Towese oyango wa dimɛna lo lɔsɛnɔ
“Engo tshe keli la lumu, katumbuli [Jehowa].”—OSAMBU 150:6.
1. Kɔndɔla woho wakatayangaka ɔlɔngɔ a pami ɔmɔtshi lɔsɛnɔ lele l’oyango.
SEUNG JIN, lakole lo wodja wa Corée mbutaka ate: “Dimi lakɔtɔ kalasa k’onganga nɛ dia lakakombola ndjokamba la lɔsɛnɔ lami dia kimanyiyaka anto.a Lakafɔnyaka nto ɔnɛ dihole dia lokumu diayonga lami ndo falanga yayomolongolaka lam’ayomonga dɔkɔtɛlɛ yayombisha ɔngɛnɔngɛnɔ. Etena kakamayoshihodiaka dia ekimanyielo kakoka mbisha dɔkɔtɛlɛ onto kekɔ l’elelo, dimi lakayɔkɔmɔ otema. Oma lâsɔ, lakayotatɛka mbeka olimu w’osangelo w’asango kana wa takitaka mikubu, koko lakayaoke dia olimu akɔ kondjiyɛkami dimɛ oto ɔngɛnɔngɛnɔ. Lakayongaka ombetsha ndo kombeta edja lakɛnyi dia laketshaka ambeki awui ato, aha mbasha ɛlɔmbwɛlɔ kakakoke mbaela ɔngɛnɔngɛnɔ wa mɛtɛ.” Oko wasala anto efula, Seung Jin akatawesaka oyango wa dimɛna lo lɔsɛnɔ.
2. a) Kakɔna kalembetshiya monga l’oyango lo lɔsɛnɔ? b) Ngande weyaso dia Otungi akikɔ la sangwelo dimɔtshi lo tokitsha lanɛ la nkɛtɛ?
2 Monga l’oyango wa mɛtɛ lo lɔsɛnɔ nembetshiyaka mbeya lande na keso la lɔsɛnɔ, monga la oyango ɔmɔtshi wa shikaa wadjaso welo aso tshɛ lɔkɔ. Onde anto kokaka monga mɛtɛ l’oyango ɔmɔtshi wa ngasɔ? Eelo! Woho wakatatongama la yimba, la nkum’otema ndo la dikoka dia kanyiya mɛnyaka dia Otungi aki l’ɔkɔkɔ w’oshika wa tokitsha lanɛ la nkɛtɛ. Ɔnkɔnɛ, paka lo nsɛna lo yoho yɔtɔnɛ la sangwelo diaki Otungi mbakokaso monga l’oyango wa mɛtɛ lo lɔsɛnɔ ndo kotsha oyango akɔ.
3. Sangwelo diaki Nzambi otsha le anto mendanaka l’awui akɔna?
3 Bible mɛnyaka dia sangwelo diaki Nzambi lo dikambo diaso mendanaka l’awui efula. Ɛnyɛlɔ, yoho ya diambo yakatatongama mɛnyaka ngandji k’otamanya kele la Nzambi. (Osambu 40:5; 139:14) Ɔnkɔnɛ, nsɛna lo yoho yɔtɔnɛ la sangwelo diaki Nzambi nembetshiyaka mboka anto akina ngandji k’otamanya. (1 Joani 4:7-11) Kɛsɔ nembetshiyaka nto kitanyiya wadjango waki Nzambi, watokimanyiya dia nsɛna lo yoho yɔtɔnɛ la sangwelo diande dioludi la ngandji.—Undaki 12:13; 1 Joani 5:3.
4. a) Kakɔna kalɔmbama dia sho monga l’oyango wa mɛtɛ lo lɔsɛnɔ? b) Naa oyango woleki dimɛna wakoka onto tshɛ mbesa?
4 Sangwelo dikina diaki Nzambi aki dia anto nsɛna l’ɔngɛnɔngɛnɔ ndo lo wɔladi lam’asawɔ ndo lam’asawɔ la ditongami dikina. (Etatelu 1:26; 2:15) Ko, kakɔna kahombaso sala dia monga l’ɔngɛnɔngɛnɔ, la wɔladi ndo la ki ka lo yimba? Oko ɔna dikɛnda lele l’ohomba wa mbeya ɔnɛ ambutshi ande wekɔ suke la nde dia nde monga l’ɔngɛnɔngɛnɔ ndo ndjaoka l’ekokelo, sho pombaka monga la diɔtɔnganelo di’oshika lam’asaso la Shɛso lele l’olongo dia sho monga l’oyango wa mɛtɛ lo lɔsɛnɔ. (Heberu 12:9) Nzambi akatosha diaaso dia sho monga la diɔtɔnganelo dia ngasɔ lam’asaso la nde lo mbetawɔ dia sho ndjasukanya la nde ndo lo woho wahokamɛnde alɔmbɛlɔ aso. (Jakoba 4:8; 1 Joani 5:14, 15) Naka sho ‘kɛndakɛnda la Nzambi’ la mbetawɔ ndo koma angɛnyi ande, kete sho koka ngɛnyangɛnya ndo tombola Shɛso lele l’olongo. (Etatelu 6:9; Tukedi 23:15, 16; Jakoba 2:23) Ɔsɔ mbele oyango woleki tshɛ wakoka onto tshɛ monga lawɔ. Omembi w’esambo akafunde ate: “Engo tshe keli la lumu, katumbuli [Jehowa].”—Osambu 150:6.
Oyango akɔna wele layɛ lo lɔsɛnɔ?
5. Lande na kele ekɔ dui di’enginya dia mbetsha wahɔ wa l’emunyi lo dihole dia ntondo?
5 Etenyi kɛmɔtshi ka sangwelo diaki Nzambi lo dikambo diaso ele dia sho ndjakokɛ dimɛna ndo kokɛ nkumbo yaso. Kɛsɔ nembetshiyaka nto kotsha ehomba aso wa lo nyuma ndo wa lo demba. Koko, ekɔ ohomba monga la wɛdimo lo dikambo sɔ diaha wahɔ kana ekiyanu w’awui wa lo demba ndjeta la ntondo k’awui wa lo nyuma, woleki ohomba. (Mateu 4:4; 6:33) Lonyangu ko, anto efula mbidjaka suke la welo awɔ tshɛ dia kondja lomombo la l’emunyi. Koko, sala la wolo dia kotsha ehomba aso tshɛ lo tawesaka paka lomombo la l’emunyi ekɔ dui di’enginya. Ɛkɔnya wakawakɔnya ase ɛngɔnyi ɛmɔtshi wa l’Asiya atete edja mɛnyaka dia anto efula l’atei awɔ “ndjaokaka dia vɔ bu la ekokelo ndo wekɔ l’ekiyanu efula kânga mbewɔ l’ahole wa lâdiko lo tshunda ndo mbangɛnangɛnawɔ l’awui wambowosala oma l’ɛngɔnyi awɔ.”—Undaki 5:11.
6. Dako diakɔna diakasha Yeso anto watayange ɛngɔnyi?
6 Yeso akatɛkɛta dia “lukesu l’ekundji.” (Mako 4:19) Ngande wele lomombo la l’emunyi lokeso? Lomombo la l’emunyi konyaka onto dia fɔnya ɔnɛ nde ekɔ l’ɔngɛnɔngɛnɔ, ko tete le bu. Sɔlɔmana nkumekanga ka lomba akate ate: “One latukaka falanga ngandji, hatuyilutaka.” (Undaki 5:10) Ko onde onto kokaka mbesa eyango wa l’emunyi ko l’etena kakɔ kâmɛ akambɛ Nzambi l’anima ande tshɛ? Ndooko! Yeso akalembetshiya ate: “Nduku untu leya nkambela ewandji ehendi ulimu. Ne dia ndi ayuhetsha omotshi, ayulanga ukina, kana ayekela omotshi, ayonyola ukina. Nyu hanyeyi nkambela [Nzambi] la ukundji ulimu.” Yeso akakeketsha ambeki ande dia vɔ ndjaombɛ, aha diangɔ dia l’emunyi la nkɛtɛ, koko dia ndjaombɛ “diango l’ulungu.” Dui sɔ nembetshiyaka monga la lokombo l’ɔlɔlɔ le Nzambi, ɔnɛ ‘lateyaka diangɔ diele laso ohomba la ntondo ka sho mbɔlɔmbadiɔ.’—Mateu 6:8, 19-25.
7. Ngande wakokaso kukutɛ “lɔsɛnɔ l’oshika”?
7 Lam’akandafundɛ wonyande Timɔtɛ, ɔpɔstɔlɔ Paulo akawosha alako amɔtshi wa wolo lo dikambo di’ɔngɔnyi. Nde akatɛ Timɔtɛ ate: “Ewuli akanga w’engonyi [wate] . . . tawulungamelaki efumbofumbo k’ongonyi, keli walungameli [Nzambi], latutushaka diango tshe ushasha ne dia ntongenyangenya . . . la dia vo ndjala la lukahu, ndu wuki akina ketshi. Vo wayaumbeli tshina di’ololo dia luudu l’etena kayuya, ne dia vo [kukutɛ lɔsɛnɔ l’oshika, NW].”—1 Timote 6:17-19.
“Lɔsɛnɔ l’oshika” kɛdikɛdi na?
8. a) Lande na kasala anto efula la wolo dia monga la ɔngɔnyi ndo la dihole dia lokumu? b) Dui diakɔna diohɛ anto asɔ?
8 Le anto efula, etelo k’ɔnɛ “lɔsɛnɔ l’oshika” mbelaka kanyi ya monga la lɔsɛnɔ l’ɔngɔnyi ndo l’ɔngɛnɔngɛnɔ. Jurnalɛ mɔtshi ya l’Asiya yakate ɔnɛ: “Anto wenda waa filmɛ kana televiziɔ mbekaka dia kombola kɛnɛ kɛnawɔ ndo vɔ mɛnaka alɔ wa kɛnɛ kakokawɔ monga latɔ.” Anto efula mbetɛka ekondjelo k’ɔngɔnyi ndo dihole dia lokumu oyango wa lo nsɛnɔ yawɔ. Anto efula mbetawɔka nambola nshi yawɔ y’ɛlɔngɔlɔngɔ, alemba awɔ, lɔsɛnɔ la nkumbo yawɔ ndo wahɔ wa lo nyuma dia nyanga diangɔ sɔ. Anto yema tshitshɛ tsho mbeya dia esato w’ɛngɔnyi wɛnawɔ ɛsɔ ekɔ tsho ɔkɛnɛmwɛlɔ wa ‘yimba ya l’andja ɔnɛ,’ mbuta ate yoho y’ekanelo kamboleka monga la anto efula ndo katshutshuya miliyara y’anto dia sala akambo lo yoho yahɔtɔnɛ la sangwelo diaki Nzambi oya le so. (1 Koreto 2:12; Efeso 2:2) Aha la tâmu, anto efula bu l’ɔngɛnɔngɛnɔ ɛlɔ kɛnɛ!—Tukedi 18:11; 23:4, 5.
9. Kakɔna kahakokaki anto sala pondjo, ndo lande na?
9 Kayotota di’anto wayasha tshɛ dikambo dia wahɔ w’anto akina dia minya ndjala, hemɔ ndo wɛngiya? Mbala la mbala anto kondjaka wahɔ oma lo welo wa la ndjahombia wadjawɔ ɛsɔ. Koko, oyadi welo w’amɛna efula wadjawɔ, vɔ hawotshikitanyaki pondjo dikongɛ di’akambo nɛ dia dikonya dikongɛ diele l’awui wosembwe ndo di’ɔlɔlɔ. Lande na kahawakoke sala dui sɔ? Nɛ dia lo mɛtɛ “wa la kete tshe weko lu wulu wa kanga kolo,” mbuta ate Satana ndo nde halange dia dikongɛ nɛ tshikitana.—Joani 5:19.
10. Etena kakɔna kayokondja akanga wa kɔlamelo “lɔsɛnɔ l’oshika”?
10 Ande kandji le onto lele bu l’elongamelo kekina paka lɔsɛnɔ la l’andja ɔnɛ loto lee! Paulo akafunde ate: “Naka shu tambulungamela Kristu lam’ekisu la lumu lone lutu, ku shu tambuleka antu tshe nsuyama.” Anto wetawɔ dia lɔsɛnɔ lɔnɛ katshɛ welɔ anɛ, mbutaka ɔnɛ: “Tolekaki, tonokaki, ne dia shu tayuvo lui.” (1 Koreto 15:19, 32) Koko tekɔ la elongamelo, mbuta ate nɛ dia “daka dia [Nzambi] mbalungamelasu ulungu w’uyuyu la kete y’uyuyu lene udjashi akambu w’ololo.” (2 Petero 3:13) L’etena kɛsɔ, Akristo wayonga la ‘lɔsɛnɔ l’oshika,’ lele “lumu la pundju” la kokele, oyadi l’olongo kana la nkɛtɛ l’ɛse ka lowandji la Diolelo diaki Nzambi!—1 Timote 6:12.
11. Lande na kele kamba la wolo dia tɔla wahɔ wa Diolelo diaki Nzambi otsha la ntondo mbele oyango woleki dimɛna?
11 Paka Diolelo diaki Nzambi to mbayoyokandola ekakatanu tshɛ wele l’anto. Kamba la wolo dia tɔla wahɔ wa Diolelo diaki Nzambi otsha la ntondo mbele oyango woleki dimɛna wakoka onto tshɛ mbesa. (Joani 4:34) Etena kakambaso olimu ɔsɔ, sho mongaka la diɔtɔnganelo di’ɔlɔlɔ la Shɛso lele l’olongo. Tekɔ nto la diɛsɛ dia kamba kâmɛ la miliyɔ y’anangɛso l’akadiyɛso wa lo nyuma, wanɛ watawese oyango akɔ wâmɛ lo lɔsɛnɔ.
Ndjahombia ka dimɛna
12. Ɛnya otshikitanu wele lam’asa lɔsɛnɔ la lo dikongɛ nɛ la “lɔsɛnɔ l’oshika.”
12 Bible mbutaka ɔnɛ andja wele kakianɛ “la saki yawo wayushila.” Ndoko etenyi k’andja waki Satana, mbidja ndo lokumu la ɔngɔnyi alɔ wayoshimbamɛ, koko “one latutshaka lulangu la [Nzambi] atuyalaka pundju.” (1 Joani 2:15-17) Otshikitanyi la efumbɔfumbɔ k’ɔngɔnyi, lotombo lahakɔhɛ la shila ndo ɛngɛnɔngɛnɔ wa tshenyitenyi wa lo dikongɛ di’akambo nɛ, “lɔsɛnɔ l’oshika” kana lɔsɛnɔ la pondjo l’ɛse ka Diolelo diaki Nzambi layotshikala pondjo ndo l’ɔtɛ alɔ mbakokaso mbetawɔ ndjahombia diangɔ dikina.
13. Ngande wakayahombia atshukanyi amɔtshi lo yoho ya dimɛna?
13 Tɔsɛdingole ɛnyɛlɔ kaki Henry nde la Suzanne. Vɔ waki la mbetawɔ ka shikaa lo daka diaki Nzambi di’ɔnɛ onto tshɛ letsha wahɔ wa Diolelo lo dihole dia ntondo ayolongola ekimanyielo oma le Nzambi. (Mateu 6:33) Ɔnkɔnɛ, vɔ wakasɔnɛ dia mbidjasɛ lo luudu lele bu oshinga wolo woho ɔnɛ wele lo dihole dia vɔ tshɛ kambaka olimu dia futɛka luudu l’oshinga wolo, vɔ wakakoke mbetsha wenya efula l’akambo wa lo nyuma kâmɛ l’anawɔ ahende wa wamato. (Heberu 13:15, 16) Ɔngɛnyi awɔ ɔmɔtshi wakayakiyanyaka dikambo diawɔ kokoka shihodia yɛdikɔ yakawɔshi shɔ. Nde akatɛ Suzanne ate: “Suzanne, naka nyu kombolaka mbidjasɛ lo luudu loleki dimɛna, kete nyetawɔ shisha ɛngɔ kɛmɔtshi.” Koko, Henry nde la Suzanne, wakeyaka dia mbetsha Jehowa lo dihole dia ntondo ekɔ “la daka dia lumu leli kakiane, ndu dia lumu layayi.” (1 Timote 4:8; Tito 2:12) Anawɔ wa wamato wakole ndo wakakome esambisha wa lo tena tshɛ wele l’ohetoheto. Lo nkumbo kawɔ, vɔ kondjaoka dia wamboshisha ɛngɔ kɛmɔtshi; koko vɔ wakakondja wahɔ efula lo ndjadjɛ oyango wa mbesa “lɔsɛnɔ l’oshika.”—Filipi 3:8; 1 Timote 6:6-8.
‘Tatoyatambiyake tshavu l’andja ɔnɛ’
14. Wâle akɔna wakoka tokomɛ naka sho minya yimba lo oyango aso wa mɛtɛ?
14 Koko, ekɔ wâle wa mamba, naka sho shisha oyango aso wa mɛtɛ lo mbohɛ kukutɛ “lɔsɛnɔ l’oshika.” ‘Ekiyanu, ɛngɔnyi ndo ɛngɛnɔngɛnɔ wa lo lɔsɛnɔ’ mbeyaka ndjotɔsa tshɛ. (Luka 8:14) Nsaki ka tshamba ndeko ka lomombo la l’emunyi ndo “edinganu wa lumu lone” koka tokonya lo sho ndjatambiya tshavu l’akambo wa lo dikongɛ di’akambo nɛ. (Luka 21:34) Lonyangu ko, anto amɔtshi wakonge la mposa kaya la anto efula ka monga ɛngɔnyi, ko “waketola uma lu mbuka ka mbetawo, wakayatshatsha la nyangu ya wulu efula,” wakayoshishaka ndo diɔtɔnganelo di’oshinga wolo diasawɔ la Jehowa. Lo mɛtɛ, etombelo wa kɔlɔ efula komɛka wanɛ ‘wahakukutɛ lɔsɛnɔ la pondjo’!—1 Timote 6:9, 10, 12; Tukedi 28:20.
15. Wahɔ akɔna wakakondja nkumbo kɛmɔtshi lo mbewɔ dia ‘ndjatambiya tshavu l’akambo wa l’andja ɔnɛ’?
15 Paulo akatolake ate: “Anɛ wooka ɔlɔ la mbo ya l’anja nyɛ, wayaale oko anɛ wahooke ɔlɔ layɔ.” (1 Koreto 7:31, Dyookaneelo dy’Oyooyo) Keith nde la Bonnie wakayele dako sɔ. Keith mbutaka ate: “Dimi lakakome Ɔmɛnyi wa Jehowa etena kakamashidiya kalasa k’onganga kendana l’awui wa lo wanyu. Laki l’ɔsɔnwɛlɔ wa sala. Lakakokaka nongola ɛkɔnyi efula ndo monga la falanga efula, koko otomosala ngasɔ tshike dui sɔ diototodjɛ wekamu l’olimu wakambɛso Nzambi. Lakɔsɛ yɛdikɔ yaha nongolaka ɛkɔnyi efula dia monga la wenya efula wa sala akambo wa lo nyuma ndo dia kotsha ehomba wa longandji wa nkumbo kaso ndo wa anaso atanu wa wamato. Kânga mbakatakondjaka falanga nkina lo tena dimɔtshi, takeyaka woho wa kamba layɔ dimɛna ndo tena tshɛ taki la kɛnɛ kakatahombaka. Taki la diɔtɔnganelo di’ɔlɔlɔ lo nkumbo ndo la lɔsɛnɔ la nkumbo l’ɔngɛnɔngɛnɔ efula. L’ɔkɔngɔ diko, sho tshɛ takayokambaka olimu wa lo tena tshɛ. Ɛlɔ kɛnɛ, anaso wekɔ l’awala w’ɔngɛnɔngɛnɔ, asato l’atei awɔ wambota ana. Nkumbo yawɔ nto yekɔ l’ɔngɛnɔngɛnɔ, oko watetemalawɔ mbetsha sangwelo diaki Jehowa lo dihole dia ntondo.”
Tetsha sangwelo diaki Nzambi lo dihole dia ntondo lo lɔsɛnɔ laso
16, 17. Bible toshaka bɛnyɛlɔ diakɔna di’anto waki la diewo, ndo vɔ mbohɔmaka l’ɔtɛ wa na?
16 Bible toshaka bɛnyɛlɔ di’anto wakasɛnɛ lo yoho yɔtɔnɛ la sangwelo diaki Nzambi ndo dia wanɛ waki kɔsɛna lo yoho yɔtɔnɛ la sangwelo diakɔ. Wetshelo w’oma lo bɛnyɛlɔ sɔ wekɔ ohomba le anto wa lo nɔnga tshɛ, waoho tshɛ ndo wele l’akambo wotshikitanyi. (Romo 15:4; 1 Koreto 10:6, 11) Nimirɔdɛ akake esomba wa weke, koko nde akasale dikambo sɔ dia ndɔshana la sangwelo diaki Jehowa. (Etatelu 10:8, 9) Anto akina waki bɛnyɛlɔ di’ɛlɔlɔ. Ɛnyɛlɔ, Mɔsɛ kɔmbɔsa dihole dia lɔnɛnɛ diaki lande lo Edjibito oko oyango wa lo lɔsɛnɔ. Koko, nde akɔsɛ waɛsɛ wakawosha Nzambi dia “[w]ambuleka diango tshe dia l’Edjibitu ongonyi.” (Heberu 11:26) Ondo onganga Luka akakimanyiya Paulo ndo anto akina lo hemɔ yaki lawɔ. Koko Luka akasalɛ anto akina ɔlɔlɔ woleki oko wakinde osambisha ndo ofundji ɔmɔtshi wa Bible. Lo wedi ande, Paulo mbeyamaka, aha oko ombeyi wa Ɛlɛmbɛ, koko oko misiɔnɛrɛ, mbuta ate: “Utumami le asi wedja.”—Romo 11:13.
17 Davidi mbohɔmaka ntondotondo, aha oko owandji w’asɔlayi kana oko opomi wa mishiki ndo oko ofundji, koko oko ‘onto lakalangema otamanya oma le Nzambi.’ (1 Samuele 13:14) Sho mbeyaka Danyɛlɛ, aha l’ɔtɛ wakinde owandji wa lɛɛta la Babilɔna, koko l’ɔtɛ w’olimu wakandakambɛ Jehowa oko ɔprɔfɛta wa kɔlamelo; Ɛsta, aha l’ɔtɛ wakinde nkumekanga ka womoto ka Pɛrɛsiya, koko lo woho wakinde ɛnyɛlɔ ka dihonga ndo ka mbetawɔ; Petero, Andɛlɛ, Jakɔba ndo Joani, aha l’ɔtɛ wakiwɔ amundji wa nse wa tomanamana, koko lo woho wakiwɔ apɔstɔlɔ waki Yeso. Ndo kɛnɛ koleki tshɛ ele Yeso mbohɔmaka aha oko “utshudi,” koko oko “Kristu.” (Mako 6:3; Mateu 16:16) Vɔ tshɛ wakashihodia hwe dia oyadi akoka waki lawɔ kana kɛnɛ kaki lawɔ kana dihole diaki lawɔ, nsɛnɔ yawɔ yakahombe mpikama aha l’elimu awɔ wa l’emunyi koko l’olimu wa Nzambi. Vɔ wakeyaka dia kɛnɛ koleki ohomba ndo difuto dioleki tshɛ diakawakoke kondja aki dia monga apami la wamato woka Nzambi wɔma.
18. Ngande wakɔshi Okristo ɔmɔtshi w’ɔlɔngɔlɔngɔ yɛdikɔ ya kamba la lɔsɛnɔ lande, ndo kakɔna kakandayɛnaka l’ɔkɔngɔ diko?
18 Seung Jin, lakatatɛkɛtshi dikambo diande l’etatelo ka sawo, nde lawɔ akayoshihodiaka dikambo sɔ. Nde mbutaka ate: “Lo dihole dia dimi mbetsha wolo ami tshɛ l’olimu w’onganga, l’olimu wa disangasanga kana w’ombetsha, lakɔsɛ yɛdikɔ ya kamba la lɔsɛnɔ lami lo yoho yɔtɔnɛ la ndjakimɔ kami le Nzambi. Ɛlɔ kɛnɛ lekɔ lo kamba lɛnɛ ele ohomba efula w’embetsha wa Bible, lo kimanyiya anto dia vɔ mbɔtɔ lo mboka k’otsha lo lɔsɛnɔ la pondjo. Dimi kɔfɔnyaka dia monga okambi wa lo tena tshɛ ayonga dikambo di’ɔngɛnɔngɛnɔ. Koko ɛlɔ kɛnɛ mbamomoleka monga la ɔngɛnɔngɛnɔ etena kasalami tshɛ dia ndowanya lonto lami ndo dikoka diami dia mbetsha anto wele la mbekelo yotshikitanyi. Dimi lambɛna dia ndjadjɛ oyango wa sala akambo lo yoho yɔtɔnɛ la sangwelo dia Jehowa mbele yoho yâmɛ ya lɔsɛnɔ yoleki dimɛna.”
19. Ngande wakokaso monga l’oyango wa mɛtɛ lo lɔsɛnɔ?
19 Oko weso Akristo, tekɔ la diɛsɛ dia kondja ewo kashimbɛ nsɛnɔ ndo katɔla otsha lo lɔsɛnɔ la pondjo ndo elongamelo ka panda. (Joani 17:3) Ɔnkɔnɛ, “ta[to]lungulaki ngandji ka mamba ka [Nzambi] anyanya.” (2 Koreto 6:1) Koko, nyɛsɔ tokambe la nshi yaso ndo la ɛnɔnyi w’ohomba wa lo nsɛnɔ yaso dia tombola Jehowa. Nyɛsɔ tokahane l’anto akina ewo kasha ɔngɛnɔngɛnɔ wa mɛtɛ kakianɛ ndo katɔla otsha lo lɔsɛnɔ la pondjo. Lo sala ngasɔ, tayɛna mɛtɛ k’ɛtɛkɛta waki Yeso wata ɔnɛ: “Mbisha, ambuleka nungula otshoko.” (Etsha 20:35) Ndo tayonga l’oyango wa mɛtɛ lo lɔsɛnɔ.
[Nɔte ka l’ɛse ka dikatshi]
a Nkombo mɔtshi yakatshikitanyema.
Onde wɛ kokaka nembetshiya?
• Oyango akɔna woleki tshɛ ohomba wakokaso ndjadjɛ lo lɔsɛnɔ?
• Lande na kele ekɔ dui di’enginya mbesana la lomombo la l’emunyi?
• “Lɔsɛnɔ l’oshika” lakalake Nzambi kɛdikɛdi na?
• Ngande wakokaso kamba la nsɛnɔ yaso lo dikambo dia sangwelo diaki Nzambi?
[Esato wa lo lɛkɛ 20]
Akristo pombaka ndjahombia lo yoho ya dimɛna