Kotsha omamemelo le Nzambi lâdiko dia ekikelo kayɛ
‘Lâdiko dia mbetawɔ kanyu, . . . nyokotsha ekikelo, lâdiko dia ekikelo nyokotsha omamemelo le Nzambi.’—2 PETERO 1:5, 6.
1, 2. (a) Woho akɔna w’ohamelo walongamɛwɔ le ɔna? (b) Naa ohomba wele l’ohamelo wa lo nyuma?
OHAMELO ekɔ ohomba efula le ɔna, koko aha ohamelo wa lo demba oto mbalongamɛwɔ le nde. Ohamelo wa lo yimba ndo wa l’asolo wekɔ nto ohomba. L’edjedja ka wonya, ɔna ndjotshikaka akambo watosalaka ɔna dikɛnda ko sala akambo watosalaka onto lambotshunda. Ɔpɔstɔlɔ Paulo akafunde lo dikambo sɔ ate: “Lam’akimi dikenda, dimi lakateketaka uku dikenda, lakukaka uku dikenda, lakakanaka uku dikenda. Kakiane, dimi lambuyala ekumanyi, lambukimo akambu wa dikenda.”—1 Koreto 13:11.
2 Ɛtɛkɛta waki Paulo ɛsɔ mɛnyaka ohomba wa mpama lo nyuma. Akristo pombaka mpama lo nyuma ndo tshika dia monga oko ana w’ashashi lo nyuma ko koma ‘epalanga lo eokelo k’akambo.’ (1 Koreto 14:20) Vɔ pombaka sala la wolo ndo nyanga dia koma “lu yediko ya diema y’elulelu ka Kristu.” Ngasɔ mbahawatoyala nto oko ‘akɛnda, wasutshasutshama la mpɛpɛ ya weho tshɛ wa wetshelo.’—Efeso 4:13, 14.
3, 4. (a) Kakɔna kahombaso sala dia sho koma anto wambotshunda lo nyuma? (b) Waonga akɔna wangɛnyangɛnya Nzambi wahombaso kɛnɛmɔla ndo naa ohomba wa waonga akɔ?
3 Ngande wakokaso ntshunda lo nyuma? Kânga mbele ohamelo wa lo demba salemaka vamɛ lo ndjela lofulo la nshi yatasɛnɛ onto, ohamelo wa lo nyuma nɔmbaka di’onto mbidja welo. Ohamelo wa lo nyuma tatɛka etena kakondja onto ewo k’oshika k’Ɔtɛkɛta wa Nzambi ndo kɔtɔnganyiyande etsha ande la kɛnɛ kekande. (Heberu 5:14; 2 Petero 1:3) Kɛsɔ mbokimanyiyaka dia kɛnɛmɔla waonga wangɛnyangɛnya Nzambi. Oko wahama tenyi dia demba kâmɛ, mbele ndo dionga dimɔtshi di’ɔlɔlɔ mpamaka kâmɛ la waonga akina wangɛnyangɛnya Nzambi. Ɔpɔstɔlɔ Petero akafunde ate: ‘Lo ndjatshutshuya l’otema ɔtɔi, nyokotsha lɔkɛwɔ l’ɔlɔlɔ lâdiko dia mbetawɔ kanyu, lâdiko dia lɔkɛwɔ lanyu l’ɔlɔlɔ, ewo, lâdiko di’ewo, ndjâkimɛ, lâdiko dia ndjâkimɛ, ekikelo, lâdiko di’ekikelo, omamemelo le Nzambi, lâdiko di’omamemelo le Nzambi lolango l’onto l’ɔnango, lâdiko dia lolango l’onto l’ɔnango nyokotsha ngandji.’—2 Petero 1:5-7.
4 Dionga tshɛ di’oshidi Petero lanɛ diekɔ ohomba efula ndo ndoko dionga diahombaso minya yimba. Nde akate nto ate: “Naka akambu ane wambuhama lu etema anyu, vo hawunyete tusuasua kana uku antu wahato elua dia nimbitela Khumesu Jesu Kristu.” (2 Petero 1:8) Nyɛsɔ kakianɛ tokotole yambalo yaso l’ohomba wa kotsha omamemelo le Nzambi lâdiko dia ekikelo kaso.
Ohomba w’ekikelo
5. Bonde keso l’ohomba w’ekikelo?
5 Petero nde la Paulo, wakakakatanya omamemelo le Nzambi la ekikelo. (1 Timote 6:11) Mbikikɛ halembetshiya tsho monga la wolo ndo tshikala nge lo tena dia wolo, koko, ekikelo nembetshiyaka nto monga la solo dia lotutsha, la dihonga, ndo tshikala nge aha la shisha elongamelo etena keso la ntondo k’ekakatanu, ka wekamu, k’ehemba ndo k’ɛhɛnyɔhɛnyɔ. Oko wasɛnaso ‘lo omamemelo le Nzambi oma lo diɔtɔnganelo diele lam’asaso la Yeso Kristo,’ sho nongamɛka dia tayɔhɛnyahɛnyama. (2 Timote 3:12) Sho pombaka mbikikɛ naka talanga mɛnya ngandji kokaso Jehowa ndo kɛnɛmɔla waonga wele ohomba dia kondja panda. (Romo 5:3-5; 2 Timote 4:7, 8; Jakoba 1:3, 4, 12) Naka hatokike, kete hatotokondja lɔsɛnɔ la pondjo.—Romo 2:6, 7; Heberu 10:36.
6. Mbikikɛ polo l’ekomelo nembetshiyaka sala dikambo diakɔna?
6 Oyadi takatatɛ lɔsɛnɔ laso l’Okristo dimɛna, ekikelo mbele dikambo dioleki ohomba. Yeso akate ate: “Keli one latetemala edja ndu l’ekumelu, ayushimbamela.” (Mateu 24:13) Eelo, sho pombaka mbikikɛ polo l’ekomelo, oyadi ekomelo ka lɔsɛnɔ laso, kana ekomelo k’andja wa kɔlɔ ɔnɛ. Ndo nto, sho pombaka nama kɔlamelo yaso otsha le Nzambi. Ɔnkɔnɛ, naka hatomamemi Nzambi lâdiko di’ekikelo kaso, kete hatotokoka ngɛnyangɛnya Jehowa ndo hatotokondja lɔsɛnɔ la pondjo. Ko, mamema Nzambi kɛdikɛdi na?
Kɛnɛ kalembetshiya mamema Nzambi
7. Mamema Nzambi kɛdikɛdi na ndo dikambo sɔ totshutshuyaka dia sala na?
7 Kitshimudi ya ntondo yasha Bible lo kɛnɛ kendana l’omamemelo le Nzambi, ele monga la wɔma wɔsɔhanyi la dilɛmiɛlɔ, tɛmɔla ndo kambɛ Jehowa Nzambi l’ɔtɛ wa kɔlamelo yele laso otsha lo lowandji lande la l’andja w’otondo. Dia sho mamema Jehowa, sho pombaka monga l’ewo ka mɛtɛ kendana la nde ndo la mboka yande. Sho pombaka kombola mbeya Nzambi dimɛna. Kɛsɔ mbayototshutshuya dia mbomamema l’otema ɔtɔi, ndo tayɛnya dikambo sɔ oma l’etsha ndo lo yoho yaso ya lɔsɛnɔ. Sho pombaka kombola monga oko Jehowa lo yɛdikɔ yɛdimi l’akoka aso, mbut’ate ndjela mboka yande ndo kɛnɛmɔla waonga ndo lonto lande. (Efeso 5:1) Omamemelo le Nzambi totshutshuyaka dia sho ngɛnyangɛnya Nzambi l’akambo tshɛ wasalaso.—1 Koreto 10:31.
8. Ngande wokakatanyi omamemelo le Nzambi la ndjakimɔ kaso le nde?
8 Dia sho mamema Nzambi lo mɛtɛ, sho pombaka tɛmɔla paka Jehowa ndamɛ oto, aha la mbetawɔ di’ɛngɔ kekina mbɔsa dihole diele lande l’atei w’etema aso. Oko wende Otungi aso, nde ekɔ la lotshungɔ la tɔlɔmba dia sho mbolanga ndo mbokambɛ lâdiko di’oseka ɛngɔ kana onto okina tshɛ. (Euhwelu k’Elembe 4:24; Isaya 42:8) Koko, Jehowa hatɔlɔmbɛ la wolo dia sho mbɔtɛmɔla. Nde nangaka dia sho mbomamema la lolango laso shamɛ. Ngandji kokaso Nzambi koye oma l’ewo ka mɛtɛ kendana la nde mbatotshutshuya dia mbɛdia nsɛnɔ yaso ndo ndjakimɔ la tshondo yaso tshɛ le nde ndo sɛna lo yoho yɔtɔnɛ la ndjakimɔ kaso.
Tonge la diɔtɔnganelo di’ɔlɔlɔ lam’asaso la Nzambi
9, 10. Ngande wakokaso monga la diɔtɔnganelo di’ɔlɔlɔ sho la Nzambi ndo dilama?
9 L’ɔkɔngɔ wa sho mɛnya ndjakimɔ kaso le Nzambi lo batizama, sho pombaka monga la diɔtɔnganelo di’ɔlɔlɔ lam’asaso la nde. Woho wakombolaso dia sala dikambo sɔ ndo kambɛ Jehowa la kɔlamelo tshɛ totshutshuyaka dia tetemala la mbeka Ɔtɛkɛta ande ndo kanaka lawɔ yimba. Naka sho mbetawɔ dia nyuma kaki Nzambi nɔmbɔla timba ndo etema aso, kete ngandji kokaso Jehowa kayoleka fula. Diɔtɔnganelo diasaso la nde diayotetemala monga ɛngɔ koleki ohomba lo nsɛnɔ yaso. Tayɔsa Jehowa oko Ɔngɛnyi aso woleki dimɛna ndo wonya tshɛ tayoyangaka dia mbɔngɛnyangɛnya. (1 Joani 5:3) Ɔngɛnɔngɛnɔ wele laso l’ɔtɛ wa diɔtɔnganelo di’ɔlɔlɔ diele lam’asaso la Nzambi wayofula ndo tekɔ la lowando l’efula lo woho watetshande ndo watongolande la ngandji lɛnɛ eso l’ohomba wa dikambo sɔ.—Euhwelu k’Elembe 8:5.
10 Naka hatotetemadi sala la wolo dia keketsha diɔtɔnganelo di’oshinga wolo diele lam’asaso la Jehowa kete diɔ mbeyaka tɛwɔ. Naka dikambo sɔ diambotokomɛ, kete aha Nzambi mbele la munga nɛ dia, “ndi kema etali uma le untu la untu.” (Etsha 17:27) Tekɔ mɛtɛ l’ɔngɛnɔngɛnɔ lo woho wetawɔ Jehowa dia sho ndjasukanya oya le nde aha l’okakatanu! (1 Joani 5:14, 15) Eelo, sho pombaka sala la wolo dia nama diɔtɔnganelo di’ɔlɔlɔ lam’asaso la Jehowa. Koko, nde tokimanyiyaka dia sho ndjasukanya la nde lo tosha ekimanyielo keso l’ohomba dia mamema Nzambi ndo dia tetemala sala dikambo sɔ. (Jakoba 4:8) Ngande wakokaso kamba dimɛna l’ekimanyielo kɛsɔ koludi la ngandji na?
Tôngake nge lo nyuma
11. Naa akambo amɔtshi wɛnya omamemelo aso le Nzambi?
11 Ngandji k’efula kokaso Nzambi kayototshutshuya dia mɛnya woke woke w’omamemelo aso le nde lo yoho yɔtɔnɛ la dako diaki ɔpɔstɔlɔ Paulo diata ɔnɛ: “Utetemali dia ndjakimo le [Nzambi] uku untu lambuluwana, uku usi ulimu laha la dikambu dia mbutshama sonyi. Enya antu aui wa mete w’usimbwi atu.” (2 Timote 2:15) Dia sala dikambo sɔ, sho pombaka monga la mbekelo ka dimɛna ka mbadiaka Bible mbala la mbala, ka mbɔtɔka lo nsanganya, ndo ka sambishaka. Sho kokaka nto kakatana la Jehowa lo ‘mbɔlɔmbaka mbala la mbala.’ (1 Tesalonika 5:17) Ɔsɔ ekɔ akambo w’ohomba efula wɛnya omamemelo aso le Nzambi. Naka sho minya yimba lo dikambo dimɔtshi l’atei w’akambo asɔ, kete tayondama la hemɔ ka lo nyuma ndo hatoteya shika tanga la ntondo ka tɔsɛngiya taki Satana.—1 Petero 5:8.
12. Ngande wakokaso tondoya ehemba?
12 Tetemala monga nge ndo la wasaso lo nyuma tokimanyiyaka nto dia shika tanga la ntondo k’ehemba watokomɛ. Ehemba watokomɛ mbeyaka tohina wolo efula. Wendjodi, ɔlɔshamelo ndo ɔhɛnyɔhɛnyɔ mbeyaka monga wolo mbikikɛ, naka vɔ ndja oma le ewotɔ wa kasuke, oma l’angɛnyi, kana oma le asukanyi aso. Tɔsɛngiya ta kɔlɔ efula tatotshutshuya dia mɔnyɔla dietawɔ di’Okristo mbeyaka ndja oma lo dihole diakambaso olimu kana diɔtɔso kalasa. Lonyangu, hemɔ, ndo ɔkɔmwɛlɔ mbeyaka tɔlɛndja demba ko ɔlɔshanelo wa l’ehemba wa mbetawɔ mbeyaka ndjonga dikambo dia wolo. Koko sho koka tondoya weho w’ehemba tshɛ naka sho tetemala la monga l’‘etsha wa lɔkɛwɔ l’ekila ndo ntshaka akambo w’anto wamamema Nzambi, etena keso lo kongɛ wôngelo wa lushi la Jehowa ndo walilamaso nshi tshɛ lo timba.’ (2 Petero 3:11, 12) Ndo sho koka nama ɔngɛnɔngɛnɔ aso lo sala dikambo sɔ, l’eshikikelo ɔnɛ tayokondja ɛtshɔkɔ oma le Nzambi.—Tukedi 10:22.
13. Kakɔna kahombaso sala naka talanga tetemala la mamema Nzambi?
13 Koyanga mbele Satana sɔmaka wanɛ wamamema Nzambi, sho hatohombe mboka wɔma. Lande na? Nɛ dia ‘Jehowa mbeyaka woho wa shimbela anto w’omamema oma l’ehemba.’ (2 Petero 2:9) Dia sho mbeya mbikikɛ ehemba ndo kondja etshungwelo ka ngasɔ, sho pombaka, “ntuna akambu wa dionyo la saki y’akambo wa la kete, dia shu ndjala la nyumu ya ki, y’uluwanyi ndu [l’omamemelo le Nzambi] la kete nye.” (Tito 2:12) Oko weso Akristo, sho pombaka ndjalama dimɛna di’aha wɔdu ɔmɔtshi wendana la nsaki ya demba ndo elimu wa l’andja ɔnɛ toshimba dia sho mamema Nzambi. Nyɛsɔ tɔsɛdingole akambo amɔtshi wa kɔlɔ wakoka toshimba dia sho mamema Nzambi.
Tewɔ akambo wakoka toshimba dia mamema Nzambi
14. Kakɔna kahombaso mbohɔka naka toyanga tala lo djonga ya nsaki ka lomombo la l’emunyi?
14 Nsaki ka lomombo la l’emunyi ekɔ djonga mɔtshi le anto efula. Sho mbeyaka ndjâkesa lo ‘fɔnya ɔnɛ mamema Nzambi nembetshiyaka monga la lomombo la l’emunyi.’ Ndo sho mbeyaka ndjotshutshuyama dia minda okanda l’alemba w’ambetawudi wa anyaso. (1 Timote 6:5) Sho mbeyaka ndjokoma polo lo kanyiya ɔnɛ kema kɔlɔ bɛbiya ɔnangɛsɔ lele ɔngɔnyi dia nde tɔsɔndja falanga yeso ondo sho bu l’akoka wa ndjɔsɔmbɔla. (Osambu 37:21) Lo wedi okina, mamema Nzambi halembetshiya ndjâmɔtshɛ diangɔ dia l’emunyi, koko kokutɛ “daka dia lumu leli kakiane, ndu dia lumu layayi.” (1 Timote 4:8) Lam’ele “shu kundja nduku l’engo la kete nye, ku hateyi ntola nduku engo uma la kete,” toleke ndjashikikɛ dia tetemala ‘mamema Nzambi ndo ngɛnangɛna la kɛnɛ kele laso’ ndo tɔngɛnangɛnake la ‘diangɔ dia ndɛ ndo ahɔndɔ wa ndɔta wele laso.’—1 Timote 6:6-11.
15. Kakɔna kakokaso sala naka oyango w’ɛngɛnɔngɛnɔ oyanga nanya omamemelo aso le Nzambi?
15 Oyango w’ɛngɛnɔngɛnɔ koka ndanya omamemelo aso le Nzambi. Onde ekɔ ohomba sho sala etshikitanu ɛmɔtshi aha la tshimbatshimba lo dikambo sɔ? Ekɔ mɛtɛ dia sho kondjaka wahɔ ɛmɔtshi oma l’osutshesutshelo wa demba ndo oma lo tɔkɛnyɔ. Koko, wahɔ ɛsɔ wekɔ anyanya naka sho mbaɛdika la lɔsɛnɔ la pondjo. (1 Joani 2:25) Ɛlɔ kɛnɛ, anto efula wekɔ ‘anangi w’ɛngɛnɔngɛnɔ oleki Nzambi. Wekɔ l’efanelo k’anto wamamema Nzambi koko vɔ tonaka wolo ande,’ ɔnkɔnɛ sho pombaka mimɔ oma l’atei w’anto asɔ. (2 Timote 3:4, 5) Wanɛ wɔsa dia omamemelo le Nzambi ekɔ ohomba efula ‘wekɔ lo ndjatshumanyɛ okundji w’ɔlɔlɔ ndo wa shikaa dia nshi yokoya, woho wa vɔ mbeya kokutɛ lɔsɛnɔ la mɛtɛ.’—1 Timote 6:19.
16. Naa nsaki ya kɔlɔ yashimba anto amɔtshi dia mbɔtɔnganyiya nsɛnɔ yawɔ l’ɛlɛmbɛ wosembwe waki Nzambi, ndo ngande wakokaso nɛndja nsaki ya kɔlɔ shɔ?
16 Wodjwelo wa wanu ndo wa dinɔnɔ dia wolo, awui wa mindo, ndo nsaki ya kɔlɔ koka ndanya omamemelo aso le Nzambi. Ndjasha l’akambo asɔ mbeyaka ndjotoshimba dia mbɔtɔnganyiya lɔsɛnɔ laso l’ɛlɛmbɛ waki Nzambi wosembwe. (1 Koreto 6:9, 10; 2 Koreto 7:1) Kânga Paulo akahombe tetemala ndɔshana la nsaki ya demba dia pɛkato. (Romo 7:21-25) Pombaka mbɔsa tɛdikɔ ta wolo dia mbikasha nsaki ya kɔlɔ. Ɔnkɔnɛ, sho pombaka ndjashikikɛ dia tetemala monga la lɔkɛwɔ la pudipudi. Paulo totɛka dia sho: “[Ndjaka] akambu wa kolo wa la kete; munanyi, akambu wa mindu, saki ka dimba, lulangu la kolo, okomiya, weli otemwelo wa dikishi.” (Kolosai 3:5) Dia ndjaka tenyi diaso dia demba lo kɛnɛ kendana l’akambo wa kɔlɔ asɔ nɔmbaka dia sho mbɔsa yɛdikɔ ya minya kana tona akambo akɔ. Nɔmba Nzambi l’otema ɔtɔi ayotokimanyiya dia minya nsaki ya kɔlɔ ndo ndjela losembwe ndo tetemala mamema Nzambi l’atei w’andja wa kɔlɔ ɔnɛ.
17. Ngande wahombaso mbɔsa engwelo?
17 Ɔkɔmwɛlɔ w’otema mbeyaka tɛwɔla ekikelo kaso ndo monga la shɛngiya ya kɔlɔ l’omamemelo aso le Nzambi. Ɛmɛnyi wa Jehowa efula wakakɔmɔ otema. (Walelu 11:11-15; Ezera 4:4; Jona 4:3) Ɔkɔmwɛlɔ w’otema mbeyaka monga l’etombelo wa kɔlɔ le so djekoleko naka tambonga ndo la lonyangu lo kɛnɛ kototshe onto ɔmɔtshi ndo kana naka takakondja lohango kana engwelo kɛmɔtshi ka wolo. Koko, lohango ndo engwelo mɛnyaka dia Nzambi ndjakiyanyaka la ngandji tshɛ dikambo diaso. (Heberu 12:5-7, 10, 11) Sho la dia mbɔsa engwelo aha tsho oko dilanya koko oko ɛngɔ katetsha dia kɛndakɛnda lo mboka k’ɔlɔlɔ. Naka tekɔ la ndjakitshakitsha, kete tayɔngɛnangɛna ndo mbetawɔ alako, lo mbeya dia “luhangu l’ekiyelu eli mbuka ka lumu.” (Tukedi 6:23) Kɛsɔ mbeyaka tokimanyiya dia pama lo nyuma lo mamema Nzambi.
18. Ɔkɛndɛ akɔna wele laso lo kɛnɛ kendana la kɔlɔ yasalanɛso?
18 Ewanu kana kɔlɔ yasalanɛso koka mbidja omamemelo aso le Nzambi l’ohemba. Vɔ mbeyaka mbisha onto pâ l’asolo kana konya anto amɔtshi dia mbɔsa yɛdikɔ ya kɔlɔ ya ndjakakitola l’anangɛwɔ ndo l’akadiyɛwɔ wa lo nyuma. (Tukedi 18:1) Koko sho pombaka mbohɔka dia mombɛ onto kɛlɛ l’otema kana monga la lohetsho otsha le anto akina mbeyaka ndanya diɔtɔnganelo diasaso la Jehowa. (Akambo w’Ase Lewi 19:18) Ekɔ mɛtɛ dia, “untu lahalangi unyandi lenandi, ndi heyi nanga [Nzambi] lahandenyi.” (1 Joani 4:20) Lo dako diande dia lo dikona, Yeso akatɛtɛ l’ohomba wa sala esadi dia kandola ekakatanu watomba lam’asaso. Nde akatɛ ampokami ande ate: “Naka we eko lu nkimo ushasha aye l’ediakelu, ku we ambuho wati: Unyami eko la mi dikambu, kutshiki ushasha aye leko la ntundu k’ediakelu. Kutshu, kutashidisha dikambu diasaye la unyaye, kuyi, kuyukimo ushasha aye.” (Mateu 5:23, 24) Ɔlɔmbɛlɔ w’edimanyielo mbeyaka kɔnɔla mpota k’oma l’ɛtɛkɛta kana etsha wa kɔlɔ. Naka sho nɔmba edimanyielo ndo mbetawɔ dia takasalanɛ kɔlɔ, kete sho koka kandola okakatanu wakatombe ndo monga nto la diɔtɔnganelo di’ɔlɔlɔ. Yeso akasha nto alako akina lo woho wa kandola ekakatanu. (Mateu 18:15-17) Sho mongaka mɛtɛ l’ɔngɛnɔngɛnɔ naka welo wadjaso dia kandola ekakatanu wambotondja etombelo w’ɔlɔlɔ!—Romo 12:18; Efeso 4:26, 27.
Toyele ɛnyɛlɔ ka Yeso
19. Bonde kele ekɔ ohomba efula ndjela ɛnyɛlɔ ka Yeso?
19 Ehemba wayotokomɛka mɛtɛ, koko vɔ hawohombe t’ekola oma lo lowango latatalawɔ otsha lo lɔsɛnɔ la pondjo. Tohɔ dia Jehowa mbeyaka totshungola oma l’ehemba. Etena ‘kanyaso wetsho tshɛ’ ndo ‘kasakaso esakelo kaso ka lowango l’etete,’ ‘tendake Yeso lele Otatedi la Ondowanyi wa mbetawɔ kaso.’ (Heberu 12:1-3) Naka sho sɛdingola ɛnyɛlɔ ka Yeso dimɛna ndo sala la wolo dia mbôkoya l’ɛtɛkɛta ndo l’etsha, kete tayokimanyiyama dia mamema Nzambi ndo dia mɛnya omamemelo akɔ lo yɛdikɔ yoleki.
20. Difuto diakɔna diakondjaso lo mbikikɛ ndo lo mamema Nzambi?
20 Ekikelo ndo omamemelo le Nzambi tokimanyiyaka dia shikikɛ panda kaso. Lo monga la waonga w’amɛna asɔ, sho koka tetemala kambɛ Nzambi olimu w’ekila la kɔlamelo tshɛ. Kânga lam’eso l’ehemba, tayonga l’ɔngɛnɔngɛnɔ lam’ɛnaso ngandji ka mamba ka Jehowa ndo ɛtshɔkɔ watoshande l’ɔtɛ wakikɛso ndo womamemaso. (Jakoba 5:11) Ndo nto, Yeso ndamɛ akatoshikikɛ ɔnɛ: ‘Oma lo ekikelo kanyu mbayonyoshimbela anima anyu.’—Luka 21:19.
Ngande wayoyokadimola?
• Lande na kele ekikelo ekɔ ohomba?
• Mamema Nzambi kɛdikɛdi na, ndo ngande wɛnyaso dikambo sɔ?
• Ngande wakokaso monga ndo nama diɔtɔnganelo di’ɔlɔlɔ lam’asaso la Nzambi?
• Naa akambo amɔtshi wakoka ndanya omamemelo aso le Nzambi, ndo ngande wakokaso mbewɔ akambo akɔ?
[Esato wa lo lɛkɛ 8]
Mamema Nzambi mɛnyamaka lo toho totshikitanyi
[Esato wa lo lɛkɛ 10]
Tewɔ kɛnɛ kakoka nanya omamemelo aso le Nzambi