Onde Sho Ngɛnangɛnaka Ɔlɔngɔswamelo Waki Jehowa?
“[Jehowa] kata okone ati: Ulungu eko kiti kami ka diulelu, la kete eko kihuna k’ekulu ami.”—ISAYA 66:1.
WƐ MBETAWƆKA ɔnɛ Jehowa ekɔ l’ɔlɔngɔswamelo ɔmɔtshi? Naka ɔsɔku, bonde ketawɔyɛ na? Wɛ kokaka kadimola ɔnɛ: ‘Tekɔ la Mbalasa ka Diolelo. Tekɔ l’etshumanelo kɔlɔngɔsami dimɛna kâmɛ l’olui wa dikumanyi. Tekɔ l’omendji w’otshimbedi ɔmɔtshi waya dia ndjotenda mbala tshɛ. Sho mbɔtɔka lo nsanganya ya weke ndo ya totshitshɛ yalɔngɔsɔma dimɛna efula. Tekɔ la bilɔ ka filialɛ k’Ɛmɛnyi wa Jehowa lo wodja aso. Awui asɔ tshɛ ndo akina mɛnyaka ɔnɛ Jehowa ekɔ l’ɔlɔngɔswamelo wakamba olimu.’
2 Awui asɔ tshɛ toshikikɛka ɔnɛ ɔlɔngɔswamelo ɔmɔtshi wekɔ. Koko, naka sho mɛnaka ndo ngɛnangɛnaka paka kɛnɛ keta la nkɛtɛ, kete lâsɔ hateye ɔlɔngɔswamelo waki Jehowa ɔlɔlɔ. Jehowa akatɛ Isaya ate: nkɛtɛ lohona Lande loto mbetɔ, koko elongo wekɔ ukudi Ande. (Isaya 66:1) Dia ‘elongo’ akɔna wakataka Jehowa na? Onde andja aso ɔnɛ? Loowa laso lɔnɛ? Ko kana dia yoho mɔtshi ya lɔsɛnɔ? Ɔnkɔnɛ mbata Isaya lo dikambo dia “edjaselu [ka Jehowa] k’ekila ka lutumbu,” ndo omembi w’esambu nembetshiyaka elongo akɔ oko “dihuli di’edjaselu kandi.” Ɔnkɔnɛ, ‘elongo’ watawɔ lo Isaya 66:1 mɛnyaka edjaselo ka lo nyuma kahɛnama lɛnɛ ɔsa Jehowa dihole di’omboledi wa lâdiko, kana dia nkum’olongo.—Isaya 63:15; Osambu 33:13, 14.
3 Omalɔkɔ, naka mɛtɛ sho nangaka mpotɔ ndo ngɛnangɛna ɔlɔngɔswamelo waki Jehowa, kete sho pombaka mbalɛ l’olongo. Ɔsɔ mɛtɛ ekɔ tshondo y’okakatanu le amɔtshi. Ko lam’ele hatɛnyi ɔlɔngɔswamelo waki Jehowa wa l’olongo, ngande weyaso ɔnɛ: mɛtɛ vɔ wekɔ na? Amɔtshi mbeyaka kandakanda, wayambola vate: ‘Ngande wakokaso dietawɔ na?’ Ɛɛ, ngande wakoka mbetawɔ mbidja tamu otshumba na? Toho tohende ta kondja ekadimwelo tɔ tɔnɛ: wekelo wa l’etete w’onto ndamɛ wa Dui dia Nzambi la wɔtwɛlɔ wa lo nsanganya y’Akristo tena tshɛ ndo woshelo wa kɔmatɛrɛ. Naka sho ntsha ngasɔ, kete osase w’akambo wa mɛtɛ wayokoka shidiya tamu takokaso monga atɔ. Ndo ekambi ekina wa Nzambi mbakadjaka tamu. Tênde kɛnɛ kakakomɛ okambi w’Elisha lam’akaye nkumekanga k’Ase Suriya dia ndjɔlɔsha wodja w’Isariyɛlɛ.—Ɛdika la Joani 20:24-29; Jakoba 1:5-8.
Onto Lakɛnyi Alembe wa l’Olongo
4 Nkumekanga ka Suriya akatome leemba l’alembe l’otsho otsha la Dɔtana dia ntonda Elisha. Lam’akemɔ okambi w’Elisha la yosose, nde akatombe l’andja, ondo dia tɔsa yema ya hiɛlɛlɛ ya tshitshi lo dɛfu dia luudu lawɔ la lâdiko lo lɛkɛ lakawadjasɛka l’ehotwelo ka wonya (Moyen-Orient), ko nde akoke wɔma efula! Nde akɛnyi olui a woke w’alembe w’Ase Suriya la falasa yawɔ la pusupusu ya ta wodingi osomba, wakongɛ dia munda omvutshi a Nzambi. Okambi w’Elisha akawodɛ kioko ate: “Yee! Khumemi, kayututsha na?” Lo mɛtɛ, aha la mboka wɔma, ndo la mbetawɔ, Elisha akokadimola ate: “Tukaki woma, ne dia wane weli la su, ndeka waku weli la wo efula.” Ondo okambi ɔsɔ akayambola ate: ‘Lende ewɔ na? nɛ dia hâwaɛnyi!’ Ondo ndo sho lawɔ kokaka kanyiya ngasɔ, mbut’ate mpekɔ dia mɛna la asho wa mana akambo fundo, kana wa shihodia alembe wa l’olongo.—2 Khumi ya Dikanga 6:8-16; Efeso 1:18.
5 Elisha akalɔmbɛ dia washo w’okambi ande ndjihɔ. Kakatombe oma lâsɔ na? “[Jehowa] akadihula ashu w’olongo ako, ku ashu ande wakadiho. Enyi ku ukungu wambulula to la falasa la pusupusu ya dja l’utshimba wa Elisha.” (2 Khumi ya Dikanga 6:17) Eelo, nde akɛnyi alembe wa l’olongo, andjelo wa Nzambi wakonga dia shimbɛ okambi ande. L’etena kɛsɔ, nde akayohotɔka lɛnɛ akɛkamaka Elisha.
6 Onde ndo sho lawɔ mbatɛ̂naka budibudi oko okambi w’Elisha oka? Onde sho tɛnaka akambo paka lo yoho ya l’emunyi tsho lam’akomaso lo wâle ɛmɔtshi kana lam’ɔtɔ olimu aso w’Akristo lo wâle lo wedja ɛmɔtshi? Ko naka ngasɔ, onde sho kokaka nongamɛ dia kondja ɛnɛlɔ kɛmɔtshi ka lânde kahomba tɔsɛnya asho oka? Kema, nɛ dia tekɔ l’ɛngɔ kɛmɔtshi kakahombaka okambi w’Elisha—tshondo ya dibuku, Bible koludi la waɛnɛlɔ efula, dibuku diakoka tomanya ɔlɔngɔswamelo wa l’olongo fundo. Dui sɔ diakasambiyama toshaka alako watɔlɔmbɔla dia sho sembola ekanelo kaso ka yimba ndo lɔsɛnɔ laso. Koko, sho pombaka mbidja weolo dia nyanga shɛnɔdi ndo pamia ɔngɛnɔngɛnɔ aso lo tɛdikɔ takɔshi Jehowa. Sho kokaka ntsha ngasɔ oma l’ekimanyielo ka wekelo aso w’onto ndamɛ, ka dɔmbɛlɔ ndo lo kanaka lomba.—Romo 12:12; Filipi 4:6; 2 Timote 3:15-17.
Têke Woho wa Mɛnaka
7 Anto efula hawoleke ngɛnangɛna wekelo wa Bible w’onto ndamɛ, watekana oko wanɛ watolawɔka mbɔtɔ kalasa kana wahatôngaka la diaaso dia kiɔtɔ. Koko, naka sho nangaka mɛna ndo ngɛnangɛna ɔlɔngɔswamelo waki Jehowa la washo aso wa mana akambo fundu, kete sho pombaka monga la nsaki ka wekelo. Onde wɛ kokaka ngɛnangɛna supu naka hawokikate dimɛna? Oko wakoka kotɛ okatshikatshi wa manamana, dia katɛ supu ka lɔɔka, wɛ pombaka kamba olimu wolo efula. Ondo tɔ mbeyaka mbeshɔ l’ɔkɔngɔ w’etenyi ka wonya a tango ko kana hokoka kânga etenyi kakɔ ka wonya. Lo wedi okina, ɛlɔlɔ waya oma lo wekelo w’onto ndamɛ tshikalaka pondjo. Nsaki kaso ka wekelo w’onto ndamɛ mbeyaka tahamaka yema yema naka sho menda nganɛ watatahame. Ɔpɔstɔlɔ Paulo aki la shadiya ya mbuta ate: sho pombaka ndjâlama nshi tshɛ ndo namaka wetshelo aso ndo ndjakimɔ l’otema aso tshɛ lo wâlelo wa lo sɛkɛ. Kɛsɔ nɔmbaka mbidja weolo efula tena tshɛ ko tayokondja ɛlɔlɔ wa pondjo.—1 Timote 4:13-16.
8 Kanga lomba ɔmɔtshi la lo nshi ya ntondo akate ate: “On’ami, naka we ayulama elembe ami; naka we ayuhuke tui lu [“lomba,” NW], ee, lam’ayuyulelela [“shɛnɔdi,” NW], ndu lam’ayuyuwelela [“lomba,” NW], naka we ayu[l]iyanga uku fesa, ndu ayu[l]iyanga wulu uku eumbelu kushami, ku we ayulimbitela woma wa [Jehowa], ayukundja [“ewo ka mɛtɛ ka Nzambi,” NW].”—Tukedi 2:1-5.
9 Onde wɛ ambolembetɛ ɔnɛ lele l’ɔkɛndɛ wa mbidja weolo? ‘Naka wɛ’ mbele etelo kaleka vusɔma l’avɛsa ango. Ohenda etelo k’ɔnɛ: ‘Naka wɛ ayotetemala nyanga oko ɛngɔ k’oshinga wolo koshami.’ Ohokanyiya dikambo di’anto wele aya deko la deko mbatshimawɔ fɛsa la paunyi l’Afrique du Sud, la Bolivie, la Mexique ndo lo wedja ekina. Vɔ kambaka l’ohetoheto tshɛ dia mbola ave wakokawɔ kondja mbolo y’oshinga wolo efula l’ekimanyielo ka tɔshɔka la kongo ya weke kana pawo. Anto mbɔsaka paunyi oko ɛngɔ k’oshinga a wolo efula, ko dui sɔ akâkonya dia vɔ tshima weoko w’etale wele oko kilɔmɛtɛlɛ 600 ndo ɔhɔngɔ wa kilɔmɛtɛlɛ wele oko kilɔmɛtɛlɛ ɔtɔi l’etenyi—paka dia kondja paunyi lo difuku dimɔtshi diatshimawɔ mbɔkɔ y’akɛsɔ la Californie, l’États-Unis d’amérique. Ko onde, wɛ koka ndɛ paunyi? Wɛ kakoka ndjinɔ? Tɔ kokaka kokimanyiya l’oswe wa shɛnga naka wɛ ambondama la ndjala ndo la mposa k’ashi? Kema, anto mbakietɛ oshinga wolo lo waa bingu ya weke yadja ɛlɔngɔswɛlɔ wa l’andja ɔnɛ kana ase pɔlitikɛ eshinga a diangɔ vamɛ. Koko, anto wakavu dikambo diayɔ. Ko lâsɔ, weelo akɔna wahombaso mbidja dia kondja paunyi ya lo nyuma, mbut’ate ‘ewo ka mɛtɛ ka Nzambi’ na? Ohotokokanyiya yema, ewo k’oshika ka Nkumadiɔndjɔ, Omboledi w’andja w’otondo, k’ɔlɔngɔswamelo ande, la k’asangwelo ande! Dia kiyanga, sho pombaka kamba la tɔshɔka ndo la pawo ya lo nyuma. Mbut’ate: ekanda w’Akristo watokimanyiya dia sho tshima lo Dui dia Jehowa ndo sɛdingola kɛnɛ kalembetshiyatɔ.—Jobo 28:12-19.
Totshime dia Ndeka Mpoto
10 Nyɛsɔ totshime yema lo nyuma dia sho tatɛ kondja ewo k’ɔlɔngɔswamelo waki Jehowa wa l’olongo. Dia kondja yimba, nyɛsɔ tende ɛnɛlɔ kaki Danyɛlɛ kakandɛnyi Tang’Andja odjashi l’okudi ande. Danyɛlɛ ate: “Lam’akimi lu menda, wakakitshaka kiti ya waulelu, ku tangu andja akadjase. Eloto andi waki wema uku pembe, la divu dia l’ote andi uku diosa di’ekoko dia pudipudi. Kiti kandi ka diulelu kaki nyumbi ya dja, la etshimbi ato uku dja yadikita. Okedi wa dja wakafukofukoka, wakakelaka la ntundu kandi; Nunu nunu wakûkambelaka ulimu, la nunu akumi akumi wakemalaka la ntundu kandi. Embadi wakadjase lu elumbwelu, wakafula abuku.” (Danyele 7:9, 10) Waa na asɔ waki nunu la nunu wakakambɛka Jehowa na? Rɛferansɛ wa l’ɛse ka dikatshi lo Traduction du monde nouveau lɛnɛ atawɔ dia ‘shɔka’ la ‘longo,’ totomaka lo abuku akina oko l’Osambu 68:17 la Heberu 1:14. Eelo, andjelo wa l’olongo mbakôkambɛka!
11 Ɔkɔndɔ wa Danyɛlɛ hate ɔnɛ nde akɛnyi andjelo tshɛ wa Nzambi wa kɔlamelo wôkambɛ olimu. Mbeyaka monga ko miliyɔ kina efula nto yekɔ. Koko lo mɛtɛ, sho kokaka mpotɔ lande na kakakoke Elisha mbuta ate: “Wane weli la su, ndeka waku weli la wo efula.” Kânga mbele andjelo wakatɔmbɔkɔ, ɛdiɛngɛ, wakasukɛ alembe wa nkumekanga k’Ase Suriya, lofulo lawɔ kɔmbɛdima l’alembe waki Jehowa wa l’olongo!—Esambu 34:7; 91:11.
12 Ondo wɛ nangaka mbeya awui efula wendana l’andjelo asɔ, ɛnyɛlɔ oko ɔkɛndɛ awɔ l’olimu wa Jehowa. Lo ndjela tshɛkɛta ya lo Grɛkɛ yokadimɔmi ɔnɛ ondjelo, sho kokaka mɛnya ɔnɛ vɔ wekɔ akɛndji nɛ dia tshɛkɛta shɔ ya lo Grɛkɛ nembetshiyaka “ɔkɛndji.” Koko, lâdiko di’olimu awɔ w’akɛndji, vɔ wekɔ l’ɛkɛndɛ ekina. Ɔnkɔnɛ, dia mbeya ɔlɔlɔ, wɛ pombaka nyomoleka tshima. Naka wɛ ekɔ la dibuku Étude perspicace des Écritures, kete wɛ kokaka mbeka sawo “Andjelo,” kana wɛ kokaka menda asawo waditɛkɛta, wambotombaka lo Tshoto y’Etangelo. Wɛ ayamba dia mbeka awui efula wendana la ekambi a Nzambi ɛsɔ wa l’olongo ko wɛ ndjeya nganɛ watokimanyiyawɔ. (Enyelo 14:6, 7) Koko, l’atei w’ɔlɔngɔswamelo waki Nzambi wa l’olongo, ditongami dimɔtshi dia lo nyuma diakambakɔ tumu mɔtshi ya lânde.
Ɛnɛlɔ k’Isaya
13 Kakianɛ, nyɛsɔke totshime yema lo ɛnɛlɔ k’Isaya. Naka wɛ mbala tshapita 6, divɛsa 1 polo 7, kete wɛ ayamba heyama. Isaya ate: “dimi lakenyi [Jehowa] udjashi lu kiti ka diulelu,” ndo “ladiku diandi kakemadi asarafu.” Vɔ wakasanyaka lotombo la Jehowa, watɛtɛmɔla ekila kande. Wɛ ayonandema polo l’asolo naka wɛ mbadia ɔkɔndɔ ɔnɛ. Isaya akandatshe na? “Okone dimi lakati nti: Ye! nduku engo kekimi; dimi lambusumbo, ne dia kanga elomo wa mindu kemi, latudjaseka l’atei akanga w’elomo wa mindu, ne dia ashu ami wambena Khum’ekanga, [Jehowa] Kanga lulimbilimbi.” Ande nganɛ wakawâmbia ɛnɛlɔ kɛsɔ lee! Onde tɔ kâmbiyaka ndo wɛ?
14 Ko ngande wakakoke Isaya mbika ekolo la ntondo k’ɛnɛlɔ ka ngasɔ na? Nde ekɔ lo nembetshiya ate: osarafu ɔmɔtshi akaye andjokimanyiya awotɛ ate: “Uhedia aye ambunyema, la kolo kaye kambudimanyema.” (Isaya 6:7) Isaya akakoke ndjaɛkɛ lo kɛtshi ka Nzambi ndo kitanyiya awui wa Jehowa. Ko lâsɔ, onde wɛ halange mbeya awui akina efula wendana la ditongami sɔ dia lo nyuma diaheme tshɛ? Ko ahombayɛ ntsha na? Tshima dia mbeya awui efula. Ehomɔ kɛmɔtshi kakoka kokimanyiya ko Index de publications de la Société Watch Tower, lɛnɛ akokayɛ kondja ahole efula wa lɛnɛ akawatɛkɛta dikambo di’andjelo.
Ezekiyɛlɛ Akandɛnyi?
15 Nyɛsɔ tende yoho kina ya ditongami dia lo nyuma. Ezekiyɛlɛ akakondja diɛsɛ dia woke dia mɛna ɛnɛlɔ kɛmɔtshi kakasambiyama lam’akinde lo fumbe la Babilɔna. Fola Bible kayɛ lo Ezekiyele tshapita 1, lo avɛsa asato w’etatelo. Ngande wotate ɔkɔndɔ akɔ na? Onde vɔ mbutaka ɔnɛ: ‘Lo nshi ya ntondotondo, lo wodja ɔmɔtshi w’etale efula . . . ’? Kema, ɔsɔ bu shimu ya lokolonganya. Divɛsa 1 mbutaka ɔnɛ: “L’eleku k’akumi asatu, lu lushi la tanu la ngondo ka nei lam’akimi l’atei a fumbi l’umamu w’okedi wa Kebara, ulungu akadiho, ku dimi lakenyi waenelo wa [Nzambi].” Ambôlembetɛ lo divɛsa nɛ na? Diɔ totɛka lushi ndo dihole dia shikaa diakatshama awui akɔ. Awui akɔ wakatshama l’ɔnɔnyi wa tanu oma lam’akandama Jɛhɔyakinɛ lo lɔhɔmbɔ, lo 613 N.T.D.
16 Jehowa akahɛ Ezekiyɛlɛ lonya lande, ko nde akatatɛ mɛna ɛnɛlɔ ka wɔma efula, nde akɛnyi Jehowa odjashi l’okudi ande lo pusupusu ka shaka efula ka l’olongo kaki l’etshimbi w’atanga efula ndo washo wodingami djɔ lɔkɔ. Dui dialeka kotola yambalo yaso lanɛ ko ditongami nɛi diakikɔ, etongami l’etongami memala l’otshimbi atɔ. “[“Nganɛ mbakidiɔ: diɔ diaki l’ɛfanɛlɔ k’onto,” NW]. Dio tshe otoi la otoi aki la dungi nei, la dio tshe diaki la ahafu anei anei. . . . Difanelu dia dundji diawo diaki okone: dio tshe otoi l’otoi aki la elundji kufanyi la elundji k’untu, dio nei otoi otoi diaki la elundji kufanyi la elundji ka tambwe la lunya la pami; dio nei otoi la otoi aki l’elundji kufanyi la elundji ka ngombe lu lunya la lomoso; dio nei otoi l’otoi aki ndu la elundji kufanyi la elundji ka pungu.”—Ezekiyele 1:5, 6, 10.
17 Ditongami sɔ nɛi diasɛna akidiɔ? Ezekiyɛlɛ ndamɛ ekɔ lo totɛ ate: toko akeruba. (Ezekiyele 10:1-3, 14) Lande na kakidiɔ la dundji nɛi na? Ele dia mɛnya didjidji dia waonga anɛi woleki weke wa Nkumadiɔndjɔ Jehowa. Elundji ka mpongo aki djembetelo ya onto lele la lomba la mɛnaka etale la ntondo. (Jobo 39:27-29) Ko elundji ka ngɔmbɛ ɛnyatɔ na? Lo menda wolo wa mamba wele latɔ lo kingo la l’ahɛka, anto wakɛnyi mbala kɛmɔtshi lo sɛkɛ dia tɔkɛnyɔ, ngɔmbɛ kakawekiya dia ndɔ̂ka ata ônyiya ponda l’ombahemi atɔ ko mbaokɛ l’olongo. Mɛtɛ, ngɔmbɛ ekɔ djembetelo ya kudu ka Jehowa kaha l’ekomelo. Tambwe mɛnyaka dihonga dia mbala akambo la losembwe. Ko, elundji k’onto mɛnyaka lo yoho yasungana ngandji ka Nzambi, nɛ dia paka onto mbele etongami kâmɛ ka la nkɛtɛ kakoka mɛnya dionga di’etongami kele la yimba ya mbokana ngandji.—Mateu 22:37, 39; 1 Joani 4:8.
18 Waɛnɛlɔ akina wekɔ wakoka tokimanyiya dia sho mpotɔ lo timba taso nganɛ wele ditongami sɔ. L’atei a waɛnɛlɔ akɔ, sho kokaka mbidja ndo ɛnɛlɔ ka Joani ka lo dibuku di’Enyelo. Oko Ezekiyɛlɛ, Joani lâwɔ akɛnyi Jehowa odjashi lo kiti kande ka diolelo, ele kâmɛ l’akeruba. Olimu akɔna wakamba akeruba na? Vɔ sanyaka diewoyelo di’asarafu dia lo Isaya tshapita 6 ɔnɛ: “Ekila, ekila, ekila, eli [Jehowa Nzambi] Kanga-Wulu-Tshe, lakiko, leko, laya ka ndja.” (Enyelo 4:6-8) Joani nde lawɔ akɛnyi ɔn’ɔkɔkɔ suke la kiti ka diolelo. Ele didjidji di’ɔn’ɔkɔkɔ na? Toko Yeso Kristo, Ɔn’ɔkɔkɔ wa sɔlɔ sɔlɔ waki Nzambi.—Enyelo 5:13, 14.
19 Kambotohotɔ lâsɔ oma l’ekimanyielo ka waɛnɛlɔ asɔ na? Tambeya ɔnɛ: Jehowa Nzambi lodjashi lo kiti kande ka diolelo la Ɔn’ɔkɔkɔ Yeso Kristo, lele Dui kana Otshelo mbâhemɛ lâdiko di’ɔlɔngɔswamelo wa l’olongo. Oma lâsɔ, takayɛna olui w’andjelo, mbut’ate: ditongami dia l’olongo kâmɛ ndo asarafu l’akeruba l’atei awɔ. Vɔ tshɛ wekɔ l’atei wa shaka y’ɔlɔngɔswamelo wakamba kâmɛ dia kotshaka asangwelo wa Jehowa. Sangwelo dimɔtshi l’atei awɔ ele esambishelo ka lokumu l’ɔlɔlɔ l’andja w’otondo lo nshi nyɛ y’ekomelo.—Mako 13:10; Joani 1:1-3; Enyelo 14:6, 7.
20 L’ekomelo, tekɔ l’Ɛmɛnyi wa Jehowa wa la nkɛtɛ wasangana lo Mbalasa yawo ya Diolelo dia mbekaka woho wa ntsha lolango la Nkumadiondjɔ ndo Omboledi w’andja. Mɛtɛ, tambokoka shihodia ɔnɛ: wanɛ wele la so, ndeka wanɛ wele la Satana kâmɛ l’atunyi w’akambo wa mɛtɛ efula. Dimbola diakambwama ɔnɛ: Olimu akɔna wakamba ɔlɔngɔswamelo wa l’olongo lo kɛnɛ kendana l’esambishelo ka lokumu l’ɔlɔlɔ la Diolelo na? Tayɔsɛdingola dikambo sɔ l’akambo akina lo sawo diayela.
[Study Questions]
1, 2. (a) Tolembetelo takɔna tɛnama takokayɛ shila tɛnya ɔnɛ Jehowa ekɔ l’ɔlɔngɔswamelo? (b) Lende odjashi Jehowa?
3. Ngande wakokaso shidiya tamu na?
4, 5. (a) Okakatanu akɔna waki l’okambi w’Elisha? (b) Ngande wakakadimola Jehowa dɔmbɛlɔ di’Elisha na?
6. Ngande wakokaso mana ɔlɔngɔswamelo waki Jehowa wa l’olongo fundo?
7. (a) Okakatanu akɔna wakoka monga l’anto amɔtshi lo dikambo dia wekelo awɔ wa Bible w’onto ndamɛ? (b) Bonde kele wekelo w’onto ndamɛ nɔmbaka mbidja weolo efula?
8. Dionga diakɔna diatɔlɔmba dibuku dia Tukedi?
9. (a) Ngande wakokaso mbɛdinya nɛmɔ dia paunyi la ‘ewo ka mɛtɛ ka Nzambi’? (b) Tɛdikɔ takɔna tahombaso kotsha naka sho nangaka kondja ewo ka mɛtɛ na?
10. Danyɛlɛ akandɛnyi lo ɛnɛlɔ?
11. Ngande watokimanyiya ɛnɛlɔ ka Danyɛlɛ dia sho shihodia ɛtɛkɛta w’Elisha?
12. Ngande wakokayɛ mbeya awui efula wendana l’andjelo?
13, 14. Isaya akandɛnyi lo ɛnɛlɔ, ndo ngande wakandayaoke?
15. Kakɔna kɛnya ɔnɛ sho kokaka mbetawɔ ɛnɛlɔ k’Ezekiyɛlɛ?
16. Ezekiyɛlɛ akandɛnyi?
17. Ele didjidji dia dundji nɛi di’akeruba?
18. Awui akɔna wamboyokotsha ɔpɔstɔlɔ Joani lo eokelo kaso kendana l’ɔlɔngɔswamelo wa l’olongo?
19. Amboyeya l’ekimanyielo ka wekelo ɔnɛ lo kɛnɛ kendana l’ɔlɔngɔswamelo waki Jehowa na?
20. Dimbola diakɔna diayokadimɔma lo sawo diayela?
[Caption]
[Questions]
[Caption on page 5]
[Caption on page 5]
Ɛlɔlɔ watomba oma lo wekelo w’onto ndamɛ ndeka etale efula wɛnɛ waya oma lo ndɛ supu ka lɔɔka
[Caption on page 6]
[Review on page 6]
Wembola w’Ovuswelo
◻ Dia sho ngɛnangɛna ɔlɔngɔswamelo waki Jehowa, kakɔna kahombaso shihodia na?
◻ Dui diakɔna diakɛnyi okambi w’Elisha, ndo ngande wakôkeketsha omvutshi na?
◻ Ngande wahombaso mbɔsaka wekelo aso w’onto ndamɛ?
◻ Awui akɔna w’ɔm’ɔmɔ wakakɔndɔla Danyɛlɛ, Isaya la Ezekiyɛlɛ lo dikambo di’ɔlɔngɔswamelo wa l’olongo?
[Caption on page 7]
[Caption on page 7]
Jehowa akakadimola dɔmbɛlɔ di’Elisha lo mbɛnya ditongami dia l’olongo