‘Nyotetemale La Ndjelami’
“Nyu nyaketama dia dikambu diako, ne dia Kristu akanyusuwela, akanyutshikela djimbitelu, dia nyu mbuyela lu wanya andi.”—1 PETERO 2:21.
1, 2. Lande na kele sho kokaka mbokoya ɛnyɛlɔ ka kokele ka lâdiko kaki Yeso kendana la wetshelo?
YESO KRISTO aki ombetsha wakaleke woke lanɛ la nkɛtɛ. Ndo nto, nde aki onto la kokele ndo laki kosala pɛkato ndoko lushi l’edja tshɛ kakandasɛnɛ lanɛ la nkɛtɛ. (1 Petero 2:22) Onde kɛsɔ nangaka mɛnya di’oko weso anto wele kema kokele, sho hatokokaki pondjo mbokoya ɛnyɛlɔ kaki Yeso ka lâdiko kendana la wetshelo? Ndoko.
2 Oko wakatadiɛnyi lo sawo dietshi, ngandji mbaki etshina ka wetshelo waki Yeso. Ngandji ekɔ dionga diakokaso sho tshɛ kɛnɛmɔla. Ɔtɛkɛta wa Nzambi tokeketshaka mbala efula dia sho pama ndo fudia ngandji kaso otsha le anto akina. (Filipi 1:9; Kolosai 3:14) Jehowa halɔmbɛ pondjo ditongami diande dia vɔ sala kɛnɛ kahawakoke sala. Ɔnkɔnɛ, lam’ele “[Nzambi] eli ngandji” ndo nde akatotonge l’efanelo kande, sho kokaka mbuta dia nde akatotonge la dikoka dia mboka anto ngandji. (1 Joani 4:8; Etatelu 1:27) Diakɔ diele lam’adiaso ɛtɛkɛta waki ɔpɔstɔlɔ Petero wele lo divɛsa diɔsami ɔtɛ aso wa sawo, sho koka mbetawɔ l’eshikikelo tshɛ dia sho kokaka mbokoya ɛnyɛlɔ kaki Yeso. Sho kokaka la ndjela wanya waki Yeso dimɛna dimɛna. Ɔnkɔnɛ, sho kokaka kitanyiya didjango diaki Yeso ndamɛ diata ɔnɛ: ‘Nyotetemale la ndjelami.’ (Luka 9:23) Nyɛsɔ tɔsɛdingole woho wakokaso mbokoya ngandji kakɛnya Kristo, ntondotondo lo kɛnɛ kendana l’akambo wa mɛtɛ wakandetshaka ndo lo kɛnɛ kendana l’anto wakandetshaka.
Tolange akambo wa mɛtɛ wekaso
3. Lande na kele anto amɔtshi mɛnaka wolo mbeka, ndo dako dakɔna diatanaso lo Tukedi 2:1-5?
3 Dia sho nanga akambo wa mɛtɛ wetshaso anto akina, sho pombaka shamɛ ngɛnangɛna mbeka akambo akɔ wa mɛtɛ. L’andja wasɛnaso ɔnɛ, anto hawoyoleka monga la woho wa ngandji kɛsɔ, mbut’ate ngandji k’akambo wa mɛtɛ. Woho wele anto efula kɔmbɔtɔ kalasa dimɛna kana komonga la mbekelo y’ɔlɔlɔ yendana la wekelo lo nshi yawɔ y’ɛlɔngɔlɔngɔ kana y’esekaseka amboyakonya di’aha vɔ nanga wekelo. Koko ekɔ ohomba efula sho mbeka akambo oma le Jehowa. Tukedi 2:1-5 mbutaka ate: “On’ami, naka we ayulunga aui ami, ndu ayulama elembe ami; naka we ayuhuke tui lu [lo]mba, ndu ayediya utema aye lu [shɛnɔdi], ee, lam’ayuyulelela yimba ndu lam’ayuyuwelela [shɛnɔdi]; naka we ayukiyanga uku fesa, ndu ayukiyanga wulu uku eumbelu kushami, ku we ayulimbitela woma wa [Jehowa], ayukundja [ewo k]a [Nzambi].”
4. Kakɔna kalembetshiya ‘mbɛdiya’ otema ndo woho akɔna wa dionga diayotokimanyiya dia sala dikambo sɔ?
4 Tolembete di’oma lo divɛsa dia 1 polo 4, sho keketshamaka mbala la mbala dia sala la wolo aha tsho dia ‘kondja’ ndo ‘momba’ ewo koko ndo dia ‘tetemala nyanga.’ Kakɔna kahomba totshutshuya dia sala akambo asɔ tshɛ na? Tende etelo kɛnɛ kata ɔnɛ ‘ɛdiya otema ayɛ lo shɛnɔdi.’ Dibuku dimɔtshi mbutaka dia dako sɔ “halɔmbɛ tsho dia mbidja yambalo; diɔ nɔmbaka onto dia monga la yoho mɔtshi ya dionga, mbut’ate nsaki k’efula ka mbetawɔ wetshelo.” Ndo kakɔna kakoka tokimanyiya dia mbetawɔ wetshelo ndo nomɔlomɔ dia mbeka kɛnɛ katetsha Jehowa na? Woho wɔsaso akambo. Sho pombaka mbɔsa ‘ewo k’oshika kaki Nzambi’ oko “fesa” ndo oko ‘ɛngɔ k’oshinga wolo koshami.’
5, 6. (a) Kakɔna kakoka ndjotomba l’edjedja ka wonya, ndo ahombaso sala di’aha dikambo sɔ tokomɛ na? (b) Lâdiko w’akambo w’ohomba efula wamboteka oma lo Bible bonde kahombaso tetemala la mbeka akambo akina wa lɔkɔ?
5 Kema wolo monga la woho w’ekanelo ka yimba ka ngasɔ. Ɛnyɛlɔ, ‘ewo kaki Nzambi’ kamboyokondja mendanaka mɛtɛ l’akambo wa mɛtɛ wata dia sangwelo diaki Jehowa ele di’anto wele la kɔlamelo sɛna pondjo pondjo lo Paradiso ka la nkɛtɛ. (Osambu 37:28, 29) Aha la tâmu, lam’akayeke akambo wa mɛtɛ asɔ mbala ka ntondo, wɛ akawaɔshi oko ɛngɔ k’oshinga wolo ndo yema y’ewo kɛsɔ kakalodia yimba nd’otema ayɛ l’elongamelo ndo l’ɔngɛnɔngɛnɔ. Ko akokaso mbuta ɛlɔ kɛnɛ? Onde lam’atete nshi mbatakitakita lowando layɛ lo kɛnɛ kendana l’ɛngɔ kayɛ k’oshinga wolo kɛsɔ? Hemba dia sala akambo anɛ ahende. Ntondotondo, nyomonga la lowando laki layɛ ntondo, mbut’ate yaoholaka mbala la mbala bonde kɔsayɛ la nɛmɔ oseka dikambo dia mɛtɛ tshɛ diakaketsha Jehowa, oyadi kânga akambo wakayeke ambeta ɛnɔnyi efula.
6 Dikambo dia hende ele, tetemala la fudia diangɔ diayɛ di’oshinga wolo. Tɔshi ɛnyɛlɔ, naka wɛ ambokundola lɔwɔkɔ lɔmɔtshi la dikɛsɔ, onde wɛ ayolidja tsho lo dibenga ko wɛ kimɛ mboka atangɛnangɛna? Onde wɛ hatotshimola dia menda kana mbɔkɔ kina yekɔ? Ɔtɛkɛta wa Nzambi ndola l’akambo wa mɛtɛ w’ohomba efula wele oko mbɔkɔ y’akɛsɔ. Oyadi efula ka ngande kamboyeka, wɛ kokaka la tetemala mbishola akambo akina w’eyoyo nto. (Romo 11:33) Lam’ekayɛ dikambo dimɔtshi dia mɛtɛ di’ohomba efula, yambola wate: ‘Kakɔna kadietɛ ɛngɔ k’oshinga wolo efula na? Onde diɔ mbishakami eokelo k’efula kendana la lonto laki Jehowa kana asangwelo ande? Onde diɔ mbishakami ɛlɔmbwɛlɔ kɛmɔtshi ka dimɛna kakoka kimanyiyami dia ndjela wanya waki Yeso?’ Naka wɛ kana yimba lo wembola wa ngasɔ, kete vɔ wayokokimanyiya dia monga la ngandji k’akambo wa mɛtɛ wamboketsha Jehowa.
Tolange akambo wa mɛtɛ wetshaso
7, 8. Naa toho tɔmɔtshi takokaso mɛnya anto akina dia sho nangaka akambo wa mɛtɛ wamboteka oma lo Bible? Sha ɛnyɛlɔ kɛmɔtshi.
7 Etena ketshaso anto akina, ngande wakokaso mɛnya dia sho nangaka akambo wa mɛtɛ wamboteka oma l’Ɔtɛkɛta wa Nzambi na? Lo ndjela ɛnyɛlɔ kaki Yeso, sho ndjaɛkɛka tshɛ lo Bible lam’asambishaso ndo wetshaso. Atet’edja, ekambi waki Nzambi wa l’andja w’otondo wakakeketshama dia ndeka kamba la Bible l’olimu awɔ w’esambishelo. Etena kakambayɛ la dako sɔ, yanga toho ta mbewoya onto lasawola layɛ dia wɛ mbɔsaka awui w’oma lo Bible wasawolayɛ la nde la nɛmɔ efula.—Mateu 13:52.
8 Ɛnyɛlɔ, yema tshitshɛ l’ɔkɔngɔ wa kɛnɛ kakasale dengalenga ɔnɔnyi w’etshi l’osomba wa New York, kadiyɛso kɛmɔtshi akakɛtshanyaka l’anto wakahomanaka la nde l’olimu w’esambishelo awui wa lo divɛsa di’Osambu 46:1, 11. Ntondotondo, nde akambolaka anto kɛnɛ kakawasale lam’akatombe mpokoso kɛsɔ. Nde akalongamɛka ekadimwelo awɔ la yambalo tshɛ, aketawɔka ekadimwelo akɔ, oma lâsɔ, nde akawatɛka ate: “Onde dimi kokaka kɛtshanya la nyu divɛsa dimɔtshi diambokeketsha efula l’etena ka pâ kɛnɛ?” Nde akasawola l’anto efula dimɛna, paka tɔtɔi toto mbakatone sawola la nde. Lam’akandasawolaka l’ɛlɔngɔlɔngɔ ndo l’esekaseka, kadiyɛso kɛsɔ akataka ate: “Aya ɛnɔnyi 50 w’etondo wemi lo ndakanya Bible. Koko lambonyotɛ nte: Ndoko lushi lamomohomana la dikambo diele dibuku nɛ hakoke kimanyiyami dia dikandola.” Lo sawola l’anto l’otema ɔtɔi ndo la wangasanu tshɛ, sho mbaɛnyaka dia sho mbɔsaka akambo wakateke l’Ɔtɛkɛta wa Nzambi la nɛmɔ ndo mbalangaka.—Osambu 119:97, 105.
9, 10. Bonde kele ekɔ ohomba kamba la Bible etena kakadimolaso lo wembola wendana la dietawɔ diaso?
9 Etena katoka anto wembola wendana la dietawɔ diaso, sho kondjaka diaaso dia dimɛna efula dia mɛnya dia sho nangaka Ɔtɛkɛta wa Nzambi. Lo ndjela ɛnyɛlɔ ka Yeso, hatohombe mbisha ekadimwelo lo ndjela tokanyi taso hita. (Tukedi 3:5, 6) Ndo sho pombaka kamba la Bible etena kakadimolaso. Onde wɛ mbokaka wɔma w’onto kôka dimbola dimɔtshi diahayatonga l’akoka wa dikadimola? Enda akambo ahende wahombayɛ sala dia kandola dikambo sɔ.
10 Sala tshɛ kakokayɛ sala dia ndjalɔngɔsɔla. Ɔpɔstɔlɔ Petero akafunde ate: “Keli nyukidia Kristu uku Khumadiondjo lu etema anyu. Nyutayalongosodi dia nyu mbeya lama nkaluya diui le untu tshe lanyumbula, dia elungamelu keli l’etema anyu. Keli nyutshi okone la memakana la woma.” (1 Petero 3:15) Onde wɛ ekɔ suke dia mamɛ dietawɔ diayɛ? Ɛnyɛlɔ, naka onto ɔmɔtshi nangaka mbeya lande na katonayɛ mbekelo kana etshelo kɛmɔtshi kahɔtɔnɛ l’Afundelo, tokomɛke tsho lo mbotɛ ɔnɛ, “Hawokietawɔ l’ɔtɛmwɛlɔ ami.” Okadimwelo wa ngasɔ ayɛnya di’oko anto akina mbakɔsɛ tɛdikɔ ndo ayɛnya dia wɛ ekɔ ose yato mɔtshi y’ɔtɛmwɛlɔ. Ayoleka dimɛna mbuta ɔnɛ, “Ɔtɛkɛta wa Nzambi, Bible sekɛka dikambo sɔ” kana ɔnɛ “diɔ hatɔngɛnyangɛnya Nzambi kami.” Oma lâsɔ ko wɛ mbolembetshiya dimɛna lande na kediɔ ngasɔ.—Romo 12:1.
11. Naa ehomɔ k’eyangelo kakoka tokimanyiya dia kadimola wembola wendana l’akambo wa mɛtɛ wele l’Ɔtɛkɛta wa Nzambi?
11 Naka wɛ ndjaokaka dia wɛ hayalɔngɔsɔdi, lande na kahayɔshi yema ya wenya dia mbeka biukubuku Woho wa Tatɛ ndo Tetemala la Sawola l’Anto lo Bible naka yekɔ l’ɔtɛkɛta wakokayɛ mbadia?a Sɔna awui amɔtshi angana wɛnama di’anto mbokaka wembola mbala efula lo kɛnɛ kendana l’awui akɔ, ndo wɛ kimɛ l’ɔtɛ tokanyi tɔmɔtshi t’oma l’Afundelo tendana l’awui akɔ. Sukanya biukubuku Woho wa Tatɛ kamɛ ndo Bible kayɛ. Tengengake dia kamba la dihomɔ diakɔ dihende, lo mbutɛ onto lokôki wombola dia wɛ ekɔ l’ehomɔ ka sala eyangelo kalangayɛ kamba latɔ dia mbokimanyiya woho wa nde mbishola okadimwelo washa Bible lo wembola ande.
12. Ngande wakokaso kadimola naka sho bu l’okadimwelo lo wombola wendana l’awui wa lo Bible wotokiwɔ?
12 Toyakiyanyake otamanya. Ndoko onto lele bu kokele lakoka mbisha ekadimwelo tshɛ. Lâsɔ, naka wambokoka wombola ɔmɔtshi wendana l’awui wa lo Bible wahayakoke kadimola, kete wɛ koka la kadimola lo yoho nyɛ wate: “Losaka lo wombola w’ohomba wombodiyɛ ɔsɔ. Lo mbuta mɛtɛ, wony’ɔnɛ dimi bu l’okadimwelo wa kosha, koko lekɔ l’eshikikelo dia Bible tɛkɛtaka dikambo sɔ. Dimi nangaka tosala eyangelo lo Bible lo kɛnɛ kendana la wombola ayɛ kele kandjokokadimole mbala kayaye.” Okadimwelo wa l’otema ɔtɔi ndo la ndjakitshakitsha wa ngasɔ, mbeyaka ndjokosha diaaso dikina dia nyu sawola dimɛna.—Tukedi 11:2.
Ngandji otsha le anto wetshaso
13. Lande na kahombaso monga la kanyi y’ɔlɔlɔ otsha le anto wasambishaso?
13 Yeso akokaka anto wakandetshaka ngandji. Ngande wakokaso mbôkoya lo dikambo sɔ na? Tatongake pondjo la dionga dia kɔlɔ otsha le asukanyi aso. Lo mɛtɛ, ‘ta dia lushi la woke la Nzambi Nkanga-Nkudu-Tshɛ’ diaya k’onyɔ, ndo efula l’atei wa miliyara y’anto wayodiakema. (Enyelo 16:14; Jeremiya 25:33) Koko sho hateye akɔna ayovɔ ndo akɔna ayoka. Elombwelo kɛsɔ kayosalema lo nshi yayaye ndo oma le onto lakasɔnama oma le Jehowa, mbut’ate Yeso Kristo. Edja tshɛ kele elombwelo kɛsɔ katasalema, sho mbɔsaka onto tshɛ dia nde ekɔ onto lakoka koma okambi waki Jehowa.—Mateu 19:24-26; 25:31-33; Etsha 17:31.
14. (a) Ngande wakokaso ndjasɛdingola shamɛ dia mbeya kana tekɔ la kɛtshi k’anto? (b) Lo toho takɔna ta dimɛna takokaso mɛnya kɛtshi ndo woho wayakiyanyaso dikambo di’anto akina?
14 L’ɛnyɛlɔ kaki Yeso, sho lawɔ tekɔ la kandji k’anto. Sho mbeyaka ndjambola shate: ‘Onde dimi ndjakiyanyaka dikambo di’anto wambɔkɔmɔ etema l’ɔtɛ w’awui wa kashi wa lo mayɛlɛ w’oma le ase ɛtɛmwɛlɔ, ase pɔlitikɛ ndo amundji w’okanda wa l’andja ɔnɛ? Naka kana vɔ wekɔ la wendjudi lo losango lawaɛmbɛso, onde dimi nyangaka dia mbeya lande na kahawalietawɔ? Onde dimi mbeyaka dia dimɛ, kana ekambi ɛmɔtshi wakambɛ Jehowa nshi nyɛ la kɔlamelo, waki la dionga dia ngasɔ? Onde dimi mbɔtɔnganyiyaka yoho yami ya sambisha la dionga diɛnyisha onto? Kana onde dimi mbɔsaka anto asɔ oko anto wahakokaki kadimɔ pondjo?’ (Enyelo 12:9) Naka anto mɛna kɛtshi ka mɛtɛ kawaokaso, kete vɔ wayoleka tshutshuyama dia mbetawɔ losango laso. (1 Petero 3:8) Kɛtshi mbeyaka nto totshutshuya dia sho nyomoleka ndjasha le anto wahomana laso l’olimu aso w’esambishelo. Sho mbeyaka mbɔsa nɔtɛ ya tomondo yendana la wembola ndo ekiyanu awɔ. Lam’ayotokalola dia towaenda, sho mbeyaka mbaɛnya dia takatokana yimba lo tokanyi takawatondja kana wembola wakawoke mbala ketshi. Kana naka wambota dia wekɔ l’ohomba w’okadimwelo paka ko wonya akɔ, kete sho mbeyaka mbasha ekimanyielo kɛmɔtshi kahombama.
15. Lande na kahombaso nyanga waonga w’ɔlɔlɔ wele l’anto, ndo ngande wakokaso sala dikambo sɔ?
15 L’ɛnyɛlɔ ka Yeso, sho nyangaka waonga w’ɛlɔlɔ wele l’anto. Ondo ombutshi ɔmɔtshi wa womoto wele ndamɛ ekɔ lo sala la wolo dia mbodia anande. Ondo pami kɛmɔtshi ekɔ lo ndɔ ta dia ta dia kotsha ehomba wa nkumbo kande. Osombe ɔmɔtshi w’onto ekɔ lo mɛnya nsaki l’akambo wa lo nyuma. Onde sho mɛnaka waonga wa ngasɔ le anto wahomana laso l’esambishelo ndo onde sho mbawandolaka l’akambo asɔ? Lo sala ngasɔ, sho mɛnyaka woho wakanɛso anto ndo dui sɔ mbeyaka tosha diaaso dia mbasambisha awui wendana la Diolelo.—Etsha 26:2, 3.
Ndjakitshakitsha kekɔ ohomba efula dia mboka anto ngandji
16. Lande na ekɔ ohomba monga la memakana ndo la dilɛmiɛlɔ otsha le anto wasambishaso?
16 Nanga anto wetshaso ayototshutshuya dia kitanyiya dako di’ɔlɔ dia lo Bible diata ate: “Ewu katutakuyaka untu, keli ngandji katuwudiaka.” (1 Koreto 8:1) Yeso aki l’ewo ka mamba, koko ndoko lushi lakinde la lotamanya. Lâsɔ, lam’asawolayɛ l’anto awui wendana la dietawɔ diayɛ, paka mbewɔ tamanu kana mbaɛnya di’oko wɛ mbaleka. Oyango aso ekɔ wa minanda etema w’anto ndo mbakotola oya l’akambo wa mɛtɛ walangaso shamɛ efula. (Kolosai 4:6) Tatohɛke dia lam’akalake Petero Akristo dia mbeya woho wa kaloya dui, nde akawaohola nto dia sala dikambo sɔ ‘la memakana ndo la dilɛmiɛlɔ di’efula.’ (1 Petero 3:15) Naka sho monga la memakana ndo la dilɛmiɛlɔ, kete tayoleka kotola anto oya le Nzambi kakambɛso.
17, 18. (a) Ngande wahombaso sala etena katɔnyɔla anto ɔnɛ sho bu l’akoka wa monga embetsha? (b) Bonde kele ewo k’ɛtɛkɛta wakafundama Bible ntondo bu ohomba le ambeki wa Bible?
17 Ndoko ohomba mambiya anto l’ewo kele laso kana kalasa kakatɔtɔ. Naka anto amɔtshi wa l’ɛtshi kanyu ka nkɛtɛ tonaka dia mpokamɛ awui w’anto waki kokoma l’inivɛrsite kana wele bu l’ahole amɔtshi wa weke lo tshunda, kete dionga diawɔ sɔ diatokɔtɛwɔlake. Yeso kombidja yimba lo woho wakawawɔnyɔlaka ɔnɛ nde kɔmbɔtɔ lo kalasa y’ambewi w’ɛlɛmbɛ w’ase Juda ya lo nshi yande; ndo nde kombesa anto lo dikanyiyakanyiya diawɔ lo nyanga dia mbawambiya l’ewo k’efula kaki lande.—Joani 7:15.
18 Ndjakitshakitsha ndo ngandji ekɔ waonga w’ohomba efula l’ekambi w’Akristo oleki okanda wa woho akɔna tshɛ wakaweke. Jehowa, Ombetsha wa Woke, mbatosha akoka wa kamba olimu aso. (2 Koreto 3:5, 6) Oyadi kakɔna kata ewandji wa lo Lokristokristo ɛmɔtshi, sho bu l’ohomba wa mbeka ɛtɛkɛta wakafundama Bible ntondo dia koma embetsha w’Ɔtɛkɛta wa Nzambi. Oma lo wolo wa nyuma k’ekila, Jehowa akasale dia Bible fundama l’ɛtɛkɛta wokɛma hwe ndo wa shikaa wakoka kimanyiya onto tshɛ dia mboka dimɛna akambo wa mɛtɛ w’oshinga wolo wele lo Bible. Akambo wa mɛtɛ asɔ watatshikitana kânga mbele Bible ambokadimɔma lo nkama y’ɛtɛkɛta. Lâsɔ, kânga mbele tena dimɔtshi ewo k’ɛtɛkɛta wa ntondo wakafundama Bible koka tokimanyiya, tɔ bu ohomba efula. Ndo nto, lotamanya l’ɔnɛ dimi mbeyaka ɛtɛkɛta efula kokaka konya onto dia shisha dionga diele ohomba le Akristo wa mɛtɛ, mbut’ate monga suke dia mbetshama.—1 Timote 6:4.
19. Lo woho akɔna wele olimu aso w’Okristo wekɔ olimu ɔmɔtshi wakambɛ anto?
19 Aha la tâmu, olimu aso w’Okristo ekɔ olimu walɔmba dia monga la ndjakitshakitsha. Mbala la mbala sho pomanaka la wekamu, wendjudi ndo ɛhɛnyɔhɛnyɔ. (Joani 15:20) Koko, naka sho tetemala kamba olimu aso la kɔlamelo tshɛ, kete tekɔ lo kamba olimu ɔmɔtshi w’ohomba efula. Naka la ndjakitshakitsha tshɛ sho tetemala la kambɛ anto akina olimu ɔnɛ, kete tekɔ lo mbokoya ngandji kaki la Yeso otsha le anto. Tende yema: Naka sho pombaka sambisha anto lokama wele la wendjudi kana wahetawɔ l’oyango wa sho tana kânga onto ɔtɔi lele oko ɔkɔkɔ, shi kete welo wayotodja dia sala dikambosɔ hatonga anyanya? Ngasɔ mbediɔ mɛtɛ! Lâsɔ, naka sho tetemala l’olimu aso aha la mpekɔ, kete tekɔ lo kambɛ anto wele oko ɛkɔkɔ weso tatashola la kɔlamelo tshɛ. Aha la tâmu, Jehowa nde la Yeso wayotokimanyiya dia sho tana weho w’anto wa ngasɔ efula ndo mbakimanyiya la ntondo k’ekomelo k’andja.—Hangai 2:7.
20. Lo toho takɔna takokaso ndakanya oma l’ɛnyɛlɔ?
20 Mbetsha anto oma l’ɛnyɛlɔ ekɔ yoho kina ya mɛnya woho wetawɔso kambɛ anto akina. Ɛnyɛlɔ, sho nangaka mbetsha anto dia vɔ mbeya ɔnɛ: kambɛ Jehowa ‘Nzambi k’ɔngɛnɔngɛnɔ,’ ekɔ yoho ya lɔsɛnɔ yoleki dimɛna, yoho ya lɔsɛnɔ yela ɔngɛnɔngɛnɔ. (1 Timote 1:11) Etena kasɛdingolawɔ lɔkɛwɔ laso ndo woho wasɛnaso l’asukanyi aso, asekaso wa la kalasa ndo wa l’olimu, onde ambeki wa Bible mɛnaka dia tekɔ l’ɔngɛnɔngɛnɔ? Woho akɔ wamɛ, sho ndakanyaka ambeki wa Bible dia etshumanelo k’Akristo ekɔ dihole dioludi la ngandji l’atei w’andja ɔnɛ woludi l’awui wa ngala ndo wahadjana anto yimba. Onde ambeki aso wa Bible mɛnaka aha l’okakatanu dia sho tekɔ la ngandji otsha le as’etshumanelo tshɛ ndo woho wasalaso la wolo dia kokɛ wɔladi wele lam’asaso?—1 Petero 4:8.
21, 22. (a) Ndjasɛdingola shamɛ lo kɛnɛ kendana l’olimu aso mbeyaka ndjotokonya lo kamba elimu akɔna? (b) Kakɔna kayɔtɛkɛtama lo numɛlɔ ka Tshoto y’Etangelo yayela?
21 Mboka olimu aso, ngandji mbeyaka mbala mɔtshi totshutshuya dia nyomoyasɛdingola. Lo ndjasɛdingola l’otema ɔtɔi, efula wakɛnyi dia vɔ kokaka pamia olimu awɔ lo ndjatambiya l’olimu wa lo tena tshɛ kana lo monɔ dia tokamba lɛnɛ ele ohomba efula w’ekambi. Akina wakɔshi yɛdikɔ ya mbeka ɔtɛkɛta ɔmɔtshi w’angɛndangɛnda dia kimanyiya lofulo latahame paka pama tsho l’anto watɛkɛta ɔtɛkɛta akɔ lo bɛtshi diawɔ dia nkɛtɛ. Naka wɛ ambetawɔ waɛsɛ asɔ, kete kana yimba dimɛna lo kɛnɛ kendana la waɛsɛ akɔ lo dɔmbɛlɔ. Lɔsɛnɔ la kambɛ anto mbelaka ɔngɛnɔngɛnɔ, ndo ki ka lo yimba.—Undaki 5:12.
22 Lo weho tshɛ, nyɛsɔ totetemale la ndjela ɛnyɛlɔ ka Yeso Kristo lo keketsha ngandji kaso k’akambo wa mɛtɛ wetshaso ndo k’anto wetshaso akambo akɔ. Monga ndo kɛnɛmɔla ngandji l’akambo asɔ ahende ayotokimanyiya dia monga embetsha wele oko Kristo. Ngande wakokaso monga la ngandji ka ngasɔ? Asawo wa lo numɛlɔ kayela ka Tshoto y’Etangelo wayɔtɛkɛta dia toho tɔmɔtshi ta shikaa ta wetshelo takakambe la Yeso.
[Nɔtɛ ka l’ɛse ka dikatshi]
a Yakatondjama oma le Ɛmɛnyi wa Jehowa.
Ngande wayokadimola?
• Eshikikelo kakɔna kele laso k’ɔnɛ sho kokaka mbokoya ɛnyɛlɔ kaki Yeso oko wakinde ombetsha?
• Ngande wakokaso mɛnya dia sho nangaka akambo wa mɛtɛ wakateke oma lo Bible?
• Lande na ekɔ ohomba nama dionga diaso dia ndjakitshakitsha lam’atahame ewo kaso?
• Naa toho tɔmɔtshi takokaso mɛnya ngandji le anto wasalaso la wolo dia mbasambisha?
[Esato wa lo lɛkɛ 12]
Sala tshɛ kakokayɛ sala dia ndjalɔngɔsɔla
[Esato wa lo lɛkɛ 13]
Naka wɛ mbɔsaka ‘ewo ka Nzambi la nɛmɔ,’ kete wɛ ayokoka kamba dimɛna la Bible
[Osato wa lo lɛkɛ 14]
Sho mɛnyaka ngandji kokaso anto lo mbasambisha lokumu l’ɔlɔlɔ