Woshelo w’apɔlɔmɛ wa Kalasa ka 123 ka Ngiliyadɛ

Wanɛ wambolongola apɔlɔmɛ lo Kalasa ka Ngiliyadɛ wambokeketshama dia ‘tatɛ tshimola’

LUSHI la samalo, Ngɔndɔ ka divwa 8, 2007, anto 6 352 w’oma lo wedja 41 wakikɔ lawɔ lo woshelo w’apɔlɔmɛ le wanɛ wakɔtɔ kalasa ka 123 ka Ngiliyadɛ. Lo 10:00 wa pindju, ɔnangɛsɔ Anthony Morris la lo Olui-walɔmbɔla waki ɔnɔmbɔdi wa losanganya lakɔ akakombolɛ ampokami oyelo w’ɔlɔlɔ. L’ɔkɔngɔ wa yema y’ɛtɛkɛta wa mbɔtwɛlɔ, nde akɔtshiya ɔnangɛso Gary Breaux la lo kɔmite ka filialɛ ka lo wodja wa États-Unis.

Ɔnangɛso Breaux akashikikɛ ambeki dia oyadi ɛnamelo ka lo demba kele lawɔ, wanɛ wasala lolango la Jehowa wekɔ elangala efula lo washo Ande. (Jer. 13:11) Nde akakeketsha wanɛ wakalongola apɔlɔmɛ dia vɔ nama yoho y’olangala shɔ. Ndo oma lâsɔ, ɔnangɛso Gerrit Lösch la lo Olui-walɔmbɔla akɛnya dia ekɔ dimɛna nongamɛ difuto oma le Jehowa naka tekɔ lo mbokambɛ. (Heb. 11:6) Koko, ngandji mbahomba ndeka totshutshuya dia kambɛ Jehowa.

Oma lâsɔ nto, ɔnangɛso William Samuelson, omendji wa departɛma diendana la Kalasa ya teokrasi, akakeketsha wanɛ wolongodi apɔlɔmɛ dia vɔ kukutɛ la kɔlamelo olimu awɔ wa nɛmɔ wa mbewoya anto awui wendana la Nkumekanga kalɔmbɔla ndo mɛnya dui sɔ oma lo lɔkɛwɔ lawɔ l’ɔlɔlɔ.a Ɔnangɛso Sam Roberson, okimanyedi w’omendji wa lo departɛma diendana la Kalasa ya teokrasi akakeketsha wanɛ wambolongola apɔlɔmɛ dia nyangaka tena tshɛ waonga w’ɛlɔlɔ le anto akina. Lo sala ngasɔ mbakokawɔ ‘mboka anangɛso wa lo nkumbo k’onto la ɔnango ka lo andja w’otondo ngandji.’​—1 Pet. 2:17.

L’ɔkɔngɔ w’asawo wakeketsha asɔ, ɔnangɛso Mark Noumair lele ombetsha lo kalasa ka Ngiliyadɛ akalɔmbɛ amɔtshi l’atei wa wanɛ wambolongola apɔlɔmɛ dia vɔ mbuta awui wakahomana lawɔ l’olimu w’esambishelo nshi yakawɔtɔka kalasa kɛsɔ. Onto tshɛ l’atei w’ampokami akakoke mɛna hwe woho walangawɔ olimu w’esambishelo ndo nsaki kawɔ ka kimanyiya anto akina. Oma lâsɔ, ɔnangɛso Kent Fischer la lo Biro ka Bɛtɛlɛ ka la Patterson akakɔnya ase kɔmite ka filialɛ w’oma lo wedja esato lɛnɛ ele waa misiɔnɛrɛ. Ɛtɛkɛta w’anangɛso wa ngandji asɔ wakashikikɛ ampokami, wele amɔtshi waki ambutshi waki wanɛ wakalongola apɔlɔmɛ dia waa misiɔnɛrɛ y’eyoyo kokamamɛka dimɛna lɛnɛ atomamawɔ. Izak Marais la lo Departɛma dia okadimwelo akakɔnya waa misiɔnɛrɛ mɔtshi yaya edja efula lo olimu ɔsɔ, wele awui wakawate wakasha wanɛ wambolongola apɔlɔmɛ dɛtɔ dia woho w’ɔngɛnɔngɛnɔ wayotonga lawɔ.

Nyango dako dia lo losanganya lɔsɔ diakashama oma le ɔnangɛso Geoffrey Jackson la lo Olui-walɔmbɔla, diaki l’ɔtɛ a dui ɔnɛ: “L’ɔkɔngɔ wa kɛnɛ tshɛ kambonyoka, kakɔna kayonyosala na?” Ɔnangɛso Jackson, lakakambe oko misiɔnɛrɛ suke la ɛnɔnyi 25 lo asɛnga wa lo Pacifique Sud, akɔmbɔla ɛtɛkɛta w’ekomelo wa Dako dia lo dikona. Lo sawo sɔ, Yeso akatɛkɛta di’apami ahende wakake mvudu, ɔmɔtshi aki kɛsɔ ndo okina aki enginya. Ɔtɛkɛtshi akɛnya dia ondo mvudu yakɔ hiende yaki lo dihole diakɔ diâmɛ. Koko, pami k’enginya akake luudu lande lo lɔsɛnga etena kele pami ka kɛsɔ akatshimola edja ndo nde ambokoma lo nkɛtɛ y’abanga yakandakoke mbika luudu lande. Etena kakaye lɔpɛpɛ la wolo, luudu lakakama lo abanga konyukɔ koko lɔnɛ lakakama lo lɔsɛnga lakanyukɔ.​—Mat. 7:24-27; Luka 6:48.

Yeso akalembetshiya dia pami k’enginya akafɔnaka la anto wakahokamɛka tsho ɛtɛkɛta waki Yeso koko kokamba la ɛtɛkɛta akɔ. Pami ka lomba aki oko anto wakahokamɛka ɛtɛkɛta waki Yeso ndo wakakambe la ɛtɛkɛta akɔ. Ɔnangɛso Jackson akawatɛ ɔnɛ: “Nyayonga oko pami ka kɛsɔ, naka nyu kamba la kɛnɛ kekinyu oma lo wekelo anyu wa Bible lo olimu anyu wa misiɔnɛrɛ.” Lo ɛtɛkɛta ande wa ndjihelo, nde akâkeketsha dia ‘tatɛ tshimola’ lo olimu awɔ wa misiɔnɛrɛ.

L’ekomelo, wanɛ wakɔtɔ kalasa kɛsɔ wakalongola apɔlɔmɛ awɔ ndo wakawatɛ ahole wakawatomama ndo ɔnangɛso Morris akakumiya lo mbasha ɛhɛmwɛlɔ ɛmɔtshi. Nde akâkeketsha dia ndjelaka ɛnyɛlɔ ka Yeso ndo ndjaɛkɛka le Jehowa tena tshɛ dia kondja wolo. Lâsɔ mbakakomɛ ekongelo kɛsɔ ka woshelo w’apɔlɔmɛ.

[Nɔte ka l’ɛse ka dikatshi]

[Kiombo ya lo lɛkɛ 31]

AWUI WENDANA LA AMBEKI

Wakaye oma lo wedja: 10

Wakatomama lo wedja: 24

Lofulo la ambeki tshɛtshɛ: 56

Yɛdikɔ ya l’atei atei y’ɛnɔnyi awɔ: 33,5

Yɛdikɔ ya l’atei atei y’ɛnɔnyi wambowosala lo akambo wa mɛtɛ: 17,9

Yɛdikɔ ya l’atei atei y’ɛnɔnyi wambowetsha l’olimu wa lo tena tshɛ: 13,8

[Osato wa lo lɛkɛ 32]

Kalasa ka 123 ka Ngiliyadɛ ka Bible ka Ɛmɛnyi wa Jehowa

Lo listɛ lele lanɛ l’ɛse, nkombo nɔngama oma lo lonya la wadi otsha lo lonya l’omi ndo oma la ntondo otsha l’ɔkɔngɔ.

1) Esparza, E.; Papaya, S.; Bilal, A.; Suárez, M.; Evers, E.; Dimichino, K. 2) Rosa, M.; Fujii, R.; Ratey, O.; Leveton, J.; Van Leemputten, M. 3) Boscaino, A.; Beck, K.; Budanov, H.; Braz, C.; Peltz, K.; Siaw, A. 4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. 5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. 6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. 7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. 8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. 9) Suárez, J.; Clarke, J.; Papaya, S.; Budanov, M.; Wilson, R.; Braz, R.