Tokimanyiya Wanɛ Wɛnya Saki Kawɔ la Ngandji Tshɛ
1 Lam’akalɔmbwama ombeki Filipo oma le ondjelo waki Jehowa otsha le ose Etiyɔpiya ɔmɔtshi lakɛnyaka saki ka l’otema ɔtɔi lo Dui dia mɛtɛ diaki Nzambi, nde akawotɛ la ngandji tshɛ dia nde mbokimanyiya lo shihodia kɛnɛ kakandalaka. (Etsha 8:26-39) Onde sho salaka tshɛ dia kimanyiya wanɛ wɛnya saki kawɔ? Sho pombaka sala ɔsɔku nɛ dia yoho mɔtshi ya lotumu laso lakatosha Nzambi ele dia mbetɛ anto ambeki. (Mat. 28:19, 20) Akokaso sala dia mbakimanyiya na?
2 Toyaombe etena lomingu tshɛ dia sala waendelo w’eyoyo. Toyalɔngɔsɔlɛ dia kalola la tenda wanɛ wakɛnya saki kawɔ ndo toyatshutshuya dia nyomokalola l’ɔkɛtshanyelo w’oma lo Bible wakatatɛkɛka lam’akatawende mbala ka ntondo. Lo yimba yaso, tongake l’oweso wa tatɛ mbeka l’onto Bible. Tokalole tena la tena dia towaenda dia mbaɛnya numɛlɔ ya ndjihelo ya Tshoto y’Etangelo la ya Réveillez-vous! Naka anto akɔ wekɔ lo mɛnya saki ka l’otema ɔtɔi, ondo tayokoka mbaɛnya abɔnɛma.
3 Naka, takakɛtshanya lo dikambo di’ohomba wa Bible lam’akatawende mbala ka ntondo, sho kokaka nyomosawola lɔkɔ lo ndjela alako wele lo dibuku “Comment raisonner” lɛkɛ 59 ko mbuta oko ɔnɛ:
◼ “Anto amɔtshi kanaka ɔnɛ alako washa Bible kema ohomba lo nshi yaso nyɛ. Ko wɛ akanayɛ lo dikambo sɔ na? [Tshikɛ onto akɔ dihole akadimole.] Ɛnyɛlɔ, naka okanda ɔmɔtshi ekɔ lo tosha alako w’amɛna efula watokimanyiya dia sho ndjâla la lɔsɛnɔ la nkumbo l’ɔngɛnɔngɛnɔ, onde hatotota ɔnɛ okanda akɔ wekɔ ohomba? [Tshikɛ onto akɔ dihole akadimole.] Lo kɛnɛ k’endana la lɔsɛnɔ la nkumbo, ɛtɛkɛta la etsha wambotshikitana, ndo etombelo wɛnaso ɛlɔ kɛnɛ kema dikayi. Koko, nkumbo yayela kɛnɛ kata Bible yekɔ nge ndo l’ɔngɛnɔngɛnɔ.” Tale Kolosai 3:18-21. Towɛnya kiatshikatshi Lande na kahombaye mbetawo Bible ndo towewoya ɔnɛ sho mbokanaka l’anto dia sala ekongelo ka wekelo wa Bible ofele.
4 Sho kokaka tatɛ ɔkɛtshanyelo lo dikambo dia nganɛ wele wanɛ wakavu lo yoho yayela nyɛ:
◼ “Awui wa mbuta wekɔ efula lo dikambo dia nganɛ wele wanɛ wakavu. Oko le yɛ, kakɔna katotokomɛka lam’avɔso na? [Tshikɛ onto akɔ dihole akadimole.] Ɛtɛmwɛlɔ efula ndakanyaka ɔnɛ sho tetemalaka la sɛna lo yoho kina. Anto efula mambaka dia mboka kɛnɛ kata Bible lo dikambo sɔ. [Ala Ondaki 9:5.] Koko, kânga mbele wanɛ wakavu kema la lɔsɛnɔ dia mbeya awui, vɔ hawohamame. Nzambi akalake dia mbaolola la tshina dia lowandji la Diolelo diakinde.” Tofole dibuku Vivre éternellement lo lɛkɛ 162 ndo, tɔkɛtshanya lande lo waɛmbwɛlɔ la asango wele lɔkɔ. Toyalɔngɔsɔlɛ dia sala diendelo di’oyoyo l’oweso wa tatɛ mbeka lande Bible.
5 Naka sho nangaka mbisha elembetshiyelo efula lo kanyi y’Akristo lo kɛnɛ k’endana l’ata walɔshana wedja, ondo tayolanga mbuta oko nganɛ:
◼ “Anto amɔtshi kanaka ɔnɛ yoho yakɔ yâmɛ ya shidiya ewanu ele ndɔshana. Kanyi yakɔna yele layɛ lo dikambo sɔ na? [Tshikɛ onto akɔ dihole akadimole.] Bible mɛnyaka ɔnɛ Nzambi nangaka dia anto mbidjasɛ kâmɛ lo wɔladi. [Ala Romo 12:17, 18.] Dikambo sɔ diayosalema lo kɛtɛ k’otondo la tshina dia lowandji la Diolelo diaki Nzambi.” Tɔshi biukubuku Dieu se soucie-t-il vraiment de nous? lo lɛkɛ 25 la 26. Towote dia tayoya nto dia ndjolembetshiya lande na kakatolakanya Yeso dia nɔmbaka ɔnɛ ‘lolango la Nzambi latshame la kɛtɛ oko atshamalɔ l’olongo.’—Mat. 6:10.
6 Ɔlɛnga w’ose Etiyopiya akeyaka dia nde totondoshihodia naka onto hawɔlɔmbɔdi. (Etsha 8:31) Filipo akawosha ekimanyielo kakandahombaka la ngandji tshɛ. Sho kokaka mɛnya ngandji kaso ka l’otema ɔtɔi otsha le asekaso lo mbakimanyiya woho akɔ wâmɛ.