodja awɔ, lo “Osese a Khum’ekanga,” lam’akawatatshɔka otsha lo Nkɛtɛ ya Daka. (Walelu 20:14-21) L’ɔkɔngɔ wa deko efula, Ase Ɛdɔma wakayohetshaka Ase Isariyɛlɛ woho w’anyanya, wakayowadjaka l’ɔhɛmbɛ ɔnɛ ko mbatondja l’okina. L’ɔkɔngɔ diko, Ase Ɛdɔma wakahombe ndjoyatɛkɛtɛ le Nzambi nɛ dia vɔ wakatshutshuya Ase Babilɔna dia vɔ nanya Jerusalɛma l’ɔnɔnyi 607 N.T.D. (Osambu 137:7) L’eleko ka samalo N.T.D., alembe w’Ase Babilɔna wakalɔmbwama oma le Nkumekanga Nabɔnidɛ wakalɛmbia Ɛdɔma, ko Ɛdɔma akayala tɔngɔ to, lo ndjela didjango dia Jehowa.—Jeremiya 49:20; Obadiya 9-11.
10 Ndo Mɔaba mbakahomɔ dikambo dia ngasɔ. Diolelo dia Mɔaba diakatanemaka lo ngɛl’a nkushi k’Ɛdɔma ndo lo ehotwelo ka wonya ka Ndjale ka Lɛɛhɔ. La ntondo k’Ase Isariyɛlɛ mbɔtɔ lo Nkɛtɛ ya Daka, Ase Mɔaba kombalongola dimɛna, vɔ mɛtɛ wakâsondjaka mapa la ashi wa nɔ paka losondja. (Euhwelu k’Elembe 23:3, 4) Balaka, Nkumekanga ka Mɔaba, akafute omvutshi Balama falanga ate kele adje Isariyɛlɛ mananu, ndo amato w’Ase Mɔaba wakɔsama dia mɔnga apami w’Ase Isariyɛlɛ oya l’awui a mindo ndo oya l’ɔtɛmwɛlɔ wa dikishi. (Walelu 22:2-8; 25:1-9) Koko, Jehowa akalembetɛ woho wakahetshaka Mɔaba Isariyɛlɛ. Lo ndjela pɔlɔfɛsi kakatama, Mɔaba akayohandjɔ vwa oma le Ase Babilɔna. (Jeremiya 9:25, 26; Zefaniya 2:8-11) Eelo, Nzambi akakoya la Mɔaba.
11 Aha Mɔaba oto koko ndo Amɔna akahombe mbikoya la Nzambi. Jehowa akatatshi ate: “Moaba ayuyala uku Sodoma, la asi Amona uku Ngomora. Kete yakakiti atende la afuku wa leho, ndu elanyelu ka pundju.” (Zefaniya 2:9) Wodja wa Mɔaba la w’Amɔna wakahandjɔ vwa, oko akalanya Nzambi osomba wa Sɔdɔma la wa Ngɔmɔra. Lo ndjela Tshunda dia la Londres Dieka Okama a Nkɛtɛ, anyangiyangi mbutaka ɔnɛ takɛnyi ahole waki osomba wa Sɔdɔma la wa Ngɔmɔra wakalanyema lo lɛkɛ l’ehotwelo ka wonya la Ndjale ka Lɛɛhɔ. Djembetelo tshɛ ya shikaa yakoka tomba nto lo dikambo sɔ kokaka paka shikikɛ pɔlɔfɛsi ya lo Bible yata ɔnɛ dikongɛ di’akambo nɛ dia kɔlɔ diayokoya la Jehowa Nzambi.—2 Petero 3:6-12.
12 Kânga mbele Jehowa akasalɛka Isariyɛlɛ ɔlɔlɔ efula, Isariyɛlɛ akahombe mbikoya la Nzambi l’ɔtɛ wa pɛkato yande. Lam’akaye Yeso Kristo lo wodja w’Isariyɛlɛ, efula ka l’atei awɔ kombêtawɔ. Paka atshikadi amɔtshi ato mbakayala la mbetawɔ ndo mbakonge ambeki ande. Paulo akate ɔnɛ pɔlɔfɛsi mɔtshi yakakotshama le atshikadi asɔ w’Ase Juda lam’akandafunde ate: “Isaya akati diui dia wulu lu dikambu dia Isariyele ati: Kuyanga asi Isariyele wayuyala efula uku lokongo la l’umamu w’ashi a waki, paka etenyi ketu kayushimbamela. Ne dia [Jehowa ayokoya la wanɛ wodjashi la nkɛtɛ, NW] esadi. Uku akati Isaya ntundu ati: Utunduyala [Jehowa] Kanga lulimbilimbi kuntutshikela tukanula, tshiki shu takayala uku Sodoma, tshiki takafani la Ngomora.” (Romo 9:27-29; Isaya 1:9; 10:22, 23) Ɔpɔstɔlɔ Paulo akashile ɛnyɛlɔ k’anto 7 000 wa lo nshi y’Elidja, wanɛ waki kombika adwe la ntondo ka Baala, oma lâsɔ ko nde ndjota ate: “Ndu nshi nye, atshikadi amotshi weko, wakasonwama [oma] lu ngandji ka mamba ka [Nzambi, NW].” (Romo 11:5) Atshikadi asɔ waki anto wele onto l’onto aki l’ɔkɛndɛ wa ndjâtɛkɛtɛ le Nzambi.
Diɛnyɛlɔ di’Ɔkɛndɛ Wele l’Onto wa Ndjâtɛkɛtɛ Ndamɛ le Nzambi
13 Bible shilaka diɛnyɛlɔ efula di’ɔkɛndɛ wele l’onto wa ndjâtɛkɛtɛ ndamɛ le Jehowa Nzambi. Tênde ɛnyɛlɔ ka Kɛna, ɔn’aki Adama l’enondo. Ndo nde, ndo Abɛlɛ w’ɔnango, wakalambola Jehowa elambo. Nzambi aketawɔ olambo w’Abɛlɛ koko nde kombetawɔ wa Kɛna. Lam’akawawelɛ dia ndjowombola bonde kakandadiake ɔnango, Kɛna akakadimola Nzambi la ngala tshɛ ate: “Olami w’onalingu mbemi uka?” L’ɔtɛ wa pɛkato kakandasale, Kɛna akatshanyema oma lo dihole diakandadjasɛka ko akatshu otsha lo ‘nkɛtɛ y’Onto Latalawɔlawɔ, lo lɛkɛ l’ehotwelo ka wonya k’Ɛdɛna.’ Nde kondjatshumuya kânga yema l’ɔtɛ wa kɔlɔ ka woke kakandasale, koko akayakiyanyaka paka lo dikambo dia dilanya diakɛdima la nde diakawawosha.—Etatelu 4:3-16.
14 Ɔkɛndɛ wele l’onto wa ndjâtɛkɛtɛ ndamɛ le Nzambi mɛnamaka nto lo ɛnyɛlɔ k’Eli, ɔlɔmbɛdi wa lâdiko wa l’Isariyɛlɛ. Anande, Hɔfɛni la Finehasi, wakakambaka oko ɛlɔmbɛdi koko, lo ndjela ɛtɛkɛta w’ombewi w’ɛkɔndɔ welɛwɔ Josèphe, vɔ “wakasalɛka anto awui waha losembwe, vɔ kɔnɛmiyaka Nzambi kânga yema, ndo kondjakimɛka oma lo weoho tshɛ w’akambo wa kɔlɔ.” Anto asɔ ‘w’anyanya’ kɔnɛmiyaka Jehowa, waki la dionga dia kɔlɔ efula ndo wakasalaka awui a mindo woho w’anyanya. (1 Samuele 1:3; 2:12-17, 22-25) Lam’eli Eli mbaki shɛwɔ ndo ɔlɔmbɛdi wa lâdiko wa l’Isariyɛlɛ, nde aki l’ɔkɛndɛ wa mbahokola, koko nde akâhangwɛka tsho wate kana onto lâkɛshakɛsha. Eli ‘akatetemala nɛmiya anande oleki Jehowa.’ (1 Samuele 2:29) Nkumbo k’Eli kakayolongolaka dilanya. Ndo Eli, ndo anande, vɔ tshɛ wakavu lushi ɔtɔi, ndo ɔlɔndji awɔ w’ɛlɔmbɛdi wakayoshila oshiki. Ɔsɔku mbakawakoya la Nzambi.—1 Samuele 3:13, 14; 4:11, 17, 18.
15 Jɔnatana y’ɔna Nkumekanga Saulo akatshike ɛnyɛlɔ kotshikitanyi tshɛ. Ohêta yema l’ɔkɔngɔ wa Davidi ndjaka Ngɔliyatɛ, “utema wa Jonatana akakelekama l’utema wa Davidi,” ko vɔ wakadje sheke ya lɔngɛnyi. (1 Samuele 18:1, 3) Ondo Jɔnatana akɛnyi ɔnɛ nyuma ka Nzambi kambomɔ oma le Saulo, koko ohetoheto waki lande lo dikambo di’ɔtɛmwɛlɔ wa mɛtɛ kokitakita. (1 Samuele 16:14) Dilɛmiɛlɔ dia Jɔnatana otsha lo lowandji lakalongola Davidi oma le Nzambi kokitakita kânga lushi ɔtɔi. Jɔnatana akeyaka ate lekɔ l’ɔkɛndɛ wa ndjâtɛkɛtɛ le Nzambi, ndo Jehowa akayowosha difuto l’ɔtɛ wa dionga diande di’ɔlɔlɔ lam’akandasale di’ɔlɔndji wa nkumbo kande tetemala lo nɔnga efula.—1 Ekondo 8:33-40.
Ase Etshumanelo k’Akristo Wekɔ l’Ɔkɛndɛ wa Ndjâtɛkɛtɛ le Nzambi
16 Afundelo w’Akristo wa lo Grɛkɛ tɛkɛtaka awui w’ɛlɔlɔ lo lokombo l’apami la amato efula wakakotsha ɔkɛndɛ awɔ dimɛna lo asho wa Nzambi. Sho mbeyaka mbɔsa ɛnyɛlɔ k’Okristo w’Ose Ngirika wakawelɛka Tito. Vate nde akayoyalaka Okristo lo lɔkɛndɔ la ntondo la misiyɔnɛrɛ lakasale Paulo otsha la Kupiro. Lam’ele Ase Juda la ambetawudi w’ase wedja w’oma la Kupiro ondo waki la Jerusalɛma lo Pɛntɛkɔsta ka l’ɔnɔnyi 33 T.D., ondo Lokristo lakayokomaka lo disɛnga sɔ yema l’ɔkɔngɔ diko. (Etsha 11:19) Koko, Tito akayala okambi wa kɔlamelo wakakambaka kâmɛ la Paulo. Nde akatshindɛ Paulo la Baranaba lo lɔkɛndɔ lawɔ l’otsha la Jerusalɛma oya l’ɔnɔnyi 49 T.D., l’etena kakawahembola dikambo dia wahemelo w’ohekele. Dui di’ɔnɛ Tito kombahema ohekele akanyomoyoleka sukɛ ɛtɛkɛta wa Paulo w’ɔnɛ wanɛ wambɔtɔ lo Lokristo hawohombe monga la tshina di’Ɛlɛmbɛ wa Mɔsɛ. (Ngalatiya 2:1-3) Olimu w’ɔlɔlɔ wakasale Tito mɛnamaka l’atei w’Afundelo; Paulo akôfundɛ ndo mukanda wakasambiyama oma le Nzambi. (2 Koreto 7:6; Tito 1:1-4) Polo ndo l’ekomelo ka lɔsɛnɔ lande la lanɛ la nkɛtɛ, Tito mɛtɛ akatetemala ndjâtɛkɛtɛ dimɛna le Nzambi.
17 Timɔtɛ nto aki onto ɔmɔtshi laki l’ohetoheto ndo lakayatɛkɛtɛ dimɛna le Jehowa Nzambi. Kânga mbakinde la tohemɔhemɔ, Timɔtɛ aki la ‘mbetawɔ kaha la lokeso’ ndo ‘akakambe nde la Paulo oko ɔhɔmbɔ dia ntɔla lokumu l’ɔlɔlɔ otsha la ntondo.’ Diɔ diakɔ diakakoke Ɔpɔstɔlɔ Paulo mbutɛ anyande Akristo wa la Filipi ate: ‘Dimi ndoko l’onto lele la dionga diele oko [dia Timɔtɛ] ndo layakiyanya l’otema ɔtɔi lo dikambo di’awui wendana la nyu.’ (2 Timote 1:5; Filipi 2:20, 22; 1 Timote 5:23) Kânga mbeso anto wele la wɛɔdu ndo mbahomanaso la weoho ekina w’ehemba, ndo sho lawɔ kokaka monga la mbetawɔ kaha la lokeso ndo ndjâtɛkɛtɛ dimɛna le Nzambi.
18 Ludiya aki omoto lakasalaka lolango la Nzambi, ndo nde mɛtɛ akayatɛkɛtɛ dimɛna le Nzambi. Nde la wa lo luudu lande waki l’atei w’anto wa ntondo wa la Mputu wakɔtɔ lo Lokristo oma l’olimu wakasale Paulo la Filipi oya l’ɔnɔnyi 50 T.D. Oko wakinde Ose Tuyatura, ondo Ludiya aki ombetawudi w’ose wodja wakayɔtɔka l’ɔtɛmwɛlɔ w’Ase Juda, koko ondo Ase Juda waki yema tshitshɛ la Filipi ndo ndoko shinangɔnga kana luudu l’ɔtɛmwɛlɔ laki lɛkɔ. Nde la amato akina wakayashaka le Nzambi wakatshumana l’omamu wa lushi l’etena kakatɛkɛtaka Paulo nde la wɔ. Omalɔkɔ, Ludiya akayoyalaka Okristo ko akatɛtɛ Paulo la asekande dia vɔ panga lakande. (Etsha 16:12-15) Ngandji k’angɛndangɛnda kaki la Ludiya kekɔ polo ndo ɛlɔ kɛnɛ djembetelo y’Akristo wa mɛtɛ.
19 Omoto okina lakayatɛkɛtɛ dimɛna le Jehowa Nzambi lokombo lande Dɔrɔka. Lam’akandavu, Petero akatshu la Jɔpa dia tetawɔ leeta l’ambeki wakadjasɛka lɛkɔ. Apami ahende wakatoyaka la Petero “wakatshu la ndi lu luudu lako la ladiku. Wadi waki edu tshe wakemala la suki la ndi, walela; wakawenya akoti la ahondo wakatshi Doroka lam’akindi la wo.” Dɔrɔka akolwama. Ko onde sho pombaka mbôhɔka paka l’ɔtɛ wa lokaho lande loto? Kema. Nde aki “umbeki,” ndo nde mɛtɛ akakambaka olimu wa mbetɛ anto ambeki. Ɛlɔ kɛnɛ, amato w’Akristo wekɔ la ‘ditshelo efula di’ɛlɔlɔ ndo la weshasha wa kɛtshi’ woho akɔ wâmɛ. Ndo nto, vɔ ngɛnangɛnaka mbidja lokolo l’ohetoheto tshɛ l’olimu wa sambisha lokumu l’ɔlɔlɔ la Diolelo ndo mbetɛ anto ambeki.—Etsha 9:36-42; Mateu 24:14; 28:19, 20.
20 Bible mɛnyaka hwe ɔnɛ ndo wedja, ndo onto l’onto, pombaka mbikoya la Jehowa, Nkumadiɔndjɔ Omboledi. (Zefaniya 1:7) Naka tamboyakimɔka le Nzambi, kete sho mbeyaka ndjambola ɔnɛ: ‘Ngande wɔsami waɛsɛ la ɛkɛndɛ wakambisha Nzambi na? Ngande wayatɛkɛtɛmi le Jehowa Nzambi la Yeso Kristo?’
[Study Questions]
1. Naa elelo wakadjama lo lotshungɔ laki l’Adama l’Eva?
2. Kem’edja nto, Jehowa ayokoya la wa na, ndo lande na?
3. Naa wembola wayangaso sɛdingola?
4. Ngande weyaso ɔnɛ Nzambi mbikoyaka la andjelo lo dikambo dia ditshelo diawɔ?
5. Woho akɔna wakakɔ Satana nde l’ɛdiɛngɛ ande, ndo ngande wayowokoya la wɔ lo dikambo di’ɔtɔmbɔkwɛlɔ awɔ?
6. Ngande wɔsa Yeso ɔkɛndɛ wele lande le She?
7. Lam’akandalɔmbaka l’etena kakinde suke la nyɔi, bonde kakakoke Yeso mbuta ɛtɛkɛta wofundami lo Joani 17:4, 5?
8. (a) Ngande wakɛnya Paulo ɔnɛ sho pombaka ndjâtɛkɛtɛ le Jehowa Nzambi? (b) Kakɔna kayotokimanyiya dia sho mbetawɔma lo asho wa Nzambi?
9. Ase Ɛdɔma akiwɔ, ndo kakɔna kakâkomɛ l’ɔtɛ wa kɛnɛ kakawasalɛ Ase Isariyɛlɛ?
10. Ase Mɔaba akawasalɛ Ase Isariyɛlɛ, ndo ngande wakayokoyaka Nzambi nde la Mɔaba?
11. Mɔaba la Amɔna wakayoyalaka oko esomba akɔna, ndo pɔlɔfɛsi ya lo Bible ɛnyayɔ lo dikambo dia dikongɛ di’akambo nɛ dia kɔlɔ?
12. Kânga mbakahombe Isariyɛlɛ mbikoya la Nzambi l’ɔtɛ wa pɛkato yawɔ, kakɔna kakatama la ntondo lo dikambo di’atshikadi w’Ase Juda?
13. Kakɔna kakayokomɛ Kɛna lam’akayowelɛ Nzambi dia ndjokoya la nde l’ɔtɛ wakandadiake Abɛlɛ w’ɔnango?
14. Ngande wakɛnama ɔkɛndɛ wele l’onto wa ndjâtɛkɛtɛ ndamɛ le Nzambi lo ɛnyɛlɔ k’Eli, ɔlɔmbɛdi wa lâdiko, nde l’anande?
15. Lande na kakafutama Jɔnatana y’ɔna Nkumekanga Saulo?
16. Tito akinde, ndo lande na kakokaso mbuta ɔnɛ nde akayatɛkɛtɛ dimɛna le Nzambi?
17. Ngande wakayâtɛkɛtɛ Timɔtɛ le Nzambi, ndo woho akɔna wakoka ɛnyɛlɔ kɛsɔ tɔsɛngiya?
18. Ludiya akinde, ndo dionga diakɔna diaki lande?
19. Dɔrɔka akayatɛkɛtɛ dimɛna le Nzambi oma lo ditshelo diakɔna di’ɛlɔlɔ?
20. Naa wembola wakokaso ndjaoka?
[Caption]
[Wembola]
[Caption on page 8]
[Diombwɛlo di’osato wa lo lɛkɛ 8]
Yeso Kristo akayatɛkɛtɛ dimɛna le She ka l’olongo
[Caption on page 13]
[Diombwɛlo di’osato wa lo lɛkɛ 13]
Oko Dɔrɔka, ɛlɔ kɛnɛ amato w’Akristo ndjâtɛkɛtɛka dimɛna le Jehowa Nzambi
[Caption on page 12]
Wate Na Ayôkadimola?
◻ Ngande wakokayɛ mɛnya ɔnɛ ndo andjelo, ndo Ɔna Nzambi, vɔ tshɛ wekɔ l’ɔkɛndɛ wa ndjâtɛkɛtɛ le Jehowa?
◻ Naa diɛnyɛlɔ dia lo Bible diɛnya ɔnɛ wedja wekɔ l’ɔkɛndɛ wa ndjâtɛkɛtɛ le Nzambi?
◻ Bible atatɔ lo dikambo di’ɔkɛndɛ wele l’onto l’onto wa ndjâtɛkɛtɛ ndamɛ le Nzambi?
◻ Naa anto amɔtshi wofundami lo Bible wakayatɛkɛtɛ dimɛna le Jehowa Nzambi?