Toseke lo lokombo la Nkumadiɔndjɔ
LO JAPON, l’osomba wa Tokyo, lo Asase a Ndjoko wa l’ɔnɔnyi wa 1995, wakakande bɔɔmbɛ kɛmɔtshi ka dinga dia lɔlɛngɔ l’otadimbo wa la tshina dia nkɛtɛ, ko anto 12 wakavu, anto nunu wakoke hemɔ, ndo dui sɔ diakakimanyiya anto akina dia vɔ mbishola sheke mɔtshi. Ɔtɛmwɛlɔ ɔmɔtshi w’ambatɔmi welɛwɔ ɔnɛ Aum Shinrikyo (Mɛtɛ Kaheme Lâdiko dia Tshɛ) wakatshumanyaka lokema la woho ɔmɔtshi wa dinga dia lɔlɛngɔ dia vɔ kamba ladiɔ dia kotsha eyango awɔ waheyama le anto akina.
L’ɔkɔngɔ wa ngɔndɔ ɔtɔi, bɔɔmbɛ kɛmɔtshi kakahandjola luudu lɔmɔtshi l’ekambi a Lɛɛta la la Oklahoma City, l’États-Unis d’Amérique, ko anto 167 wakavu. Tolembetelo tshɛ mɛnyaka ɔnɛ dikambo sɔ mbɔtɔnɛka yema la okakatanu wakatombe lo 1993 l’asa Lɛɛta la Bilɔ k’ase ɔtɛmwɛlɔ welɛwɔ ɔnɛ Aseka Davidi, Bilɔ kele la Waco, l’osomba wa Texas. L’etena kɛsɔ, anto 80 wa l’ɔtɛmwɛlɔ ɔsɔ wakavu. Okamwelo wa bɔɔmbɛ kɛsɔ akashola dikambo diele anto efula kombeyaka: Elui efula w’anto wele oko asɔlayi wekɔ lo kamba olimu nshi nyɛ l’États-Unis, ndo elui ɛmɔtshi wa l’atei w’elui ɛsɔ fɔnyamaka la wanɛ wasangoya lo woshɛshɛ dia ndɔshana la Lɛɛta.
L’ɔkɔngɔ diko, otsha l’ekomelo k’ɔnɔnyi wa 1995, wakatane edo w’anto 16 wakatshumbama l’okonda ɔmɔtshi wosukanyi la ngelo ka Grenoble, la France. Anto asɔ waki l’atei wa Tshunda dia Tɛmpɛlɔ ka Wonya, djui ya tshitshɛ y’ɔtɛmwɛlɔ wakanyanyema lo tita nsango ta la Suisse la lo Canada lo ngɔndɔ ka Kɔlɛkɔlɛ, l’ɔnɔnyi wa 1994, lam’akayâdiake kana wakadiakema anto 53 wa lɔkɔ. Koko, kânga l’ɔkɔngɔ w’ekambokambo kɛsɔ, olui ɔsɔ w’ɔtɛmwɛlɔ wekekɔ. Polo ndo ɛlɔ kɛnɛ, nsaki yawɔ la eyango awɔ wekɔ didjidji to le anto.
Wâle wa Toseke t’Ɛtɛmwɛlɔ
Lo menda akambo wa ngasɔ watomba, onde sho kokaka mamba lo mɛna ɔnɛ anto efula mendaka elui w’ɛtɛmwɛlɔ la sso dia kɔlɔ? Lo mɛtɛ, ndoko onto layolanga sukɛ tshunda dimɔtshi dia woshamu—oyadi di’ɔtɛmwɛlɔ kana aha di’ɔtɛmwɛlɔ—, tshunda diakamba la mbetawɔ kande lo yoho ya kɔlɔ ndo diawosokoya dia nde ntsha awui wahandalange. Ko kakɔna kakoka anto ntsha di’aha ndjotala lo djonga ya mbɔtɔ l’atei w’atshunda wa woshamu wele l’eyango wa kɔlɔ na?
Lo mɛtɛ, onto lasangoya mbɔtɔ l’atei wa tshunda dimɔtshi dia woshamu, naka nde ekɔ la lomba kete nde ayoyanga dia shihodia eyango wa lɔkɔ tshɛ dimɛna dimɛna. Aha angɛnyi kana anto akina weyande mbotshutshuya la wolo; ndo nde pombaka mbɔsa tɛdikɔ oma l’akambo wa mɛtɛ wɛnande koko aha lo ndjela nsaki ya l’otema ande. Tohɛke ɔnɛ onto ndamɛ—koko aha anto akina—mbakoka ndjɛ̂na pâ l’akambo tshɛ wayoyokoka ndjotomba.
Shambo yoleki dimɛna ya mbewɔ atshunda wa wâle wele l’eyango wa kɔlɔ ele ndjela awui wa lo Bible. (Isaya 30:21) Kɛdikɛdi, aha ndjadja l’akambo wa pɔlitikɛ, pombaka mbokaka anto akina ngandji, oyadi kânga atunyi, mbewɔ “etsha wa dimba,” ndo monɛ elowa wa nyuma ka Nzambi l’atei w’otema. Lâdiko di’akambo tshɛ, Akristo wa mɛtɛ hawohombe monga wa l’andja ɔnɛ, oko waki Yeso komonga la l’andja ɔnɛ, ndo dionga sɔ mbashimbaka dia mbɔtɔ l’atei w’atshunda wa woshamu wa l’andja ɔnɛ.—Ngalatiya 5:19-23; Joani 17:14, 16; 18:36; Romo 12:17-21; Jakoba 4:4.
Ɛmɛnyi wa Jehowa wekɔ anto weka Bible l’otema ɔtɔi; vɔ mbɔsaka ɔtɛmwɛlɔ awɔ oko dui dioleki ohomba ndo vɔ salaka tshɛ dia ndjaɔtɔnganyiya l’awui w’ɔtɛmwɛlɔ awɔ lo sɛkɛ. L’andja w’otondo, anto mbeyaka ɔnɛ Ɛmɛnyi wa Jehowa wekɔ olui w’ɔtɛmwɛlɔ ‘wayanga wɔladi ndo watetemala ndjela wɔladi akɔ.’ (1 Petero 3:11) Dibuku diawɔ dielɛwɔ Les Témoins de Jéhovah : Prédicateurs du Royaume de Dieu mbutaka lo yoho ya mɛtɛ mɛtɛ ɔnɛ: “Ɛmɛnyi wa Jehowa bu tshunda dimɔtshi dia woshamu, oyadi lo woho akɔna tshɛ. Awui wetawɔwɔ wotumbi oma lo Bible nembetshiyama hwe lo ekanda wakiwɔ wakoka onto tshɛ kondja. Ndo nto, vɔ ndjâtshutshuyaka lo yoho ya lânde dia mbelɛ anto dia vɔ ndja lo nsanganya yawɔ dia vamɛ ndjɛ̂na ndo ndjôka kɛnɛ kêta lɛkɔ.”
Ɔtɛmwɛlɔ wa mɛtɛ hakoke monga kânga yema tshitshɛ oko tshunda diele la toseke taheyama le anto akina. Atɛmɔdi wa Nzambi ka mɛtɛ ndakanyemaka di’aha vɔ ndjashɛshɛ ɔnɛ kele aha anto mbaeya kana dia mbishɛshɛ oyango awɔ vɔ Ɛmɛnyi wa Jehowa. Ambeki wa Yeso wa ntondo wakalodja Jerusalɛma la wetshelo awɔ. Vɔ wakasalaka olimu awɔ lo sɛkɛ ndo anto tshɛ wakeyaka akambo wetawɔwɔ. Ngasɔ mbele ndo Ɛmɛnyi wa Jehowa nshi nyɛ. Bu kɔlɔ dia naka ewandji wa hiadi, lo kɔlɔ kakiwɔ, wamboshimba anto di’aha vɔ monga la lotshungɔ l’ɔtɛmwɛlɔ, kete Akristo pombaka tetemala ntsha olimu awɔ la yewo ndo la dihonga, ndo kitanyiyaka ‘awui a Nzambi, oko wende owandji, la ntondo k’awui w’anto’ naka wambâsekɛ dia sambisha lo sɛkɛ.—Etsha 5:27-29; 8:1; 12:1-14; Mateu 10:16, 26, 27.
Naka wɛ ambɔfɔnyaka lushi lɔmɔtshi ɔnɛ Ɛmɛnyi wa Jehowa mbeyaka monga olui w’ɔtɛmwɛlɔ kana w’ambatɔmi wa lo woshɛshɛ, kete ondo nɛ dia wɛ kombeyaka awui efula lo dikambo diawɔ. Ondo ngasɔ mbaki anto efula l’eleko ka ntondo.
Etsha tshapita 28 totɛka dia losanganya lakɔtɔ ɔpɔstɔlɔ Paulo la Rɔmɔ nde l’‘ɛlɔhɛ w’Ase Juda.’ Vɔ wakawotɛ vate: ‘Sho nangaka mboka oma le yɛ kɛnɛ kakanayɛ; nɛ dia lo mɛtɛ, sho mbeyaka ɔnɛ olui ɔnɛ w’ambatɔmi wamboyɔtɔ, l’ahole tshɛ anto wekɔ lo tɛkɛta kɔlɔ lo lokombo lawɔ.’ (Etsha 28:16-22) Dia nde mbakadimola, Paulo ‘akâlembetshiya dikambo ɔnkɔnɛ wediɔ, lo mbasambisha akambo wa diolelo diaki Nzambi dimɛna dimɛna,’ ko ‘amɔtshi wa l’atei awɔ wakatatɛ mbetawɔ.’ (Etsha 28:23, 24) Lo mɛtɛ, lo wahɔ awɔ wa pondjo mbakaweye akambo wa mɛtɛ lo kɛnɛ kendana la Lokristo la mɛtɛ.
Lam’ele vɔ ndjashaka efula l’olimu wa Nzambi lo sɛkɛ, Ɛmɛnyi wa Jehowa wayonga l’ɔngɛnɔngɛnɔ hakoke dia nembetshiya onto tshɛ awui wa mɛtɛ wendana l’olimu awɔ ndo la akambo wetawɔwɔ naka nde nangaka mbeya kɛnɛ kele mɛtɛ. Lande na kahayayangiayangia wɛmɛ, dia wɛ shihodia ɔnkɔnɛ wele ɔtɛmwɛlɔ awɔ na?
[Caption on page 6]
[Picture caption on page 6]
Ɛmɛnyi wa Jehowa ngɛnangɛnaka mbewoya anto akina kɛnɛ kewɔ ndo katshawɔ