EKADIMWELO LO AMBOLA W’OMA LO BIBLE
Ngande wakondjaso wahɔ oma lo nyɔi ka Yeso?
Etena kakatonge Nzambi anto, nde akawatonge la kanyi ya vɔ sɛnaka pondjo pondjo la nkɛtɛ aha la diɛnɛ la hemɔ kana nyɔi. Koko, Adama pami ka ntondo kokitanyiya Otungi ndo akashisha diɛsɛ dia nsɛna pondjo pondjo. Oko weso tokanula ta Adama, takahowɔ nyɔi oma le nde. (Rɔmɔ 5:8, 12; 6:23) Jehowa Nzambi ka mɛtɛ, akatome Ɔnande, Yeso la nkɛtɛ dia ndjovɔ ko mfuta kɛnɛ kakashisha Adama.—Adia Joani 3:16.
Yeso akavu dia nkimanyiya anto dia vɔ ndjokondja lɔsɛnɔ la pondjo. Ngande wafɔnyayɛ wayonga lɔsɛnɔ laha l’ekomelo la nkɛtɛ?
Diɛsɛ la nyɔi ka Yeso, pɛkato yaso dimanyiyamaka ndo tekɔ l’elongamelo ka lɔsɛnɔ laha l’ekomelo. Bible toshaka kanyi ya woho wayonga lɔsɛnɔ la nkɛtɛ etena kahatatodiɛnɛ nto la lotshundu, hemɔ ndo nyɔi.—Adia Isaya 25:8; 33:24; Ɛnyɛlɔ 21:4, 5.
Ngande wahombaso mbohɔka nyɔi ka Yeso?
La dikɔlɔ dia la ntondo ka nde mvɔ, Yeso akatɛ ambeki ande dia vɔ mbohɔka nyɔi kande lo salaka sɛlɛmɔnyi kɛmɔtshi kaha kawotake. Nsala Eohwelo ka nyɔi ka Yeso lo yoho shɔ ɔnɔnyi tshɛ toshaka diaaso dia nkana yimba lo woke woke wa ngandji kakoke Yeso nde la Jehowa anto.—Adia Luka 22:19, 20; 1 Joani 4:9, 10.
Ɔnɔnyi ɔnɛ, Eohwelo ka nyɔi ka Yeso kayosalema Lushi l’ɔtɔi, Ngɔndɔ ka nɛi 14, l’ɔkɔngɔ wa ɛɔtwɛlɔ ka wonya. Tambokelɛ dia wɛ ndjosangana kaamɛ l’Ɛmɛnyi wa Jehowa wa l’ɛtshi kanyu ka nkɛtɛ.—Adia Rɔmɔ 1:11, 12.