‘Nyosungukalake lo akambo tshɛ’
“Kanga enginya atetawoka aui tshe wata antu. Keli kanga ewu atushishimaka mbuka katandatshu.”—TUKEDI 14:15.
1, 2. a) Wetshelo akɔna wakondjaso oma lo kɛnɛ kakakomɛ Lɔta la Sɔdɔma? b) Tshɛkɛta ‘sungukala’ alembetshiyayɔ?
ETENA kakasha Abarahama Lɔta diaaso dia nde sɔna ntondo wodja wakandalangaka, washo wa Lɔta wakatshu lo ɛtshi ka nkɛtɛ kaki oko “ekambo ka [Jehowa].” Dihole diakɔ diakɛnamaka dimɛna efula dia nde la nkumbo kande mbidjasɛ lɛkɔ. Diakɔ diele “Lota akasonola usui tshe wa l’ukidi wa Jorodana,” ndo nde akake mvudu yande y’apɛma suke la Sɔdɔma. Koko, kɛnɛ kakɛnamaka oko ɔlɔlɔ lo washo kakôkese, nɛ dia suke la lawɔ mbakadjasɛka “asi Sodoma waki antu wa kolo efula, ndu wakatamanya ntuna [Jehowa].” (Etatelu 13:7-13) Lo edjedja ka wonya, Lɔta ndo nkumbo kande wakasowe heyama. L’ɔkɔngɔ diko nde l’anande wa wamato wakatodjasɛka lo woko ɔmɔtshi wa dive. (Etatelu 19:17, 23-26, 30) Kɛnɛ kakɛnamaka dimɛna le nde l’etatelo kakayokomaka ololo oko kondjo.
2 Ɔkɔndɔ wa kɛnɛ kakakomɛ Lɔta mbishaka ekambi waki Nzambi wa nshi nyɛ wetshelo. Etena kɔsaso tɛdikɔ, sho pombaka mbidja yimba lo wâle wakoka monga la dui diakɔ ndo ndjalama diaha ndjakesa oma lo ɛnɛlɔ ka ntondo. Diakɔ mɛtɛ mbatokeketsha Ɔtɛkɛta wa Nzambi ɔnɛ: “Nyosungukalake.” (1 Petro 1:13, Dyookaneelo dy’Oyooyo.) Tshɛkɛta ya lo Grɛkɛ yokadimɔmi ɔnɛ ‘sungukala’ nembetshiyaka lo mɛtɛ mɛtɛ “monga la yimba y’ɔlɔlɔ.” Lo ndjela R.C.H. Lenski nomb’ewo kɛmɔtshi k’awui wa lo Bible, yimba y’ɔlɔlɔ shɔ ekɔ “dionga di’onto lele ki, lele la yimba yoshikimadi yawokimanyiya dia mbɛdika ndo sɛdingola akambo dimɛna ndo kɛsɔ mbokimanyiyaka dia mbɔsa tɛdikɔ t’amɛna.” Nyɛsɔ tɔsɛdingole awui amɔtshi walɔmba dia sho monga la yimba y’ɔlɔlɔ.
Tɛdikolake awui tshɛ wendana la okanda
3. Lande na kele ekɔ ohomba monga la yewo etena kakondjaso diaaso dimɔtshi dia munda okanda?
3 Ohɔsa dia onto ɔmɔtshi lalɛnyama efula, ondo ɔtɛmɔdi ɔmɔtshi wa Jehowa ambokosha diaaso dia munda okanda. Nde ekɔ l’eshikikelo k’ɔnɛ okanda akɔ wayɔkɛndakɛnda dimɛna ndo nde ekɔ lo kokeketsha diaha wɛ tshimbatshimba dia tatɛ munda okanda akɔ. Wɛ mbeyaka tatɛ kanyiya woho wayoyonga la lɔsɛnɔ la dimɛna wɛ la nkumbo kayɛ polo lo fɔnya ɔnɛ dui sɔ diayokokimanyiya dia wɛ ndeka ndjasha lo awui wa lo nyuma. Koko Tukedi 14:15 tewolaka ɔnɛ: “Kanga enginya atetawoka aui tshe wata antu. Keli kanga ewu atushishimaka mbuka katandatshu.” Oma l’ɔngɛnɔngɛnɔ waya mbala efula lo tatɛ munda okanda, onto mbeyaka minya yimba lo wâle, mpokoso ndo ekakatanu wakoka monga l’awui w’okanda. (Jakoba 4:13, 14) Lo dui dia ngasɔ, ekɔ mɛtɛ ohomba sungukalaka lo akambo tshɛ!
4. Ngande wakokaso mɛnya dia ‘tekɔ la lomba’ etena kɛdikolaso awui w’okanda?
4 Onto lele la yewo sɛdingolaka dimɛna dimɛna awui w’okanda la ntondo ka mbɔsa yɛdikɔ. (Tukedi 21:5) Mbala efula ɔsɛdingwelo wa ngasɔ mbisholɛka onto wâle wakoka monga l’awui w’okanda. Tokane yimba lo dikambo nɛ: Onto ɔmɔtshi ekɔ lo nyanga sɔmbɔ dia nde munda okanda ndo nde kolakaka dia naka wɛ mbɔsɔndja falanga yakɔ nde ayoyokɔsɔmbɔlɛyɔ la wahɔ w’efula. Kânga mbele kɛnɛ kakolakande mbeyaka mɛnama oko dimɛna, naa wâle wele la dui sɔ? Onde ɔsɔmbi mbetawɔka dia ndjokokaloyayɔ oyadi kânga awui ande w’okanda hawɔkɛndjikɛndji dimɛna? Kana onde ofutelo wa falanga yakɔ nemanɛka paka la woho wayowɔkɛndakɛnda dimɛna? Lo ɛtɛkɛta ekina, onde wɛ ayoshisha falanga yayɛ naka okanda ande hakɛndjikɛndji dimɛna? Sɛdingola wâle wakoka monga ayokokimanyiya dia wɛ mbɛdikola dui diakɔ dimɛna.—Tukedi 13:16; 22:3.
5. a) Dui diakɔna dia lomba diakasale Jeremiya etena kakandasombe ekambɔ? b) Lande na kende ohomba funda lofunda waokanelo tshɛ wasalaso wendana l’awui w’okanda?
5 Etena kakasombe ɔprɔfɛta Jeremiya ekambɔ oma le ɔna ɔnango she laki onyande ɔtɛmɔdi wa Jehowa, nde akasale mukanda wa diokanelo la ntondo k’ɛmɛnyi. (Jeremiya 32:9-12) Ɛlɔ kɛnɛ onto lele la lomba pombaka ndjashikikɛ dia waokanelo tshɛ wendana l’awui w’okanda wasalande la ewotɔ, angɛnyi ndo asekande ambetawudi fundama lofunda.a Funda diokanelo lofunda kimanyiyaka dia mbewɔ mindjo ndo kokɛ kâmɛ. Lo wedi okina, waokanelo wa l’onyɔ mongaka mbala efula kiɔkɔ y’ekakatanu watomba lam’asa ekambi wa Jehowa l’awui w’okanda. Lonyangu ko, ekakatanu wa ngasɔ kokaka ndjokonya onto dia nde monga la lɔkɔnyɔ, tshikala la tokumbɛkumbɛ ndo kânga shisha lonyuma lande.
6. Lande na kahombaso ndjalama diaha monga la lokaki?
6 Sho pombaka ndjalama diaha monga la lokaki. (Luka 12:15) Elongamelo ka kondja wahɔ efula kokaka konya onto dia nde minya yimba oma lo wâle wonga l’okanda wa kɔlɔ. Oyadi kânga wanɛ waki l’ɛkɛndɛ w’ohomba efula l’olimu wa Jehowa wakandama lo djonga shɔ. Ɔtɛkɛta wa Nzambi tewolaka ɔnɛ: “Tanyuyalaki la saki ya diango. Nyuyali la ongenongeno lu diango dieli la nyu.” (Heberu 13:5) Etena kakanande yimba lo kɛnɛ kendana la diaaso dimɔtshi dia munda okanda, Okristo pombaka ndjambola ɔnɛ: ‘Onde ekɔ mɛtɛ ohomba dia dimi ndjasha lɔkɔ?’ Nsɛna lɔsɛnɔ l’ɔsɛlɛngɛ lohikami lo ɔtɛmwɛlɔ watɛmɔlaso Jehowa ayotokokɛ oma lo “wehu tshe w’akambu wa kolo.”—1 Timote 6:6-10.
Ekakatanu wele la Akristo w’enyemba
7. a) Ekakatanu akɔna wahomana l’efula k’Akristo w’enyemba? b) Ngande wele ɔsɔnwɛlɔ w’onto la tshukana la nde ekɔ dui diendana la kɔlamelo y’onto otsha le Nzambi?
7 Ekambi wa Jehowa efula kombolaka tshukana koko watatane elonganyi wakoka lawɔ. Lo wedja ɛmɔtshi, anto tshutshuyaka anto akina dia vɔ tshukana. Mbeyaka monga wolo dia vɔ tana onto lakokawɔ tshukana la nde l’atei w’etshumanelo. (Tukedi 13:12) Akristo mbeyaka dia kitanyiya didjango dia lo Bible dia tshukana paka ‘lo Nkumadiɔndjɔ’ ekɔ dui diendana la kɔlamelo y’onto otsha le Jehowa. (1 Koreto 7:39) Dia vɔ shika tanga lo tɔsɛngiya ndo lo ehemba wahomana lawɔ, Akristo w’enyemba pombaka sungukalaka lo akambo tshɛ.
8. Shɛngiya yakɔna yakahomana la osekaseka w’ose Shulama, ndo ngande wakoka esekaseka w’Akristo pomana la okakatanu wa ngasɔ ɛlɔ kɛnɛ?
8 Dibuku dia Limbu la Solomona tɛkɛtaka dia nkumekanga akalange osekaseka ɔmɔtshi w’ose Shulama. Nde akalange mbêtawoya lo mbɛnya lokema la ɔngɔnyi, la lokumu ndo olangala ande, kânga mbele lâsɔ ko osekaseka ɔsɔ amboshilaka nanga ɔlɔngɔlɔngɔ ɔmɔtshi. (Limbu la Solomona 1:9-11; 3:7-10; 6:8-10, 13) Naka wɛ ekɔ Okristo wa womoto, kete ondo wɛ mbeyaka kotola yambalo ya pami kɛmɔtshi aha la mbeya. Pami kɛmɔtshi lo dihole diayɛ di’olimu, ondo owandji ayɛ w’olimu mbeyaka tatɛ kɔtɛtɛmɔla, kosalɛ ɛlɔlɔ ɛmɔtshi ndo nyanga waaso wa nde monga kâmɛ layɛ. Onga la yewo lo ɛlɔlɔ wa lɔngɔ ɛsɔ. Kânga mbele mbala mɔtshi pami kɛsɔ mbeyaka kosalɛ ɛlɔlɔ wa ngasɔ aha la oyango wa sala layɛ akambo wa mindo, koko tena efula apami watosalaka ngasɔ tongaka l’oyango ɔsɔ. Lo ɛnyɛlɔ ka osekaseka w’emuma w’ose Shulama onga “eheli.” (Limbu la Solomona 8:4, 10) Tona la wolo tshɛ ɛlɔlɔ wakosalɛ pami kɛsɔ dia kɔnga. Kam’atatɛyɛ kamba olimu lo dihole dimɔtshi, ewoya asekayɛ wa l’olimu dia wɛ ekɔ Ɔmɛnyi wa Jehowa ndo kamba la waaso tshɛ dia mbasambisha. Dui sɔ diayokokokɛ.
9. Naa wâle ɛmɔtshi waya lo monga la losambi la onto lahateye dimɛna lo Ɛtɛrnɛtɛ? (Enda nto kiombo yele lo lɛkɛ 30.)
9 Ahole wa lo Ɛtɛrnɛtɛ wakimanyiya enyemba dia kondja elonganyi wekɔ tshavutshavu. Anto efula mbɔsaka dui sɔ oko yoho mɔtshi ya mbeya anto wewɔ bu la diaaso dia mɛnana lawɔ elungi lo elungi. Koko, monga la losambi la onto leso hateye ekɔ tshondo ya wâle. Ekɔ wolo efula shihodia kɛnɛ kele mɛtɛ la kɛnɛ kele kashi lo Ɛtɛrnɛtɛ. (Osambu 26:4) Aha onto tshɛ lata ɔnɛ ekɔ okambi wa Jehowa mbele mɛtɛ ngasɔ. Ndo nto, diɔtɔnganelo dia wolo mbeyaka pama esadi eto oyadi kânga nyu membwana paka mbala ɔtɔi lo Ɛtɛrnɛtɛ ndo dui sɔ kokaka fukutanya yimba y’onto. (Tukedi 28:26) Oyadi lo Ɛtɛrnɛtɛ kana lo yoho kina tshɛ, kema dimɛna monga la diɔtɔnganelo dia ma ma la onto lahateye dimɛna.—1 Koreto 15:33.
10. Ngande wakoka Okristo w’onyemba keketshama oma le anyande ambetawudi?
10 Jehowa mbokaka ekambi ande ‘ngandji ka mamba.’ (Jakoba 5:11) Nde mbeyaka dia ekakatanu wahomana la Akristo watshikala enyemba aha la lolango lawɔ mbeyaka monga mbala mɔtshi pâ heyama ndo nde mandolaka kɔlamelo yawɔ. Ngande wakoka anto akina mbakeketsha? Sho pombaka mbândolaka mbala la mbala dikambo dia okitanyiya ndo dia yimba yawɔ ya ndjahombia. (Embadi 11:39, 40) Sho kokaka nto mbaelɛ lawakaso etena kakongɛso dia sangana kâmɛ l’angɛnyi aso dia keketshanya. Onde wɛ akohɔ mbala k’ekomelo kakayasale dikambo sɔ? Ndo nto, sho kokaka nɔmba dikambo diawɔ, dia Jehowa mbakimanyiya dia vɔ nama wɛdimo awɔ ndo kondja ɔngɛnɔngɛnɔ lo mbokambɛ. Lo ndjakiyanya l’otema ɔtɔi, nyɛsɔ tɛnya dia l’ɛnyɛlɔ ka Jehowa, sho mandolaka anangɛso la akadiyɛso wele la kɔlamelo asɔ.—Osambu 37:28.
Woho wa kandola ekakatanu wendana la yônge ya demba
11. Ekakatanu akɔna wakoka ndja oma lo yônge ya demba yele bu dimɛna?
11 Ekɔ mɛtɛ pâ efula etena katataso shoamɛ kana katata onto ɔmɔtshi lalangaso. (Isaya 38:1-3) Etena kayangaso esakelo ka dimɛna tatohɛke di’ekɔ ohomba efula kitanyiya atɔndɔ wa l’Afundelo. Ɛnyɛlɔ, Akristo pombaka kitanyiya didjango dia lo Bible dia tona dikila ndo mbewɔ toho tshɛ ta mbishola hemɔ ndo toho ta sakɛ hemɔ yakɔ lo yoho yele la losambi la ɛdiɛngɛ. (Etsha 15:28, 29; Ngalatiya 5:19-21) Le wanɛ wele kema la diewo di’awui w’aseka enganga mbɛdikola toho totshikitanyi t’esakelo kokaka monga dikambo diatshindja wɔɔngɔ ndo dia wolo. Kakɔna kayotokimanyiya dia sungukalaka lo akambo tshɛ?
12. Ngande wakoka Okristo monga la wɛdimo etena kasɛdingolande esakelo ɛmɔtshi?
12 “Kanga ewu atushishimaka mbuka katandatshu” lo sala eyangelo lo Bible ndo lo ekanda w’Akristo. (Tukedi 14:15) Lo bɛtshi dimɔtshi dia nkɛtɛ diele adɔkɔtɛlɛ ndo mpitadi kema efula, esakelo wâmɛ wakoka monga ele esakelo wa la ekanga w’anto w’edima wakambawɔ la esongo. Naka tekɔ lo nanga mbeya awui efula wendana l’esakelo wa ngasɔ, sho kokaka tana awui w’ohomba efula lo Tshoto y’Etangelo ya Ngɔndɔ ka nɛi 15, 1987, lɛkɛ 26-29, lo Falase. Yɔ tɛnyaka wâle wakoka monga la esakelo wa ngasɔ. Ɛnyɛlɔ, sho pombaka ndjambola ɔnɛ: Onde osaki w’ekanga w’anto w’edima mbeyamaka oko onto lele la losambi la ɛdiɛngɛ? Onde esakelo kande mendanaka la dietawɔ di’ɔnɛ nyuma ya watshɛwɔ wambovɔka kana atunyi awɔ wakamba la dɔki mbela onto hemɔ ndo nyɔi? Onde nde nambolaka, tɛkɛtaka la djimu kana salaka awui akina wɛnya dia nde ekɔ la losambi l’ɛdiɛngɛ l’ɔlɔngɔswɛlɔ kana lo osakelo washande? (Euhwelu k’Elembe 18:10-12) Eyangelo wa ngasɔ wayotokimanyiya dia kitanyiya dako dia lo Bible diata ɔnɛ: “Nyedikaki akambu tshe: nyukimeli weli ololo.”b (1 Tesalonika 5:21) Dako sɔ diayotokimanyiya dia monga la wɛdimo.
13, 14. a) Ngande wakokaso mɛnya dia tekɔ l’ekanelo k’ɔlɔlɔ etena kakokɛso yônge yaso ya demba? b) Lande na keso l’ohomba wa ekanelo k’ɔlɔlɔ lam’asawolaso la asekaso dikambo dia hemɔ ndo dia esakelo?
13 Monga la ekanelo k’ɔlɔlɔ l’awui tshɛ wa lo lɔsɛnɔ mbidja ndo okokelo wa yônge yaso ya demba ekɔ ohomba efula. (Filipi 4:5) Mbidja yimba lo yônge yaso ya demba la wɛdimo tshɛ ekɔ yoho mɔtshi ya mɛnya dia sho mbɔsaka lɔsɛnɔ la nɛmɔ efula. Ekɔ ohomba efula mbidja yimba lo dikambo sɔ etena katataso. Koko, tayonga la yônge ya kokele paka lam’ayokoka etena ka Nzambi “nkonoya wedja.” (Enyelo 22:1, 2) Sho pombaka menda ɔlɔlɔ diaha ndeka ndjakiyanya lo dikambo dia yônge ya demba ko tshindja awui wa lo nyuma l’ɔkɔngɔ.—Mateu 5:3; Filipi 1:10.
14 Sho pombaka monga nto la wɛdimo ndo la ekanelo k’ɔlɔlɔ etena kasawolaso la anto akina lo kɛnɛ kendana la hemɔ ndo la esakelo. Awui asɔ hawohombe mongaka tena tshɛ l’ɛlɔmɔ aso etena kahomanaso l’asekaso Akristo lo nsanganya ya l’etshumanelo ndo ya weke. Ndo nto, tɛdikɔ tendana la esakelo k’aseka enganga mendanaka mbala efula la atɔndɔ wa lo Bible, la nkum’otema k’onto ndo la diɔtɔnganelo diele l’onto la Jehowa. Koko, bu dimɛna mbetawoya osekaso ombetawudi kanyi yaso la wolo kana mbotshutshuya diaha nde mbidja yimba lo kɛnɛ kawotɛ nkum’otema kande. Sho mbeyaka nɔmba anto wambotshunda lo nyuma dia vɔ tokimanyiya. Koko, Okristo tshɛ pombaka ‘mɛmba wotsho ande ndamɛ’ lo kɛnɛ kendana la tɛdikɔ tɔsande nɛ dia ‘sho tshɛ tayoyokoya la Nzambi.’—Ngalatiya 6:5; Romo 14:12, 22, 23.
Etena kahomanaso la ekakatanu wa wolo
15. Ngande wakoka awui wa pâ efula monga la shɛngiya lo dionga diaso?
15 Awui wa pâ efula kokaka konya kânga okambi wa kɔlamelo wa Jehowa dia nde tɛkɛta kana sala akambo aha la kana yimba. (Undaki 7:7) Etena kakinde lo ehemba wa wolo, Jɔbɔ akashisha yema ya wɛdimo ande. Ndo nde akahombe ndjotshikitanya ekanelo kande ka yimba. (Jobo 35:2, 3; 40:6-8) Kânga mbele “Mose aki untu kanga memakana ka wulu, ndeka antu tshe wa la kete,” lo diaaso dimɔtshi nde akoke kɛlɛ ndo akatɛkɛta aha la kana yimba. (Walelu 12:3; 20:7-12; Osambu 106:32, 33) Davidi aki la ndjakimɛ ka dimɛna efula lo woho wakandatone ndjaka nkumekanga Saulo. Koko etena kakɔtɛngɛ Nabala ndo kakandatɛkɛta kɔlɔ lo dikambo di’anto ande, Davidi akomala heyama polo ndo lo shisha ekanelo kande k’ɔlɔlɔ. Kɛnɛ kakasale Abingayili mbakahandja Davidi diaha nde sala pɛkato ka woke.—1 Samuele 24:2-7; 25:9-13, 32, 33.
16. Kakɔna kakoka tokimanyiya diaha sala akambo aha la kana yimba?
16 Sho lawɔ mbeyaka pomana la awui wa pâ efula wakoka toshishɛ ekanelo kaso k’ɔlɔlɔ. Sɛdingola la yambalo tshɛ tokanyi taki anto akina oko wakasale Davidi kokaka tokimanyiya dia sho mbewɔ dia sala akambo aha la kana yimba ndo sala pɛkato esadi eto. (Tukedi 19:2) Ndo nto, Ɔtɛkɛta wa Nzambi totɛka ɔnɛ: “[Nyoke kɛlɛ], keli tanyutshaki kolo; Nyotekete lu khumu y’etema yanyu lam’enyu lu tangi, ku nyuyali ki.” (Osambu 4:4) Lɛnɛ akoka dikambo sɔ, ekɔ dui dia lomba dia kongɛ polo ndo taya ki la ntondo ka mbɔsa yɛdikɔ mɔtshi. (Tukedi 14:17, 29) Sho kokaka nɔmba Jehowa la etete tshɛ ndo “ki ka [Nzambi], kuleki yimba tshe, ayulama etema [aso] la tukanyi [taso] le Kristu Jesu.” (Filipi 4:6, 7) Ki kaki Nzambi kɛsɔ kayotokimanyiya dia sho sungukalaka lo akambo tshɛ.
17. Lande na kahombaso ndjaɛkɛ le Jehowa dia sungukalaka lo akambo tshɛ?
17 Oyadi welo tshɛ wakokaso mbidja dia mbewɔ wâle ndo sala akambo la lomba, sho tshɛ salaka munga. (Jakoba 3:2) Sho kokaka sala dikambo dimɔtshi dia kɔlɔ aha la mbeya. (Osambu 19:12, 13) Kɛnɛ koleki tshɛ ele oko weso anto sho kema la akoka ndo la lotshungɔ la nɔmbɔla wanya aso aha la ekimanyielo ka Jehowa. (Jeremiya 10:23) Tekɔ mɛtɛ la ɔngɛnɔngɛnɔ oko watoshikikɛnde ɔnɛ: “Dimi layuketshaka ndu layukenyaka mbuka ka we kendakenda, dimi layukulakaka, layukendaka.” (Osambu 32:8) Eelo, la ekimanyielo ka Jehowa sho kokaka sungukalaka lo akambo tshɛ.
[Nɔte ya l’ɛse ka dikatshi]
a Dia mbeya awui efula wendana la waokanelo wa lofunda l’awui w’okanda enda lo Tshoto y’Etangelo, ya Ngɔndɔ k’enanɛi 1, 1997, lɛkɛ 18-19; ya Ngɔndɔ ka dikumi l’ɔtɔi 15, 1986, lɛkɛ 16-17; ndo lo Réveillez-vous! wa Ngɔndɔ ka tanu 8, 1983, lɛkɛ 13-15 tshɛ lo Falase, periodikɛ yakatondjama oma le Ɛmɛnyi wa Jehowa.
b Dako nɛ diayokimanyiya efula wanɛ tshɛ walanga sɛdingola toho t’esakelo tavɔwɔ tshɔdia dia sakɛ hemɔ mɔtshi.
Ngande wayoyokadimola?
Ngande wakokaso sungukalaka
• naka wambotosha diaaso dimɔtshi dia munda okanda?
• etena kayangaso olonganyi?
• etena keso la hemɔ?
• etena kahomanaso l’ekakatanu?
[Kiombo ya lo lɛkɛ 30]
Onde wɛ ayɛkɛ otema lo awui wa lɔkɔ?
Ditelo nɛ tanemaka l’ahole wa l’Ɛtɛrnɛtɛ wayanga enyemba elonganyi ndo diɔ mɛnyaka di’akanga adiɔ bu l’onongo wa dui tshɛ diakoka tomba:
“Oyadi welo tshɛ wakokaso mbidja, sho kema l’eshikikelo ka mɛtɛ lo kɛnɛ kendana la lonto l’onto lembɔna la yɛ.”
“Sho kema l’eshikikelo k’ɔnɛ awui tshɛ wele lo ahole ango wekɔ mɛtɛ, kokele ndo amɛna.”
“Tokanyi, alako, ditelo kana awui akina tshɛ watanema lo ahole [ango] mendanaka paka la afundji . . . ndo bu ohomba mbɛkɛ otema lɔkɔ.”
[Osato wa lo lɛkɛ 29]
“Kanga ewu atushishimaka mbuka katandatshu”
[Esato wa lo lɛkɛ 30, 31]
Ngande wakoka Okristo wa womoto mbokoya osekaseka w’ose Shulama?
[Osato wa lo lɛkɛ 32]
“Nyedikaki akambu tshe: nyukimeli weli ololo”