Nɔa la Mvula k’elola: Dui dia mɛtɛ koko aha shimu
ONDE wɛ nongamɛka andja w’ɔlɔlɔ wayɔsɛna anto lo wɔladi lam’asawɔ? Andja wahatonga ata, awui w’otshatsha ndo ɛhɛnyɔhɛnyɔ? Naka eelo, kete wɛ kokaka kondja ekeketshelo lo ɔkɔndɔ ɔmɔtshi wele ondo wɛ mboweyaka dimɛna. Ɔkɔndɔ akɔ ko ɔkɔndɔ wa Nɔa, pami k’ɔlɔlɔ kakasɛlɛ wato wa luudu dia ndjashimbɛ ndo shimbɛ nkumbo kande oma lo elola ka lo andja w’otondo kakadiake anto wa kɔlɔ.
Tɔtɔi t’ɛkɔndɔ toto mbeyama dimɛna le anto wa lo andja w’otondo. Ɔkɔndɔ wa kɛnɛ kakakomɛ Nɔa tanemaka lo mukanda wa lo Bible wa Etatelu tshapita 6 polo 9 ndo vɔ kɔndwama nto lo Coran ka waa mizilma ndo lo toshimu efula t’anto wa lo nkɛtɛ k’otondo. Onde mɛtɛ Mvula k’elola kakalɔ, kana ekɔ tsho shimu yakeketsha anto dia sala kɛnɛ kele ɔlɔlɔ? Aya ɛnɔnyi nkama wadjana ase teoloji ndo ase siansɛ tâmu lo dikambo sɔ. Koko Bible, Ɔtɛkɛta wa Nzambi mɛnyaka hwe dia ɔkɔndɔ akɔ wekɔ dui dia mɛtɛ koko aha shimu. Nyɛsɔ tɔsɛdingole awui washikikɛ dui sɔ:
Ɔkɔndɔ wa lo Etatelu totɛka ɔnɔnyi, ngɔndɔ ndo lushi shikaa lakatatɛ Mvula k’elola, etena ndo dihole diakatemalaka wato wa luudu ndo etena kakome ashi. Vɔ tɛkɛtaka nto l’eshikikelo kiambokambo tshɛ yendana la wato wa luudu, ɛnyɛlɔ woho wakiwɔ, otale, woke ndo wemema wa wato ndo diangɔ diakakambe la Nɔa dia sɛla wato. Koko mbala efula, toshimu hatote awui la eshikikelo ka ngasɔ.
Ɛkɔndɔ ehende wendana la ɛlɔndji wa waoho w’anto wele lo Bible mɛnyaka dia Nɔa aki onto lakasɛnɛ mɛtɛ. (1 Ekondo 1:4; Luka 3:36) Ɛzɛra la Luka, wanɛ wakafunde ɛlɔndji ɛsɔ waki anyangiyangi wa tomanamana. Luka akashile Nɔa lo ɔlɔndji wa dioho diaki Yeso Kristo.
Ɔprɔfɛta Isaya la Ezekiyɛlɛ ndo apɔstɔlɔ w’Akristo Paulo la Petero wakatɛkɛta dikambo dia Nɔa ndo dia Mvula k’elola.—Isaya 54:9; Ezekiyele 14:14, 20; Heberu 11:7; 1 Petero 3:19, 20; 2 Petero 2:5.
Yeso Kristo akatɛkɛtaka dikambo dia Mvula k’elola ate: “Uku akayala lu nshi ya Noa, mbayuyala lu nshi ya On’a untu. Vo wakalekaka, wakanokaka, wakatshukaka, wakatshukamaka edja ndu lushi lakoto Noa lu watu a luudu, ku elula kakayi, kakâdiaki tshe.” (Luka 17:26, 27) Otondoyala Mvula k’elola kɔndɔ, tshike kɛnɛ kakate Yeso lo dikambo dia “nshi ya On’a untu” tototonga la nɛmɔ.
Ɔpɔstɔlɔ Petero akatatshi dia “asoki” wayoya ndo wayɔnyɔla kɛnɛ kata Bible. Petero akafunde ate: ‘Lo ndjela nsaki yawɔ, vɔ mbohɛka dia la elola k’ashi mbakalanya Nzambi andja wa lo nshi [ya Nɔa].’ Onde sho pombaka mbohɛ ‘dui sɔ?’ Kema! Petero tetemalaka mbuta ɔnɛ: ‘Olongo la nkɛtɛ yele kakianɛ wambolamema dia ndanyema la dja ndo wambolamema dikambo dia lushi l’elombwelo ndo l’elanyelo k’anto wa kɔlɔ.’—2 Petero 3:3-7.
Nzambi ayanga ndanya nto anto wa kɔlɔ ndo anto amɔtshi wayoka. Naka sho mbokoya ɛnyɛlɔ kaki Nɔa, kete tayokoka monga l’atei w’anto w’ɔlɔlɔ wayɔtɔ lo andja woleki dimɛna.