Etshama oma l’Ɔtɛkɛta wa Nzambi

Onde Bible mbutaka akambo wa lo nshi yayaye?

Sawo nɛ monyiyaka ambola amɔtshi wele ondo wɛ amboyaokaka ndo diɔ mɛnyaka lɛnɛ akokayɛ ntana ekadimwelo lo Bible kayɛ. Ɛmɛnyi wa Jehowa wayɔngɛnangɛna dia nkɛtshanya layɛ ekadimwelo ɛsɔ.

1. Onde prɔfɛsiya ya lo Bible yekɔ mɛtɛ?

Paka Nzambi Kanga-Wolo-Tshɛ mbakoka mbuta woho wayosalema akambo wa lo nshi yayaye. (Amose 3:7) Ɛnyɛlɔ, oma ko nshi yakete, nde akatatshi di’oyelo wa Mɛsiya kana Kristo. Nde akatɛnyisha dia Mɛsiya ayoyotomba l’ɔlɔndji w’Abarahama ndo ayoyonga omboledi wayokimanyiya anto wele l’okitanyiya dia vɔ ndjokondja ɛtshɔkɔ wa lɔsɛnɔ la kokele. (Etatelu 22:18; Isaya 53:4, 5) Jehowa akatewoyisha nto ɔnɛ Mɛsiya wakalakema ayotɔ la Bɛtɛlɛhɛma.—Adia Mika 5:2.

Yeso mbakayonga Mɛsiya ɔsɔ. Ndekana ɛnɔnyi nkama esambele la ntondo, Bible kakatewoyisha ɔnɛ Mɛsiya ayotɔ oma le womoto l’emuma ndo ayoyohetshama. Nde ayokimɔ lɔsɛnɔ lande oko olambo wa pɛkato y’anto efula, ndo nde ayokundɛma kâmɛ l’akanga w’ɛngɔnyi. (Isaya 7:14; 53:3, 9, 12) Ndekana ntambe tshanu la ntondo, Bible kakatewoyisha nto ɔnɛ nde ayɔtɔ la Jerusalɛma ahemi lâdiko dia ponda ndo nde ayofungama la falanga y’ekenga 30. Akambo asɔ tshɛ wakakotshama.—Adia Zekariya 9:9; 11:12.

2. Onde Nzambi akewoya adatɛ wayoyosalema akambo amɔ?

Ndekana ntambe tshanu la ntondo, Bible akatewoyisha ɔnɔnyi shikaa wakahombe Mɛsiya ndjɛnama. Etena kɛsɔ kakɛdikama la mingu ya didjidji, mbuta ate ‘mingu y’ɛnɔnyi,’ yele lushi ɔtɔi ekɔ ɔnɔnyi. Ɔnkɔnɛ, lomingu tshɛ laki l’ɛnɔnyi esambele. Akahombe monga mingu 7 nsanganya la mingu 62, mbatoshande mingu 69. Etena kalodiaso mingu 69 lo 7, sho tanaka ɛnɔnyi 483. Etena kakɔna kakatatɛ ɛnɔnyi ɛsɔ mbadiema? Lo ndjela Bible, etena kɛsɔ kakatatɛ lam’akakome Nɛhɛmiya la Jerusalɛma ndo lam’akawatatɛ nyomohika mpele di’osomba ɔsɔ. Ɔkɔndɔ w’ase Pɛrɛsiya mɛnyaka dia dui sɔ diakatatɛ lo 455 N.T.D. (Nehemiya 2:1-5) Yeso akayobatizamaka oko Mɛsiya l’ɔkɔngɔ w’ɛnɔnyi 483, mbuta ate l’ɔnɔnyi 29 T.D., paka l’etena kakatama.—Adia Danyele 9:25.

3. Onde prɔfɛsiya ya lo Bible yekɔ lo kotshama nshi nyɛ?

Yeso akatatshi di’akambo wa diambo efula wayoyosalema lo nshi yaso nyɛ. L’atei w’akambo asɔ mbele ndo prɔfɛsiya kendana la lokumu l’ɔlɔlɔ la Diolelo diaki Nzambi diayosha anto tshɛ wa l’andja w’otondo wawoka ngandji esambelo. Diolelo sɔ diayokomiya dikongɛ di’akambo dia kɔlɔ nɛ.—Adia Mateu 24:14, 21, 22.

Prɔfɛsiya ya lo Bible mɛnyaka akambo efula wendana l’ekomelo ka dikongɛ di’akambo nɛ. Bible mɛnyaka dia otshikitanyi la kɛnɛ kakokaso nongamɛ lo menda woho watatshu akambo, efukutanu wayotetemala monga la nkɛtɛ. Mpokoso yaya oma l’ata, ndjala ya kasha, adidimu wa nkɛtɛ ndo elando wayotafulanɛka tsho. (Luka 21:11; Enyelo 11:18) Anto wayotetemala mɔnyɔla atɔndɔ waki Nzambi wendana la lɔkɛwɔ. Lo nshi ya pâ nyɛ, ambeki waki Yeso wayotetemala nsambisha lokumu l’ɔlɔlɔ la Diolelo diaki Nzambi lo wedja tshɛ.—Adia Mateu 24:3, 7, 8; 2 Timote 3:1-5.

4. Ngande wayonga nshi yayaye y’anto?

Nzambi Kanga-Wolo-Tshɛ ekɔ l’ɛtshɔkɔ efula walamɛnde anto wele la kɔlamelo. Yeso Kristo Mɛsiya, kâmɛ l’asɔnami ande wayɔlɔmbɔla anto wa la nkɛtɛ oma l’olongo. Vɔ wayokenga Diolelo diayɔlɔmbɔla ɛnɔnyi kinunu. Anto wakavu wayolɔ ndo wayolomboshama dia menda kana vɔ kokaka nkondja lɔsɛnɔ la pondjo. Lâdiko dia lâsɔ, Diolelo diaki Nzambi diayɔkɔnɔya anto tshɛ hemɔ ndo nyɔi hatonga nto.—Adia Enyelo 5:10; 20:6, 12; 21:4, 5.

Dia mbeya akambo efula, enda lɛkɛ 23-25 ndo 197-201 ya dibuku nɛ: Bible etshatɔ mɛtɛ?