Ambola w’oma le ambadi aso
Onde mpokoso y’oma lo diangɔ diakatongama yekɔ dilanya di’oma le nzambi?
Nzambi hakambe la mpokoso y’oma lo diangɔ diakatongama dia mbisha anto waha la onongo dilanya. Nde atasalaka ndo nde hasalaki dui sɔ pondjo. Lande na? Nɛ dia Bible mbutaka lo 1 Joani 4:8 dia ‘Nzambi ele ngandji.’
Ngandji mbatshutshuya Nzambi dia sala awui tshɛ. Ngandji hasalɛ onto laha l’onongo kɔlɔ, nɛ dia Bible mbutaka dia ‘ngandji hatshela onto kɔlɔ.’ (Romo 13:10) Lo Jobo 34:12, Bible mbutaka ɔnɛ: “Mete, [Nzambi] hatutshaka kolo.”
Lo mɛtɛ, Bible akatɛkɛta dia mpokoso yahomba salema lo nshi yaso nyɛ, ɛnyɛlɔ oko “adidimu wa mamba wa kete.” (Luka 21:11) Koko Jehowa kema kiɔkɔ y’awui wa kɔlɔ waya oma lo mpokoso yakɔ oko wele anto wewoya dia mpokoso kɛmɔtshi kayosalema bu l’onongo wa etombelo wa kɔlɔ waya oma lo mpokoso kakɔ. Naka Nzambi bu lo kiɔkɔ ya mpokoso y’oma lo diangɔ diakatongama, ko ele lo kiɔkɔ ya mpokoso yakɔ?
Bible mbutaka ɔnɛ: “Wa la kete tshe weko lu wulu wa kanga kolo,” mbuta ate Satana Diabolo. (1 Joani 5:19) Nde aki ondjakanyi oma ko etena kakandatɔmbɔkɔ lo etatelo k’ɔkɔndɔ w’anto polo ndo lo nshi nyɛ. (Joani 8:44) Satana mbɔsaka dia lɔsɛnɔ l’onto bu l’ohomba ndo ekɔ yangɔ y’anyanya. Nde nɔmbwamaka la yimba ya lokaki, diakɔ diele aha la tâmu, nde akasale dikongɛ dia l’andja w’otondo dialɔmbwama la yimba ya lokaki. Lo andja wa nshi nyɛ akanga wa lokaki tshutshuyaka anto efula waha l’onongo dia vɔ mbidjasɛ lo ahole wele wâle oyadi oma lo diangɔ diakatongama kana oma lo kɛnɛ kasala anto. (Efeso 2:2; 1 Joani 2:16) Ɔnkɔnɛ, anto wa lokaki mbele l’onongo wa pâ yɛna anto oma lo mpokoso mɔtshi. (Undaki 8:9) Lo ngande?
Lo yɛdikɔ mɔtshi, mpokoso efula ndjaka oma lo kɛnɛ kasala anto. Ɛnyɛlɔ, tende pâ kakakomɛ anto wadjasɛ l’osomba wa Nouvelle-Orléans lo États-Unis wakadiɛnɛ la lɔpɛpɛ la wolo ndo la mvula ngembe kana woho wakanyukɔ mvudu la mvula ngembe kakakɛdia lɔtɛkɛ lo wodja wa Venezuela. Lo bɛnyɛlɔ sɔ ndo dikina, diangɔ diakatongama diele oko lɔpɛpɛ ndo mvula akayokoma mpokoso ka wolo l’ɔtɛ wahadje anto yimba lo ahole wodjashiwɔ, wahawake mvudu y’amɛna, wahawadje yimba lo ɛhɛmwɛlɔ washama ndo munga yasala ewandji wa lɛɛta.
Tɔsɛdingole mpokoso kɛmɔtshi kakasalema lo etena kakafundamaka Bible. Lo nshi ya Yeso, ehele kɛmɔtshi kakanyukɔ la shashimoya kakadiake anto 18. (Luka 13:4) Ondo mpokoso kɛsɔ kakaye oma lo munga k’anto kana ‘tena ndo akambo wa shashimoya,’ kana tɔkɔkɔ takɔ tohende, koko lo mɛtɛ ɔsɔ komonga dilanya di’oma le Nzambi.—Undaki 9:11.
Onde Nzambi ambelaka mpokoso kɛmɔtshi? Eelo, koko otshikitanyi la mpokoso yaya oma lo diangɔ diakatongama kana oma lo kɛnɛ kasala anto, yɔ sɔnaka wanɛ wahomba nsɛna ndo wanɛ wahomba ndanyema, yekɔ la oyango ɔmɔtshi ndo salemaka lo pai. Mvula k’elola kakonge l’andja w’otondo lo nshi y’owandji wa nkumbo Nɔa ndo elanyelo k’osomba wa Sɔdɔma la Ngɔmɔra lo nshi yakasɛnaka Lɔta ekɔ bɛnyɛlɔ dimɔtshi pende. (Etatelu 6:7-9, 13; 18:20-32; 19:24) Alanya w’oma le Nzambi asɔ wakadiake anto wa kɔlɔ waki kondjatshumoya koko wakatshike anto w’ɛlɔlɔ la lɔsɛnɔ.
Kɛnɛ kele mɛtɛ ele Jehowa Nzambi ekɔ l’akoka, la nsaki ndo la wolo wa komiya asui tshɛ ndo tshungola anto oma lo etombelo w’oma lo mpokoso y’oma lo diangɔ diakatongama. Lo kɛnɛ kendana la Yeso Kristo Nkumekanga kakasɔnama oma le Nzambi, Osambu 72:12 wakate ɔnɛ: “Ndi kameli uhumbi lam’awulelelandi, ndu usi wula laha la ukimanyidi pupu.”