Ɛtshɔkɔ Waya Oma L’olimu W’ombatshi Mboka
“Otshoko wa [Jehowa] mbatongonyaka. Ndi hataheka lunyangu ladiku diawo.”—TUKEDI 10:22.
“ONDE ekɔ ɔngɛnɔngɛnɔ ɔmɔtshi woleki wɔnɛ wa mɛna onto ɔmɔtshi lakayetsha Bible ôtombola Jehowa la wâsaso oka? Ekɔ ɔlɔ efula ndo mbetawɔ kaso keketshamaka lam’ɛnaso nganɛ watshutshuyama anto oma lo nkudu kele la Dui dia Nzambi dia vɔ sala etshikitanu lo nsɛnɔ yawɔ dia ngɛnyangɛnya Jehowa.” Ngasɔ mbakafunde ombatshi mboka ɔmɔtshi w’Ose Canada wambolekanya ɛnɔnyi 32 l’olimu wa lo tena tshɛ. Nganɛ mbatande lo dikambo di’olimu ande w’ombatshi mboka: “Halɛnyi ema kekina nto kakokami ntsha. Halɛnyi ndoko ema kekina kakokami fɔnya ɔnɛ tɔ kokaka ngɛnyangɛnyami ngasɔ.”
2 Onde wɛ suyaka ɔnɛ kimanyiya onto ɔmɔtshi dia nde mbidjɛ lo mboka ka lɔsɛnɔ ekɔ dui di’ɔngɛnɔngɛnɔ efula? Mɛtɛ, aha ambatshi mboka ato mbangɛnangɛna ngasɔ. Ekambi wa Jehowa tshɛ mbele l’ɔkɛndɛ wa “[mb]ete wedja tshe ambeki,” ndo vɔ ndjatshutshuyaka dia ntsha ngasɔ. (Mateu 28:19) Koko, lam’ele ambatshi mboka mbetshaka wenya efula l’olimu w’esambishelo, mbala efula vɔ mbaleka ngɛnangɛna l’olimu wa mbetɛ anto ambeki. Koko olimu w’ombatshi mboka wekɔ l’afuto akina nto. Naka wɛ sawola l’ambatshi mboka, kete vɔ wayokotɛ ɔnɛ olimu akɔ ekɔ diaaso dia mamba dia kondja ‘ɔtshɔkɔ wa Jehowa wangɔnya onto.’—Tukedi 10:22.
3 Atete ndoko edja, wakambola ambatshi mboka w’oma lo bɛkɛ diotshikitanyi dia l’andja w’otondo dia vɔ kɔndɔla ɛtshɔkɔ wakawakondja l’olimu awɔ wa lo tena tshɛ. Nyɛsɔ tende kɛnɛ kakawate. Koko, tonyangake naka wɛ hakoke kamba efula dikambo dia yoonge yayɛ bu dimɛna, ko kana lotshundu lambokonda, kana awui akina nto hawokosha diaaso. Tohɛke ɔnɛ dui dioleki ohomba ele kambɛ Jehowa l’anima ayɛ tshɛ oyadi lɔsɛnɔ la ngande lasɛnayɛ. Lo tetemala mpokamɛ asawo w’ambatshi mboka amɔtshi, nsaki kayɛ ka kamba olimu ɔsɔ wa nɛmɔ mbeyaka pama naka wɛ kokaka sala olimu akɔ.
Ɔlɔ w’Efula ndo Ɔngɛnɔngɛnɔ Waya oma l’Olimu
4 Yeso akate ate: “[“Ɔngɛnɔngɛnɔ wa,” NW] mbisha, ambuleka [wa] nungula.” (Etsha 20:35) Eelo, naka hatosha l’etema ehende, kete tayokondja difuto diaso. (Tukedi 11:25) Dui sɔ mɛnamaka lam’asambishaso anto akina lokumu l’ɔlɔlɔ. Onde na, oshasha ɔmɔtshi woleki woke wakokaso mbisha onyaso onto wekɔ naka aha mbokimanyiya dia nde kondja ewo ka Nzambi katɔla otsha lo lɔsɛnɔ la pondjo?—Joani 17:3.
5 Tamu bu dia wanɛ wakamba olimu wa lo tena tshɛ tɛkɛtaka di’ɔlɔ ndo di’ɔngɛnɔngɛnɔ w’efula wakondjawɔ l’olimu awɔ. Ombatshi mboka ɔmɔtshi w’ɛnɔnyi 64 w’Ose Angleterre ate: “Dimi mbeyaka dia ndoko olimu okina wakoka ngɛnyangɛnyami oko wɔnɛ wa sambisha anto akina akambo wa mɛtɛ.” Wadi aki odo ɔmɔtshi l’Ose R.D. Congo akɛnya etombelo waki olimu w’ombatshi mboka le nde ata ate: “Olimu w’ombatshi mboka waki ekeketshelo ka mɛtɛ le mi l’ɔkɔngɔ wa nyɔi k’omɛmi la ngandji. Efula katombami l’olimu dia tokimanyiya anto akina, efula kakitakita kandji ka nyɔi k’omɛmi. Dimi mbidjaka mbetawɔ kami lo alaka wa Jehowa ndo dimi ndekaka kanyiya nganɛ wakokami kimanyiya anto wetshami Bible dia vɔ sala etshikitanu lo nsɛnɔ yawɔ. Lam’adja wonya, dimi ndalaka djɔ ya bao, ndo otema ami ngɛnangɛnaka efula.”
6 Ambatshi mboka amɔtshi waya ɛnɔnyi akumi l’olimu awɔ wakakondja ɔngɛnɔngɛnɔ wa lânde wa kamba olimu awɔ lo bɛkɛ dia tale, wambata tshumanelo diayokengaka etshimbedi l’ɔkɔngɔ. Oko ɛnyɛlɔ, kadiyɛso kɛmɔtshi kaya ombatshi mboka l’edja kɛnɔnyi 33 ekɔ la Abashiri, Hokkaido (Disɛnga di’Ase Japon dianganyi etale koleki lo lɛkɛ la Nɔrdɛ). Nde ekɔ lo mbohɔ ɔnɛ lo losanganya l’otshimbedi la ntondo lakawɔtɔ—lo Hokkaido w’otondo—anto 70 ato mbakiwɔ. Ko ɛlɔ kɛnɛ? Etshimbedi 12 wele l’apandjudi ndekana 12000 lo tshɛtshɛ wambatema lo disɛnga diakɔ. Ohokanyiya ɔlɔ w’efula wele lande l’otema lam’ɔtɔnde lo nsanganya ya ngasɔ ndo nsanganya ya distrikɛ kamɛ la nyemba ya anyande apandjudi wa Diolelo wa lo disɛnga diakɔ!
7 Akina wanɛ waya edja l’olimu w’ombatshi mboka wakangɛnangɛna lam’akawɛnyi ambeki awɔ wa Bible wabatizama ko vɔ ndjonga ndo la waɛsɛ a weke w’olimu. Kadiyɛso kɛmɔtshi ka lo Japon kambokamba olimu ande w’ombatshi mboka lo mbilo divwa yotshikitanyi oma ko 1957 ekɔ lo mbohɔ nganɛ wakandasha osekaseka ɔmɔtshi wakakambaka lo bankɛ Réveillez-vous ! Osekaseka ɔsɔ akabatizama l’ɔkɔngɔ wa ngɔndɔ divwa. Nde akayotshukamaka l’ɔkɔngɔ, ko nde l’omɛnde ndjoyala ambatshi mboka wotshikitanyi. Ande ɔlɔ wakoke kadiyɛso kɛsɔ kaki ombatshi mboka lam’akandatshu lo mbilo kande k’olimu ka sato ko etshumanelo kawɔ nongola omendji w’oyoyo w’otshimbedi wakaye la wadiɛnde—ombeki wa Bible wedjedja waki kadiyɛso kɛsɔ lee!
8 Ombatshi mboka ɔmɔtshi w’ɛnɔnyi 22 akate ate: Tamu bu dia wanɛ wakasɔnɛ olimu w’ombatshi mboka mbɔsaka olimu akɔ oko “diɛsɛ dia woke efula di’oshinga wolo”!
Tolembetelo Tɛnya ɔnɛ Jehowa Mbakimanyiyaka
9 Jehowa, Onkotshi a Woke w’ehomba aso ndakaka dia kimanyiya ekambi ande, dia mbakokɛ lo nyuma la l’emunyi. Diakɔ diakakoke Davidɛ, Nkumekanga k’edjedja mbuta ate: “Dimi laki olongo a pami, ku laya usumbi, keli latenyi untu ololo asekama, kuyanga an’andi walomba ma.” (Osambu 37:25) Lo mɛtɛ, hatohombe mbɔsa eshikikelo katosha Nzambi kɛsɔ oko yɛkɛ nɛndɛ di’aha sho kotsha ehomba wa l’emunyi wa nkumbo yaso, kana dia sho mendɛka paka le anangɛso Akristo wele l’etema wa lokaho. (1 Tesalonika 4:11, 12; 1 Timote 5:8) Koko, naka sho ndjahombia la lolango laso shamɛ dia kambɛ Jehowa efula, kete nde hotokalɛ.—Mateu 6:33.
10 Ambatshi mboka wa l’andja w’otondo mbeyaka oma l’awui wɛnawɔ ɔnɛ Jehowa kotshaka ehomba a wanɛ wêndɛ l’anya ande w’ekokelo. Tɔshi ɛnyɛlɔ ka wadi l’omi wanɛ waki ambatshi mboka wakonɔ otsha l’osomba ɔmɔtshi wa tshitshɛ lɛnɛ aki ohomba efula w’apandjudi a Diolelo. L’ɔkɔngɔ wa ngɔndɔ ngana tsho, akayonga wolo kondja olimu wa l’emunyi lɛkɔ ko wakayohombaka falanga. Aha la mbeta ndok’edja ɔnɛ alongolawɔ faktirɛ ka dɔlara 81 dia futɛ asurasɛ wa mutuka awɔ. Ɔnangɛso ate: “Takiso ndoko la dikuta dia kifuta. Takalɔmbɛ Nzambi wolo efula otsho w’otondo ɔsɔ.” La wedi a pindju, vɔ wakalongola mukanda oma le nkumbo kɛmɔtshi kakasowaka ndo tɔ lawɔ. Mukanda akɔ akataka ɔnɛ lam’ele Lɛɛta akâkaloyɛ falanga yakahema lâdiko w’elambo wakawafute ko yɔ yakaleke lofulo la nyɛ yakawalongamɛka, diakɔ mbakawalange kahɛ atshukanyi akɔ w’ambatshi mboka asɔ tshenyi. Shɛkɛ ya dɔlara 81 yaki lo mukanda akɔ! Ɔnangɛso l’ombatshi mboka ate: “Hambohɛki diakamɛnyi lushi lɔsɔ pondjo—lakatshikala onyo hwe la diambo! Sho ngɛnangɛnaka efula lo mɛna otema a lokaho wele la nkumbo kɛsɔ.” Ndo Jehowa mbangɛnangɛna woho w’ɔlɔlɔ w’otema wa ngasɔ, wɛnya woho wa lokaho wakeketshande ekambi ande dia vɔ monga alɔ.—Tukedi 19:17; Heberu 13:16.
11 Ambatshi mboka efula kokaka kɔndɔla awui wa ngasɔ wakawɛnyi. Mbolawɔ ko wayokotɛ ɔnɛ ndoko lushi ‘lakawakalema.’ Ombatshi mboka w’ɛnɔnyi 72 ate: ndjaka dimi mboka sso lo ɛnɔnyi 55 wamomotshindja l’ɔkɔngɔ l’olimu wa lo tena tshɛ, ko dimi mɛnaka dia “ndoko lushi lakankalɛ Jehowa.”—Heberu 13:5, 6.
“Yoho ya Dimɛna Efula ya Ndjasukanya la Jehowa”
12 Ekɔ tshondo ya diɛsɛ mbatosha Jehowa kânga lam’atɔlɔmbande dia sho sambisha lukumu l’ɔlɔlɔ la Diolelo diakinde. Kânga mbeso bu anto wa kokele—nde tɔsaka—oko “ekambi kame” lande l’olimu ɔsɔ wa shimbɛ nsɛnɔ y’anto. (1 Koreto 3:9; 1 Timote 4:16) Etena kasambishaso anto akina awui wendana la Diolelo dia Nzambi, etena kasambishaso ekomelo k’akambo wa kɔlɔ, etena kalembetshiyaso anto ngandji kande ka mamba kakandatoke lo woho wakandalɔngɔsɔla dia tshungo futama, etena kafolaso Dui diande diasɛna ndo ketshaso akanga w’etema ɔlɔlɔ awui w’ohomba wa lɔkɔ, sho ndjasukanyaka mɛtɛ mɛtɛ la Jehowa, Otungi aso.—Osambu 145:11; Joani 3:16; Heberu 4:12.
13 Ambatshi mboka kokaka mbetsha wenya efula ngɔndɔ tshɛ lo mbeka la mbetsha anto awui wendana la Jehowa. Ngande wayaokawɔ lam’ele dui sɔ mendanaka la diokanelo diasawɔ la Nzambi na? Ekumanyi kɛmɔtshi ka la France kambokamba olimu w’ombatshi mboka ɛnɔnyi dikumi l’ɛmɔtshi ate: “Olimu w’ombatshi mboka ekɔ yoho ya dimɛna efula ya ndjasukanya la Jehowa.” Ombatshi mboka okina wa lo wodja akɔ laya ɛnɔnyi 18 l’olimu wa lo tena tshɛ ate: “Olimu w’ombatshi mboka toshaka diaaso dia sho ‘ndɛta ndo mɛna ɔnɛ Jehowa ekɔ ɔlɔlɔ,’ dui sɔ tokimanyiyaka dia takeketshaka diokanelo diasaso l’Otungi aso lushi la lushi.” (Osambu 34:8) Ndo kadiyɛso kɛmɔ ka l’Angleterre kaya ombatshi mboka ɛnɔnyi 30 mbayaoka ngasɔ. Nde ekɔ lo mbuta ate: “Woho walɔmbami Jehowa nyuma kande dia tɔ nɔmbɔlami l’olimu w’esambishelo ndekaka sukanyɛmi lande. Lamboshilaka mboka mbala efula ɔnɛ mɛtɛ nyuma ka Jehowa kekɔ lo tanɔmbɔla otsha lo luudu lɔmɔtshi la lânde l’etena kahombama.”—Ɛdika la Etsha 16:6-10.
14 Ambatshi mboka efula mɛnaka ɔnɛ kamba la Bible ndo l’ekanda wakiɔmbɔla lushi la lushi dia nembetshiya ndo mbetsha akina mɛtɛ ya l’Afundelo mbakimanyiyaka dia vɔ pama lo ewo ka Dui dia Nzambi. Ɔnangɛso ɔmɔ la l’Espagne lele l’ɛnɔnyi 85 ndo laya ombatshi mboka ɛnɔnyi 31 w’etondo ate: “olimu w’ombatshi mboka ambokimanyiya dia dimi kondja ewo k’oshika ka Bible, ewo kamomokamba latɔ dia kimanyiya anto efula dia vɔ ndjokoma lo mbeya Jehowa l’asangwelo ande.” Kadiyɛso k’Ose Angleterre kaya ɛnɔnyi 23 l’olimu w’ombatshi mboka ate: “Olimu wa lo tena tshɛ ambokimanyiya dia dimi mongaka la saki ka ndɛ diangɔ dia lo nyuma.” Nembetshiyaka anto akina “elungamelu keli l’etema anyu” koka keketsha mbetawɔ yanyu nyamɛ lo ndjela awui wetawɔnyu ɔnɛ wekɔ ohomba. (1 Petero 3:15) Ombatshi mboka w’Ose Australie ate: “Olimu w’ombatshi mboka amboleka fudia mbetawɔ kami lam’atamasawola l’anto akina.”
15 Mɛtɛ, ekambi ɛsɔ wele ambatshi mboka mbetawɔka ɔnɛ vɔ wakasɔnɛ yoho mɔtshi y’olimu yawasha ɛtshɔkɔ oma le Jehowa. Mɛtɛ, la lolango lawɔ, efula wakasale etshikitanu lo nsɛnɔ yawɔ, wakatakɔ ndo ntumu yawɔ ya l’emunyi ndo ɔngɔnyi waki lawɔ dia vɔ mbɔtɔ l’olimu w’ombatshi mboka ndo shikikala lɔkɔ!—Tukedi 28:20.
Onde Otema Ayɛ Kosokoyaka dia Wɛ Kamba Efula?
16 L’ɔkɔngɔ wa sho sɛdingola kɛnɛ kata ambatshi mboka di’ɛtshɔkɔ wakondjawɔ l’olimu awɔ, ondo wɛ ekɔ lo ndjambola dia kana wɛ kokaka kamba olimu akɔ. Naka ngasɔ, lande na ahayasawola l’ombatshi mboka ɔmɔtshi wambohomɔ lokolo l’ɔlɔ l’olimu wa lo tena tshɛ na? Ondo wɛ mbeyaka kondja ekimanyielo k’efula naka wɛ sawola l’ekumanyi kɛmɔtshi ka l’etshumanelo, kana onto ɔmɔtshi lakeya dimɛna—leya yoonge yayɛ nganɛ weyɔ, akoka ayɛ, ndo ɛkɛndɛ wele layɛ l’atei a nkumbo. (Tukedi 15:22) Alako w’eshika wayokosha anto akina mbeyaka kokimanyiya dia mbɛdikola ɔlɔlɔ kana wɛ kokaka kamba olimu w’ombatshi mboka. (Ɛdika la Luka 14:28.) Naka wɛ kokaka kamba oko ombatshi mboka, kete mɛtɛ, wɛ ayokondja ɛtshɔkɔ efula.—Malaki 3:10.
17 Kayotota lo dikambo di’apandjudi efula wa Diolelo wele la kɔlamelo wahakoke kamba olimu w’ombatshi mboka, kânga mbakombolawɔ sala efula l’olimu awɔ na? Oko ɛnyɛlɔ, nyɛsɔ tende dikambo dia kadiyɛso kɛmɔ k’Okristo kalɔ ta lɔlɔ dia mbodia anande anɛi ndamɛ. Ɔnkɔnɛ mbatande: “Haloke dimɛna nɛ dia dimi lokêkɛka monga ombatshi mboka wa pondjo, koko kakianɛ, lo menda awui wele la mi lo lɔsɛnɔ, handjokoka tomba l’olimu w’esambishelo edja efula oko akamatombaka.” Kadiyɛsɔ kɛsɔ mbokaka anande ngandji k’efula ndo nde nangaka kotsha ehomba awɔ. L’etena kakɔ kamɛ, nde kombolaka sala efula l’olimu w’esambishelo. Nde ambolembetshiya ate: “Dimi nangaka olimu w’esambishelo.” Ndo Akristo akina wamboyakimɔka mbele la saki ka ngasɔ, wanɛ wele ngandji kokawɔ Nzambi mbatshutshuyaka dia vɔ kambɛ Jehowa ‘l’otema awɔ tshɛ.’—Osambu 86:12.
18 Tohɛke dia, kɛnɛ kalongamɛ Jehowa oma le so ele mbokambɛ l’anima aso tshɛ. Efula ka wenya wokambɛso nemanɛka efula la kɛnɛ kakoka sala anima la anima. Amɔtshi kokaka tshikitanya akambo awɔ dia vɔ monga ambatshi mboka wa pondjo. Efula nto mbɔsaka olimu w’ombatshi mboka wa tshanda, oyadi lo tena kana ngɔndɔ tshɛ, lo mbetshaka wenya 60 lo ngɔndɔ l’olimu w’esambishelo. Koko, ekambi wa Jehowa efula ndjashaka vamɛ l’olimu w’esambishelo ndo wa mbetɛ anto ambeki l’anima awɔ tshɛ oko apandjudi wa l’etshumanelo. Omalɔkɔ, naka demba diɔhɛkɔhɛkɔ, lotshundu, ɛkɛndɛ ayɛ wa l’atei a nkumbo, kana ekakatanu ekina hakosha diaso dia wɛ kamba efula, kete tɔkɔmɔke otema. Edja tshɛ kayoyoshaka kɛnɛ koleki ɔlɔlɔ le yɛ, Nzambi ayɔsaka olimu ayɛ la nɛmɔ, oko wɔsande wɔnɛ w’ekambi wa lo tena tshɛ!
Onto Tshɛ Kokaka Mɛnya Yimba y’Ombatshi Mboka
19 Kânga wɛ hakoke mbɔtɔ l’ɔnɔngɔ w’ambatshi mboka, wɛ kokaka mɛnya yimba y’ombatshi mboka. Elɛwɔ yimba y’ombatshi mboka? Olimu Aso wa Diolelo wa Ngɔndɔ k’Esambele 1988 l’Angɛlɛ akate ɔnɛ: “monga la yimba y’ombatshi mboka kɛdikɛdi mɛna didjango diakawatodjangɛ dia sambisha ndo mbetɛ anto ambeki la sso di’ɔlɔlɔ, ndjasha la tshondo tshɛ le anto ndo mbaɛnya ngandji kawaokayɛ, mbetawɔ ndjahombia, ngɛnangɛna lam’atatayele Nkumɛso lo nna ndo lo nna, ndo ngɛnangɛna lo diangɔ dia lo nyuma koko aha dia l’emunyi.” Ngande wakokayɛ mɛnya yimba y’ombatshi mboka?
20 Naka wɛ ekɔ ombutshi wele l’ana w’ɛlɔngɔlɔngɔ, kete wɛ kokaka mbalɔmba oma k’ɛse otema, dia vɔ mbɔsa olimu w’ombatshi mboka oko lutumu layowokambaka lo lɔsɛnɔ lawɔ. Dionga diayɛ di’ɔlɔlɔ l’olimu w’esambishelo mbeyaka mbasha diaaso dia vɔ mɛna ɔnɛ ndeka dimɛna mbetɛ olimu wa Jehowa dui dioleki ohomba lo nsɛnɔ yawɔ. Wɛ kokaka mbelɛka ambatshi mboka l’emendji weteta la wadiɛwɔ lakayɛ woho w’anayɛ kondja wahɔ oma lo bɛnyɛlɔ di’anto wangɛnangɛna l’olimu awɔ wa lo tena tshɛ. (Ɛdika la Heberu 13:7.) Kânga lo nkumbo kambatɔna l’awui w’ɔtɛmwɛlɔ, ambutshi wele ambetawudi kokaka kimanyiya anawɔ dia vɔ mbɔsa olimu wa lo tena tshɛ oko oyango awɔ wa lo lɔsɛnɔ oma l’ɛnyɛlɔ kashawɔ kana oma l’ɛtɛkɛta.—2 Timote 1:5; 3:15.
21 L’atei w’etshumanelo, sho tshɛ kokaka sukɛ wanɛ wakoka monga ambatshi mboka l’otema ɔtɔi. Oko ɛnyɛlɔ, onde wɛ hakoke tshindɛ ombatshi mboka ɔmɔ l’olimu w’esambishelo, djekoleko l’etena kende bu l’onto latomba lande? Naka wɛ ntsha ngasɔ, kete wɛ mbeyaka mɛna dia ‘nyayokeketshana.’ (Romo 1:11, 12) Naka wɛ ekɔ ekumanyi, kete wɛ kokaka ntsha efula dia keketsha ambatshi mboka. Lam’atshumana dikumanyi dia l’etshumanelo, vɔ la dia mendaka tena tshɛ ehomba w’ambatshi mboka. Naka ombatshi mboka ambɔkɔmɔ kana ekɔ l’ekakatanu ɛmɔ, tanyosasɛke esadi eto dia nɔmba ɔnɛ atshike olimu ande w’ombatshi mboka. Naka nyambɛna ɔnɛ mbala mɔtshi ekɔ ohomba nɔmba dia nde mumɔ l’ɔnɔngɔ w’ambatshi mboka, tanyohɛke ɔnɛ olimu w’ombatshi mboka ekɔ diɛsɛ di’ohomba diangɛnangɛna wanɛ wele l’olimu wa lo tena tshɛ. Esangɔ ɛmɔtshi vɔ mbeyaka monga paka l’ohomba wa yema y’ekeketshelo ndo alako amɔtshi w’eshika kana yema y’ekimanyielo kete ambokoka. Filialɛ kaki la Société ka l’Espagne akafunde ɔnɛ: “Naka dikumanyi keketshaka wanɛ wakamba olimu w’ombatshi mboka, mbasukɛka l’olimu w’esambishelo, ndo mbaembolaka mbala tshɛ, kete wayɔngɛnangɛna efula, wayɛna ɔnɛ vɔ mbaɔsaka la nɛmɔ, ndo wayolanga kɔkɔmala l’olimu awɔ oyadi ekakatanu akɔna wakoka mbakomɛ.”
22 Tekɔ lo sɛna lo etena ka pâ efula ka lo lɔsɛnɔ l’onto. Jehowa akatosha olimu wahombaso kambaka dia shimbɛ nsɛnɔ y’anto. (Romo 10:13, 14) Oyadi sho kokaka kamba olimu ɔsɔ oko ombatshi mboka wa lo tena tshɛ kana bu, nyɛsɔ tɛnya ɔnɛ tekɔ la yimba y’ombatshi mboka. Nyɛsɔ tôhɔke ɔnɛ nshi yambotshikala yaya bu kambe ndo tonge la yimba ya ndjahombia. Nyɛsɔ toyashikikɛ dia mbisha Jehowa kɛnɛ katɔlɔmbande—mbokambɛ olimu l’anima aso tshɛ. Ndo nyɛsɔ tôhɔke ɔnɛ naka sho mbosha kɛnɛ tshɛ kakokaso mbosha, oyadi kana oshasha akɔ fɔnaka la ekenga ehende waki wadi aki odo kana la malashi waki Mariya w’oshinga wolo, kete tayowokambɛka olimu l’anima aso tshɛ, ko Jehowa ayɔngɛnangɛnaka olimu akɔ wokambɛso l’anima aso tshɛ!
[Study Questions]
1, 2. (a) Ngande wakɛnya ombatshi mboka ɔmɔtshi saki kokande olimu wa lo tena tshɛ? (b) Lande na kaleka ngɛnangɛna ambatshi mboka l’olimu wa mbetɛ anto ambeki?
3. Kakɔna kahomba tosokoya dia sho tetemala la kambɛ Jehowa na?
4, 5. (a) Bonde kele sambisha anto akina lokumu l’ɔlɔlɔ mbelaka onto difuto di’ɔngɛnɔngɛnɔ na? (b) Ngande wayaoka ambatshi mboka etena kakambawɔ olimu wa lo tena tshɛ na?
6. Ɔngɛnɔngɛnɔ akɔna wa lânde wakonge l’ambatshi mboka amɔtshi?
7, 8. Ɔngɛnɔngɛnɔ akɔna wele l’ambatshi mboka efula waya edja l’olimu awɔ?
9. Oko wende Onkotshi a Woke w’ehomba aso, kakɔna kalaka Jehowa ekambi ande, ndo dui sɔ atɛnyadiɔ?
10, 11. Lo menda awui wakawɛnyi, kakɔna keya ambatshi mboka efula lo dikambo di’akoka wele la Jehowa wa kotsha ehomba aso?
12. Lande na kele olimu wa sambisha lokumu l’ɔlɔlɔ ekɔ diɛsɛ dia woke na?
13. Kakɔna kata anto amɔtshi lo dikambo dia shɛngiya yele l’olimu awɔ w’ombatshi mboka lo diokanelo diasawɔ la Jehowa na?
14. Ɛlɔlɔ akɔna wakondja ambatshi mboka lam’akambawɔ la Bible ndo l’ekanda wakilembetshiya lushi la lushi dia mbetsha anto akina?
15. Anto amɔtshi akawasale la lolango lawɔ dia vɔ kamba olimu w’ombatshi mboka ndo shikikala lɔkɔ, ndo lande na?
16, 17. (a) Naka wɛ ndjambolaka kana wɛ kokaka kamba olimu w’ombatshi mboka kana bu, kakɔna kahombayɛ ntsha? (b) Ngande wayaoka anto amɔtshi naka hawokoke monga ambatshi mboka?
18. (a) Kakɔna kalongamɛ Jehowa oma le so? (b) Lande na ahatahombe kɔmɔ otema naka ekakatanu ɛmɔtshi toshimbaka dia sho sala kɛnɛ kakokaso sala?
19. Elɛwɔ yimba y’ombatshi mboka?
20. Ngande wakoka ambutshi mɛnya yimba y’ombatshi mboka?
21. (a) Ngande wakokaso sho tshɛ sukɛ ambatshi mboka? (b) Dikumanyi akokawɔ sala dia keketsha ambatshi mboka?
22. Lo etena kɛnɛ ka pâ ka lo lɔsɛnɔ l’onto, kakɔna kahombaso ndjashikikɛ dia salaka na?
[Caption]
[Questions]
[Caption on page 17]
[Captions on page 17]
Ambatshi mboka ngɛnangɛnaka efula oma l’olimu awɔ wa mbetɛ anto ambeki
Anayɛ kokaka kondja ɛlɔlɔ naka vɔ sawolaka l’apandjudi wa Diolelo wakamba olimu wa lo tena tshɛ
Dikumanyi kokaka keketsha ambatshi mboka l’olimu w’esambishelo
[Caption on page 18]
[Review on page 18]
Onde Wɛ Mbohɔka?
◻ Lande na kele olimu wa lo tena tshɛ mbelaka onto ɔngɛnɔngɛnɔ?
◻ Lo menda awui watshama, kakɔna kambohotɔ ambatshi mboka efula dikambo di’akoka wele la Jehowa wa kokɛ ekambi ande?
◻ Ambatshi mboka ndjaokaka ɔnɛ olimu awɔ wekɔ la shɛngiya yakɔna lo diokanelo diasawɔ la Jehowa?
◻ Ngande wakokayɛ mɛnya Yimba y’ombatshi mboka?