Tatohekɔke sala kɛnɛ kele ɔlɔlɔ
“Tatuhekoki dia ntsha ditshelu di’ololo, ne dia tayuna lu eleku ka muna, naka hatuheko.”—NGALATIYA 6:9.
1, 2. (a) Lande na kele ekɔ ohomba monga l’etetemalelo dia kambɛ Nzambi? (b) Ngande wakɛnya Abarahama etetemalelo, ndo kakɔna kakokimanyiya dia sala dikambo sɔ?
OKO weso Ɛmɛnyi wa Jehowa, sho ngɛnangɛnaka lam’asalaso lolango laki Nzambi. Sho kondjaka nto ekeketshelo lam’ɛmbaso “lokoho” la monga ombeki. (Mateu 11:29) Koko, kambɛ Jehowa la Kristo hatongaka nshi tshɛ dikambo dia wɔdu. Ɔpɔstɔlɔ Paulo akalembetshiya dikambo sɔ hwe lam’akandakɔkɔmiya asekande Akristo ate: “Dieli la nyu dia ntetemala, dia nyu ntsha lulangu la [Nzambi], ku nyu nyayulungula daka diakandanyulaki.” (Heberu 10:36) Etetemalelo kekɔ ohomba nɛ dia kambɛ Nzambi koka monga dikambo dia wolo efula.
2 Lɔsɛnɔ laki Abarahama shikikɛka dikambo sɔ mɛtɛ. Mbala efula nde akahombaka sala ɛsɔnwɛlɔ wa wolo ndo akahomanaka l’akambo wakokiyanyaka efula. Akambo asɔ wakatatɛ lam’akawawodjangɛ dia monɔ oma l’osomba wa Ura lɛnɛ akinde la lɔsɛnɔ la dimɛna efula. Kombeta edja, nde akayodiɛnɛka la ndjala, la lohetsho l’oma le asukanyi ande, akonge suke la nshisha wadiɛnde, akahetshama oma le ewotɔ ande ɛmɔtshi, ndo aki la shɔkɔ y’oma l’awui wa ta. Ehemba wa weke efula waki la ntondo kande. Koko Abarahama kompekɔ ndoko lushi dia sala kɛnɛ kele ɔlɔlɔ. Ɔsɔ ekɔ dikambo dia diambo efula naka wɛ kanyiya dia l’etena kɛsɔ nde komonga l’otondo w’Ɔtɛkɛta wa Nzambi tshɛ oko weso la wɔ ɛlɔ kɛnɛ. Koko, aha la tamu nde akeyaka prɔfɛsiya ka ntondo kakate Nzambi ate: “Dimi layudja luhetshu l’asaye la umuntu, ndu l’asa [lɔtɔngɔ l]aye la [lɔtɔngɔ l]andi.” (Etatelu 3:15) Lam’ele oma le nde mbakahombe tomba Lɔtɔngɔ la womoto, lâsɔ mbokɛmaka hwe dia Satana akahombe sɔmana l’Abarahama la lohetsho. Aha la tamu, ewo ka dikambo sɔ kakakimanyiya Abarahama dia nde mbikikɛ ehemba wakokomɛ l’ɔngɛnɔngɛnɔ tshɛ.
3. (a) Lande na kahomba ekambi waki Jehowa wa nshi nyɛ nongamɛ asui na? (b) Ekeketshelo kakɔna katosha Ngalatiya 6:9?
3 Ɛlɔ kɛnɛ, ekambi waki Jehowa pombaka vɔ lawɔ nongamɛ asui. (1 Petero 1:6, 7) Diakɔ diatewola Enyelo 12:17 ɔnɛ Satana ekɔ lo ‘ndɔsha’ atshikadi w’akitami w’esɔ. “Ekoko ekina” wekɔ lo ndɔshama woho akɔ wâmɛ oma le Satana nɛ dia vɔ wekɔ lo kamba kâmɛ l’akitami w’esɔ. (Joani 10:16) Lâdiko w’ɔlɔshamelo wakoka Akristo pomana lawɔ l’olimu awɔ wa lo sɛkɛ, vɔ kokaka nto pomana l’ekakatanu wa wolo lo nsɛnɔ yawɔ hita. Paulo tolakaka ate: “Tatuhekoki dia ntsha ditshelu di’ololo, ne dia tayuna lu eleku ka muna, naka hatuheko.” (Ngalatiya 6:9) Eelo, kânga mbayanga Satana woho wa ndanya mbetawɔ kaso, sho pombaka shika tanga dia ndɔshana la nde lo monga nge lo mbetawɔ. (1 Petero 5:8, 9) Kakɔna kakoka tomba oma lo kɔlamelo yaso na? Jakoba 1:2, 3 nembetshiyaka ate: “Anyami, nyali ongenongeno tshe lam’ayunyutana wehu efula w’ehimba; nyeyi nyati: Ehimbelu ka mbetawo kanyu katutungaka etetemalu.”
Ɔlɔshamelo wɛnama la washo nganɛ
4. Ngande wakakambe Satana l’ɔlɔshamelo wɛnama la washo nganɛ dia ndanya kɔlamelo y’ekambi waki Nzambi?
4 Lɔsɛnɔ laki Abarahama mɛnyaka mɛtɛ ‘ehemba wotshikitanyi’ wakoka Okristo pomana lawɔ ɛlɔ kɛnɛ. Ɛnyɛlɔ, nde akahombe ndɔshana l’andɔshi wakaye oma la Shinarɛ. (Etatelu 14:11-16) Kema dikambo dia diambo dia mɛna dia Satana ekɔ lo tetemala la kamba l’ɔlɔshamelo wɛnama la washo nganɛ, ɛnyɛlɔ oma lo tshimbo y’ɛhɛnyɔhɛnyɔ. Tatɛ oma l’ekomelo ka Ta dia Hende dia l’Andja w’Otondo, ewandji wa wedja efula wakashimbe olimu wa wetshelo w’Akristo wakamba Ɛmɛnyi wa Jehowa. Annuaire des Témoins de Jéhovah 2001 mɛnyaka awui wa ngala wakahombe mbikikɛ Akristo wa lo wodja w’Angola oma l’anya w’atunyi. Lo ndjaɛkɛ le Jehowa, anangɛso wa lo wedja ɛsɔ wakatone la wolo tshɛ dia tshika olimu awɔ. Vɔ kosala akambo la ngala kana l’ɔtɔmbɔkwɛlɔ, koko wakatetemala l’olimu w’esambishelo lo woshɛshɛ.—Mateu 24:14.
5. Ngande wokoki ɛlɔngɔlɔngɔ w’Akristo diɛnɛ l’ɛhɛnyɔhɛnyɔ la kalasa?
5 Koko, aha awui wa ngala ato mbatonga ɛhɛnyɔhɛnyɔ. L’ɔkɔngɔ diko, Abarahama akayonga la diɛsɛ dia mbota ana ahende: Ishamɛlɛ nde la Isaka. Etatelu 21:8-12 totɛka dia, osangɔ ɔmɔtshi Ishamɛlɛ akasale ‘shɛkɛsɛkɛ’ nde la Isaka. Lo mukanda wakandafundɛ ase Ngalatiya, Paulo mɛnyaka dia dikambo sɔ komonga tsho oko tɔkɛnyɔ tatɔkɛnyaka ana w’akɛnda, nɛ dia nde mbutaka ɔnɛ Ishamɛlɛ akahɛnyahɛnyaka Isaka. (Ngalatiya 4:29) Ɔnkɔnɛ, lɔsɔkɔ l’oma le asekaso wa la kalasa ndo ɛtɛkɛta wa kɔlɔ w’oma le atunyi aso koka mɛtɛ mbelamɛ ɔnɛ ɛhɛnyɔhɛnyɔ. Ɔlɔngɔlɔngɔ ɔmɔtshi w’Okristo welɛwɔ Ryan mbohɔka woho wakandadiɛnɛ oma le asekande wa la kalasa ate: “Minitɛ 15 yakatɔsaka mutuka lo tshɔ ndo lo kalola oma la kalasa akɛnamaka oko wenya wa ntango efula nɛ dia lakadiɛnɛka l’ɛtɛkɛta wa kɔlɔ efula. Vɔ wakatshumbaka dja lo demba lo mbokakami towolowolo tɔmɔtshi takawaloloyaka lo dja.” Lande na kakawɔhɛnyahɛnya ngasɔ na? Nde ate: “Wetshelo wakamakondja oma lo tshimbo y’ɔlɔngɔswamelo waki Nzambi akatshikitanyaka l’ɛlɔngɔlɔngɔ ekina wa la kalasa.” Koko, l’ekimanyielo k’ambutshi ande, Ryan akonge l’akoka wa mbikikɛ la kɔlamelo tshɛ. Ɛlɔngɔlɔngɔ le, onde ɛtɛkɛta wa kɔlɔ kana tɛngɔ y’oma le asekanyu nyɔkɔmɔlaka etema? Naka ɔsɔku, kete tanyohekɔke! Naka nyu mbikikɛ la kɔlamelo tshɛ, kete nyayɛna ekotshamelo k’ɛtɛkɛta waki Yeso wata ɔnɛ: “Lam’ayuwunyotenga, lam’ayuwunyusuya, lam’ayuwunyumamanyia wehu tshe w’akambu wa kolo dia dikambu diami, nyeko la otshoko.”—Mateu 5:11.
Ekiyanu wa lushi la lushi
6. Akambo akɔna wakoka fukutanya diɔtɔnganelo diele lam’asaso l’asekaso Akristo ɛlɔ kɛnɛ?
6 Efula k’ehemba wahomana laso ɛlɔ kɛnɛ ndja oma l’ekiyanu woki laso ngelo. Abarama ndamɛ akahombaka mbikikɛ ekakatanu wakonge lam’asa ekambi ande vɔ l’ekambi waki Lɔta l’ɔnaki diɛwɔ di’ɔnango. (Etatelu 13:5-7) Popo nd’ɛlɔ kɛnɛ, ewanu waya oma l’oyango wa dihole dia lâdiko ndo yema ya kandjema kokaka nanya diɔtɔnganelo diele lam’asaso ndo fukutanya ki ka l’etshumanelo. “Ne dia lam’eli kandjema la tamu, laawo keli ufutanu la akambu wa kolo tshe.” (Jakoba 3:16) Ekɔ mɛtɛ ohomba efula di’aha sho mpekɔ ndo dia mbetsha wɔladi la ntondo ka lotamanya oko wakasale Abarahama ndo nyanga wahɔ w’anto akina.—1 Koreto 13:5; Jakoba 3:17.
7. (a) Ahomba onto sala naka kɛnɛ kakosale osekande Okristo akawosha pâ l’asolo? (b) Ngande wakasha Abarahama ɛnyɛlɔ k’ɔlɔlɔ lo kɛnɛ kendana la nama diɔtɔnganelo dia dimɛna nde l’anto akina?
7 Koka monga wolo dia monga la wɔladi etena kɛnaso dia tambɛngiyama oma le osekaso ombetawudi. Tukedi 12:18 mbutaka ɔnɛ: ‘Ekɔ onto ɔmɔtshi latotondjaka ɛtɛkɛta wa wotata watuhumuyaka oko yɔmbɔ.’ Ɛtɛkɛta wa wotata, oyadi kânga vɔ hawotami la kanyi ya kɔlɔ, vɔ koka mbisha onto pâ efula l’asolo. Pâ kɛsɔ mongaka efula naka tambɛna di’oko wakatomamatanye dikambo kana wakatɛkɛtshi kɔlɔ lo dikambo diaso. (Osambu 6:6, 7) Koko, Okristo hakoke mbetawɔ dia tokanyi tɔsɔ tawosha pâ l’asolo mbohekoya! Naka dikambo dia ngasɔ diambokokomɛ, kete ɔsa yɛdikɔ ya nɔngɔsɔla dikambo sɔ lo tshɔ dia tɔtɛkɛta la lotutsha tshɛ wɛ l’onto lakakosale munga. (Mateu 5:23, 24; Efeso 4:26) Sala tshɛ dia kimwɛ onto ɔsɔ. (Kolosayi 3:13) Naka sho mbewɔ dia mombɛ onto kumbɛkumbɛ, kete tayoshidiya pâ kele laso l’asolo ndo tayɔlɔngɔsɔla diɔtɔnganelo diasaso l’ɔnangɛso. Abarahama komombɛ Lɔta ndoko kumbɛkumbɛ ɔtɔi. Diɔ diakɔ, diakatshu Abarahama esadi eto dia tokokɛ Lɔta nde la nkumbo kande!—Etatelu 14:12-16.
Ehemba wayayangɛso shamɛ
8. (a) Ngande wakoka Akristo ‘ndjatshatsha vamɛ la nyangu ya wolo efula’? (b) Lande na kakakoke Abarahama monga la wɛdimo lo dikambo dia lomombo la l’emunyi?
8 Aha la tamu, shamɛ ndjadjaka l’ehemba ɛmɔtshi. Ɛnyɛlɔ, Yeso akadjangɛ ambeki ande ate: “Tanyuyaumbelaki diango la kete, lene ukuki tumumbu la matadi dilanya, lene ukuki evi mbula mvudu la diva.” (Mateu 6:19) Koko, anangɛso amɔtshi ‘ndjatshatshaka la nyangu ya wolo efula’ lo mbetsha wahɔ wa lomombo la l’emunyi la ntondo ka wahɔ wa Diolelo. (1 Timote 6:9, 10) Abarahama aketawɔ dia ndjahombia lomombo la l’emunyi dia nde ngɛnyangɛnya Nzambi. “Dia mbetawo, mbakandayala ongendangenda lu kete yakawûlaki, uku lu kete yaha yandi, akadjaseka lu tumbu, kame la Isaka la Jakoba, ekito waki la ndi lu daka diame. Ne dia ndi akalungamelaka usumba weli la tshina dia wulu, [Nzambi] keli umbiki la olongosodi awo.” (Heberu 11: 9, 10) Mbetawɔ kaki l’Abarahama l’“osomba” wa lo nshi yayaye, kana l’ɛlɔmbwɛlɔ kaki Nzambi, akokimanyiya di’aha nde mbɛkɛ otema l’ɛngɔnyi wa l’emunyi. Kema ayonga dui dia lomba dia sho sala woho akɔ wamɛ?
9, 10. (a) Ngande wokoki nsaki ka lokumu ntela ɛhɛnyɔhɛnyɔ? (b) Ngande wakoka ɔnangɛso kɛndakɛnda ɛlɔ kɛnɛ oko ‘onto lele l’ɛse’ k’anto akina?
9 Tɔsɛdingole dikambo dikina. Bible toshaka dako di’ohomba efula ɔnɛ: “Naka untu ambuyakanela ati: Untu a wuki kemi, lam’endi untu k’untu, ndi ambuyadimbiya.” (Ngalatiya 6:3) Ndo nto, vɔ tolakaka ɔnɛ “tanyutshaki dikambu la utshanu kana la ndjatumbula, keli la ndjakitshakitsha ka yimba.” (Filipi 2:3) Amɔtshi ndjayangɛka ehemba etena katonawɔ dia kotsha dako sɔ. Lam’ele vɔ kotwamaka la nsaki ka monga la lokumu lo dihole dia kombola sala ‘olimu w’ɔlɔlɔ,’ vɔ ndjɔkɔmɔka otema ndo ndjoshishaka ɔngɛnɔngɛnɔ awɔ etena kɛnawɔ dia hawolongola waɛsɛ amɔtshi l’etshumanelo.—1 Timote 3:1.
10 Abarahama akatotshikɛ ɛnyɛlɔ ka dimɛna efula lo woho wakinde ‘kotamanya ndjakana.’ (Romo 12:3) Lam’akandahomana la Mɛlɛkizɛdɛkɛ, Abarahama kosala akambo watekana oko nde mamboleka tshɛ l’ɔtɛ wa dihole dia nɛmɔ diaki lande lo washo wa Nzambi. Koko, nde aketawɔ dihole dia lâdiko diaki la Mɛlɛkizɛdɛkɛ oko ɔlɔmbɛdi, lo mbosha etenyi ka dikumi. (Heberu 7:4-7) Ɛlɔ kɛnɛ, Akristo vɔ lawɔ pombaka kɛndakɛnda woho akɔ wâmɛ lo ndjaɔsa oko ‘anto wele l’ɛse’ ndo lo mbewɔ dia kotola yambalo y’anto oya lewɔ. (Luka 9:48) Naka wɛ mɛnaka dia wanɛ walɔmbɔla etshumanelo tonaka dia kosha waɛsɛ amɔtshi, kete yasɛdingola ɔlɔlɔ dia mbeya etshikitanu akɔna wakokayɛ sala lo kɛnɛ kendana la lonto layɛ kana la yoho yayɛ ya sala akambo. Lo dihole dia ndjakiyanya efula l’ɔtɛ w’ɛkɛndɛ weyɛ bu lawɔ, ngɛnangɛna efula la diɛsɛ diele layɛ, diɛsɛ diakɔ ko kimanyiya anto akina dia vɔ mbeya Jehowa. Eelo, “nyuyakitshakitsha la tshina dia lunya la wulu la [Nzambi], dia ndi nyumbiya lam’ayukuka etena kanyu.”—1 Petero 5:6.
Mbetawɔ lo akambo wahɛnama
11, 12. (a) Lande na kakoka ase etshumanelo amɔtshi tshika dia sala akambo la shamanya? (b) Ngande wakasha Abarahama ɛnyɛlɔ k’ɔlɔlɔ lo monga la mbetawɔ lɔsɛnɔ lande l’otondo l’alaka waki Nzambi?
11 Ohemba okina mbeyaka monga woho wɛnama di’oko ekomelo ka dikongɛ di’akambo dia kɔlɔ nɛ kekɔ lo tshimbatshimba. Lo ndjela 2 Petero 3:12, Akristo pombaka ‘kongɛka ndo namaka oyelo wa lushi laki Jehowa lo timba tawɔ.’ Koko, efula wambokongɛ “lushi” lɔsɔ ɛnɔnyi efula ndo akina ɛnɔnyi akumi. Kɛsɔ mbeyaka ndjɔkɔmɔla amɔtshi etema ndo ndjatshutshuya di’aha sala akambo la shamanya.
12 Tɔsɛdingole nto ɛnyɛlɔ kaki Abarahama. Lo lɔsɛnɔ lande l’otondo, nde aki la mbetawɔ l’alaka waki Nzambi kânga mbakinde kokoka mɛna ekotshamelo k’alaka asɔ tshɛ lo nshi yakinde la lɔsɛnɔ. Mɛtɛ, nde akasɛnɛ etena k’otale kakokimanyiya dia mɛna woho wakole Isaka w’ɔnande. Koko, akahombe mbeta nkama y’ɛnɔnyi la ntondo ka lɔtɔngɔ laki Abarahama ndjokoma oko “toto ta l’ulungu” kana oko “seke ya lokongo, yatuyalaka l’umamu w’ashi.” (Etatelu 22:17) Koko, Abarahama kondjakiyanya kana kɔmɔ otema. Diakɔ diakate ɔpɔstɔlɔ Paulo lo dikambo diaki Abarahama ndo di’ewandji ekina wa nkumbo ate: “Wane tshe wakavu lu mbetawo la ntundu watalungula alaka, keli vo wakawaenyi uma l’etali, wakâlemia; waketawo vati: Antu wa kana la angendangenda mbesu la kete nye.”—Heberu 11:13.
13. (a) Ngande wele ɛlɔ kɛnɛ Akristo wekɔ oko “angendangenda”? (b) Lande na kayela Jehowa ekomelo ka dikongɛ di’akambo nɛ?
13 Naka Abarahama akakoke mbɛkɛ lɔsɛnɔ lande l’otondo lo ekotshamelo k’alaka ‘wakawɛnyi oma l’etale,’ kete hoke sho, wanɛ wele ɛlɔ kɛnɛ ekotshamelo k’alaka akɔ kaya ka nsuke! L’ɛnyɛlɔ kaki Abarahama, sho pombaka ndjaɔsa oko “angendangenda” l’andja ɔnɛ waki Satana, lo tona nsɛna yoho ya lɔsɛnɔ ya lokaki. Lo mɛtɛ, sho pombaka kombola dia “ekumelu k’akambu tshe” salema kakianɛ koko aha tɔ mongaka tsho suke. (1 Petero 4:7) Ondo tekɔ lo sowa la hemɔ mɔtshi. Kana mbeyaka monga ko ekakatanu wendana l’ekondjelo wekɔ lo tɛnya pâ. Ɔnkɔnɛ, sho pombaka mbohɔ ɔnɛ Jehowa ayanga mbela ekomelo, aha paka dia totshungola oma lo pâ shɔ tsho, koko ndo dia kidia lokombo lande l’ekila. (Ezekiyele 36:23; Mateu 6:9, 10) Ekomelo kayoya, aha l’etena kɛnaso ɔlɔlɔ dia tɔ ndja, koko l’etena kayɛna Jehowa ɔlɔlɔ dia kotsha asangwelo ande.
14. Ngande wakondjaso wahɔ oma lo memakana kaki Nzambi ɛlɔ kɛnɛ?
14 Tohɔ nto dia “[Jehowa] huhela dia nshidiya alaka andi, uku atedikaka antu wauhu awo, keli ndi eko la nyu memakana. Ndi halangi nduku omotshi nshisho, keli ndi nangaka tshe wakadimuli etema.” (2 Petero 3:9) Nyolembete dia Nzambi ‘ekɔ la nyu memakana,’ nyu anto wa l’etshumanelo k’Akristo. Ondo amɔtshi wa l’atei aso wekɔ l’ohomba w’etena k’otale dia sala etshikitanu woho wa “ntanema la ki, aha la vadi, aha la unungu lu ashu andi.” (2 Petero 3:14) Onde lâsɔ hatohombe monga la lowando lo woho wɛnya Nzambi memakana kɛsɔ?
Woho wakokaso tana ɔngɛnɔngɛnɔ l’atei w’ekakatanu
15. Lande na kakakoke Yeso nama ɔngɛnɔngɛnɔ ande l’atei w’ehemba, ndo ngande wakondja Akristo wahɔ ɛlɔ kɛnɛ lo mbôkoya?
15 Lɔsɛnɔ laki Abarahama mbetshaka Akristo wa nshi nyɛ akambo efula. Nde akɛnya aha paka mbetawɔ keto, koko ndo memakana, lomba, dihonga ndo ngandji kaha la lokaki. Nde aketsha ɔtɛmwɛlɔ waki Nzambi lo dihole dia ntondo lo lɔsɛnɔ lande. Ndo hatohombe mbohɛ dia, ɛnyɛlɔ koleki tshɛ kahombaso mbokoya ele ɛnyɛlɔ kakatotshikɛ Yeso Kristo. Nde lawɔ akadiɛnɛ l’ehemba ndo l’ɛhɛnyɔhɛnyɔ efula, koko nde koshisha ɔngɛnɔngɛnɔ ande l’atei w’akambo asɔ tshɛ. Lande na? Nɛ dia nde akashikikɛ yimba yande l’elongamelo kaki la ntondo. (Heberu 12:2, 3) Diakɔ diakalɔmbɛ Paulo ate: “[Nzambi k]’etetemalu ndu [k]’ekikitshelu anyukimanyia dia nyu mbukana l’utema otoi lu yediko ya Kristu Jesu.” (Romo 15:5) Naka sho monga la dionga di’ɔlɔlɔ, kete sho koka monga l’ɔngɛnɔngɛnɔ kânga l’atei w’ekakatanu wakoka Satana mbidja la ntondo kaso.
16. Kakɔna kakokaso sala etena kɛnaso di’ekakatanu aso wamboleka wolo?
16 Etena kɛnaso di’ekakatanu wamboleka wolo, tohɔ dia Jehowa tolangaka woho wakandalangaka Abarahama. Nde nangaka dia sho ntondoya. (Filipi 1:6) Toyaɛkɛ tshɛ le Jehowa l’eshikikelo ɔnɛ “ndi hetawo dia [sho] mpimbama uleki wulu a[s]u. Keli lam’ayuya ehimba, ndi ayu[t]utshela mbuka ka [sho] mpanda dia [sho] ndjala la wulu wa nshikikala.” (1 Koreto 10:13) Tonge la mbekelo ka mbadiaka Ɔtɛkɛta waki Nzambi lushi la lushi. (Osambu 1:2) Totetemalake lo dɔmbɛlɔ ndo tɔlɔmbake Jehowa dia nde tokimanyiya di’aha sho mpekɔ. (Filipi 4:6) Nde ‘ayosha nyuma k’ekila le wanɛ watɔlɔmbaka.’ (Luka 11:13) Tokondja wahɔ oma lo kɛnɛ katosha Jehowa dia tosukɛ lo nyuma ɛnyɛlɔ oko ekanda aso walembitshiya awui wa lo Bible. Ndo nto, toyange ekimanyielo k’anangɛso. (1 Petero 2:17) Ɔtɔka lo nsanganya y’Akristo esangɔ tshɛ, nɛ dia lɛkɔ mbayotokondja ekeketshelo kele laso ohomba dia tetemala. (Heberu 10:24, 25) Tɔngɛnɛngɛnɛ lo woho wayashikikɛso ɔnɛ etete kaso ayotokonya lo eongelo k’anto wambetawɔma lo washo waki Nzambi ndo ɔnɛ kɔlamelo yaso ngɛnyangɛnyaka otema ande!—Tukedi 27:11; Romo 5:3-5.
17. Lande na kahahombe Akristo nshisha elongamelo?
17 Abarahama akalangema oma le Nzambi oko “ongenyi” ande. (Jakoba 2:23) Kânga mbakidiɔ ɔsɔku, lɔsɛnɔ laki Abarahama lakalole l’ehemba ndo l’ɛhɛnyɔhɛnyɔ wa wolo. Ɔnkɔnɛ, Akristo vɔ lawɔ koka nongamɛ ekakatanu wa woho akɔ wamɛ lo “nshi y’ekumelu” nyɛ ya kɔlɔ. Koko, Bible tewolaka ɔnɛ: “antu wa kolo la akanga a lukesu wayuhama lu akambu awo wa kolo; vo wayukesana, ku wayukesama.” (2 Timote 3:1, 13) Lo dihole dia sho nshisha elongamelo, teye dia ekakatanu wele laso ɛnɛ mɛnyaka di’ekomelo ka dikongɛ nɛ di’akambo diaki Satana kambosukana. Koko Yeso toholaka ate: “one latetemala edja ndu l’ekumelu, ayushimbamela.” (Mateu 24:13) Ɔnkɔnɛ, ‘tatohekɔke dia sala kɛnɛ kele ɔlɔlɔ!’ Tokoya Abarahama, ndo tonge l’atei wa wanɛ “wambukita alaka ne dia mbetawo la etetemalu kawo.”—Heberu 6:12.
Onde wɛ akalembete?
• Lande na kahomba ekambi waki Jehowa nongamɛ ehemba ndo asui ɛlɔ kɛnɛ?
• Lo weho akɔna wakamba Satana l’ɛlɔshamelo wɛnama la washo nganɛ?
• Ngande wakoka kandɔma ewanu wa l’atei w’Akristo wendana l’oyangelo w’ahole wa lâdiko?
• Ngande wakoka lotamanya ndo yimba ya ndeka ndjakana mbela onto ehemba?
• Lo yoho yakɔna yakatshike Abarahama ɛnyɛlɔ k’ɔlɔlɔ lo kongɛ ekotshamelo k’alaka waki Nzambi?
[Osato wa lo lɛkɛ 18]
Ɛlɔngɔlɔngɔ l’esekaseka w’Akristo efula diɛnɛka l’ɛhɛnyɔhɛnyɔ ndo sɔkamaka oma le asekawɔ
[Osato wa lo lɛkɛ 21]
Lo nshi y’Abarahama, ekotshamelo k’alaka waki Nzambi kaki ‘etale efula,’ koko nde akɛkɛ lɔsɛnɔ lande l’otondo l’alaka akɔ