Losanganya l’olimu toshaka akoka wa ntsha olimu tshɛ w’ɔlɔlɔ
1 Losanganya l’olimu lekɔ l’oyango wa tosha diaaso ndo tosha akoka wa nyomoleka mbisha lonya l’olimu wa sambisha ndo wa mbetɛ anto ambeki. (2 Tim. 3:17) Koko naka sho hatolilɔngɔsɔla woho wakoka, ndo naka hatokambe olimu la kɛnɛ kekaso, kete hatotokondja ɛngɛnɔngɛnɔ efula oma lɔkɔ.
2 Layalɔngɔsɔlaso, sho kokaka nyomoleka mpotɔ wetshelo watoshawɔ. Tonyomenda ekanda wayokambema olimu ndo towawɔshi dia ndjela ndo mbisha waɛmbwɛlɔ. Tohokɛ lotui ɔlɔlɔ ndo tofunde towui wui tɔmɔtshi dia sho ndjotiohɔ l’ɔkɔngɔ.
3 Omendji-lalɔmbɔla sɛdingolaka l’ɔlɔlɔ tshɛ tenyi diotshikitanyi dia pɔlɔngalamɛ. Dikumanyi l’ekambi w’olimu wakoka sɔnamaka dia diɔmbɔla. (om lɛk. 70) Lo tshumanelo diele dikumanyi l’ekambi w’olimu kema efula, kokaka nɔmba anangɛso wakokaka dia mbakimanyiya. (km 10/77, Ekadimwelo lo wembola anyu.) Ombahemi a loseke tshɛ pombaka ndjalɔngɔsɔla la kɔmba, ndjela alako lo nna ndo lo nna ndo ndjashikikɛ di’aha ndekanya wonya wakɛdikama.
4 Losanganya tatɛka nshi tshɛ la waewoyelo. Ɔnangɛso lakasɔnama dia mbala waewoyelo akɔ pombaka tatɛkɛtshi ntondo la Omendji-lalɔmbɔla dia nde nshikikɛ kɛnɛ kele lɔkɔ. Ondo mbeyaka ndjâla mikanda wa la Société, ko kana waehwelo w’endana la tɛdikɔ tɔsami dikambo di’esambishelo kana nto okimwelo w’alapɔlɔ wa ngɔndɔ la ngɔndɔ. Ondo sho tayôka dia pombaka membola ase hemɔ, kana tayôka awui akina w’ɔmɔmɔ w’elimu wa l’etshumanelo. Todje yambalo yaso lɛkɔ dia mbisha lonya.
5 Lam’alɔmbama waɛmbwɛlɔ w’ampokami, toyalɔngɔsɔlɛ lo mbala awui akɔ ndo lo nyanga avɛsa w’oma lo Bible. Tokanyiya lo woho wa kamba olimu l’elakanya; naa diɔmbwɛlɔ diokokiso mbisha dia keketsha akina na? Kokaka mɛnya ohomba wa wetshelo woshami lo kɔndɔla dikambo dia mɛtɛ dimɔtshi diakayɛnyi lo tshena pe.
6 Etena kasalema diɛnyɛlɔ, tohembe fɔnya dia tambotanema la ntondo ka dikambo dia woho akɔ, ndo tokanyiya dia kɛnɛ kototota l’etena kakɔ. Tolembete elembetshielo ndo lokanyi lokambemi olimu. Tohembe ndjaohola kɛnɛ kakatate mbala ka komelo kakatatanema la ntondo ka dikambo dia woho akɔ, ndo tênde woho wokoki tokanyi ta lo ɛnyɛlɔ tosha akoka wa kondja etombelo w’ɛlɔlɔ.
7 Wanɛ wasala diɛnyɛlɔ la wanɛ wakɔnyawɔ pombaka ndjalɔngɔsɔla dimɛna. Onto l’onto pombaka mbeya kakɔna kayondota ndo kayondotsha ladiko dia lɔyɛnga. Esangɔ efula ampokami hawokeketshama la diɛnyɛlɔ diâki kɔnɔngɔswama dimɛna. Amɔtshi mvusolaka ɛnyɛlɔ kawɔ l’ɔkɔngɔ a wekelo wa La Tour de Garde, dia vɔ pemba lo lɔyɛnga ndo dia mbisha anangɛso anɛ w’enda awui wa loseke diaaso dia vɔ mbeya ɛngɔ kayonga ohomba.
8 Losanganya mongaka tena dimɔtshi la dako di’endana l’ohomba ɔmɔtshi wa laande w’etshumanelo, kana diotombi oma lo artikɛlɛ ɔmɔtshi wa La Tour de Garde wasungana. Tohokɛ lotui ndo tosale wolo dia kamba olimu la kɛnɛ kotami.
9 Sho kombolaka ‘nɔngɔswama dia elimu tshɛ w’ɔlɔlɔ.’ (2 Tim. 2:21) Losanganya l’olimu ekɔ yɛdikɔ mɔtshi l’atei a tɔnɛ tɔsa Jehowa dia tokimanyiya lo dikambo diakɔ. Naka sho mbɔtɔ la kɔlamelo lo losanganya lakɔ ndo mbidja weolo wa sɔlɔ dia kamba olimu la kɛnɛ k’ekaso, kete mɛtɛ tayokoka ‘kotsha olimu aso dimɛna.’—2 Tim. 4:5.