Ehomɔ K’oyoyo Dia Kimanyiya Anto Dia Vɔ Mbeya Kɛnɛ Kalɔmba Nzambi
“ƐTƐKƐTA wa lɔkɔ wa wɔdu, wasembɔ tɔɔ lo dikambo, ndo w’ɛlɔlɔ, wayotondja etombelo woleki ndo wɛnɛ walongamɛso. Lam’ele awui wa lɔkɔ nembetshiyama lo ɛtɛkɛta wa wɔdu ndo w’amɛna, onto tshɛ latayange mɛtɛ ayotshutshuyama dia mbuta ate: ‘Nzambi mɛtɛ ekɔ l’atei anyu.’ ” (1 Kɔrɛtɔ 14:25, NW) Ngasɔ mbakate Ɔmɛnyi wa Jehowa ɔmɔtshi wa lo wodja wa Thaïlande lam’akandatɛkɛtaka dikambo dia biukubuku y’oyoyo yelɛwɔ Kakɔna Katɔlɔmba Nzambi? Biukubuku shɔ yakatondjama oma le la Société Watch Tower lo nsanganya ya distrikɛ yakasalema l’ɔnɔnyi wa 1996 la 1997, nsanganya yakɔ yaki l’ɔtɛ a dui ɔnɛ: “Akɛndji wa Wɔladi a Nzambi.”
Biukubuku shɔ ya ndjɛkɛ 32 yoludi tɔ l’alangi yakalɔngɔswama l’oyango wa mbekaka l’anto Bible. Yɔ yekɔ l’atshina a wetshelo wa lo Bible. Yɔ fundama l’ɛtɛkɛta wa wɔdu wa lo tshena pe ndo nembetshiyaka kɛnɛ katɔlɔmba Nzambi lo yoho yokɛma hwe. Ambadi hawotonga ndoko l’okakatanu dia ndjimana fundo. Ko ngande wakokayɛ mbeka l’onto Bible lo biukubuku shɔ y’oyoyo na?
Kamba la Wembola. Wembola wekɔ l’etatelo ka wekelo tshɛ. L’atei w’ekumbi (parenthèses) wele l’ekomelo ka dimbola tshɛ, wɛ ayɛna numɛlɔ y’edingɔ wele l’ekadimwelo wa wembola akɔ. Wɛ kokaka mboka wembola ɛsɔ la ntondo kana l’ɔkɔngɔ wa wekelo dia vusola awui wakanyeki. Ɛnyɛlɔ, l’etatelo ka wekelo wa Bible wa la ngelo, wɛ mbeyaka mboka ombeki wembola akɔ dia nde mbisha tokanyi tande. Lo dihole dia wɛ nɔngɔsɔla okadimwelo wele bu mɛtɛ wonya akɔ wâmɛ, wɛ kokaka tetemala la wekelo. L’ekomelo ka wekelo akɔ, wɛ kokaka kalola lo wembola akɔ dia menda kana ombeki ambokoka mbakadimola lo yoho yɔtɔnɛ la Bible.
Mbadia avɛsa. Lo wekelo tshɛ, wɛ ayotana yema y’ɛtɛkɛta wɛnya awui a mɛtɛ wa lo Bible kâmɛ l’avɛsa washikikɛ awui akɔ. Lam’ele efula k’avɛsa asɔ shilama tsho koko etondo w’awui w’oma lɔkɔ hawofundami, ekɔ ohomba keketsha ombeki wa Bible dia nde mbadia avɛsa asɔ lo Bible kande hita. Nde pombaka mbadia Dui dia Nzambi ndo kana ladiɔ yimba la ntondo ka nde ndjokoka dikitanyiya lo lɔsɛnɔ lande.—Jashua 1:8.
Lembetshiya esato dimɛna dimɛna. Biukubuku yakɔ yekɔ la fɔtɔ ndo l’asango efula—lofulo la fɔtɔ la asango wa lɔkɔ ndekana 50. Esato ɛsɔ kɔnɔngɔswama dia ngɛnyangɛnyaka asho ato koko wakalɔngɔswama nto dia kokimanyiyaka lo olakanyelo. Ɛnyɛlɔ, wekelo ehende wa komelo (ɔmɔtshi lo lɛkɛ l’akumi asato, okina lo lɛkɛ l’akumi asato l’ɔtɔi) wekɔ l’ɛtɛ ɛnɛ: “Tâkimanyiya dia Vɔ Sala Lolango la Nzambi” la “Ɔsa Yɛdikɔ dia Kambela Nzambi.” Fɔtɔ ya lo ndjɛkɛ shɔ hiende mɛnyaka ehamelo ka lo nyuma k’onto akɔ ɔtɔi: woho wakandatasambishaka lo tshakitudi, lo luudu la luudu, lam’akandayoyakimɔ le Nzambi ko ndjobatizama. Naka wɛ kotola yambalo y’ombeki wa Bible oya l’esato ɛsɔ, kete wɛ ayowokimanyiya dia nde mɛna wanya wahomba onto takula dia nde kambɛ Nzambi.
Ko ayotosala naka onto ekɔ la mposa koko heye mbadia dimɛna kana hakoke mbadia kânga yema na? La Société ekɔ lo sala tshɛ dia tondja biukubuku shɔ y’oyoyo lo bandɛ kasɛtɛ lo ɛtɛkɛta efula. Bandɛ-kasɛtɛ kakɔ kekɔ l’awui wofundami lo biukubuku yakɔ ndo efula k’avɛsa woshilami lɔkɔ. Nganɛ mbakawadje biukubuku shɔ lo bandɛ-kasɛtɛ: Wakadia dimbola dia ntondo ko ndjâdia odingɔ (kana edingɔ) wakadimola dimbola diakɔ, vɔ mbadia ndo avɛsa amɔtshi woshilami. Oma lâsɔ ko vɔ ndjâdia dimbola diahɔnyi, l’ɔkɔngɔ a wadielo wa dimbola ko vɔ mbadia odingɔ wadikadimola la avɛsa amɔtshi, ko tatshɔka ngasɔ oto. Ombeki kokaka mpokamɛ awui wa lo bandɛ-kasɛtɛ kakɔ wonya walɔngɔsɔlande wekelo. Wɛ kokaka kamba ndo la bandɛ-kasɛtɛ kakɔ wonya wekayɛ la nde Bible.
Wanɛ wakɔtɔ lo losanganya lɔsɔ la woke waki la mposa k’efula ka kamba la biukubuku shɔ y’oyoyo l’olimu w’esambishelo. Ɛnyɛlɔ, nshi ngana tsho l’ɔkɔngɔ wa vɔ nongola biukubuku yakɔ, ambatshi mboka ahende (esambisha wa lokumu l’ɔlɔlɔ wa lo tena tshɛ) wa lo wodja w’États-unis wakatshikɛ atshukanyi amɔtshi w’ɛlɔngɔlɔngɔ biukubuku yakɔ lam’akawatshu dia towaenda. Lam’akende atshukanyi asɔ ɛtɛ w’awui wofundami, wekelo wele l’ɔtɛ a dui ɔnɛ: “Ditshelo Diahetsha Nzambi” akakotola yambalo yawɔ. Osekaseka akɔ wa omoto akate ate: “Wakambetshaka nshi tshɛ ɔnɛ Nzambi hakokaki monga la lohetsho pondjo—nde ekɔ la ngandji ka tshɛ. [Wekelo] ɔnɛ mbayangami mbadia ntondo.” Lam’akayokalolaka ambatshi mboka asɔ ahende l’ɔkɔngɔ wa lomingu ɔtɔi, osekaseka akɔ wa omoto akate ate: “Lakadia biukubuku y’oyoyo nyɛ. Kɛdikɛdi, ekɔ wolo efula sala akambo tshɛ wahombaso sala. Jehowa hatɔngɛnangɛna nɛ dia tatatshukana [lo yoho yasungana]. Koko tambɔsa yɛdikɔ mɔtshi. Tamboyalɔngɔsɔla dia tshukana Lushi la Tanu la lomingu layaye.” Vɔ wakakumbatɛ ambatshi mboka asɔ ahende ko wakawatɛ nto vate: “Nyotokimwe lo woho weso tatɔshi tɛdikɔ dia mbekaka Bible mbala la mbala, koko yɛdikɔ yambotɔsa nyɛ yambotonyɛ wotsho w’efula.”
Tambokokeketsha mɛtɛ dia wɛ kamba la biukubuku shɔ y’oyoyo yelɛwɔ ɔnɛ Kakɔna Katɔlɔmba Nzambi? Yɔ yekɔ ehomɔ ka dimɛna efula dia kimanyiya anyaso anto dia vɔ mbeya kɛnɛ kalɔmba Nzambi.
[Caption on page 10]
[Caption on page 10]
Ngande wayoyokamba la biukubuku nyɛ y’oyoyo?