Akambo wa mɛtɛ wa lo Bible wakakotsha nsaki kami ka nkondja ekadimwelo

NSHI YAMI YAKETE:

Lakotɔ la Bakou, Azerbaïdjan ndo lekɔ ɔna la kose lo ana ahende wakatotɔ. Papa aki Mizilima ndo mama aki ose ɔtɛmwɛlɔ w’ase Juda. Ambutshi ami wakokanaka ngandji ndo onto l’onto akalɛmiyaka dietawɔ di’osekande. Mama akasukɛka papa etena kakandakilaka mbo ya ndɛ lo nshi ya Ramadan ndo papa akasukɛka mama etena kakawasalaka dambo di’Elekanelo. Lo luudu laso taki la Cora, Tɔra ndo Bible.

Lakayaɔsaka oko Mizilima. Kaanga mbele ndooko lushi lakamoke dimbola dia mbeya kana Nzambi ekɔ, awui amɔtshi wakatshindjaka wɔɔngɔ. Lakayambolaka ɔnɛ: ‘Lande na kakatonge Nzambi anto, ndo l’oyango akɔna wahomba onto diɛnɛ lɔsɛnɔ l’otondo paka dia ndjosowaka pondjo pondjo l’ifɛrnɔ?’ Lam’ele anto wakataka ɔnɛ dui tshɛ diasalema ekɔ lolango laki Nzambi, dimi lakayambola ɔnɛ: ‘Onde Nzambi mbele lo kiɔkɔ y’ekakatanu w’anto ndo nde ngɛnangɛnaka mɛna woho wasowawɔ?’

Etena kakimi l’ɛnɔnyi 12, lakatatɛ nɔmba namaz, mbuta ate alɔmbɛlɔ ndo sɛlɛmɔnyi tshanu yasala waa Mizilima lo lushi. L’etena kɛsɔ, papa akatotome dimi l’enondo ami la womoto lo kalasa y’ase Juda. L’atei w’akambo wakateke mbaki ndo mbekelo ya Tɔra ndo ɔtɛkɛta wa Hɛbɛru. Lushi tshɛ la ntondo ka sho mbeka, takalɔmbaka lo ndjela mbekelo y’ase Juda. Koko, la pindju lakalɔmbaka namaz la ngelo ndo la kalasa, takalɔmbaka alɔmbɛlɔ w’ase Juda.

Laki la mposa k’efula ka nkondja ekadimwelo w’eshika lo ambola ami. Mbala la mbala lakambolaka embetsha aso wa la kalasa ɔnɛ: “Lande na kakatonge Nzambi anto? Ngande wɔsa Nzambi papa lele Mizilima? Nde ekɔ onto ɔlɔlɔ, ko lande na kɔsamande oko onto la lele bu pudipudi? Lande na kakotonge Nzambi?” Yema y’ekadimwelo yakawambisha komonga amɛna ndo vɔ kombetawoyami.

WOHO WAKATSHIKITANYA BIBLE LƆSƐNƆ LAMI:

Lo 2002, dimi komonga la mbetawɔ nto le Nzambi. L’ɔkɔngɔ wa lomingu ɔtɔi etena kakatonɔ l’Allemagne, papa akandama la hemɔ ka wolo ka lo wɔɔngɔ ndo tɔ kakokonya lo kɔma. L’edja k’ɛnɔnyi efula, lakalɔmbaka lo dikambo dia yoonge yande ya demba ndo dia nkumbo kaso. Lam’ele laki l’eshikikelo dia Nzambi Kanga-Wolo-Tshɛ ekɔ la wolo laadiko dia lɔsɛnɔ ndo nyɔi, lakalɔmbaka lushi tshɛ lo dikambo dia lɔsɛnɔ la papa. Lakafɔnyaka ɔnɛ: ‘Oko wakimi yana ya yimato, ekɔ kiambokambo y’anyaya le Nzambi dia kotshɛmi nsaki shɔ.’ Laki l’eshikikelo dia Nzambi ayoka ɛsɛngɔsɛngɔ ami. Lonyangu ko, papa akayovɔ.

Laki la lɔkɔnyɔ l’efula nɛ dia akɛnama ɔnɛ Nzambi hayakiyanya lo dikambo di’anto. Lakayotatɛ ndjambola ɔnɛ: ‘Onde lekɔ lo nɔmba lo yoho ya kɔlɔ, kana Nzambi kele bu?’ Laki la lonyangu l’efula ndo dimi kokoka nɔmba namaz nto. Ɛtɛmwɛlɔ ekina waki anyanya le mi, diakɔ diakamayota ɔnɛ Nzambi bu.

L’ɔkɔngɔ wa ngɔndɔ shamalo, Ɛmɛnyi wa Jehowa wakaye ndjotosambisha. Lam’ele, sho kɔmbɔsaka Lokristo la nɛmɔ nto, dimi l’enondo ami la womoto takalange mbaɛnya la dilɛmiɛlɔ tshɛ dia vɔ waki akanga wa kashi. Takawambola ɔnɛ: “Lande na kele Akristo tɛmɔlaka Yeso, kurusɛ, Mariya ndo dikishi dikina etena kele Ɛlɛmbɛ dikumi tonaka dui sɔ?” Vɔ wakatɛnya oma lo Bible tolembetelo t’eshika tɛnya di’Akristo wa mɛtɛ hawohombe ntɛmɔla dikishi ndo ɔnɛ alɔmbɛlɔ pombaka tomama paka le Nzambi. Dui sɔ diakamambiya.

Oma laasɔ, takawambola ɔnɛ: “Ko kayotota lo dikambo dia Losato l’osanto? Naka Yeso ekɔ Nzambi, ko lande na kakandasɛnɛ la nkɛtɛ ndo ndjakema oma le anto?” Mbala kɛsɔ nto, vɔ wakakambe la Bible dia tokadimola ndo wakatolembetshiya dia Yeso bu Nzambi ndo nde hɛdimi la Nde. Ɛmɛnyi wa Jehowa wakatolembetshiya ɔnɛ, l’ɔtɛ ɔsɔ mbahawetawɔ Losato l’osanto. Lakambiyama nto ndo lakate ɔnɛ: ‘Wasɔ mɛtɛ wekɔ ase ɔtɛmwɛlɔ w’oyoyo.’

Lakalange mbeya nto lande na kavɔ anto ndo katshika Nzambi asui. Ɛmɛnyi wa Jehowa wakamɛnya dibuku Ewo katɔla otsha lo lɔsɛnɔ la pondjo,a diaki la totshapita takendanaka la ambola ami. Aha la ntshimbatshimba, vɔ wakatatɛ mbeka la mi Bible.

Mbala tshɛ kakatekaka, lakakondjaka ekadimwelo w’eshika w’oma lo Bible lo ambola ami. Lakayeya ɔnɛ, Jehowa mbele lokombo laki Nzambi. (Osambu 83:18) Dionga diande dioleki woke ko ngandji kaha la lokaki. (1 Joani 4:8) Nde akatonge anto nɛ dia nde akalange mbasha woshasha wa lɔsɛnɔ. Lakayoshihodia ɔnɛ kaanga mbatshika Nzambi awui wa wɛngiya, nde mbahetshaka ndo keema edja nde ayanga mbanya lo pondjo. Lakayeyaka di’ɔtɔmbɔkwɛlɔ wa Adama la Eva wakonge l’etombelo wa kɔlɔ le anto tshɛ. (Rɔmɔ 5:12) L’atei w’etombelo wa kɔlɔ ɛsɔ mbele ndo nyɔi ka wakiso wa ngandji, ɛnyɛlɔ oko papa kami. Koko, Nzambi ayonya akambo wa kɔlɔ asɔ lo andja w’oyoyo waya kaa ndja, lɛnɛ ele wanɛ wakavu wayolɔ.—Etsha 24:15.

Akambo wa mɛtɛ wa lo Bible wakakotsha nsaki kami ka nkondja ekadimwelo. Lakatatɛ monga la mbetawɔ le Nzambi nto. Oko wakamayeya Ɛmɛnyi wa Jehowa dimɛna, lakayoshikikɛ ɔnɛ vɔ wekɔ nkumbo k’onto l’ɔnango ka l’andja w’otondo. Kaamɛ ndo ngandji kele lam’asawɔ kakamambiya efula. (Joani 13:34, 35) Akambo wendana la Jehowa wakameke wakatshutshuya dia monga la mposa ka mbookambɛ, diakɔ diakamayɔsa yɛdikɔ ya nkoma Ɔmɛnyi wa Jehowa. Lakabatizama lo Ngɔndɔ ka ntondo 8, 2005.

WAHƆ WAMBOMOKONDJA:

Ekadimwelo w’eshika wakamakondja oma lo Bible wakatshikitanya kanyi yami lo dikambo dia lɔsɛnɔ. Elembetshielo w’eshika wakamatane oma l’Ɔtɛkɛta wa Nzambi wakambisha ki ka l’etei k’otema. Lakonge l’ɔngɛnɔngɛnɔ w’efula ndo lakakondja esambelo lo elongamelo k’ɔnɛ, layɛnana la papa nto diɛsɛ la eolwelo kalaka Ɔtɛkɛtɛ wa Nzambi.—Joani 5:28, 29.

Aya ɛnɔnyi esamalo wemi l’ɔngɛnɔngɛnɔ wa tshukana la Jonathan, omi loka Nzambi wɔma. Sho akɔ ahende takashihodia ɔnɛ akambo wa mɛtɛ wendana la Nzambi wekɔ mɛtɛ ndo wɔdu, koko l’etena kakɔ kaamɛ vɔ wekɔ ɛngɔ kombami kahakoke onto nsomba. Diakɔ diele, sho mongaka l’ɔngɛnɔngɛnɔ dia nsambisha anto akina awui wendana la dietawɔ ndo l’elongamelo kaso ka diambo. Ɛlɔ kɛnɛ, lambeya dia Ɛmɛnyi wa Jehowa bu “ase ɔtɛmwɛlɔ w’oyoyo,” koko vɔ wekɔ Akristo wa mɛtɛ.