Tambokakitɔma Dia Tombolaka Nzambi L’ɔngɛnɔngɛnɔ L’andja W’otondo
‘Nyotombole Jehowa! Nyowotombole, nyu ekambi wa Jehowa, nyotombole lokombo la Jehowa.’—OSAMBU 113:1.
JEHOWA NZAMBI ekɔ Otungi wa Woke w’olongo la nkɛtɛ; nde mbele Nkumɛso Kaheme l’andja w’otondo pondjo pondjo. Nde mɛtɛ sunganaka lo weho akɔ tshɛ dia sho mbotombola la wangasanu. Diɔ diakɔ diatodjangɛwɔ l’Osambu 113:1-3 ɔnɛ: “Nyandulaki [Jehowa]! Nyu ekambi wa [Jehowa], nyuwandulaki, nyandulaki lukumbu la [Jehowa]! Lukumbu la [Jehowa] latumbwamaki kakiane ndu pundju! Lukumbu la [Jehowa] latumbwami, uma l’ehutwelu edja ndu l’edjelu ka unya!”
2 Sho ngɛnangɛnaka ntsha dikambo sɔ nɛ dia tekɔ Ɛmɛnyi wa Nzambi. Ande ɔlɔ wokaso lam’eyaso ɔnɛ, kem’edja nto, Jehowa Nzambi ayosala tshɛ dia nkembo ya lotombo yawembɛso nshi nyɛ ndola lo nkɛtɛ k’otondo lee! (Osambu 22:27) Onde ndo dui diayɛ mbôkɛma l’atei w’olui ɔsɔ w’amembi wa l’andja w’otondo? Naka eelo, kete wɛ mɛtɛ ekɔ l’ɔngɛnɔngɛnɔ wa mamba nɛ dia wɛ ambokakitɔma oma l’andja ɔnɛ wele la diatɔnelo ndo wele bu l’ɔngɛnɔngɛnɔ.
3 Woho ɔnɛ watombolaso Jehowa sho tshɛ kâmɛ ekɔ mɛtɛ dikambo diatotshikitanya l’anto akina. Sho tɛkɛtaka lolemi lakɔ ɔtɔi, sho ndakanyaka woho akɔ wâmɛ, ndo sho kambaka la tosambo ta woho ɔtɔi dia mbewoya anto ‘ɔlɔlɔ w’efula waki Jehowa.’ (Osambu 145:7) Eelo mɛtɛ, oko weso anto wamboyakimɔ le Jehowa, sho tambokitshama lânde dia kambɛka Jehowa, Nzambi kaso, olimu. Nzambi akatɛ Isariyɛlɛ, wodja ande wakayakimɔ le nde lo nshi ya ntondo, dia vɔ ndjâkakitola la wedja wakasukana la wɔ ndo di’aha vɔ mbisana la ditshelo dia wedja akɔ. (Etumbelu 34:12-16) Nde akasha wodja ande ɛlɛmbɛ dia nde mbakimanyiya dia vɔ ntsha dui sɔ. Popo ndo ɛlɔ kɛnɛ, Jehowa akatosha Bible, Ɔtɛkɛta wakinde w’Ekila. Alako wa lɔkɔ tɛ̂nyaka nganɛ wakokaso tetemala ndjâkakitola l’andja ɔnɛ. (2 Koreto 6:17; 2 Timote 3:16, 17) Sho hatokakitɔmi lo woho wa monɔ ko ntshɔ dia toyadjasɛ shamɛ lo mvudu y’andjashi Nzambi kana lo waa kuva (couvents), ɔnkɔnɛ wasala andjashi Nzambi wa lo Babilɔna ka Woke. Lo ndjela ɛnyɛlɔ ka Yeso Kristo, sho tombolaka Jehowa lo sɛkɛ.
Nyɛsɔ Tôkoyake Owandji a Wanɛ Watombola Jehowa
4 Yeso komumɔ ndoko lushi ɔtɔi oma l’oyango ande wa tombolaka Jehowa. Ndo dikambo sɔ mbakôtshikitanyaka l’andja ɔnɛ. Nde akatombolaka lokombo la Nzambi l’ekila lo waa shinangɔnga (synagogues) la lo tɛmpɛlɔ ka la Jerusalɛma. Oyadi lo shɔdi ya dikona kana l’ɔkɛngɛ w’ashi, lɛnɛ akatshumanaka elui w’anto, Yeso akasambishaka akambo wa mɛtɛ waki Jehowa lo sɛkɛ. Nde akate ate: ‘Dimi lambokotombola lo sɛkɛ, wɛ Papa, Owandji w’olongo la nkɛtɛ.’ (Mateu 11:25) Koyanga lam’akawôlomboyaka la ntondo ka Pɔnsɔ Pilato, Yeso akashikikɛ ate: “Dimi lakuto dia dikambu ne. Dia dikambu ne mbakamayi la kete, dia mvuta akambu wa mete.” (Joani 18:37) Yeso akeyaka ɔnɛ olimu ande wekɔ ohomba efula. Lo dihole tshɛ diakinde, Yeso akasambishaka awui wa Jehowa ndo akôtombolaka lo sɛkɛ.
5 L’Osambu 22:22, sho tanaka pɔlɔfɛsi kɛnɛ kakatama lo dikambo di’Owandji a wanɛ watombola Jehowa: “Dimi layudianganya lukumu la lukumbu laye l’atei [w’]analingu, layukandulaka l’atei a lusanganya.” Lo Heberu 2:11, 12, ɔpɔstɔlɔ Paulo akayɛnya ɔnɛ avɛsa asɔ mendanaka la Nkumadiɔndjɔ Yeso nde la wanɛ wakakidiama oma le Jehowa Nzambi dia kondja lotombo la l’olongo. Lo ndjela ɛnyɛlɔ kande, vɔ hawoke sɔnyi tombola lokombo la Jehowa l’atei a losanganya. Onde ndo sho mbele la yimba ya ngasɔ lam’ɔtɔso lo nsanganya yaso ya l’etshumanelo? Woho washaso kɔmatɛrɛ la wangasanu tshɛ lo nsanganya ndo wahokɛso lotui ɔlɔlɔ lo awui watawɔ tombolaka Jehowa. Ko onde lâsɔ ato mbokome lotombo lashaso Nzambi l’ɔngɛnɔngɛnɔ?
6 Lo ndjela Mateu 5:14-16, Nkumadiɔndjɔ Yeso akasha ambeki ande ndo ɔkɛndɛ wa pɛtshaka osase wakiwɔ kele anto akina kawotombole Jehowa. Nde akate ate: ‘Osase w’andja mbenyu. . . . Osase wakinyu wahɛtɛ la ntondo k’anto, dia vɔ mɛna etsha anyu w’ɛlɔlɔ kele kawotombole Shɛnyu lele l’olongo.’ Wanɛ walanga osase mbishaka Nzambi lokumu. Onde vɔ mboshaka lokumu paka lo mbutaka la lo ntshaka akambo w’ɛlɔlɔ, ndo lo kimanyiyaka anto akina? Ndoko, vɔ ntshaka dui sɔ lam’atombolawɔ Jehowa vɔ tshɛ kâmɛ. Eelo mɛtɛ, anangi w’osase ndjâkimɔka le Nzambi ndo mbotombolaka l’ɔngɛnɔngɛnɔ. Onde wɛ ambosalaka dikambo sɔ di’ɔngɛnɔngɛnɔ?
Ɔngɛnɔngɛnɔ Wakondja Onto lo Tombolaka Jehowa
7 Wanɛ watombola Jehowa wekɔ l’ɔngɛnɔngɛnɔ efula—lande na na? Nɛ dia ɔngɛnɔngɛnɔ ekɔ olowa ɔmɔtshi wa nyuma k’ekila kaki Nzambi. Lo Ngalatiya 5:22, ɔngɛnɔngɛnɔ shilama oma lâle ngandji. Ambeki wa Yeso wa l’eleko ka ntondo wakakɛnɛmɔlaka olowa ɔsɔ wa nyuma ka Jehowa. Kɛdikɛdi, lushi la Pɛntɛkɔsta ka l’ɔnɔnyi wa 33 T.D., lam’akatshulola Nzambi nyuma kande lâdiko di’ambeki wa Yeso oko 120, vɔ tshɛ wakamɛ tombola Jehowa lo nyɛndɔ yotshikitanyi. Ase Juda wakokaka Nzambi wɔma wakaye la Jerusalɛma oma lo wedja efula ‘wakahokahoka ndo wakambe hahoke.’ Vɔ wakataka la diambo tshɛ vate: ‘Tekɔ lo mbaoka watɛkɛta akambo wa mamba wa Nzambi lo ɛtɛkɛta wakiso’! (Etsha 2:1-11) Kakɔna kakatombe oma lo yoho shɔ ya diambo yakawatombolaka Jehowa lo ɛtɛkɛta wa weho la weho na? Anto oko 3000 (Ase Juda la ase wedja wakayɔtɔ l’ɔtɛmwɛlɔ w’Ase Juda) waketawɔ lokumu l’ɔlɔlɔ la Diolelo lendana la Mɛsiya. Vɔ wakabatizama, wakalongola nyuma k’ekila, ndo wakayosanganya awui awɔ la wangasanu tshɛ dia tombolaka Jehowa l’ɔngɛnɔngɛnɔ. (Etsha 2:37-42) Ɔsɔ mɛtɛ aki ɔtshɔkɔ wa mamba!
8 Ɔkɔndɔ akɔ tetemalaka mbuta ɔnɛ: “Vo wakakolamelaka [sangana] lushi la lushi lu [“tɛmpɛlɔ,” NW], wakatolaka ma lu mvudu yawo. Vo wakalekaka ma diawo la ongenongeno ndu l’etema wa lukahu. Vo wakandula [Nzambi], wakalemiama le antu tshe. Ku la lushi la lushi, Jehowa akasanganyaka wane wakashimbamelaka kame la wo.” (Etsha 2:46, 47) Onde woho wakawasanganaka ndo wakawalɛkaka mma kâmɛ mbakawashaka ɔngɛnɔngɛnɔ a woke? Ndoko, ɔngɛnɔngɛnɔ awɔ woleki tshɛ akayaka oma lo woho ɔnɛ wakawatombolaka Jehowa Nzambi lushi la lushi. Ndo ɔngɛnɔngɛnɔ awɔ wakafulanɛka lam’akawɛnaka nunu di’anto wetawɔ losango lawɔ la panda. Ngasɔ mbeso ndo sho lawɔ nshi nyɛ.
Wekɔ lo Tombola Nzambi l’Ɔngɛnɔngɛnɔ lo Wedja Tshɛ
9 Jehowa konanga di’olimu wasala ekambi ande, olimu wa mɛmba osase, komɛ paka lo wodja ɔtɔi oto. Diɔ diakɔ diele, tatɛ oma l’ɔnɔnyi wa 36 T.D., nde akasha anto wa lo wedja tshɛ diaaso dia vɔ mboka lokumu lande l’ɔlɔlɔ. L’ɛlɔmbwɛlɔ ka Nzambi, Petero akatshu laka owandji ɔmɔtshi w’alembe waki la Kayisariya; pami kɛsɔ aki Ose Wodja. Lam’akandakome lakande, nde akatane Kɔnɛliyo akatshumanyisha nkumbo kande la angɛnyi ande wakandalekaka nanga. L’etena kakawahokamɛka ɛtɛkɛta wa Petero l’atui akɔ ahende, vɔ wakayala la mbetawɔ le Yeso l’atei w’etema awɔ. Lande na kataso ngasɔ na? Nɛ dia nyuma k’ekila kaki Nzambi kakaholɔ le ambetawudi asɔ waki komonga Ase Juda. Anto wakalongolaka losha la nyuma ka Nzambi nshi tshɛ paka l’ɔkɔngɔ wa batismu, koko l’etena kɛsɔ, la ntondo ka vɔ tambiyama l’ashi, Jehowa akɛnya dia nde aketawɔka anto asɔ waki komonga Ase Juda. Otondoyala Jehowa kontsha ngasɔ, tshike Petero kokoka shikikɛ ɔnɛ kakianɛ Nzambi ambetawɔ Ase Wedja dia vɔ monga ekambi Ande ndo nde totondeya ɔnɛ mɛtɛ vɔ wambokoka nongola batismu k’ashi.—Etsha 10:34, 35, 47, 48.
10 Oma ko nshi y’edjedja, Jehowa akatatshi ɔnɛ anto wa lo wedja tshɛ wayowotombola. Nde akatatshi ɔnɛ nde ayonga l’anto wayowotombolaka l’ɔngɛnɔngɛnɔ lo wedja tshɛ. Dia shikikɛ dikambo sɔ, ɔpɔstɔlɔ Paulo akanyomoyofunda pɔlɔfɛsi yakatafundami ntondo lo Afundelo wa lo Hɛbɛru. Ɔnkɔnɛ mbakandatɛ etshumanelo ka la Rɔmɔ, etshumanelo kaki l’Akristo w’oma lo wedja efula: “Nyulungwa[n]i uku akanyulungula Kristu dia ntumbula [Nzambi]. Dimi lambuta nti: Kristu akayala ukambi w’ambahemi w’uhekeli dia mbaenya mete ka [Nzambi] la dia nkikitsha alaka wakalaki [Nzambi] watshesu, dia asi wedja ntumbula [Nzambi] dikambu dia ketshi kandi. Uku akafundama [l’Osambu 18:49] ati: Okone dimi layukandula l’atei w’asi wedja, layimbelaka lukumbu laye esambu. La ntu [lo Euhwelu k’Elembe 32:43] ati: Nyu asi wedja, nyongenengene kame la wudja andi. ndu ntu [l’Osambu 117:1] ati: Nyu asi wedja tshe, nyanduli [Jehowa]; ee, nyu antu tshe, nyuwanduli!” (Sho mbɛnganyisha alɛta ango.)—Romo 15:7-11.
11 Anto hawokoke tombola Jehowa vɔ tshɛ kâmɛ tshikima vɔ kokitshisha elongamelo kawɔ le Yeso Kristo, ɔnɛ lakasɔnama oma le Nzambi dia mbolɛ anto wa lo wedja tshɛ. Dia mbakimanyiya woho wa vɔ shihodia akambo Ande wa mɛtɛ watɔla otsha lo lɔsɛnɔ la pondjo, Nzambi akalɔngɔsɔla ekongelo kɛmɔtshi ka ndakanyaka anto l’andja w’otondo. Lo tshimbo y’olui ande w’ɔhɔmbɔ wa kɔlamelo, nde ekɔ lo mɛnya kɛnɛ kahomba ntshama. (Mateu 24:45-47) Kakɔna kambotomba oma lɔkɔ na? Awui w’anto ndekana miliyɔ tshanu y’etondo wekɔ lo membɛ Jehowa nkembo ya lotombo lo wedja ndekana 230. Ndo miliyɔ kina nto wekɔ lo mɛnya saki kawɔ ka ndo vɔ lawɔ ntsha ngasɔ. Ohênda lofulo la wanɛ wakɔtɔ lo losanganya la Eohwelo ka nyɔi ka Yeso: anto 12921933 w’etondo. Ɔsɔ mɛtɛ dikambo dia mamba!
Lemba la Woke la Wanɛ Watombola Nzambi l’Ɔngɛnɔngɛnɔ Lakatatami la Ntondo
12 Lo ɛnɛlɔ kakandɛnyi, ɔpɔstɔlɔ Joani akɛnyi ‘lemba la woke’ l’anto w’oma lo wedja tshɛ. (Enyelo 7:9) Naa otondo a dikambo diatawɔ lo nkembo ya lotombo yemba lemba lɔsɔ la woke kâmɛ l’atshikadi w’akitami wa Nzambi na? Joani ekɔ lo totɛ ate: ‘Panda kaso kamboya oma le Nzambi kaso, ɔnɛ lodjashi l’okudi, ndo oma le Ɔn’ɔkɔkɔ.’ (Enyelo 7:10) Ɛtɛkɛta ɛsɔ wekɔ lo mbutama la dihonga tshɛ l’ahole tshɛ wa l’andja. Oko wanyinginyaso waanga w’atoko, lo yoho ya didjidji, tekɔ lo tombola Nzambi oko Owandji w’Andja w’Otondo ndo tekɔ lo mbuta l’ɔngɛnɔngɛnɔ tshɛ la ntondo k’olongo la nkɛtɛ ɔnɛ panda kaso ‘ndja’ oma le nde ndo oma le Ɔnande, Ɔn’ɔkɔkɔ, Yeso Kristo. Ɔpɔstɔlɔ Joani akangɛnangɛna efula mɛtɛ lam’akandɛnyi ɛnɛlɔ kɛsɔ ka lemba la woke, ɛnɛlɔ kahahanya asolo! Ndo ɛlɔ kɛnɛ nto, sho ngɛnangɛnaka hakoke lo mɛna ndo lo monga l’atei wa lemba la woke lɔsɔ lakɛnyi Joani!
13 Oko weso ekambi wa Jehowa, tekɔ lo tɛɛmbɛ lokombo lande la lɔwɔlɛ tshɛ. (Isaya 43:10, 12) Woho weso Ɛmɛnyi wa Jehowa totshikitanyaka l’andja ɔnɛ. Ande ɔlɔ mɛmba lokombo la Nzambi lotshikitanyi la nkombo kina tshɛ, ndo mbɔsa osalelo w’olimu ande oko oyango wa lo lɔsɛnɔ laso lee! Nsɛnɔ yaso yamboyokondja oyango ɔmɔtshi w’ohomba oma lo sangwelo dia Jehowa dia diambo dia santoya lokombo lande ndo mɛnya losembwe la lowandji lande la l’andja w’otondo lo tshimbo ya Diolelo. Nde tokimanyiyaka dia sho monga la dihole l’atei wa sangwelo diande diendana la lokombo lande ndo la Diolelo diande. Ngande watokimanyiyande na? Ele lo weho esato.
Wakatosha Ɔkɛndɛ wa Akambo wa Mɛtɛ
14 Ntondotondo, Jehowa akasha ekambi ande ɔkɛndɛ wa akambo wa mɛtɛ. Dui dioleki ɔngɛnɔngɛnɔ tshɛ diakandawasholɛ ele dui di’ɔnɛ Diolelo diande diakatatɛ mbolɛ l’ɔnɔnyi wa 1914. (Enyelo 12:10) Lowandji lɔsɔ la l’olongo tshikitana la diolelo dia didjidji diaki la Jerusalɛma, lɛnɛ akahemaka nkumi ya dikanga ya l’ɔlɔndji wa Davidi l’okudi. Diolelo sɔ diakayɔkɔshama, ko tatɛ oma l’ɔnɔnyi wa 607 N.T.D., Jerusalɛma akayoyalaka tshɛ l’ɛse k’ɛlɔmbwɛlɔ ka mandji y’Ase Wedja. Diolelo di’oyoyo dia l’olongo diakakongɛ Jehowa lo 1914 diekɔ lowandji lahatoyala l’ɛse k’onto akɔna tshɛ, onyake Jehowa, ndo diɔ hadiolanyemaki pondjo. (Danyele 2:44) Ndo nto, ɛlɔmbwɛlɔ kadiɔ tshikitana. Lo woho akɔna na? Enyelo 11:15 kadimolaka ɔnɛ: “Aui wa wulu wakukema l’ulungu, wakati vati: Diulelu dia la kete nye diambuyala dia Khumesu, la dia Kristu kandi. Ndi ayulela pundju pundju.”—Sho mbɛnganyisha alɛta ango.
15 “Diulelu dia Khumesu, la dia Kristu kandi” diekɔ la lowandji lâdiko di’andja w’otondo. Ɔsɔ ekɔ ɛnamelo k’oyoyo ka lowandji laki Jehowa, lowandji lokengami ndo la Mɛsiya w’Ɔnande, l’anango Yeso 144000, wanɛ wele efula ka l’atei awɔ wamboshilaka mbolɔ otsha lo lotombo la l’olongo. Ɛnamelo kɛsɔ k’oyoyo ka lowandji laki Jehowa bu paka dikambo dimɔtshi diele paka lo tokanyi oto ko hadiɛnama mɛtɛ lo akambo wa lo lɔsɛnɔ—lowandji lɔsɔ bu lokanyi lɔmɔtshi langɛnangɛna ambeki kɛtshanyaka. Diolelo sɔ dia l’olongo diekɔ lowandji la mɛtɛ. Elongamelo kaso k’ɔngɛnɔngɛnɔ ka sɛna pondjo pondjo lo eongelo k’anto wa kokele oma l’ɛlɔmbwɛlɔ ka Diolelo sɔ totshutshuyaka dia sho tetemala ngɛnangɛna efula. Woho wakatosha Jehowa akambo wa mɛtɛ wa ngasɔ w’oma lo Dui diande totshutshuyaka dia sho sanyɛ anto akina awui akɔ l’ɔlɔlɔ tshɛ. (Osambu 56:10) Onde wɛ ntshaka dui sɔ mbala la mbala lo mbutɛka onto tshɛ ɔnɛ Diolelo dia Mɛsiya wa Nzambi diekɔ lo mbolɛ l’elongo nshi nyɛ?
Nyuma k’Ekila la Nkumbo Kaso ka l’Andja w’Otondo k’Anto l’Ɔnango Tokimanyiyaka
16 Yoho ya hende yatokimanyiya Nzambi dia sho monga la dihole l’atei wa sangwelo diande ele woho watoshande nyuma kande k’ekila, nyuma kakɔ tokimanyiyaka dia sho monga l’elowa atɔ lo nsɛnɔ yaso ko mbetawɔma le Nzambi. (Ngalatiya 5:22, 23) Ndo nto, Paulo akafundɛ Akristo w’akitami ate: ‘Sho takalongola . . . nyuma k’oma le Nzambi, dia sho monga l’akoka wa mbeya diangɔ diakatosha Nzambi oma l’ɔlɔlɔ ande.’ (1 Koreto 2:12) Naka sho mbetawɔ nyuma ka Jehowa monga la shɛngiya le so, kete kakianɛ sho tshɛ kokaka mbeya ndo shihodia diangɔ di’ɛlɔlɔ diakandatosha nshi nyɛ oma l’ɔlɔlɔ ande, diangɔ diakɔ ele: alaka ande, ɛlɛmbɛ ande, awui ande, ndo akambo akina efula.—Ɛdika la Mateu 13:11.
17 Yoho ya sato yatokimanyiya Nzambi ele tekɔ la nkumbo kaso ka l’andja w’otondo k’anto l’ɔnango ndo ɔlɔngɔswamelo wa dimɛna efula wakasale Jehowa dia sho mbɔtɛmɔlaka. Ɔpɔstɔlɔ Petero akataka dikambo sɔ lam’akandatokeketsha dia sho ‘mbokaka tshunda di’otondo di’anangɛso ngandji.’ (1 Petero 2:17) Nkumbo kaso ka ngandji kokengami l’anangɛso ndo l’akadiyɛso wa l’andja w’otondo tokimanyiyaka dia sho kambɛ Jehowa l’etema w’ɔngɛnɔngɛnɔ efula, ɔnkɔnɛ watotɛwɔ l’Osambu 100:2 ɔnɛ: “Nyukambelaki [Jehowa] ulimu l’ongenongeno, nyuyaki la ntundu kandi [“la kioko y’ɔngɛnɔngɛnɔ,” NW].” Divɛsa 4 mbutaka nto ɔnɛ: “Nyotoki l’asuku w’etemwelo kandi la lusaka, ndu lu aseke andi la diandu! Nyuwukaki lusaka, nyutumbulaki lukumbu landi.” Ɔnkɔnɛ, oyadi kânga tekɔ lo tasambisha lo sɛkɛ kana tekɔ lo losanganya, sho kokaka monga l’ɔngɛnɔngɛnɔ. Ande wɔladi la lotui tshitshi lakatakondja lo asɛkɛ wa tɛmpɛlɔ ka Jehowa ka lo nyuma lee!
Nyɛsɔ Totombolake Jehowa l’Ɔngɛnɔngɛnɔ!
18 Oyadi kânga ekakatanu a woho akɔna tshɛ, ɛhɛnyɔhɛnyɔ kana pâ ya ngande yambotokomɛ, nyɛsɔ tɔngɛnangɛnake lo woho weso lo luudu la Jehowa l’ɔtɛmwɛlɔ. (Isaya 2:2, 3) Tohɛke wate ɔngɛnɔngɛnɔ ekɔ dionga dia l’otema. Akristo w’anangɛso l’akadiyɛso wa lo nshi ya ntondo wakatombolaka Jehowa l’ɔngɛnɔngɛnɔ oyadi kânga mbakawasowaka efula ndo mbakawashishaka mbo yawɔ. (Heberu 10:34) Anyaso ambetawudi wa nshi nyɛ wekɔ mɛtɛ oko vɔ.—Mateu 5:10-12.
19 Sho wanɛ tshɛ wakambɛ Jehowa ngɛnangɛnaka dia kitanyiya didjango dia Bible diatotɛ dia sho mbotombolaka. Lo dibuku di’Enyelo tshɛkɛta ‘nyandole Jehowa’ fundama mbala la mbala l’atei w’ɛtɛkɛta watɛkɛtama dia mandola Nzambi. (Enyelo 19:1-6) Lo avɛsa asamalo wa l’Osambu 150, wekɔ lo totɛ mbala 13 dia sho mandola kana tombola Jehowa. Ɔsɔ ekɔ leeta lelɛwɔ ditongami tshɛ dia diɔ tshɛ kâmɛ sanganya awui awɔ dia membɛka Jehowa nkembo ya lotombo l’ɔngɛnɔngɛnɔ. Dia sho monga la lɔsɛnɔ la pondjo, pombaka sho mbɔtɔ l’ɔnɔngɔ w’olui ɔsɔ wa woke w’amembi w’Aleluya! Eelo mɛtɛ, paka anto watetemala tombola Jehowa mbayɔsɛna pondjo pondjo. Lâsɔ, sho tamboyadjangɛ dia mamema wolo lo etshumanelo kande ka kɔlamelo ka l’andja w’otondo l’etena kɛnɛ kayasukana ekomelo. L’etena kɛsɔ mbayotokoka nongamɛ dia mɛna ekotshamelo ka kokele k’ɛtɛkɛta wa ndjihelo wa l’Osambu 150 wata ɔnɛ: “Engo tshe keli la lumu, katumbuli [Jehowa]! Nyandulaki [Jehowa]!”
[Study Questions]
1, 2. (a) Lo ndjela Osambu 113:1-3, akɔna asungana sho tombolaka la wangasanu? (b) Naa wembola wasungana mumbɔma?
3. (a) Kakɔna katshikitanya ekambi wa Jehowa l’anto akina tshɛ? (b) Lo yoho yakɔna yambotokakitɔma?
4. Ngande wakatotshikɛ Yeso ɛnyɛlɔ lo tombolaka Jehowa?
5. Osambu 22:22 mendanaka la waa na, ndo ngande wahomba dionga diaso monga?
6. Ɔkɛndɛ akɔna wakasha Yeso ambeki ande, ndo anangi w’osase ngande watombolawɔ Nzambi?
7. Bonde kele wanɛ watombola Jehowa wekɔ l’ɔngɛnɔngɛnɔ w’efula? Ɔngɛnɔngɛnɔ akɔna waki lawɔ lushi la Pɛntɛkɔsta ka l’ɔnɔnyi wa 33 T.D.?
8. L’ɔkɔngɔ wa Pɛntɛkɔsta, Akristo akawasale dia fudia ɔngɛnɔngɛnɔ awɔ?
9. (a) Etena kakɔna ndo woho akɔna wakatatɛ Nzambi mbisha anto wa lo wedja tshɛ diaaso dia vɔ mboka lokumu lande l’ɔlɔlɔ? (b) Bonde kakaholɔ nyuma k’ekila le Kɔnɛliyo l’asekande la ntondo ka vɔ batizama?
10. Ngande wakawatatshi oma ko nshi y’edjedja ɔnɛ anto wa lo wedja tshɛ wayotombola Jehowa?
11. Ngande wakakimanyiya Nzambi anto wa lo wedja tshɛ dia vɔ mbeya akambo ande wa mɛtɛ, ndo kakɔna kambotomba oma lo dikambo sɔ na?
12. Naa ɛnɛlɔ kahahanya asolo kakɛnyi ɔpɔstɔlɔ Joani, ndo wa na wele lemba lɔsɔ la woke nshi nyɛ?
13. Kakɔna katshikitanya ekambi wa Jehowa la andja ɔnɛ?
14, 15. (a) Naa yoho mɔtshi yatokimanyiya Nzambi dia sho monga la dihole l’atei wa sangwelo diande diendana la lokombo lande ndo la Diolelo diande? (b) Ngande wotshikitanyi Diolelo diakatatɛ mbolɛ lo 1914 T.D. la nɛ diakakɔshama l’ɔnɔnyi wa 607 N.T.D.?
16, 17. Naa yoho ya hende la ya sato yatokimanyiya Nzambi dia sho monga la dihole l’atei wa sangwelo diande?
18. Lande na kakokaso ngɛnangɛna efula dia tombolaka Jehowa kânga l’atei w’ɛhɛnyɔhɛnyɔ kana lam’atokomɛ ekakatanu ekina?
19. (a) Naa didjango diatoshawɔ mbala ko mbala diatotshutshuya dia sho tombola Jehowa? (b) Ahombaso ntsha dia monga la lɔsɛnɔ la pondjo, ndo ahombaso ndjadjangɛ dia ntsha?
[Caption]
[Questions]
[Caption on page 27]
[Caption on page 27]
Lo dihole tshɛ diakinde, Yeso akasambishaka awui wa Jehowa ndo akôtombolaka lo sɛkɛ
[Caption on page 30]
[Review on page 30]
Ngande Wayoyokadimola?
◻ Kakɔna katshikitanya ekambi wa Jehowa l’anto akina tshɛ?
◻ Bonde kele ekambi wa Jehowa l’ɔngɛnɔngɛnɔ w’efula?
◻ Kakɔna katotshikitanya la andja ɔnɛ?
◻ Naa weho esato watokimanyiya Nzambi dia sho monga la dihole l’atei wa sangwelo diande?