Sanganya y’eshika dikambo di’esambishelo
1 Lo Luka 10:1-11, wakatɛkɛta dia losanganya lɔmɔtshi lakasale Yeso l’ambeki ande w’eyoyo 70 dia mbakimanyiya lo ndjalɔngɔsɔla dikambo di’esambishelo. Nde akawasha alako w’eshika lo woho wa ndjalɔngɔsɔla, wa ndowola lokumu lawɔ ndo lo woho wa ntokomɛ ekakatanu a wolo. Ɔkɔndɔ ɔsɔ mbeyaka tosha wetshelo.
2 Lo weoho akɔ tshɛ, ambeki akɔ 70 wakɔtɔ lo losanganya lakasale Yeso lawɔ. Wenya mbetaka lo sanganya y’esambishelo etena kele anto amɔtshi wekɔ la mbekelo ka koma l’ɔkɔngɔ. Lâsɔ pombaka nyomɔlɔngɔsɔla elui wa wanɛ wele l’akalo ndo nyomokahola mbilo, dikambo diatshindjatshindja anto tshɛ tena efula. Sho tshɛ kokaka mbisha lonya lo komaka la wonya ndo tshɔka esadi esadi lo mbilo.
3 Yeso akɛ̂nya olui akɔ tshɛ ɔtɛ wa sawo ɔmɔtshi wa shikaa mbut’ate “Diolelo dia Nzambi.” (Luka 10:9) Têkɔ l’ɔkɛndɛ wa sambisha lokumu lakɔ lamɛ, ndo tekɔ lo ngɛnangɛna nshi tshɛ dia kondja alako w’ohomba lo woho wahombaso tɛkɛta. Ɔnɔmbɔdi mbeyaka menda lo dibuku Comment raisonner, diatosha mbɔtwɛlɔ akumi anɛi la mɔtshi yotshikitanyi ndo avɛsa wasungana wakoka kambema olimu aha l’ekakatanu efula. Ɔsɛdingwelo wa tshena pe wa wɛnyanyelo ɔtɔi kana ehende kokaka tokimanyiya dia mbeya kakɔna kayotota, ɔsɔku mbakondjaso diaaso dia tɛkɛta l’atɛkɛtshi aso l’eshikikelo tshɛ.
4 Yeso konembetshiya ambeki ande paka kɛnɛ kakawahombe mbuta keto, koko nde akawatɛ ndo woho wa tɛkɛta. (Luka 10:5, 6) Diɛnyɛlɔ diekɔ lo pɔlɔngalamɛ ka losanganya l’olimu dikambo dia tɛnya woho wa sho tɛkɛta dimɛna. Ɔnɔmbɔdi mbeyaka mvusola tokanyi t’oma lo losanganya la ndjihelo ndo mbisha alako lo woho wa kamba latɔ olimu l’esambishelo lushi longo. Ɛnyɛlɔ ka tshena pe kakalɔngɔswama oma lo wɛnyanyelo w’oma lo Bible waha l’okakatanu ayotokimanyiya dia tshumanya tokanyi taso ndo titɛkɛta.
5 Yeso akasha ambeki ande alako nto lo kɛnɛ k’endana la lɔkɛwɔ lawɔ. (Luka 10:7, 8) Woho akɔ wamɛ, ɔnɔmbɔdi mbeyaka tosha alako wa kokele di’aha sala ndoko dui ɔtɔi diokoki nanya olimu aso. Ondo nde ayokotola yambalo yaso lo wemalelo w’elui elui lo tokoma ta toshinga kana lo wenya w’eta lo manyanya l’atunyi. Nde mbeyaka tohola ohomba wa funda towui wui t’eshika lo note de maison en maison kana mbewoya anto ɔnɛ sho nongolaka weshasha lo dikambo di’olimu wa l’andja w’otondo. Ondo ayohomba mbohola ambutshi dia nama an’awɔ ɔlɔlɔ.
6 Ambeki 70 akɔ wakayele alako wa Yeso ndo l’ɔkɔngɔ diko ‘wakakalola l’ɔngɛnɔngɛnɔ.’ (Luka 10:17.) Naka sho kamba olimu l’alako wakondjaso lo sanganya y’esambishelo, kete tayokoka kongɛ ndo sho lawɔ ɔngɛnɔngɛnɔ woleki l’esambishelo ka lokumu la Diolelo.—Etsha 13:48, 49, 52.