Tokoya Jehowa Lo Ntshaka Akambo Wa Losembwe La Sambo K’ɔlɔlɔ
“Dimi leli [Jehowa] latutshaka akambu wa mamba, [“losembwe la sambo k’ɔlɔlɔ,” NW] lu kete, ne dia lu akambu ako mbatumongenangenaka, mbata [Jehowa].”—JEREMIYA 9:24.
JEHOWA akalake ɔnɛ lushi lɔmɔtshi, onto tshɛ ayoweya. Nganɛ mbakandate lo tshimbo y’omvutshi ande Isaya: “Vo hawuhumuya kuyanga nanya ukungu ami w’ekila tshe, ne dia kete ayulula la ewu ka [Jehowa], uku atululaka ashi a waki.” (Isaya 11:9) Ande elongamelo ka diambo lee!
2 Ko mbeya Jehowa kɛdikɛdi na? Jehowa akasholɛ Jeremiya ɔnɛ kɛnɛ koleki ohomba onto ntsha ele: “Dia ndjala la ewu la dia nimbitelami, dia mbeya ati: Dimi keli [Jehowa]. Dimi leli [Jehowa], latutshaka akambu wa mamba, [“losembwe la sambo k’ɔlɔlɔ,” NW] lu kete, ne dia lu akambu ako mbatumongenangenaka.” (Jeremiya 9:24) Omalɔkɔ, mbeya Jehowa nɔmbaka nto mbeya woho wɛnyande losembwe la sambo kande k’ɔlɔlɔ. Naka sho kɛnɛmɔla waonga asɔ, kete nde ayotɔngɛnangɛna. Ngande wakokaso ntsha dikambo sɔ na? Lo Bible, Dui diande, Jehowa akalame ɛkɔndɔ wendana la woho wakandatshelaka anto wele kema kokele oma ko mɔmbɔkɔmbɔla. Sho kokaka mbeya nganɛ wakamba Jehowa la losembwe la sambo k’ɔlɔlɔ ndo mbôkoya, naka tayekaka dui diande.—Romo 15:4.
Kanga Losembwe Koko Lokana Kɛtshi
3 Woho wakalanya Nzambi Sɔdɔmɔ la Ngɔmɔrɔ ekɔ ɛnyɛlɔ ka dimɛna efula kɛnya toho efula takamba Jehowa la losembwe lande. Jehowa kɔmɛna tsho ohomba wa nanya esomba ɛsɔ koko nde akɔshi nto tɛdikɔ dia kokɛ anto w’ɔlɔlɔ. Onde mɛtɛ esomba ɛsɔ wakasungana ndanyema? Abarahama, kombeyaka akambo tshɛ wa kɔlɔ wakatshamaka lo Sɔdɔmɔ, ko nde kɔfɔnyaka ntondo ɔnɛ vɔ sunganaka ndanyema. Jehowa akashikikɛ Abarahama ɔnɛ naka anto w’ɛlɔlɔ dikumi wayotanema lɔkɔ, kete nde hatolanya osomba ɔsɔ. Lo mɛtɛ, losembwe laki Jehowa sanganaka nshi tshɛ la lotutsha ndo la kɛtshi.—Etatelu 18:20-32.
4 Andjelo ahende wakaye dia ndjokemba osomba wakɛnya akambo wa kɔlɔ wakatshaka Ase Sɔdɔmɔ. Lam’ekeye ase osomba ɔsɔ, ‘oma ko dikɛnda polo l’opalanga,’ ɔnɛ apami ahende wakahangi laka Lɔta, vɔ wakayange ndanya luudu lande la kanyi ya mbeyana la wɔ la wolo. Lɔkɛwɔ lawɔ la nyɛtɛtɛ lakatambe olelo! Aha la tamu, Jehowa kotsha kɔlɔ lo ndanya osomba ɔsɔ.—Etatelu 19:1-5, 24, 25.
5 L’ɔkɔngɔ wa nde shila elanyelo ka Sɔdɔmɔ la Ngɔmɔrɔ oko ɛnyɛlɔ katosha ɔhɛmwɛlɔ, ɔpɔstɔlɔ Petero akafunde ate: ‘Jehowa mbeyaka woho wa mbitsha wanɛ wawoka wɔma oma l’ehemba.’ (2 Petero 2:6-9) Otondonga Lɔta, kanga losembwe la nkumbo kande wakadiakema kâmɛ l’anto asɔ wa kɔlɔ, tshike totota ɔnɛ Nzambi akatshe kɔlɔ lo dikambo sɔ. Omalɔkɔ, andjelo wa Jehowa wakewola Lɔta dikambo di’elanyelo kakalɛndalɛndaka. Lam’akalɔmbalɔmbaka Lɔta, andjelo ‘oma lo kɛtshi ka Jehowa’ wakokimɛ, nde la wadiɛnde l’anande wa amato ko wakâlɔmbɔla l’andja w’osomba. (Etatelu 19:12-16) Sho kokaka ndjashikikɛ ɔnɛ Jehowa ayoyakiyanya woho akɔ wamɛ dikambo di’anto w’ɛlɔlɔ lam’ayangande ndanya dikongɛ nɛ dia kɔlɔ di’akambo.
6 Kânga mbele ekomelo ka dikongɛ nɛ ayonga ‘etena k’elombwelo,’ sho hatohombe ndjakiyanya ɔtɛkɔya. (Luka 21:22) Elombwelo kayela Nzambi l’Armangɛdɔna ayonga ‘elombwelo ka losembwe.’ (Osambu 19:9) Oko wakakondja Abarahama wetshelo, sho kokaka ndjaɛkɛ lo losembwe laki Jehowa loleki lakiso la fwa. Abarahama akambola ate: “Umbadi w[a] kete tshe hatalaka la dialelu di’ololo uka?” (Etatelu 18:25; ɛdika la Jobo 34:10.) Kele Isaya kotshimbatshimba dia mumbola ate: ‘Akɔna alakanya Jehowa mboka k’osembwe na?’—Isaya 40:14.
Tshelo y’Ɔlɔlɔ dia Shimbɛ Anto
7 Nzambi hɛnya losembwe lande paka lo woho washande atshi wa kɔlɔ dilanya. Jehowa ndjaelɛka ndamɛ ɔnɛ ‘Nzambi k’ɔlɔlɔ ndo Oshimbedi.’ (Isaya 45:21) Mɛtɛ, diɔtɔnganelo diekɔ lam’asa sambo k’ɔlɔlɔ kaki Nzambi kana losembwe, la saki kande ka kokɛ anto oma l’etombelo wa pɛkato. Lo dikambo sɔ, dibuku, The International Standard Bible Encyclopedia, diakatombe lo 1982 mbutaka ɔnɛ: “Oma lo losembwe lande, Nzambi toyangaka lo yoho yasungana dia mɛnya kɛtshi Kande ndo saki Kande ka shimbɛ anto.” Aha ɔnɛ kɛtshi katoka Nzambi kaleke losembwe lande wolo, koko kɛtshi katoka Nzambi mɛnamaka oma lo woho watshande akambo la losembwe. Yɛdikɔ yakɔshi Nzambi dia mbisha anto tshungo ekɔ djembetelo yoleki tshɛ ɔlɔlɔ ya losembwe lande.
8 Oshinga wa tshungo, mbut’ate lɔsɛnɔ l’oshinga wolo laki Yeso Kristo, Ɔna ɛtɔi laki Nzambi lakandote—aki ɛngɔ koleki oshinga wolo nɛ dia ɛlɛmbɛ waki Jehowa mbaheme tshɛ, ndo ndamɛ mbâkitanyiyaka. (Mateu 20:28) Adama akashisha lɔsɛnɔ la kokele, ndo dia ekana waki Adama tshungɔ, aki ohomba nambola lɔsɛnɔ la kokele. (Romo 5:19-21) Ɔpɔstɔlɔ Paulo ekɔ lo tɛkɛta dia olowanyi waki Yeso la dia oshinga wa tshungo oko ‘tshelo mɔtshi y’ɔlɔlɔ.’ (Romo 5:18, nɔtɛ) Bonde kele dikambo sɔ ngasɔ na? Nɛ dia lo kanyi ya Jehowa, tshungola anto aki dikambo di’ɔlɔlɔ ndo diakasungana nde ntsha kânga mbele diɔ diakahombe mbɔlɔmba efula. Tokanula t’Adama taki oko “sopo diakawaminula,” nɛ diele Nzambi konanga diɔ minwama, kana oko “hyondo ya tala yatumba dinga,” yele nde hatolanga yɔ nyimala. (Mateu 12:20) Nzambi aki l’eshikikelo ɔnɛ apami ndo amato efula wa kɔlamelo wayotomba oma l’atei wa tokanula taki Adama.—Ɛdika la Mateu 25:34.
9 Ahombaso ntsha la ntondo ka tshelo shɔ ya ngandji ndo ya losembwe yoleki tshɛ na? Dui dimɔtshi diatɔlɔmba Jehowa ele dia sho ‘monga la losembwe.’ (Mika 6:8) Ngande wakokaso ntsha dikambo sɔ na?
Toyange Sambo k’Ɔlɔlɔ ndo Toyele Losembwe
10 Ntondotondo, sho la dia kitanyiya ɛlɛmbɛ wa Nzambi wendana la lɔkɛwɔ l’ɔlɔlɔ. Lam’ele ɛlɛmbɛ wa Nzambi wekɔ ɔlɔlɔ ndo osembɔki, sho mɛnyaka losembwe laso lo mbɔtɔnganyiya lɔsɛnɔ laso l’ɛlɛmbɛ akɔ. Kɛsɔ mbalongamɛ Jehowa oma le ekambi ande. Jehowa akatɛ Ase Isariyɛlɛ ate: “Nyeki dia ntsha ololo; nyuyangi [“losembwe,” NW].” (Isaya 1:17) Woho wa dako sɔ mbakasha Yeso wanɛ wakohokamɛka lam’akandashaka Dako l’Okongo, lam’akandetsha anto dia vɔ ‘nyanga ntondo Diolelo la sambo k’ɔlɔlɔ kaki Nzambi.’ (Mateu 6:33) Paulo akakeketsha Timɔtɛ dia nde ‘ndjela sambo k’ɔlɔlɔ.’ (1 Timote 6:11) Naka sho kitanyiya ɛlɛmbɛ wa Nzambi wendana la lɔkɛwɔ l’ɔlɔlɔ lo lɔsɛnɔ laso ndo naka sho ndɔta lonto l’oyoyo, kete lâsɔ tayɛnya ɔnɛ tekɔ lo ndjela losembwe la mɛtɛ la sambo k’ɔlɔlɔ. (Efeso 4:23, 24) Lo wedi okina, sho nyangaka losembwe lo ntshaka akambo wɔtɔnganɛ la mboka ka Nzambi.
11 Kânga mbadieyaso, hatongaka nshi tshɛ wɔdu le anto wele kema kokele dia vɔ ntsha akambo wa losembwe ndo w’ɔlɔlɔ. (Romo 7:14-20) Paulo akakeketsha Akristo w’Ase Rɔmɔ dia ndɔsha wolo di’aha vɔ monga fumbe ya pɛkato, woho wa vɔ mbeya nambola alemba awɔ le Nzambi oko ‘dihomɔ dia ta dia sambo k’ɔlɔlɔ,’ diakoka kamba la Nzambi dia kotsha sangwelo diande. (Romo 6:12-14) Woho akɔ wamɛ, lo mbekaka Dui dia Nzambi lushi la lushi ndo lo dikitanyiya, sho kokaka kɛndakɛnda l’‘ɛlɛmbɛ wa Jehowa’ ndo ‘mpokwama lo sambo k’ɔlɔlɔ.’—Efeso 6:4; 2 Timote 3:16, 17.
12 Dikambo dia hende: sho mɛnyaka losembwe laso lam’atshɛso anto akambo walangaso Jehowa totshelɛ. Kema wolo di’onto monga la tɛdikɔ tohende, mbut’ate lo dikambo diaso ko sho tɛyatɛya koko otsha le akina ko sho shinganya. Mbala tshɛ sho nyangaka tɛkɛ nɛndɛ lo munga yaso hita, koko tɛndaka akina oma lo munga yawɔ, yele mbala mɔtshi yaso ndeka yawɔ la fwa. Yeso akambola ate: “Ukundi wenaye fumvufumvu lu su dia unyaye, keli we hakani dia wima utamba weli lu su diaye?” (Mateu 7:1-3) Sho pombaka mbeya ɔnɛ ndoko ɔtɔi l’atei aso lakoka memala naka Jehowa towesa lo munga yaso. (Osambu 130:3, 4) Naka losembwe laki Jehowa mboshaka diaaso dia nde nimanyiyɛ anangɛso wɛɔdu awɔ, sho eso dia mbalombosha l’awui a wolo wolo na?—Romo 14:4, 10.
13 Dikambo dia sato: sho kɛnɛmɔlaka losembwe laki Nzambi lam’ayakimɔso l’etete tshɛ l’olimu w’esambishelo. Jehowa tolakaka ate: “Tuyalaki unyishi a di’ololo le wane wukuki dilungula lam’eye la wulu wa mbashadio.” (Tukedi 3:27) Hasungana sho dima anto akina woshasha wa ewo ka lɔsɛnɔ kakatosha Jehowa oma lo lokaho lande. Mɛtɛ, anto efula mbeyaka tona losango laso, koko lam’ele Nzambi ekɔ lo tetemala mbaoka kɛtshi, sho pombaka tetemala mbasha diaaso dia vɔ ‘kadimola etema.’ (2 Petero 3:9) L’ɛnyɛlɔ ka Yeso, sho ngɛnangɛnaka efula lam’akimanyiyaso onto dia nde ndjela losembwe l’akambo w’ɔlɔlɔ. (Luka 15:7) Etena k’ɔlɔlɔ ka ‘sho ndjayaonɛ sambo k’ɔlɔlɔ’ tɔ kɛnɛ.—Hosea 10:12.
‘Ewandji wa Losembwe’
14 Sho tshɛ la dia ndjela sambo k’ɔlɔlɔ, koko dikumanyi dia l’etshumanelo k’Akristo wekɔ l’ɔkɛndɛ wotshikitanyi lo dikambo sɔ. Lowandji laki Yeso ‘sukamɛ la losembwe ndo la sambo k’ɔlɔlɔ.’ Woho akɔ wamɛ, dikumanyi la dia ndjela losembwe laki Nzambi. (Isaya 9:7) Vɔ mbohɔka pɔlɔfɛsi ka l’Isaya 32:1 kata ɔnɛ: “Enda, khum’ekanga ayulela la sambu k’ololo, la ewandji wayolombola antu lu akambu w’usimbwi.” Oko wewɔ emendji, kana ‘ekambi waki Nzambi’ wasɔnama l’ekimanyielo ka nyuma, dikumanyi pombaka ntshaka akambo lo ndjela mboka ka Nzambi.—Tito 1:7.
15 Yeso akɛnya ɔnɛ oma lo losembwe lande, Jehowa akayadje lo dihole di’anto, akawaoke kɛtshi ndo akatshelɛ akambo lo yoho yasungana. Lâdiko w’akambo asɔ tshɛ, nde akatshe tshɛ dia kimanyiya wanɛ waki l’ekakatanu ndo ‘akayange la kokɛ wanɛ wakashishɔ.’ (Luka 19:10) L’ɛnyɛlɔ k’olami w’ɛkɔkɔ wa lo wɛɛla wa Yeso ɔnɛ lakayange ɔkɔkɔ wakashishɔ la wolo tshɛ edja ndo mboshola, dikumanyi nyangaka wanɛ wambotakɔ mboka lo nyuma ndo tshaka la wolo dia mbalɔmbɔla nto oya lo lokoto.—Mateu 18:12, 13.
16 Lo dihole dia vɔ manya wanɛ wele ondo wakatshe pɛkato ya weke, dikumanyi nyangaka dia mbakɔnɔya ndo mbakimanyiya dia vɔ ndjatshumuya naka kokaka. Vɔ ngɛnangɛnaka etena kakimanyiyawɔ onto lambotakɔ mboka. Koko, vɔ mbokaka kandji, naka ɔnɛ lotshe kɔlɔ hayatshumuya. L’ɔkɔngɔ diko, ɛlɛmbɛ waki Nzambi wa losembwe mbalɔmbaka dia vɔ tondja oma l’etshumanelo ɔnɛ lambotsha pɛkato koko hayatshumoya. Kânga l’ɔkɔngɔ wa vɔ mbotondja, l’ɛnyɛlɔ k’ombutshi wa ɔna la lotshito, vɔ nongamɛka dia lushi lɔmɔtshi ɔnɛ lakatshe kɔlɔ ‘ayoyokana lomba.’ (Luka 15:17, 18) Omalɔkɔ, dikumanyi mbɔsaka tɛdikɔ ta tembola anto amɔtshi wakatshanyema dia mbaohola nganɛ wakokawɔ kawola nto l’ɔlɔngɔswamelo wa Jehowa.a
17 Lo yoho ya lânde, dikumanyi pombaka mbokoya losembwe laki Jehowa lam’alomboshawɔ otshi wa kɔlɔ. Atshi wa pɛkato ‘wakayasukanyaka’ le Yeso nɛ dia vɔ wakɛnaka ɔnɛ nde ayowaoka ndo ayowakimanyiya. (Luka 15:1; Mateu 9:12, 13) Lo mɛtɛ, Yeso kodihaka washo l’akambo wa kɔlɔ. Yema ya wenya yaketsha Yeso lakandalɛka mma laka Zakɛyo, akatshutshuya ɔpɔtwanyi ɔsɔ dia nde ndjatshumuya ndo ndjadja kibawo l’asui tshɛ wakandasoya anto akina. (Luka 19:8-10) Ɛlɔ kɛnɛ, dikumanyi weko l’oyango akɔ wamɛ wonya walomboshawɔ onto, mbut’ate mbɔ̂lɔmbɔla lo nde ndjatshumuya. Naka vɔ wayodjaka anto lo demba, l’ɛnyɛlɔ ka Yeso, kete hatonga wolo le atshi wa kɔlɔ dia nyanga ekimanyielo kawɔ.
18 Wanɛ wele l’otema wetawɔ alako wayokimanyiya dikumanyi dia vɔ kamba la losembwe laki Nzambi, lahahini onto koko mbôkaka kandji. Diɛsɛ ko, Ɛzɛra akalɔngɔsɔla otema ande, koko aha yimba yande tsho, dia nde mbetsha Ase Isariyɛlɛ losembwe. (Ezera 7:10) Otema wa ndjadjaka lo dihole di’akina ayokimanyiya dikumanyi dia vɔ kamba l’awui wa l’Afundelo lo yoho ya dimɛna ndo menda dikambo di’onto l’onto lo yoho yasungana la nde. Lam’akakɔnɔla Yeso omoto laki l’ɛkɛlɛlɔ ka dikila, nde akɛnya ɔnɛ losembwe laki Jehowa kɛdikɛdi monga la yimba ya ndjadja lo dihole di’akina oleki ndjela ɛlɛmbɛ nna lo nna. (Luka 8:43-48) Dikumanyi dioka anto akina kɛtshi wonya wakambawɔ la losembwe mbeyaka monga oko “eshamelu uma lu lopepe” le wanɛ wambɔlɛndjama oma lo wɛɔdu awɔ kana oma lo dikongɛ dia kɔlɔ diasɛnaso nɛ.—Isaya 32:2.
19 Kadiyɛso kɛmɔtshi kakatshe pɛkato ka woke, akayandolaka losembwe laki Nzambi aha l’onto mbotshutshuya. Nde ate: “Mɛtɛ, dimi laki la wɔma wa tshɔ le dikumanyi, koko vɔ wakamboke kɛtshi ndo kɔmɔnyɔlami. Dikumanyi wakonge oko ambutshi w’apami koko aha oko toshushi t’awui wolo. Vɔ wakambokiya dimɛna ɔnɛ Jehowa hatokalɛ naka dimi ndowanya yoho yami ya lɔsɛnɔ. Lakeke dimɛmɛ woho watohokolande oko Ombutshi a pami woludi tɔ la ngandji. Dimi lakakoke dihwɛ Jehowa otema l’eshikikelo nte nde ayoka ɛsɛngɔsɛngɔ ami. Lo mbohɔ akambo asɔ, dimi kokaka mbuta la mɛtɛ tshɛ nte: losanganya lɔsɔ lakamɔtɔ la dikumanyi ɛnɔnyi esambele w’etondo aki tshondo y’ɔtshɔkɔ oma le Jehowa. Tatɛ oma k’etena kɛsɔ, diokanelo diasami lande diakakeketala wolo efula.”
Sukɛ Losembwe ndo Ntsha Kɛnɛ Kele Ɔlɔlɔ
20 La lowando tshɛ, losembwe laki Nzambi halembetshiya tsho mbisha onto tshɛ kɛnɛ kasunganande nongola, mbut’ate dilanya kana difuto. Losembwe laki Jehowa akotshutshuya dia nde mbisha wanɛ wele la mbetawɔ lɔsɛnɔ la pondjo. (Osambu 103:10; Romo 5:15, 18) Nzambi totshɛka ngasɔ nɛ dia losembwe lande mbeyaka lɔsɛnɔ lele l’onto l’onto ndo lɔ nyangaka dia kokɛ koko aha dia mbisha onto dilanya. Lo mɛtɛ, naka sho mana woke woke wa losembwe la Jehowa fundo, kete tayoleka mbomamema. Ndo naka sho ntsha tshɛ dia mbokoya lonto lande lɔsɔ, kete nsɛnɔ yaso ndo y’anto akina yayɔtshɔkwama efula. Naka sho ndjela losembwe, kete Shɛso lele l’olongo hotohɛ. Jehowa tolakaka ɔnɛ: ‘Nyoyele losembwe, ndo nyotshe kɛnɛ kele ɔlɔlɔ. Nɛ dia panda kami kaya suke ndo sambo kami k’ɔlɔlɔ kayotomba sɛkɛ. Onto okovɔ latsha dikambo sɔ ekɔ l’ɔtshɔkɔ.’—Isaya 56:1, 2.
[Footnote]
a Enda lo Tshoto y’Etangelo, ya Ngɔndɔ ka Nɛi 15, 1991, lɛkɛ 22-3.
[Study Questions]
1. Naa elongamelo ka diambo kambosha Jehowa anto?
2. Mbeya Jehowa nɔmbaka dikambo diakɔna? Ndo lande na?
3, 4. Lande na kele Jehowa aki la shadiya ya ndanya Sɔdɔmɔ la Ngɔmɔrɔ?
5. Ngande wakatshungola Nzambi Lɔta la nkumbo kande oma la Sɔdɔmɔ?
6. Lande na kahatahombe ndjakiyanya ɔtɛkɔya lo dikambo di’elanyelo ka dikongɛ nɛ dia kɔlɔ di’akambo kaya kasuke?
7. Diɔtɔnganelo diakɔna diele lam’asa losembwe laki Nzambi la kɛtshi kande?
8, 9. (a) Kakɔna kakɔndwama nto oko ‘tshelo mɔtshi y’ɔlɔlɔ’? Lande na? (b) Kakɔna katɔlɔmba Jehowa?
10. (a) Naa yoho mɔtshi yɛnyaso losembwe laso? (b) Ngande wakokaso nyanga ntondo sambo k’ɔlɔlɔ kaki Jehowa?
11. Lande na ndo ngande wahombaso ndɔsha di’aha pɛkato tahemɛ?
12. Kakɔna kahombaso mbewɔ naka sho nangaka tshelɛ anto akambo woho walangaso Jehowa totshelɛ?
13. Lande na kayaoka onto ɔlɔlɔ dia nde pombaka sambisha lokumu l’ɔlɔlɔ la Diolelo?
14. Lo kɛnɛ kendana la losembwe, ɔkɛndɛ akɔna wele la dikumanyi?
15, 16. (a) Ngande wokoya dikumanyi olami wa kɔlamelo wa lo wɛɛla wa Yeso? (b) Ngande wayaoka dikumanyi lo dikambo dia wanɛ wamboshishɔ lo nyuma?
17. Oyango akɔna wahomba monga la dikumanyi lam’alomboshawɔ otshi wa kɔlɔ, ndo naa dionga diahombawɔ monga la diɔ dia tondoya oyango ɔsɔ?
18. Kakɔna kayokimanyiya dikumanyi dia vɔ monga oko “eshamelu uma lu lopepe” na?
19. Ngande wakayaoke kadiyɛso kɛmɔtshi lo menda woho wakakambe dikumanyi la losembwe laki Nzambi?
20. Monga la mbekelo ka shihodia akambo la ka mbâtshaka la losembwe ndo la sambo k’ɔlɔlɔ ekɔ la wahɔ akɔna?
[Caption]
[Footnotes]
[Caption]
[Questions]
[Caption on page 31]
[Caption on page 31]
Oma l’olimu w’esambishelo, sho kɛnɛmɔlaka losembwe la Nzambi
[Caption on page 32]
[Caption on page 32]
Lam’ɛnya dikumanyi losembwe la Nzambi, wanɛ wele l’ekakatanu hawengenga nyanga ekimanyielo kawɔ
[Caption on page 32]
[Review on page 32]
Onde Wɛ Mbohɔka?
◻ Kakɔna katetsha elanyelo ka Sɔdɔmɔ la Ngɔmɔrɔ lo dikambo dia losembwe laki Jehowa?
◻ Lande na kele tshungo ekɔ ɛnyɛlɔ koleki tshɛ ka losembwe laki Nzambi la ngandji kande?
◻ Naa weho esato wakokaso mɛnya losembwe laso?
◻ Naa yoho mɔtshi ya lânde yakoka dikumanyi mbokoya losembwe laki Nzambi?