Yana ya yimato y’ose Isariyɛlɛ ya nshi nyɛ
LO 2006, mingu hiende la ntondo ka Eohwelo ka nyɔi ka Yeso, onto tshɛ la lo nkumbo ka yɔnɛ Sales kele la Praia Grande lo wodja wa Brésil akasale listɛ l’anto wakandahombe mbelɛ. Wakasha Abigayl yana ya yimato y’ɛnɔnyi esamalo dikatshi dia leeta ɔtɔi ndo wakawombola onto akɔna akandalangaka todisha.
Nde akakadimola ate: “Pami katɔmbɔlɛka tena tshɛ.”
Ambutshi ande wakawombola ɔnɛ: “Pami kakɔna kɛsɔ?”
Nde akakadimola ate: “Pami kakɛndakɛnda la pusupusu.”
Nshi nyɛi l’ɔkɔngɔ, Abigayl akɛnya ambutshi ande pami kɛsɔ. Pami kakɔ lokombo lande Walter, nde akadjasɛka suke la Mbalasa ka Diolelo. Ambeta ɛnɔnyi ndekana 15, etena kakinde la ɛnɔnyi 28, aksida wakandasale la mutuka wakawotshike ekuse. Nde aki la anto ahende wakolamaka nɛ dia nde aki la falanga efula. L’ɔkɔngɔ wa vɔ mbisha Abigayl lotshungɔ la nde sawola la Walter, ambutshi waki Abigayl wakawotɛ dia ɔnawɔ akakombolaka mbosha dikatshi dia leeta.
L’ekomelo ka sawo diande, Abigayl akate ate: “Anto akina tshɛ wa lo Mbalasa kaso ka Diolelo wekɔ l’akatshi wa leeta efula, koko dimi lekɔ paka la tshɔi tsho. Ɔnkɔnɛ, wɛ ekɔ tshɔi y’onto yambomelɛ. Naka wɛ haye, kete dimi hatonga ndoko l’onto. Koko, naka wɛ ndja, kete dimi layonga l’ɔngɛnɔngɛnɔ w’efula ndo Jehowa ayoleka monga l’ɔngɛnɔngɛnɔ.”
Lushi la Eohwelo, Abigayl la Ɛmɛnyi ekina wa Jehowa wakalɔngɔsɔlaka Mbalasa ka Diolelo dia Eohwelo. La dikɔlɔ diakɔ, Walter akatetaka lawɔ ndo nde akɛnyi Abigayl, nde akatɛ shufɛlɛ yande dia nde memadja mutuka. Nde akadihola didishi dia mutuka ndo akambola Abigayl kakɔna kakinde lo sala. Abigayl akawotɛ dia vɔ waki lo nɔngɔsɔla Mbalasa ka Diolelo dia tɔ monga pudipudi dikambo diande.
La dikɔlɔ diakɔ Abigayl akayakiyanyaka efula. Etena kakatatɛ sawo, nde akɛwɛwaka dia menda kana Walter ambokoma. Walter la alami wakinde wakakome la shashimoya. Abigayl aki la ɔngɛnɔngɛnɔ w’efula. L’ɔkɔngɔ wa sawo, Walter akate dia nde akalange munda lɔkɛndɔ otsha l’osomba okina koko nde akayotshikitanyaka kanyi yande ndo akayoya oya lo Eohwelo dia ngɛnyangɛnya Abigayl. Oma lâsɔ, nde akakotsha ate: “Awui wakatami lo sawo waki mɛtɛ kɛnɛ kaki ohomba le mi.” Nde akalɔmbɛ Bible ndo akatatɛ mbeka ndo mbɔtɔ lo nsanganya.
Lo etena kɛsɔ, kose aki Walter la womoto akate dia nde nangaka mɛnana la Abigayl latɛkɛta enondo ande mbala efula dikambo diande. Etena kakandahomana la Abigayl, nde akangɛnangɛna efula dia mbeya dia Abigayl aki yana ya yimato y’ɔlɔlɔ. Nde akate ate: “Kakianɛ, lambeya lande na kele ɔnalengo ekɔ l’ɔngɛnɔngɛnɔ efula.”
Walter ekɔ lo tetemala mbeka Bible ndo mbɔtɔ lo nsanganya. Nde mbishaka ndo kɔmatɛrɛ ndo mbutɛka anto akina awui wekande. Lo mɛtɛ, Abigayl toholaka yana ya yimato y’ose Isariyɛlɛ yakakimanyiya Namana dia nde mbeya Jehowa Nzambi ka mɛtɛ.—2 Khumi ya Dikanga 5:2-14.