Vɔ Wakakeketsha Otema

HATONGAKA nshi tshɛ wɔdu di’onto keketsha otema ko sambisha. Ɔpɔstɔlɔ Paulo akate ɔnɛ mbala kɛmɔtshi nde ‘akɛnyi pâ’ dia sambisha. (1 Tesalonika 2:2) Onde sunganaka mɛtɛ ‘mɛna pâ’ dia sambisha? Ndoko kɛnɛ kawashikikɛ ɔnɛ akambo wa kawotake mbayowotsha, koko, esangɔ efula, ekambi wa Nzambi mongaka l’ɔngɛnɔngɛnɔ lo woho wakeketshawɔ otema. Ɛsɔ tênde bɛnyɛlɔ dimɔtshi.

Tara, yana ya yimato y’ɛnɔnyi enanɛi, akahokamɛka ombetsha ande ɔlɔlɔ lam’akandatɛka ana wa kalasa ɔnɛ lo nshi ya Ta dia Hende di’Andja w’Otondo, ase Juda wanɛ waki lo mvudu ya nkanu ya wolo wakahombaka ndɔta tshapa mɔtshi yakasangema Yɔɔtɔ y’ɛnɔndɔ ya Davidi oko djembetelo ya vɔ mbeyamaka. Tara akayambola dia kana ayonga ɔlɔlɔ nde keketsha otema ko tɛkɛta. Nde ekɔ lo mbohɔ ate: “Lakalɔmbɛ Nzambi aha la kukɛ washo.” Oma lâsɔ ko nde memɛ lonya ko mbuta ɔnɛ Ɛmɛnyi wa Jehowa waki lo mvudu ya nkanu shɔ ndo vɔ lawɔ, ko wakahombaka ndɔta tshapa ya trianglɛ k’otsha l’ɛkɛsɛkɛsɛ. Ombetsha akangɛnangɛna dui sɔ ko akawosha losaka. Kɛnɛ kakatɛkɛta Tara akayowoshaka diaaso dia nde sawola l’ombetsha asawo akina, ko l’ɔkɔngɔ diko, ombetsha akɔ akayɛnya kalasa k’otondo bandɛ ka video kelɛwɔ La fermeté des Témoins de Jéhovah face à la persécution nazie.

Lo wodja wa Guinée, l’Afrika wa l’Edjelo ka wonya, dikɛnda dia womoto dielɛwɔ Irène, opandjudi wa lokumu l’ɔlɔlɔ wahatabatizama, akalange pama l’olimu ande. Misiɔnɛrɛ wa womoto wakekaka la nde Bible akôkeketsha dia pembaka mbisha asekande wa la kalasa Tshoto y’Etangelo la Réveillez-vous ! Irène akokaka wɔma dikambo asekande wa la kalasa konangaka. Koko, oma l’ekeketshelo kaki misiɔnɛrɛ, Irène akɔshi yɛdikɔ ya tatɛ sambisha ombeki wakɛnamaka oko nde mbakalekaka ntona. Irène akâmbe heyama dikambo ɔna womoto ɔsɔ kontona ndo aketawɔ periodikɛ l’ɔngɛnɔngɛnɔ efula. Ambeki akina waketawɔ mbɔsa periodikɛ. Ngɔndɔ kɛsɔ, Irène akakahɛ anto lofulo la periodikɛ loleki ndo nyɛ tshɛ yakandakahe ngɔndɔ tshanu yakete.

Lo disɛnga dielɛwɔ ɔnɛ Trinité, ekumanyi kɛmɔtshi aki la yema ya wɔma dia nde ntshɔ le dikitɛlɛ dia kalasa dia towɛnya ohomba wa Réveillez-vous ! l’awui wa kalasa. Koyanga mbakidiɔ ɔsɔku, nde akakeketsha otema. Nde ekɔ lo mbuta ate: “Lakalɔmbɛ Nzambi lam’akamɔtɔ lo lokombo. Dikitɛlɛ akangɛnangɛna lo yɛdikɔ yakimi kɔfɔnyaka ndo fɔnya.” Nde aketawɔ Réveillez-vous ! waki l’ɔtɛ a dui ɔnɛ: “Elongamelo Kakɔna le Ɛlɔngɔlɔngɔ l’Esekaseka wa Nshi Nyɛ?” ko aketawɔ mbɔsa periodikɛ kakɔ dia ndakanyaka ase kalasa. Oma k’etena kɛsɔ, nde akɔshi periodikɛ 40 yele l’asawo wa weho la weho.

Lam’akinde dikɛnda, Vaughn akɛnaka olimu w’esambishelo wolo nshi tshɛ. “Lakahandjɔka wɔɔngɔ vwa, dungu diakakɛlanɛka l’anya ami, ndo lakatɛkɛta esadi esadi wa mamba​—takamakokaka tɛkɛta ɔkɔkɛ.” Koyanga mbakidiɔ ɔsɔku, nde akayoyalaka ombatshi mboka. Koko, komongaka nshi tshɛ wɔdu le nde dia keketsha otema ko tɛkɛta. Mbala kɛmɔtshi, l’ɔkɔngɔ wa nde nyanga olimu lushi l’otondo ko kokondja, otema ande wakakɔmɔ; nde akalange sambisha onto ɔmɔtshi lo kawolo, “dia kele dui dimɔtshi di’ɔlɔ diatombe oma lo lushi lɔsɔ [lakinde kompomɔ] lokolo l’ɔlɔ.” Koko nde akoke wɔma nɛ dia pami kɛsɔ akɛnamaka oko kɔmɛrsa ka woke. Nde akayokeketsha otema ko ndjɔtɛkɛta l’ekumanyi kɛmɔtshi kakadjasɛ suke la pami kɛsɔ. Wakasawola edja efula. Pami kɛsɔ k’ose okanda akawombola ate: “Wɛ dikɛnda dia nganɛ ko tondjaka wembola w’eshika wa ngasɔ, onde wɛ ekɔ ombewi wa teoloji?” Ko Ɔnangɛso Vaughn akôkadimola ate: “Bu, dimi lekɔ Ɔmɛnyi wa Jehowa.” Ko pami kakɔ akamɔnamɔna, ata ate: “Aah, kakianɛ lamboka.”

Ɛmɛnyi wa Jehowa ɛsɔ tshɛ, ndo ekina efula heyama mbadia, wekɔ l’ɔngɛnɔngɛnɔ lo woho wakawakeketsha otema dia sambisha. Onde ndo wɛ ayotsha ngasɔ?

[Osato wa lo lɛkɛ 17]

Tara

[Osato wa lo lɛkɛ 17]

Vaughn