Onde wɛ amboyaombɛka etena ka mbekaka Bible?
ƆNƆNYI wetshi, Olui-walɔmbɔla akewoya otshikitanu wakasalema lo ekongelo ka nsanganya ya l’etshumanelo dia tokimanyiya woho wa sho kondja wenya efula wa salaka wekelo wa Bible ndo ɔkɛtshanyelo wa lo nkumbo. Naka wɛ ekɔ ɔtɛ wa nkumbo, kete sala la wolo dia nɔmbɔlaka wekelo wa Bible wa lo nkumbo kâmɛ la wadɛyɛ ndo l’anayɛ mbala la mbala. Atshukanyi wele bu l’ana wayokambaka l’etena kɛsɔ dia salaka wekelo wa Bible kâmɛ. Anangɛso l’akadiyɛso w’enyemba wele kema l’ɛkɛndɛ l’atei wa nkumbo wayokambaka l’etena kɛsɔ dimɛna dia salaka wekelo wa Bible w’onto ndamɛ.
Anto efula wakɛnya lowando lawɔ lo yɛdikɔ ya salaka Ɔtɛmwɛlɔ wa lo nkumbo wa la dikɔlɔ. Ɛnyɛlɔ, ekumanyi kɛmɔtshi kelɛwɔ Kevin akafunde ate: “Tshɛkɛta ‘losaka’ hayɔkɛnɛmɔla tshɛ lo tshɛ lowando l’efula lele l’ase etshumanelo. Sho dikumanyi takakɛtshanya woho wakambaso la dikɔlɔ sɔ dia sala kɛnɛ kakatɔlɔmbɛ Olui-walɔmbɔla, mbuta ate mbekaka la nkumbo yaso.”
Kadiyɛso Jodi lele omɛnde ekɔ ekumanyi akafunde ate: “Tekɔ l’ana wa wamato asato, l’enondo ɛnɔnyi 15, la hende 11 ndo la sato 2. Sho mala monɔ otsha l’etshumanelo kasala nsanganya l’ɔtɛkɛta w’akanga a mpoke. Dui sɔ tɔsɛka wenya ndo tɔlɔmbaka dia mbidja welo efula dia nɔngɔsɔla nsanganya tshɛ. Kakianɛ, diɛsɛ l’otshikitanu ɔsɔ, taya la dikɔlɔ dikina dia ndjashaka l’ɔtɛmwɛlɔ wa lo nkumbo!”
John nde la JoAnn, atshukanyi wele ambatshi mboka wa pondjo wakafunde ɔnɛ: “Mbala efula wekelo aso wa Bible wa lo nkumbo wakasalemaka paka lo pai nɛ dia takahombaka somba etena oma lo lokema l’awui wa l’etshumanelo waki la so. Yɛdikɔ y’oyoyo nyɛ yekɔ woshasha w’oma le Jehowa watokeketsha lo nyuma, koko paka naka sho mbokambi l’etena kakɔ lo yoho yatɔlɔmbawɔ dia sho kamba la tɔ.”
Tony, ɔnangɛso l’onyemba lele l’ɛnɔnyi 25 akasɔnɛ dikɔlɔ dia Lushi la hende dia salaka wekelo w’onto ndamɛ. Nde kambaka la wenya ekina wa lo lomingu dia nɔngɔsɔla nsanganya ya l’etshumanelo. Koko Tony mbutaka ate: “Dimi kongɛka Lushi la hende lɔsɔ l’asolo walomɔlomɔ.” Lande na? Tony nembetshiyaka ate: “Dikɔlɔ sɔ ekɔ etena ka lânde kasami la Jehowa. Dimi mbɔsaka wenya suke l’ehende dia mbekaka akambo wakeketsha diɔtɔnganelo diasami la Jehowa. Monga la wenya efula wa mbekaka kimanyiyakami dia kana yimba l’avɛsa wa lo Bible wadiami.” Dui sɔ diekɔ l’etombelo akɔna? Nde ekɔ lo kotsha ɔnɛ: “Nshi nyɛ mbamboleka alako wa Jehowa munanda otema ami.” Onde nde kokaka tosha ɛnyɛlɔ kɛmɔtshi? Nde mbutaka ate: “Lakadia dikambo dia lɔngɛnyi laki lam’asa Davidi nde la Jɔnatana lo dibuku Étude perspicace. Lakakondja wetshelo w’efula oma lo ngandji ka ndjahombia kaki la Jɔnatana. Ɛnyɛlɔ kande kakakimanyiya dia dimi shihodia elɛwɔ monga ɔngɛnyi w’ɔlɔlɔ. Lekɔ lo kongɛ l’asolo walomɔlomɔ dia dimi mbishola akambo akina w’amɛna lo akɔlɔ akina wa Lushi la hende!”
Aha la tâmu, ekambi tshɛ waki Jehowa wayokondja wahɔ efula lo kambaka dimɛna l’etena ka lâdiko kɛsɔ dia salaka wekelo wa Bible wa dimɛna ndo ɔtɛmwɛlɔ wa lo nkumbo.