Esambelo lo tena dia wolo

NSANGO yewoyawɔ nshi nyɛ kema kânga la yema y’esambelo. Onto ɔmɔtshi akafunde ate: “Awui weta nshi nyɛ mbishaka lonyangu efula woho ɔnɛ wele mbala efula hatokoke shikikɛ dia kana tayokoka monga la dihonga dia menda sango yayewoyama l’eshidi esamalo kokele.” Andja ɔnɛ wambolola l’ata, l’akambo wa wɔma, l’asui, l’awui wa ngala ndo la waa hemɔ, mbut’ate l’akambo wa kɔlɔ wele ondo wekɔ suke dia munanda etondo aso kana watatonanda.

Bible amboshilaka la nembetshiya otombelo w’akambo asɔ. Lam’akandakɔndɔlaka awui wendana l’etena kaso, Yeso akate di’ata wa weke, hemɔ ya wolo, ndjala ya kasha, ndo adidimu wa nkɛtɛ wayoyala. (Luka 21:10, 11) Woho akɔ wamɛ mbakafunde ɔpɔstɔlɔ Paulo lo kɛnɛ kendana la “tena dia wulu,” diele anto wayonga akanga w’ududu, anangi wa falanga ndo waha la ngandji k’akambo w’ɔlɔlɔ. Nde akete etena kakɔ ate: “Nshi y’ekumelu.”​—2 Timote 3:1-5.

Diakɔ diele, lam’akɔndɔlawɔ awui weta l’andja ɔnɛ, mɛnamaka dia lo yoho mɔtshi nsango yatama shɔ mbɔtɔnɛka yema l’akambo wakatama lo Bible. Koko paka awui weta l’andja ɔnɛ ato mbɔtɔnganyiya nsango yatama l’awui wa lo Bible. Bible mbishaka dilembetshiyelo diele nsango yewoyama l’andj’ɔnɛ hayokoke mbisha. Oma lo tshimbo y’Ɔtɛkɛta wa Nzambi wakasambiyama, sho koka shihodia aha tsho lande na katanema akambo efula wa kɔlɔ koko ndo woho wayonga nshi yayaye.

Woho wɔsa Nzambi awui wa kɔlɔ

Bible nembetshiyaka woho wɔsa Nzambi akambo washa okiyanu weta lo nshi yaso nyɛ. Kânga mbakandashile la mɛna efukutanu watomba lo nshi yaso nyɛ, nde hetawɔ akambo akɔ kana mbetawɔ dia mbâtshika pondjo pondjo. Ɔpɔstɔlɔ Joani akafunde ate: “[Nzambi] eli ngandji.” (1 Joani 4:8) Jehowa ndjakiyanyaka efula dikambo di’anto ndo nde petshaka akambo wa kɔlɔ tshɛ. Diakɔ diele, sunganaka dia sho kadimɔ otsha le Nzambi dia nyanga esambelo nɛ dia nde ekɔ kanga ɔlɔlɔ ndo lokana kɛtshi ndo nde ekɔ la nkudu ndo nangaka minya awui wa kɔlɔ oma la nkɛtɛ. Omembi w’Esambo akafunde ate: “[Nkumekanga kaki Nzambi kakasɔnama l’olongo] kameli uhumbi lam’awulelelandi, ndu usi wula laha la ukimanyidi pupu. Ndi kukaki amenyi fono la asi wula ketshi, kamelaki nyumu ya amenyi fono. Ndi katshunguli nyumu yawo uma le akang’a lukesu la wa ngala. Dikila diawo diayuyala ushinga a wulu lu ashu andi.”​—Osambu 72:12-14.

Onde wɛ mbokaka wanɛ wɛna pâ kɛtshi? Ondo wɛ mbaokaka. Kɛtshi ekɔ dionga diakatosha Jehowa nɛ dia takatongama l’ɛfanelo kande. (Etatelu 1:26, 27) Lâsɔ, sho koka monga l’eshikikelo dia Jehowa ndjakiyanyaka lam’ɛnande anto wasowa. Yeso lakaleke mbeya Jehowa dimɛna oleki anto akina tshɛ akalakanya dia Jehowa ndjashaka efula le so ndo nde tokaka kandji efula.​—Mateu 10:29, 31.

Diangɔ diakatongama dɔamɛ mɛnyaka dia Nzambi ndjakiyanyaka dikambo di’anto. Yeso akate ate Nzambi “atuhutuyaka unya le antu wa kolo ndu le antu w’ololo, ndu atutumaka mvula le antu w’ololo ndu le antu wa kolo.” (Mateu 5:45) Ɔpɔstɔlɔ Paulo akatɛ anto wa l’osomba wa Lustɛra ate: “[Nzambi] kundjatshika aha la djimbitelu, ne dia ndi akâtshela ololo; akanyoloshiya mvula uma l’ulungu, la deku dia nfudia mbu ya nde, akalutsha etema anyu la mbu ya nde la ongenongeno.”​—Etsha 14:17.

Ele kiɔkɔ y’akambo wa kɔlɔ?

Sunganaka dia Paulo mbutɛ anto wa l’osomba wa Lustɛra nto ɔnɛ: “Lu nshi yaketi, [Nzambi] akakimo wedja tshe dia vo nkendakenda lu mbuka yawo.” Diakɔ diele, wedja kana anto vamɛ wekɔ kiɔkɔ ya woke y’ekakatanu efula wele lawɔ. Aha Nzambi mbele lo kiɔkɔ y’awui asɔ.​—Etsha 14:16.

Ko lande na kahomba Jehowa mbetawɔ di’akambo wa kɔlɔ tombaka? Onde nde ayosala dikambo dimɔtshi lushi lɔmɔtshi? Okadimwelo lo wembola ɛsɔ koka tanema paka l’Ɔtɛkɛta wa Nzambi. Ekɔ ngasɔ nɛ dia okadimwelo mendanaka efula l’onto okina la lo nyuma ndo la wembola ɛmɔtshi wakonyiyama l’andja wahɛnama.

[Esato wa lo lɛkɛ 4]

Anto ndjadjaka lo dihole di’asekawɔ. Onde Nzambi ndjakiyanyaka kânga yema lo pâ y’anto?

[Efundelo wɛnya kanga osato wa lo lɛkɛ 2]

La diko lo lonya la lɔmɔsɔ, Croatie: UN PHOTO 159208/S. Whitehouse

[Efundelo wɛnya kanga osato wa lo lɛkɛ 3]

Ana wadiɛnɛ la ndjala: UN PHOTO 146150 BY O. MONSEN