“Nyosungukalake”
“Laasɔ nyosungukalake, dikambo hanyeewe loshi layooya Owanji waakinyu.”—MATEYO 24:42, Dyookaneelo dy’Oyooyo.
1. Wanɛ wambokambɛ Jehowa olimu edja efula akanawɔ lo menda ɛnɔnyi efula wambowoyasha l’olimu ande? Shila ɛnyɛlɔ kɛmɔtshi.
EFULA ka wanɛ wambokambɛ Jehowa olimu aha ɛlɔ la lui wakeke akambo wa mɛtɛ l’akiwɔ weke ɛlɔngɔlɔngɔ kana esekaseka. Oko ose okanda lakashola lɔwɔkɔ la dikɛsɔ l’oshinga wolo ko sondja kɛnɛ tshɛ kaki lande dia nde lisomba, anto asɔ wakekaka Bible la mposa ka wolo wakayasɛkɛ ndo wakalambola nsɛnɔ yawɔ le Jehowa. (Mateu 13:45, 46; Mako 8:34) Akanawɔ nshi nyɛ lo menda woho ɔnɛ wakawahombe konga edja koleki ndo woho wakawafɔnyaka dia ndjɛna ekotshamelo k’asangwelo waki Nzambi lo dikambo dia nkɛtɛ kɛnɛ na? Vɔ bu la lonyangu kânga yema tshitshɛ! Vɔ wekɔ la kanyi yaki l’Ɔnangɛso Alexander Macmillan. L’ɔkɔngɔ w’ɔnangɛso ɔsɔ ndjasha l’olimu wa Nzambi suke l’ɛnɔnyi 60, nde akayota ate: “Lamboleka ndjâkeketsha dia tetemala lo mbetawɔ kami. Tɔ mbaketɛ lɔsɛnɔ ohomba le mi. Ndo tɔ mbakimanyiya polo ndo ɛlɔ kɛnɛ dia dimi kongɛ nshi yayaye aha la mboka wɔma.”
2. (a) Dako diakɔna diakasha Yeso ambeki ande lo wonya wasungana? (b) Wembola akɔna wayotɔsɛdingola lo sawo nɛ?
2 Ko wɛ ngande na? Oyadi dikɛnda kana opalanga mbeyɛ, enda ɛtɛtɛkɛta ɛnɛ wa Yeso wata ɔnɛ: “Laasɔ nyosungukalake, dikambo hanyeewe loshi layooya Owanji waakinyu.” (Mateyo 24:42, Dyokokaneelo dy’Oyooyo.) Ɛtɛkɛta ɛsɔ wa wɔdu mɔmbɔlaka akambo efula wa mɛtɛ. Sho hateye lushi lakɔna layoya Nkumadiɔndjɔ dia ndjolanya andja ɔnɛ wa kɔlɔ, ndo ndoko ohomba sho mbeya lushi lakɔ. Koko, sho pombaka sɛnaka nshi tshɛ lo yoho yahatatoyokoka monga la lonyangu lam’ayondoya. Ko naa bɛnyɛlɔ diatanaso lo Bible lo dikambo sɔ diayotokimanyiya dia sho sungukalaka na? Ngande wakɛnya Yeso ohomba wa sungukalaka? Ndo tolembetelo takɔna tele laso nshi nyɛ tɛnya ɔnɛ tekɔ lo sɛna lo nshi y’ekomelo k’andja ɔnɛ wahoke Nzambi wɔma na?
Ɛnyɛlɔ Katewola
3. Anto efula ɛlɔ kɛnɛ ngande wafɔnawɔ la wanɛ waki lo nshi ya Nɔa?
3 Lo weho efula, anto wa lo nshi yaso nyɛ fɔnaka l’apami ndo la wamato wa lo nshi ya Nɔa. Nshi shɔ nkɛtɛ akalole tɔ l’akambo wa ngala, ndo tokanyi t’etema w’anto ‘taki paka kɔlɔ keto wonya tshɛ.’ (Etatelu 6:5) Anto efula wakayashaka tshɛ lo akambo wa lɔsɛnɔ wa lushi la lushi. Koko, la ntondo ka nde ndɔsha Mvula k’Elola ka woke, Jehowa akasha anto diaaso dia vɔ kadimola etema. Nde akasha Nɔa ɔkɛndɛ wa sambisha, ko Nɔa akakitanyiya dui sɔ—nde akakambe olimu w’‘osambisha w’akambo w’ɔlɔlɔ’ ondo ɛnɔnyi 40 kana 50 kana ndekana ndo lâsɔ. (2 Petero 2:5) Koko anto kombidjaka losango laki Nɔa yimba. Vɔ kosungukalaka. Ɔnkɔnɛ, l’ekomelo, paka Nɔa nde la nkumbo kande ato mbakake lam’akaye dilanya dia Jehowa.—Mateu 24:37-39.
4. Lo yoho yakɔna yakokaso mbuta ɔnɛ Nɔa akatondoya olimu ande, ndo ngande wakokaso mbuta ɔsɔku lo dikambo di’olimu ayɛ w’esambishelo?
4 Onde Nɔa akatondoya olimu ande? Dia kadimola dimbola sɔ, têndake paka lofulo la tshitshɛ la wanɛ wakawokɛ. Lo mɛtɛ, esambishelo ka Nɔa kakakotsha oyango atɔ kânga mbele anto efula kombetawɔ. Lande na na? Nɛ dia anto wakakondja diaaso dia sɔna kɛnɛ kalangawɔ: kambɛ Jehowa kana bu. Kayotota dia etenyi ka ngelo kasambishayɛ na? Kânga mbele wanɛ wetawɔ wekɔ yema tshitshɛ, wɛ ekɔ lo tatondoya olimu ayɛ lo yɛdikɔ y’efula. Bonde kataso ɔsɔku na? Dikambo lam’atayasambisha, wɛ ekɔ lo tewoya losango la Nzambi dia mbewola anto, ko lâsɔ wɛ ekɔ lo takotsha ɔkɛndɛ wakasha Yeso ambeki ande.—Mateu 24:14; 28:19, 20.
Vɔ kombokɛ amvutshi wa Nzambi
5. (a) Awui akɔna wakatanemaka efula la Juda lo nshi ya Habakuka, ndo anto ngande wakawɔsaka losango l’amvutshi? (b) Ase Juda ngande akawɛnyaka lohetsho lawɔ otsha le amvutshi wa Jehowa?
5 Ɛnɔnyi nkama l’ɔkɔngɔ wa Mvula k’Elola, diolelo dia Juda diakayofukutanaka heyama. Ɔtɛmwɛlɔ wa dikishi, akambo wa wɛngiya, ɛhɛnyɔhɛnyɔ, ndo odiakanelo akayokokanɛka ahole tshɛ. Jehowa akonyiya Habakuka dia nde mbewola anto ɔnɛ endaka nyu hanyokadimudi etema, kete mpokoso ka woke kayonyokomɛ oma le ase Kaladiya, mbut’ate ase Babilɔna. (Habakuka 1:5-7) Koko anto kombetawɔ mbohokamɛ. Ondo wakakanyiyaka l’etema awɔ vate: ‘Ɛnɔnyi ndekana lokama wambeta tatɛ oma lam’akewoyaka Isaya losango la ngasɔ dia mbewola anto koko ndoko kambosalema polo ndo ɛlɔ kɛnɛ!’ (Isaya 39:6, 7) Efula k’ewandji wa Juda, kombidjaka losango lɔsɔ yimba ndo wakahetshaka amɛmbi alɔ. Lushi lɔmɔtshi, vɔ wakayange ndjaka ndo omvutshi Jeremiya, ndo wotowodiaka mɛtɛ otondoyala Ahikamɛ kondjekama l’atei. Nkumekanga Jehɔyakima akomala l’ɔtɛ wa losango lokina lakawawewoya ko akadiake omvutshi Uriya.—Jeremiya 26:21-24.
6. Jehowa ngande wakandakeketsha Habakuka?
6 Losango lakewoyaka Habakuka laki wolo woho akɔ wâmɛ ndo kombetawɔmaka le anto efula oko losango la Jeremiya, ɔnɛ lakasokoyama oma le Nzambi dia tatshi di’ɛnɔnyi 70 wakahombe Juda monga tɔngɔ diambohandjɔ vwa. (Jeremiya 25:8-11) Lâsɔ sho kokaka mboka bonde kakayakiyanyaka Habakuka lam’akandalele ate: “[Jehowa] li, edja ndu kaandi ayumulela ekimanyelu, ku we hambukela? Dimi lambukulelela dia akambu wa ngala, keli we hatushimbela.” (Habakuka 1:2) Oma lo kɛtshi kande, Jehowa akakadimola Habakuka l’ɛtɛkɛta ɛnɛ wakeketsha mbetawɔ: “Enelo kene keko ne dia etena kakasonwama. To kutsha nkuma lu ekumelu kato, to huta kashi. Kuyanga to kayutshimbatshimba, nyukikungeli. To kayuya mete, hakiutshimbatshimba.” (Habakuka 2:3) Lâsɔ Jehowa ekɔ la “etena kakasonwama” dia komiya wɛngiya la ɛhɛnyɔhɛnyɔ. Habakuka takandahombe nkɔmɔ otema kana tɛwɔla anya l’olimu ande naka nde ambɛna di’oko ɛnɛlɔ kakɔ kambotshimbatshimba. Nde akahombe ‘tetemala kikongɛ,’ ndo sɛnaka lushi tshɛ la kanyi y’ɔnɛ tɔ kayanga kotshama. Lushi la Jehowa hoya l’ɔkɔngɔ w’etena kakashikikɛma!
7. Bonde kakayofundamɛ Jerusalɛma elanyelo kekina lo ntambe ka ntondo ka lo nshi yaso nyɛ?
7 Suke l’ɛnɔnyi 20 l’ɔkɔngɔ wa Jehowa tɛkɛta la Habakuka, Jerusalɛma, kapitalɛ ka Juda, akayolanyema. Wakayohikaka osomba ɔsɔ nto l’ɔkɔngɔ diko, ndo efula k’akambo wa kɔlɔ wakakiyanyaka Habakuka kondjoyala nto. Koko, lo ntambe ka ntondo ka lo nshi yaso nyɛ, osomba ɔsɔ wakayofundamɛ elanyelo dikambo anto wakadjasɛka lɔkɔ wakatɔmbɔkwɛ Nzambi. Oma lo kɛtshi kande, Jehowa akalɔngɔsɔla woho ɔmɔtshi di’anto w’etema ɔlɔlɔ kondja eko. Mbala kɛsɔ, nde akakambe la Yeso Kristo, omvutshi woleki woke, dia mbewoya losango lɔsɔ. L’ɔnɔnyi wa 33 T.D., Yeso akatɛ ambeki ande ate: “Lam’ayunyena elui w’alimbi wambudinga Jerusalema, kanyeyi nyati: Elanyelu kayo kaya suki. Lushi lako, wane weli la Judiya, kawulawo l’ekungu.”—Luka 21:20, 21.
8. (a) Kakɔna kakakoke komɛ Akristo amɔtshi lam’akatetaka nshi l’ɔkɔngɔ wa nyɔi ka Yeso? (b) Ngande wakayokotshama ɛtɛkɛta wa Yeso wa prɔfɛsiya lo dikambo dia Jerusalɛma?
8 Lam’akatetaka ɛnɔnyi, ondo Akristo amɔtshi wa la Jerusalɛma wakayambolaka etena kakahombe prɔfɛsiya ka Yeso ndjokotshama. Wakakoke ndjambola ngasɔ mɛtɛ lo menda kɛnɛ kaketawɔ amɔtshi ndjâhombia. Ondo wakatone munda ekanda ɛmɔtshi wotokoka mbangɛnyangɛnya nɛ dia vɔ wakɔshi tɛdikɔ dia tetemala sungukala. Onde vɔ wakayɔkɔmɔka etema l’edjedja ka wonya? Onde wakayota ɔnɛ waketsha wenya awɔ wetshetsha, ndo wakakanyiyaka ɔnɛ ɛtɛkɛta wa Yeso mendanaka la lɔlɔnga la nshi y’otsha la ntondo koko aha lɔlɔnga la lo nshi yawɔ? L’ɔnɔnyi wa 66 T.D., prɔfɛsiya ka Yeso kakatatɛ kotshama lam’akaye asɔlayi w’ase Rɔmɔ ko ndjodinga Jerusalɛma. Wanɛ wakasungukalaka wakalembetɛ djembetelo yakɔ ko wakalawɔ oma l’osomba ndo wakashimbamɛ lam’akayolanyema Jerusalɛma.
Ɛnyɛlɔ kɛnya ohomba wa sungukalaka
9, 10. (a) Ngande wakokayɛ mbuta lo tshena pe wɛɛla wa Yeso w’ase olimu wakakongɛka owandji awɔ oma lo dambo diande dia diwala? (b) Lande na kakakoke ase olimu monga l’okakatanu dia kongɛ owandji awɔ? (c) Lande na kele aki ɔlɔlɔ di’ase olimu mbikikɛ solo?
9 Dia nde tɔtɔmiya ohomba wa sungukalaka, Yeso akɛdika ambeki ande la ase olimu wakongɛ nkumɛwɔ oma lo dambo dia diwala. Vɔ wakeyaka ɔnɛ nde ayokalola l’otsho, ko wonya akɔna shikaa na? Onde lo djɔ ya ntondo? Ya hende? Ya sato? Vɔ kombeyaka. Yeso akate ate: “Oyaadi [owandji] nkoma lo jɔ ya hende kaanga ya sato, ko nde mbaatana wosungukadi, dyɛɛsɛ lee as’olemu anɛ!” (Luka 12:35-38, Dyookaneelo dy’Oyooyo) Ohotokokanyiya woho wakalokɔlokɔka asolo w’ase olimu asɔ. Yema ya londjo tshɛ yakawokaka kana dɛdi di’onto diakawɛnaka akalekaka mbahɛ asolo awɔ lâdiko, lâsɔ ko woyambola ɔnɛ: ‘Ɔsɔ aha owandji aso ondo?’
10 Kakɔna kototomba otondoyala owandji awɔ akaye lo djɔ ya hende, yatatɛ oma l’eshidi divwa w’otsho polo midi k’otsho na? Onde ase olimu tshɛ, oyadi kânga wanɛ wakakambe olimu oma ko pindju ka yosose, wotemala dia mbosha mɔɔyɔ, kana amɔtshi wotonga lo djɔ? Kakɔna kototomba otondoyala owandji akaye lo djɔ ya sato, oma l’asa midi k’otsho la suke l’eshidi esato wa pindju? Onde ase olimu amɔtshi wotɔkɔmɔ etema, kana monga la lonyangu l’ɔtɛ wakawɛnaka di’oko nkumɛwɔ amboviya?a Paka wanɛ wakawatane wosungukadi lam’akakome owandji awɔ mbakahombe mbelamɛ ɔnɛ amɛnyi w’ɔlɔ. Ɛtɛkɛta ɛnɛ wa lo Tukedi 13:12 kotshamaka mɛtɛ le wɔ: “Elungamelu k’engo kahakumi esadi, katukiaka utema kandji. Keli lam’akuma engo kalungamelandi, to katuyalaka uku utamba a lumu.”
11. Ngande wakoka dɔmbɛlɔ tokimanyiya dia sho sungukalaka?
11 L’edja k’etena kakawɛnaka di’oko lushi l’elanyelo lambotshimbatshimba, kakɔna kakahombe kimanyiya ambeki wa Yeso dia vɔ tetemala sungukalaka na? Lam’akinde l’ekambɔ ka Ngɛtɛsɛmanɛ yema la ntondo ka vɔ mbonda, Yeso akatɛ apɔstɔlɔ ande amɔtshi asato ate: ‘Nyosungukale kele nyɔlɔmbake Nzambi, nyatokɔkɔ l’ehemba.’ (Mateu 26:41) L’ɔkɔngɔ w’ɛnɔnyi efula, Petero, ɔnɛ laki laawɔ, akayoshaka asekande Akristo dako dia woho ɔsɔ. Nde akafunde ate: “Ekumelu k’akambu tshe kaya suki, okone nyuyali la yimba y’ololo, nyolembohali, nyolombaki.” (1 Petero 4:7) Lâsɔ mbokɛmaka hwe dia sho pombaka mbidjaka alɔmbɛlɔ w’oma k’ɛse otema l’atei w’akambo aso w’Akristo wasalaso mbala ko mbala. Sho pombaka mɛtɛ sɛngasɛngaka Jehowa dia nde tokimanyiya dia sho sungukalaka.—Romo 12:12; 1 Tesalonika 5:17.
12. Naa otshikitanu wa l’asa fɔnyaka akambo ɔfɔnyafɔnya la etshelo ka sungukala?
12 Tolembete dia Petero akate ndo ɔnɛ: “Ekumelu k’akambu tshe kaya suki.” Nshi ngana yambotshikala na? Ndoko woho wakoka anto shikikɛ lushi la wonya. (Mateu 24:36) Koko, otshikitanu wekɔ l’asa ndjasha lo fɔnyaka akambo ɔfɔnyafɔnya, etshelo kahetawɔma lo Bible, la tetemala kongɛ ekomelo, kɛnɛ katokeketsha Bible dia ntsha. (Enda ndo lo 2 Timote 4:3, 4; Tito 3:9.) Naa yoho mɔtshi yakokaso tetemala kongɛ ekomelo na? Ele lo mbidjaka yimba lo tolembetelo tɛnya ɔnɛ ekomelo kaya suke. Lâsɔ, ɛsɔ tênde tolembetelo tosamalo tɛnya ɔnɛ tekɔ lo sɛna lo nshi y’ekomelo k’andja ɔnɛ wa kɔlɔ.
Tolembetelo tosamalo ta shikaa
13. Ngande waketawoya prɔfɛsiya ka Paulo kofundami lo 2 Timote tshapita 3 ɔnɛ tekɔ lo sɛna lo “nshi y’ekumelu”?
13 Ntondotondo, ekotshamelo ka prɔfɛsiya ka Paulo kendana la “nshi y’ekumelu” kekɔ lo mɛnama hwe. Paulo akafunde ate: “Lu nshi y’ekumelu, tena dia wulu diayuyala. Antu wayuyalanga, wayulanga ukundji, wayosema, wayutakula, wayotengana, wayutuna aui w’ambutshi, hawukana lusaka, waha ololo. Vo wayuyala waha la ngandji ka mete, akanga w’ududu, amamanyishi, wahayakimela, akanga w’usihi, atunyi w’akambu w’ololo. Vo wayuyala afungi, akanga a puki, akanga a ndjambiya, anangi wa engenongeno, wuleki wa [Nzambi]. Vo wayuyala l’efanelu ka ololo a [Nzambi], keli wayutuna wulu andi. Umo l’atei w’antu aso. Keli antu wa kolo la akanga a lukesu wayuhama lu akambu awo wa kolo; vo wayukesana, ku wayukesama.” (2 Timote 3:1-5, 13) Onde hatɛnyi prɔfɛsiya kɛsɔ akotshama lo nshi yaso nyɛ? Paka wanɛ wadiha washo l’okonda di’aha mɛna akambo wasalema mbakoka mbuta ɔnɛ prɔfɛsiya kɛsɔ atakotshama!b
14. Ngande wakotshama ɛtɛkɛta wa l’Enyelo 12:9 lo dikambo dia Diabolo nshi nyɛ, ndo kakɔna kayanga mbokomɛ kem’edja?
14 Djembetelo ya hende ele, tekɔ lo mɛna akambo watomba tatɛ lakawakadja Satana nde l’ɛdiɛngɛ ande oma l’olongo, dia kotsha kɛnɛ kofundami lo Enyelo 12:9. Divɛsa sɔ totɛka ɔnɛ: “Wakakadja ului ako a wuki w’edjedja, wetawo vati: Uhimbanyi, Satana, ukeshi a wa la kete tshe—wakawukadja la kete ndi la andjelo andi.” Dikambo sɔ diakela mananu ka woke le nkɛtɛ. Lo mɛtɛ, anto wambɛna pâ hakoke, djekoleko tatɛ oma l’ɔnɔnyi wa 1914. Koko, prɔfɛsiya ka l’Enyelo mbutaka nto ɔnɛ lam’akakadjema Diabolo oya laa nkɛtɛ, nde mbeyaka ate ‘etena kambotshikalɛ kaya yema tshitshɛ.’ (Enyelo 12:12) L’etena kakɔ kɛnɛ, Satana ekɔ lo ndɔsha ambeki wa Yeso w’akitami w’esɔ. (Enyelo 12:17) Tambɛna mɛtɛ etombelo w’oma l’ɔlɔshɛlɔ ɔsɔ lo nshi yaso nyɛ.c Koko, kem’edja nto, Satana ayodihama lo difuku diaha la komelo ‘di’aha nde minganyiyaka wedja nto.’—Enyelo 20:1-3.
15. Ngande watɛnya Enyelo 17:9-11 ɔnɛ tekɔ lo sɛna lo etena k’ekomelo?
15 Djembetelo ya sato ele, tekɔ lo sɛna l’etena ka “khum’ekanga” k’enanɛi ndo ka komelo katawɔ lo prɔfɛsiya ka l’Enyelo 17:9-11. Lo divɛsa nɛ, ɔpɔstɔlɔ Joani ekɔ lo tɛkɛta dia nkumi ya dikanga esambele, yalembetshiya wedja esambele wakahemɛ andja w’otondo: Edjibito, Asuriya, Babilɔna, Mediya la Pɛrɛsiya, Ngirika, Rɔmɔ, la lowandji laheme andja w’otondo lokengami la wedja ehende ɛnɛ: Grande-Bretagne la États-Unis d’Amérique. Nde akɛnyi nto ‘nkumekanga kɛmɔtshi k’enanɛi kayatombe oma lo k’esambele.’ Nkumekanga kɛsɔ k’enanɛi—ka komelo kakɛnyi Joani lo ɛnɛlɔ—nembetshiyaka ɛlɔ kɛnɛ ɔlɔngɔswamelo welɛwɔ Nations unies. Joani ekɔ lo mbuta ɔnɛ nkumekanga kɛsɔ k’enanɛi ‘kekɔ lo tatshu otsha l’elanyelo,’ l’ɔkɔngɔ atɔ ndoko nkumi ya dikanga nto ya laa nkɛtɛ yatawɔ.d
16. Awui wa woho wakakotshama dɔ diaki Nɛbukadinɛza dia lohingu ngande wɛnyawɔ ɔnɛ tekɔ lo sɛna lo nshi y’ekomelo?
16 Djembetelo ya nɛi ele, tekɔ lo sɛna l’etena kolembetshiyami lo didjidji oko ekolo wa lohingu lakɛnyi Nɛbukadinɛza lo dɔ. Omvutshi Danyɛlɛ akasakola dɔ sɔ di’ehekesa dia shaka ya lohingu l’onto. (Danyele 2:36-43) Tenyi nɛi dia mbolo dia lohingu lɔsɔ nembetshiyaka wedja wakahemɛ andja w’otondo, tatɛ oma l’ɔtɛ (mbut’ate Diolelo dia Babilɔna) polo ndo l’ekolo la lo mpita ya l’ekolo (mbut’ate mandji yalɔmbɔla nshi nyɛ). Mandji tshɛ yolembetshiyami lo lohingu lɔsɔ yambɛnamaka. Tekɔ lo sɛna nshi nyɛ l’etena kolembetshiyami oko ekolo wa lohingu. Hawɔtɛkɛta dia mandji nkina nto yahomba ndja.e
17. Olimu aso w’esambishelo ngande wɛnyawɔ ndo vɔ ɔnɛ tekɔ lo sɛna lo etena k’ekomelo?
17 Djembetelo ya tanu ele, tekɔ lo mɛna olimu w’esambishelo wasalema lo nkɛtɛ k’otondo, olimu wakatatshi Yeso ɔnɛ wayosalema yema la ntondo k’ekomelo k’andja ɔnɛ. Yeso akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Ɛlɔ kɛnɛ, prɔfɛsiya kɛnɛ kekɔ lo kotshama lo yɛdikɔ yoleki tshɛ. Eelo mɛtɛ, ekɔ bɛtshi dimɔtshi dia nkɛtɛ diahatanandema, ndo ondo l’etena kakashikikɛ Jehowa, diaaso dia woke di’olimu efula kambema diayoyala. (1 Koreto 16:9) Koyanga mbediɔ ɔsɔku, Bible hate ɔnɛ Jehowa ayokonga edja ndo onto l’onto la lo nkɛtɛ k’otondo ambosambishama lo yema yande ndamɛ. Koko, lokumu l’ɔlɔlɔ pombaka sambishama polo ndo lo yɛdikɔ yayɔngɛnangɛna Jehowa. Lâsɔ mbayoyoya ekomelo.—Enda ndo lo Mateu 10:23.
18. Kakɔna mɛtɛ kayokomɛ akitami amɔtshi w’esɔ lam’ayotatɛ fɔnu ka woke, ndo ngande wakoka dikambo sɔ shikikɛma?
18 Djembetelo ya samalo ele, lofulo l’ambeki wa Kristo wa mɛtɛ w’akitami w’esɔ lekɔ lo takitakita, kânga mbele amɔtshi mɛtɛ wayonga laa nkɛtɛ lam’ayotatɛ fɔnu ka woke. Efula k’atshikadi waya esombe efula, ndo lam’atete ɛnɔnyi, lofulo la wanɛ mɛtɛ wele akitami w’esɔ lekɔ lo takitakita efula. Koko, lam’akandatɛkɛtaka dia fɔnu ka woke, Yeso akate ate: “Utunduyala nshi sho kunsusama, tshiki nduku untu lutushimbamela. Keli wayususa nshi sho ne dia esonami.” (Mateu 24:21, 22) Lâsɔ mbokɛmaka hwe dia “esonami” ɛmɔtshi wa Kristo wayonga laa nkɛtɛ lam’ayotatɛ fɔnu ka woke.f
Kakɔna katokongɛ lo nshi yayaye?
19, 20. Lande na kele amboleka ohomba le so nshi nyɛ dia sɛnaka ndo sungukalaka?
19 Kakɔna katokongɛ lo nshi yayaye na? Tena di’akambo wa mamba diakayaye. Paulo akatewola ɔnɛ ‘lushi la Jehowa lekɔ lo ndjaye oko wovi l’otsho.’ Lo dikambo di’anto wɛnama oko akanga a tomba wa l’andja ɔnɛ, nde akate ate: “Lam’ayowota vate: ‘Wɔladi la lotui tshitshi!’ lâsɔ ko elanyelo ka shashimoya ndja le wɔ.” Diɔ diakɔ diakɔkɔmiya Paulo ambadi wa mukanda ande ate: “Tatolalake djɔ oko akina, koko tɔsɛnɛ ndo toyalame dimɛna.” (1 Tɛsalɔnika 5:2, 3, 6, NW) Lo mɛtɛ, wanɛ wendɛ le atshunda w’anto dia mbela wɔladi la lotui tshitshi wekɔ oko anto wahɛnyi dimɛna. Anto wa ngasɔ wekɔ lo djɔ ya baku!
20 Elanyelo k’andja ɔnɛ kayoya la shashimoya ya mamba. Lâsɔ, nyokongɛke lushi la Jehowa. Nzambi ndamɛ akatɛ Habakuka ate: ‘Lɔ hatokoma l’ɔkɔngɔ’! Mɛtɛ, amboleka ohomba le so nshi nyɛ dia sho sungukalaka.
[Nɔtɛ ya l’ɛse ka dikatshi]
a Owandji kondakana l’ase olimu ande ɔnɛ layoya lo wonya ɔsɔ shikaa. Ɔnkɔnɛ, nde komonga l’ɔkɛndɛ wa mbakɔndwɛ awui tshɛ wakandasale kana mbalembetshiya ɔkɔkɔ wakawayɛna di’oko nde ambotshimbatshimba.
b Dia wɛ mɛna woho wakawɔmbɔla prɔfɛsiya kɛnɛ, enda lo tshapita 11 ya Ewo Katɔla Otsha lo Lɔsɛnɔ la Pondjo, dibuku diakatondja Ɛmɛnyi wa Jehowa.
c Dia wɛ mana dui sɔ fundo, enda lo lɛkɛ 180-186 lo dibuku La Révélation : le grand dénouement est proche !, dibuku diakatondja Ɛmɛnyi wa Jehowa.
d Enda lo La Révélation : le grand dénouement est proche !, lɛkɛ 251-254.
e Enda lo tshapita 4 ya dibuku Prêtons attention à la prophétie de Daniel !, dibuku diakatondja Ɛmɛnyi wa Jehowa.
f Lo wɛɛla w’ɛkɔkɔ la mbudi, Ɔna onto ayoya lo lotombo l’etena ka fɔnu ka woke ndo ayodjasɛ dia nomboya anto. Nde ayolomboya anto lo menda kana vɔ wakakimanyiya anango Kristo w’akitami w’esɔ. Naka l’etena k’elombwelo ko anango Kristo wambotashilaka mumɔ oma laa nkɛtɛ, lâsɔ kete hatokɛma kânga yema naka nde ndjela kɛnɛ kakâsalɛka anto lo nshi shɔ.—Mateu 25:31-46.
Onde wɛ mbohɔka?
• Bɛnyɛlɔ diakɔna dia l’Afundelo diakoka tokimanyiya dia sho sungukalaka?
• Ngande wakɛnya Yeso ohomba wa sungukalaka?
• Naa tolembetelo tosamalo tɛnya ɔnɛ tekɔ lo sɛna lo nshi y’ekomelo?
[Esato wa lo lɛkɛ 3]
Alexander Macmillan akakambɛ Jehowa olimu la kɔlamelo suke l’ɛnɔnyi akumi asamalo
[Osato wa lo lɛkɛ 4]
Yeso akɛdika ambeki ande la ase olimu wasungukala