Akɔna Ayoshimbamɛ Lo “Lushi La Jehowa”?
‘Lâsɔ nyamɛ mbokaka woho w’anto wahombanyu monga, nyu pombaka monga la etsha wa lɔkɛwɔ l’ekila ndo la ditshelo di’anto wamamema Nzambi, ko kongɛka ndo namaka wôngelo wa lushi la Jehowa lo yimba!’—2 PETERO 3:11, 12.
OMA l’atei w’anto, Jehowa Nzambi akasɔnɔla wanɛ wayoyoyala ekitɔ kâmɛ l’Ɔnande Yeso Kristo lo Diolelo dia l’olongo. (Romo 8:16, 17) Etena kekewɔ lanɛ laa nkɛtɛ, Akristo w’akitami kambaka olimu la yimba ndo la nkudu k’Elidja. (Luka 1:17) Lo sawo dietshi, takɛnyi awui amɔtshi wafɔna l’asa elimu wasalawɔ la elimu wakasalaka omvutshi Elidja. Ko kayotota lo dikambo di’olimu wakayosala omvutshi Elisha, okitɔ w’Elidja na?—1 Khumi ya Dikanga 19:15, 16.
2 Dihindo dia komelo diakasale Elidja aki mbɔsa kɔti diande ko dikɔmɔla l’Ɔkɛdi wa Jɔrɔdana ko ashi mbatɔna. Dihindo sɔ diakasha Elidja nde la Elisha diaaso dia vɔ ntehɔ ɔkɛdi ɔsɔ lo nkɛtɛ y’ofumbo. Lam’akawatatshɔka lo lɛkɛ l’ehotwelo l’ɔkɛdi akɔ, lɔpɔpɛ la wolo lakɛmbɛ Elidja otsha lo dihole dikina dia lanɛ laa nkɛtɛ. (Enda lo kiombokombo ya lo lɛkɛ 12 yele l’ɔtɛ a dui ɔnɛ: “Elidja Akadɛ l’Olongo wa Woho Akɔna?”) Kɔti di’Elidja diakatshikala. Lam’akadiɔshi Elisha ko nde dikɔmɔla lo Jɔrɔdana, ashi awɔ wakatɔna ko nde akakalola lo nkɛtɛ y’ofumbo. Dihindo sɔ diakɛnya hwe ɔnɛ Elisha aya okitɔ w’Elidja dia keketsha ɔtɛmwɛlɔ wa mɛtɛ l’Isariyɛlɛ.—2 Khumi ya Dikanga 2:6-15.
Waonga Walanga Nzambi Wekɔ Ohomba
3 Ɛnɔnyi nkama l’ɔkɔngɔ wa nshi yakasɛnaka Elidja nde la Elisha, ɔpɔstɔlɔ Paulo nde l’ɔpɔstɔlɔ Petero wakayɔsɔhanya “lushi la Jehowa” layaye la wôngelo wa Yeso Kristo ndo la “elongo w’eyoyo [wayaye] la nkɛtɛ k’oyoyo” kayaye. (2 Tɛsalɔnika 2:1, 2, NW; 2 Petero 3:10-13, NW) Dia sho mbika lo lushi la woke la Jehowa, lam’ayolanya Nzambi atunyi ande ko shimbɛ wodja ande, sho pombaka nyanga Jehowa ndo mɛnya lo sɛkɛ ɔnɛ tekɔ la ndjâkitshakitsha ndo la losembwe. (Zefaniya 2:1-3) Koko, lam’endaso akambo wendana l’omvutshi Elisha, mɛnamaka dia waonga akina nto wekɔ ohomba.
4 Ekɔ ohomba monga l’ohetoheto l’olimu wa Nzambi naka sho nangaka mbika lo “lushi la Jehowa.” Elidja nde l’Elisha waki l’ohetoheto l’olimu wa Jehowa. Ɛlɔ kɛnɛ, atshikadi w’Akristo w’akitami wekɔ l’ohetoheto wa ngasɔ ko wekɔ lo kambɛ Jehowa olimu w’ekila ndo wekɔ lo nɔmbɔla olimu w’esambishelo ka lokumu l’ɔlɔlɔ.a Tatɛ oma l’atei atei w’ɛnɔnyi wa 1930, vɔ keketshaka anto tshɛ wetawɔ losango la Diolelo ndo walongamɛ ndjɔsɛna pondjo pondjo lanɛ laa nkɛtɛ dia vɔ nambola nsɛnɔ yawɔ le Jehowa ndo batizama. (Mako 8:34; 1 Petero 3:21) Miliyɔ y’anto wekɔ lo ndjela dako sɔ. Lo nshi ya ntondo vɔ waki lo wodjima wa lo nyuma ndo wakavu lo pɛkato, koko kakianɛ vɔ wambeka akambo wa mɛtɛ waki Nzambi, waya l’elongamelo ka lɔsɛnɔ la pondjo lo nkɛtɛ kayokadimɔ paradiso, ndo wekɔ l’ohetoheto l’olimu wa Jehowa. (Osambu 37:29; Enyelo 21:3-5) Oma l’ohetoheto awɔ, oma lo woho ɔnɛ wakambawɔ kâmɛ, oma lo ngandji kawɔ k’angɛndangɛnda ndo oma l’elimu ekina w’ɛlɔlɔ wasalawɔ, vɔ mbishaka anango Kristo wa lo nyuma wêke lanɛ laa nkɛtɛ ekeketshelo ka woke.—Mateu 25:31-46.
5 Wanɛ wasalɛ ‘anango’ Kristo ɔlɔlɔ nɛ dia akitami asɔ wekɔ ambeki ande wekɔ l’elongamelo ka mbika lo “lushi la Jehowa.” Mama kɛmɔtshi ka lo ngelo ka Shunɛma nde l’omɛnde wakakondja ɛtshɔkɔ efula nɛ dia vɔ wakasalɛ Elisha nde l’okambi ande ɔlɔlɔ ndo wakâlongolaka lakawɔ. Atshukanyi asɔ komonga ndoko l’ɔna, ndo pami aki osombe. Koko Elisha akalake omoto ɔsɔ l’Ose Shunɛma ɔnɛ nde ayota ɔna pami, ko mama kɛsɔ akayotaka ɔna. Lam’akayovɔ tshɔyi yakɔ y’ɔna, Elisha akatshu la Shunɛma ko akatowolola. (2 Khumi ya Dikanga 4:8-17, 32-37) Ande afuto wa weke wakawalongola oma lo ngandji kakawɛnya Elisha lo mbolongolaka lakawɔ lee!
6 Okitshakitsha ekɔ ohomba di’onto mbetawɔ alako w’oma lo Bible waya oma le ‘anango’ Kristo ko monga l’elongamelo ka mbika lo lushi la Jehowa. Owandji w’alembe w’Ase Suriya wakawelɛka Namana, ɔnɛ laki la hemɔ ka sudi, akahombe monga l’okitshakitsha dia ndjela kanyi yaki yana ya yimato y’Ose Isariyɛlɛ yaki lo lɔhɔmbɔ ko nyanga ɛkɔnwɛlɔ lo ntshɔ l’Isariyɛlɛ dia tɛnana l’Elisha. Lo dihole dia nde tomba oma lo luudu lande dia tohomana la Namana, Elisha akôtomɛ dikɛndji ate: “Utshu, utoke tena esambeli lu ashi wa Jorodana, ku dimba diaye diayokolongana uku akidio ntundu, ku we ayuyala pudipudi.” (2 Khumi ya Dikanga 5:10) Oko wakinde l’otako, Namana akayala la pâ l’asolo ko akoke nkɛlɛ, koko l’ɔkɔngɔ wa nde ndjâkitshakitsha ko ntshɔ dia tombɛ mbala esambele l’ɔkɛdi wa Jɔrɔdana, “dimba diandi diakayala uku dimba dia ona ashashi; ndi akayala pudipudi.” (2 Khumi ya Dikanga 5:14) La ntondo ka nde kalola lakande, Namana akande lɔkɛndɔ otsha la Samariya dia tosha omvutshi wa Jehowa losaka. Elisha akaye dia ndjohomana la Namana koko nde kombetawɔ nongola kânga woshasha ɔtɔi nɛ dia nde akɔshi tɛdikɔ di’aha kondja wahɔ wa l’emunyi oma lo nkudu kakawosha Nzambi. Namana akatɛ Elisha l’okitshakitsha tshɛ ate: “Dimi ukambi aye handjulanga nambula ulambu a lutshumba kana ulambu le [“nzambi kina,” NW]. Dimi layêlambulaka paka le [Jehowa].”—2 Khumi ya Dikanga 5:17.
7 Ɛlɔ kɛnɛ, miliyɔ y’anto wekɔ lo kondja ɛtshɔkɔ efula lam’ayakitshakitshawɔ ko ndjelaka alako w’oma l’Afundelo wawasha Akristo w’akitami. Lâdiko dia lâsɔ, oma lo mbetawɔ kele lawɔ l’olambo w’etshungwelo wakakimɔ Yeso, anto asɔ wele l’etema wa losembwe wambɛdiama lo nyuma. Kakianɛ vɔ waya la diɛsɛ dia monga angɛnyi wa Jehowa Nzambi la wa Yeso Kristo. (Osambu 15:1, 2; Luka 16:9) Ndo oma lo woho wamamemawɔ Nzambi ndo wayashawɔ l’olimu ande, vɔ wayokondja difuto, mbut’ate wayohandɔ oma l’elanyelo ka pondjo kayanga komɛ akanga w’otako, atshi wa kɔlɔ wahayatshumoya, lam’ayokoka “lushi la Jehowa” layasukana esadi esadi.—Luka 13:24; 1 Joani 1:7.
“Akona Eli lu Leke Lami”?
8 Wanɛ walongamɛ mbika lo “lushi la Jehowa” pombaka nto monga anto wamboyashikikɛ dia ntsha lolango la Nzambi. La dihonga tshɛ, Elidja akatatshi dia elanyelo ka nkumbo ka Nkumekanga Ahaba, nkumbo k’andjakanyi ndo k’atɛmɔdi wa Baala. (1 Khumi ya Dikanga 21:17-26) Koko la ntondo ka didjango sɔ ndjokotshama, Elisha, okitɔ w’Elidja, akahombe tashidiyisha olimu ɔmɔtshi wakatshikala. (1 Khumi ya Dikanga 19:15-17) Lam’akakoke etena kakemɛ Jehowa, Elisha akatɛ okambi ande dia nde ntshɔ ko tokita Jehu, ɔlɔmbɔdi w’alembe, esɔ oko nkumekanga k’oyoyo ka l’Isariyɛlɛ. L’ɔkɔngɔ wa nde mbutɛ esɔ l’ɔtɛ wa Jehu, dikɛndji diakɔ akawotɛ ate: “[“Jehowa Nzambi k’Isariyɛlɛ,” NW], kata ati: Lambukutela iso dia we ndjala khum’ekanga ka wudja wa [Jehowa], Isariyele. Kushili luudu la khumeye Ahaba ushiki, dia dimi nsomboya Jezebele dikila dia ekambi ami amvutshi la dikila dia ekambi tshe wa [Jehowa]. Ne dia utundu a khumbu tshe ka Ahaba kayulanyema.” Jezabɛlɛ ya wad’a Nkumekanga, omoto la kɔlɔ, akahombe ndjokadjema le waa mfɔ ndo aha ndjokundɛma lo yoho yasungana.—2 Khumi ya Dikanga 9:1-10.
9 Anto waki Jehu waketawɔ okitamelo ande w’esɔ ko wakôsapola oko nkumekanga k’oyoyo k’Isariyɛlɛ. Aha la mengenga, Jehu akasamanya otsha la Jizerɛlɛ dia totatɛ olimu ande wa ndjaka ɛtɔlɔki wakalɔmbɔlaka anto l’ɔtɛmwɛlɔ wa Baala. Onto la ntondo lakahomɔ lohito la Jehu aki Nkumekanga Jɔrama, ɔna Ahaba. Nde akâhema lâdiko dia falasa, akatombe oma l’osomba ko akatshu dia tombola Jehu kana lo wɔladi mbayandaye. Jehu akôkadimola ate: “Ki kakona keko lam’eki munanyi ya nyo Jezebele, la aloka andi efula okone?” L’etena kakɔ, Jehu akatsheeta Jɔrama ko lohito lakatondola doi diande.—2 Khumi ya Dikanga 9:22-24.
10 Amato wamamema Nzambi mbewɔka dia monga oko Jezabɛlɛ kana woho ɔmɔtshi wɔfɔnyi la nde. (Enyelo 2:18-23) Lam’akakome Jehu la Jizerɛlɛ, Jezabɛlɛ akasale tshɛ dia ndjâlɛnga ko mɛnama dimɛna di’efula. Nde akende la wedi wa didishi oya laa nkɛtɛ ko akawemula la dianelo. Jehu akambola ekambi ande ate: “Akona eli lu leke lami?” Ko wonya akɔ wâmɛ, ɛlɔhɛ ehende kana esato wa lo mbalasa ka nkumekanga wakende oya laa nkɛtɛ. Onde vɔ waki lo lɛkɛ la Jehu? Jehu akawatɛ ate: “Nyuwukadja la kete.” Kam’akawoke ɔsɔku, aha la mengenga vɔ wakɔshi Jezabɛlɛ, omoto la kɔlɔ, wakôtondja oma lo didishi ko mbɔkɔsha laa nkɛtɛ. Nde akahɔtshahɔtshama, ondo l’ekolo a waa falasa. Lam’akayoya anto dia ndjôkundɛ, ‘vɔ wakayotana paka lowako, ekolo la tambe di’anya.’ Ɔsɔ mɛtɛ aki ekotshamelo ka diambo k’ɛtɛkɛta w’Elidja w’ɔnɛ: “Fo yayole emunyi wa Jezebele”!—2 Khumi ya Dikanga 9:30-37.
Tosuke Ɔtɛmwɛlɔ wa Mɛtɛ l’Otema Ɔtɔi
11 Wanɛ walongamɛ dia mbika lo “lushi la Jehowa” ko sɛna pondjo pondjo lanɛ laa nkɛtɛ pombaka sukɛ ɔtɛmwɛlɔ wa mɛtɛ l’otema ɔtɔi. Vɔ pombaka monga oko Jɛhɔnadaba, kana Jɔnadaba, ɔtɛmɔdi wa Jehowa waki komonga Ose Isariyɛlɛ. Lam’akatatetemalaka Jehu sala olimu ande l’ohetoheto tshɛ, Jɛhɔnadaba akalange mɛnya ɔnɛ nde mbetawɔka ndo sukɛka olimu akɔ. Ɔnkɔnɛ nde akatshu dia tohomana la Nkumekanga k’oyoyo k’Isariyɛlɛ, lam’akandatatshɔka otsha la Samariya dia todiaka ase nkumbo k’Ahaba wakatshikala. Lam’akandɛnyi Jɛhɔnadaba, Jehu akawombola ate: “Undi, utema aye weko ololo le mi uku eli utema ami le ye?” Okadimwelo wa Jɛhɔnadaba w’ɔnɛ: eelo akatshutshuya Jehu dia nde sembola lonya lande ko mbelɛ Jɛhɔnadaba dia nde mbudɛ lo pusupusu kande, awotɛ ate: ‘Yete tênde woho wahametawɔ kânga yema di’onto sɛmanɛ la Jehowa.’ Aha la tshimbatshimba, Jɛhɔnadaba aketawɔ diɛsɛ sɔ dia mɛnya woho wasukɛnde okitami wa Jehowa, ɔnɛ lakasɔnama dia ndjaka atunyi ande.—2 Khumi ya Dikanga 10:15-17.
12 Sunganaka mɛtɛ dia sho sukɛ ɔtɛmwɛlɔ wa mɛtɛ l’otema ɔtɔi nɛ dia Jehowa mbele Otungi ndo Omboledi w’Andja w’Otondo; nde hatshe ndoko kɔlɔ lam’atɔlɔmbande dia sho mbomamema paka ndamɛ oto ndo nde mɛtɛ sunganaka la dui sɔ. Nde akadjɛ Ase Isariyɛlɛ didjango nɛ ɔnɛ: “Tuyaselelaki nduku ekishi, kuyanga efanelu k’engo kemotshi keli l’ulungu, kana keli la kete, kana keli l’ashi. Tudikhuselaki adui kuyanga ditemola, ne dia dimi [“Jehowa Nzambi kayɛ lekɔ Nzambi ka,” NW] kandjema.” (Etumbelu 20:4, 5) Wanɛ walongamɛ dia ndjoshimbamɛ lo “lushi la Jehowa” pombaka mbɔtɛmɔlaka paka ndamɛ oto, mbɔtɛmɔlaka “lu [n]yuma la lu mete.” (Joani 4:23, 24) Vɔ la dia monga nge dia mamɛ ɔtɛmwɛlɔ wa mɛtɛ, oko Elidja nde l’Elisha la Jɛhɔnadaba.
13 L’ɔkɔngɔ wa nde ndjaka wa lo luudu l’Ahaba tshɛ, Nkumekanga Jehu akatshe awui akina nto dia nde mbeya wanɛ wele atɛmɔdi wa Baala ko minya ɔtɛmwɛlɔ ɔsɔ wa kashi oma l’Isariyɛlɛ. (2 Khumi ya Dikanga 10:18-28) Ɛlɔ kɛnɛ, Yeso Kristo, Nkumekanga ka l’olongo, mbambɔsɔnama dia ndjaka atunyi wa Jehowa ndo mɛnya losembwe la lowandji Lande. Oko waki otema wa Jɛhɔnadaba ɔlɔlɔ le Jehu, ɛlɔ kɛnɛ ‘lemba la woke’ l’“ekoko ekina” waki Yeso wekɔ lo mbetawɔ Kristo l’otema ɔtɔi oko Mɛsiya ndo Nkumekanga ndo wekɔ lo kamba kâmɛ l’anango wa lo nyuma wele lanɛ laa nkɛtɛ. (Enyelo 7:9, 10; Joani 10:16) Vɔ wekɔ lo mɛnya dui sɔ lo woho ɔnɛ wewɔ l’atei w’ɔtɛmwɛlɔ wa mɛtɛ ndo lo woho wasalawɔ olimu w’esambishelo l’ohetoheto, ko tewolaka atunyi wa Nzambi lo dikambo dia “lushi la Jehowa” layasukana esadi esadi.—Mateu 10:32, 33; Romo 10:9, 10.
Kem’edja, Akambo wa Diambo Wayanga Ntshama!
14 Jehu akasale tshɛ dia minya ɔtɛmwɛlɔ wa Baala oma l’Isariyɛlɛ. Lo nshi yaso nyɛ, l’ekimanyielo ka Yeso Kristo, Jehu Yoleki Woke, Nzambi ayela elanyelo le Babilɔna ka Woke, mbut’ate etshumanelo k’ɛtɛmwɛlɔ wa kashi wa l’andja w’otondo. Kem’edja nto, tayɛna ekotshamelo k’ɛtɛkɛta wakatɛ ondjelo ɔpɔstɔlɔ Joani ate: “Seki dikumi yakayenyi, ndu nyama, yayuhetsha umuntu a luseka [Babilɔna ka Woke]. Yo yayûhandjula, yayûtshika utakataka, yayole umunyi andi, yayûtshumba ushiki. Ne dia [Nzambi] akotshiya dikambu ne l’etema awo dia vo ntsha uku lulangu landi, la dia vo ndjala la utema otoi, la dia vo nkimwela nyama kako diulelu diawo, edja ndu lam’ayushidiyama aui wa [Nzambi].” (Enyelo 17:16, 17; 18:2-5) “Seki dikumi” shɔ nembetshiyaka mandji ya pɔlitikɛ yele l’asɔlayi yôlɛ lanɛ laa nkɛtɛ. Kânga mbasalawɔ loseka la lo nyuma nshi nyɛ vɔ la Babilɔna ka woke, etena kande kaya mondomondo. Atshunda wa pɔlitikɛ wa l’andja ɔnɛ wayolanya ɛtɛmwɛlɔ wa kashi, ndo ‘nyama ka djawudi,’ mbut’ate O.N.U., ayoyala l’ɔkɛndɛ wa woke efula kâmɛ la “seki dikumi” lo elanyelo kawɔ.b Ɔsɔ mɛtɛ ayonga etena ka tombola Jehowa.—Enyelo 19:1-6.
15 L’ɔkɔngɔ wa Nkumekanga Jehu ndɔshana l’ɔtɛmwɛlɔ wa Baala, nkumbo kande ka nkumekanga kakendana l’ewandji wa pɔlitikɛ wakahetshanaka l’Isariyɛlɛ. Nkumekanga Yeso Kristo ayosala ngasɔ ndo nde lawɔ. L’ɔkɔngɔ w’elanyelo k’ɛtɛmwɛlɔ wɔfɔnyi l’ɔtɛmwɛlɔ wa Baala, mandji ya pɔlitikɛ yayotshikala. Oma lo shɛngiya yaki Satana Diabolo, atunyi asɔ wa lowandji la Jehowa wayɔtwɛ ɔlɔngɔswamelo wa Nzambi wa lanɛ laa nkɛtɛ dia mbohandjola. (Ezekiyele 38:14-16) Koko Jehowa ayotoma Nkumekanga Yeso Kristo dia nde ndjâdiaka lo Armagɛdɔna, ‘ta dia lushi la woke la Nzambi Kanga-Nkudu-Tshɛ,’ ko shidiya la mɛnya losembwe la lowandji laki Jehowa!—Enyelo 16:14, 16; 19:11-21; Ezekiyele 38:18-23.
Tokambe Olimu l’Ohetoheto oko Elisha
16 Edja ndo lam’ayokumiya “lushi la Jehowa” dikongɛ di’akambo dia Satana dia kɔlɔ nɛ di’otondo, ekambi wa Nzambi wayongaka nshi tshɛ la dihonga ndo l’ohetoheto oko Elisha. Lâdiko di’olimu wakandakambaka oko okambi w’Elidja, Elisha akayokamba ndamɛ oto oko omvutshi wa Jehowa l’edja k’ɛnɔnyi ndekana 50! Elisha akɔ aki l’ohetoheto polo ndo l’ekomelo ka lɔsɛnɔ lande l’otale efula. Yema la ntondo ka nde mvɔ, Nkumekanga Jɔashi, okana waki Jehu, akaye dia ndjowenda. Elisha akawotɛ dia nde mboka lohito la wedi wa didishi. Lohito lakɔ lakatshu lo lɛkɛ lakandalioke ko Elisha akate ate: ‘Lohito la panda ka Jehowa, ɛɛ, lohito la panda dia ndɔshana la Suriya! Wɛ ayodiaka Ase Suriya l’Afɛka polo ndo lam’ayoyâshila oshiki.’ Lo ndjela kɛnɛ kakawotɛ Elisha, Jɔashi akakɔmɔla mpito kina shato laa nkɛtɛ. Koko nde konsala dui sɔ l’ohetoheto, akayikɔmɔla paka mbala shato tsho. L’etena kɛsɔ, Elisha akate ɔnɛ lam’ele Jɔashi ambotsha ɔnkɔnɛ, nde ayodja Suriya otshumba paka mbala shato tsho, ko dikambo sɔ diakayala mɛtɛ. (2 Khumi ya Dikanga 13:14-19, 25) Nkumekanga Jɔashi kondjaka Ase Suriya tshɛ, ‘edja ndo mbashila oshiki.’
17 Koko, atshikadi w’Akristo w’akitami wekɔ lo tetemala la ndɔsha ɛtɛmwɛlɔ wa kashi l’ohetoheto tshɛ oko Elisha. Asekawɔ walongamɛ ndjɔsɛna lanɛ laa nkɛtɛ wekɔ lo ntsha ngasɔ ndo vɔ lawɔ. Lâdiko dia lâsɔ, ayonga ɔlɔlɔ dia wanɛ tshɛ walongamɛ mbika lo “lushi la Jehowa” mbohɔka ɛtɛkɛta wakate omvutshi w’ohetoheto wakawelɛka Elisha lo dikambo dia tsheeta mpito laa nkɛtɛ. Nyɛsɔ tɔshi mpito y’akambo wa mɛtɛ kele toyitshetake l’ohetoheto tshɛ—mbala ko mbala—edja ndo lam’ayota Jehowa ɔnɛ olimu wasalaso la mpito yakɔ amboshila.
18 Kem’edja nto, “lushi la Jehowa” layokumiya dikongɛ di’akambo nɛ dia kɔlɔ. Nyɛsɔ totshike ɛtɛkɛta w’ekeketshelo waki ɔpɔstɔlɔ Petero watosokoyake l’etsha. Petero akate ate: ‘Lâsɔ nyamɛ mbokaka woho w’anto wahombanyu monga, nyu pombaka monga la etsha wa lɔkɛwɔ l’ekila ndo la ditshelo di’anto wamamema Nzambi, ko kongɛka ndo namaka wôngelo wa lushi la Jehowa lo yimba!’ (2 Petero 3:11, 12) Lam’ayolanyema tenyi tshɛ dia dikongɛ nɛ la dja ya nkɛlɛ ka Nzambi kayɛnama lo tshimbo ya Yeso Kristo, paka wanɛ weyama ɔnɛ vɔ waki la lɔkɛwɔ la losembwe ndo wakamamemaka Nzambi mbayohandɔ. Ekɔ ohomba monga la lɔkɛwɔ la pudipudi ndo ndjâla pudipudi lo nyuma. Ekɔ ohomba nto monga la ngandji k’asekaso anto, ngandji kakɔ mɛnamaka lam’awashaso kɛnɛ kahombawɔ, djekoleko lo nyuma, oma l’olimu aso w’Okristo.
19 Onde ɛtɛkɛta ayɛ la ditshelo diayɛ mɛnyaka dia wɛ ekɔ okambi wa Nzambi wa kɔlamelo ndo wele l’ohetoheto? Naka eelo, kete wɛ kokaka monga l’elongamelo ka mbika lo “lushi la Jehowa” ko mbɔtɔ l’andja w’oyoyo wakatolake Nzambi. Eelo mɛtɛ, wɛ kokaka kondja eko naka wɛ salɛ anango Kristo wa lo nyuma ɔlɔlɔ nɛ dia vɔ wekɔ ambeki ande, ɔnkɔnɛ wakalongolaka wadi l’omi w’Ase Shunɛma Elidja lakawɔ. Dia wɛ kondja eko, wɛ pombaka monga nto oko Namana, ɔnɛ lakayakitshakitsha ko mbetawɔ awui w’oma le Nzambi wakawawotɛ ko ndjoyala ɔtɛmɔdi wa Jehowa. Endaka wɛ kombolaka sɛna pondjo pondjo lo nkɛtɛ kayokadimɔ paradiso, kete wɛ pombaka mɛnya dia wɛ sukɛka ɔtɛmwɛlɔ wa mɛtɛ l’otema ɔtɔi, oko ɔnkɔnɛ wakasale Jɛhɔnadaba. Lâsɔ mbakokayɛ monga l’atei w’ekambi wa Jehowa wa kɔlamelo, wanɛ wayanga mɛna ekotshamelo k’ɛtɛkɛta wa Yeso w’ɔnɛ: “Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja.”—Mateu 25:34.
[Footnotes]
a Enda lo tshapita ya 18 la 19 ya lo dibuku dielɛso “Que ton nom soit sanctifié,” dibuku sɔ diakatondjama oma le Watchtower Bible and Tract Society of New York, Inc.
b Enda lo lɛkɛ 254-256, lo dibuku dielɛso La Révélation : le grand dénouement est proche !; dibuku sɔ diakatondjama oma le Watchtower Bible and Tract Society of New York, Inc.
[Study Questions]
1. Waa na wakamba olimu la yimba ndo la nkudu k’Elidja?
2. (a) Dihindo diakɔna dia komelo diakasale Elidja, ndo naa dihindo dia ntondo diakasale Elisha? (b) Kakɔna kɛnya ɔnɛ Elidja kombudɛ l’olongo?
3. Paulo nde la Petero akawate lo dikambo dia wôngelo wa Yeso ndo dia “lushi la Jehowa”?
4. Naa ohomba w’ohetoheto l’olimu wa Jehowa?
5. Bonde kele ekɔ ohomba salɛka ‘anango’ Yeso akambo w’ɔlɔlɔ, ndo naa ɛnyɛlɔ kakondjaso oma lo nshi yaki Elisha la lɔsɛnɔ?
6, 7. Ɛnyɛlɔ kakɔna kakatotshikɛ Namana, ndo dui sɔ diekɔ la shɛngiya yakɔna lo panda kaso lo “lushi la Jehowa”?
8. (a) Wanɛ wayokondja eko lo “lushi la Jehowa” wekɔ la dionga diakɔna lo osalelo wa lolango la Nzambi? (b) Olimu akɔna wakawasha Jehu? (c) Kakɔna kakahombe ndjokomɛ Jezabɛlɛ?
9, 10. Ngande wakayokotshamaka ɛtɛkɛta w’Elisha le Jezabɛlɛ?
11. Jɛhɔnadaba akinde, ndo ngande wakandɛnya ɔnɛ nde sukɛka ɔtɛmwɛlɔ wa mɛtɛ?
12. Lande na kasungana Jehowa nɔmba anto dia vɔ mbɔtɛmɔlaka paka ndamɛ oto?
13. Oko waki otema wa Jɛhɔnadaba ɔlɔlɔ le Jehu, waa na akɔna wetawɔ Mɛsiya Nkumekanga, ndo ngande wɛnyawɔ dikambo sɔ?
14. Kakɔna kayanga komɛ ɛtɛmwɛlɔ wa kashi?
15. Kakɔna kayosalema lam’ayowoyanga nanya ɔlɔngɔswamelo wa Nzambi wa lanɛ laa nkɛtɛ?
16, 17. (a) Ngande weyaso ɔnɛ Elisha aki l’ohetoheto polo ndo l’ekomelo ka lɔsɛnɔ lande? (b) Ahombaso sala la mpito y’akambo wa mɛtɛ?
18. Ahombaso sala lo ndjela ɛtɛkɛta wa lo 2 Petero 3:11, 12?
19. Ahombaso ntsha dia mbika lo “lushi la Jehowa”?
[Caption]
[Footnotes]
[Caption]
[Questions]
[Caption on page 17]
[Review on page 17]
Ngande Wayoyokadimola?
◻ Naa waonga amɔtshi wahombama dia sho shimbamɛ lo “lushi la Jehowa”?
◻ Ɛnyɛlɔ kakɔna kakatotshikɛ wadi l’omi w’Ase Shunɛma wanɛ wakasɛnaka lo nshi y’Elisha?
◻ Wetshelo akɔna wakokaso mbɔsa oma le Namana?
◻ Ngande wakokaso ndjela ɛnyɛlɔ ka Jɛhɔnadaba?
◻ Ngande wahomba 2 Petero 3:11, 12 monga la shɛngiya le so?