Toyangeyange Wanɛ Walanga Mbetshama
1 “Nduku untu leya ndja le mi, tshikima Papa lakantumi kûkutudi.” (Joa. 6:44) Jehowa, ɔnɛ lasɛdingola etema, ayofuta wanɛ walanga mbetshama ndo wɔtɔnganyiya nsɛnɔ yawɔ la kɛnɛ kekawɔ. (Jer. 17:10; Joa. 6:45) Naka sho nyangayanga anto wayakitshakitsha ndo wakombola ndjâla la lɔsɛnɔ l’andja w’oyoyo, kete tayoyala la lokumu la monga ekambi wakamba kâmɛ Lande.—Osam. 37:11; 1 Kor. 3:9.
2 Yeso akate ɔnɛ ambeki ande waki “amundji w’antu.” (Mat. 4:19) Mɛtɛ, woho w’olimu wa ngasɔ tôngaka tena dimɔtshi wolo, koko vɔ mbishaka ɔngɛnɔngɛnɔ efula oma lo etombelo w’ɔlɔlɔ w’oma lɔkɔ. Lo dihole dia sho ndjasha tshɛ lo nyangaka wâhɔ aso shoamɛ, sho mbitshaka “nse” oma lo olanyelo wayosalema mɛtɛ. Omundji a nse w’oshika pombaka mbeka woho wa monga lose. Woho akɔ wâmɛ, sho pombaka mbuta losango la Diolelo lo woho wakotola anto, wotsha atɛkɛtshi aso saki. Dikambo sɔ diekɔ mɛtɛ djekoleko lam’asalaso waendelo w’eyoyo. Ayotota na?
3 Naka ɔtɛkɛtshi aso akɛnya saki lo asawo wele lo “Tshoto y’Etangelo” watɛkɛta dikambo dia ɔtɛmwɛlɔ, kete sho kokaka mbuta ɔnɛ:
◼ “Mbala ka ndjihelo, takatɛkɛta dikambo di’ɔnɛ anto efula hawolange kɛtshanya l’awui w’ɔtɛmwɛlɔ. Onde wɛ hɛnyi dia dikambo sɔ hokɛma, nɛ dia anto efula wotodingi wekɔ lo ndjata ɔnɛ Akristo mbewɔ? Ondo wɛ ndjambolaka bonde kele ɔtɛmwɛlɔ dikambo diakakitola anto ndo dia tamu?” Totshike onto akɔ etena akadimole. Tofole dibuku Comment raisonner lo lɛkɛ 310, ko sho tɛkɛta tokanyi tɔmɔtshi toshami l’ɔtɛ a dui woyedi w’ɔnɛ “Lande na kele ɛtɛmwɛlɔ efula nganɛ?”
4 Ondo tayolanga pemba tatɛ sawola l’onto lo dikambo di’ɔtɛmwɛlɔ nganɛ, lo mbuta ɔnɛ:
◼ “Onde yoho mɔtshi yekɔ ya ndjashikikɛ ɔnɛ tekɔ l’ɔtɛmwɛlɔ a mɛtɛ? [Totshike onto akɔ etena akadimole.] Ɛtɛmwɛlɔ amboleka efula ko anto hawoyeya shikikɛ ndo wambɔtɔ l’ofukutanu.” Tende lo lɛkɛ 316 polo 318 lo dibuku Comment raisonner, lɛnɛ otondjishawɔ dimbola di’ɔnɛ: “Woho Akɔna Wokokiso Mbeya Ɔtɛmwɛlɔ wa Mɛtɛ Na?” Tosha kɔmatɛrɛ lo tshena pe lo dimbola 5 di’ɔnɛ “Onde anto wele lɔkɔ mbokanaka ngandji mɛtɛ lam’asawɔ?” Tote onto akɔ ɔnɛ nde kokaka mbeya akambo efula naka nde mbeka Bible l’onto ɔmɔtshi.
5 Naka ɔtɛkɛtshi aso ekɔ lo ndjakiyanya dia akambo watomba l’andja ɔnɛ, ondo tayolanga mbuta ɔnɛ:
◼ “Ondo wɛ ekɔ lo ndjakiyanya dia lɔsɛnɔ la kɔlɔ lahombaso sɛna ndo mbodia anaso. Bible mɛnyaka daka dia diambo efula diayokotsha Nzambi lo nshi yayaye yaya ka suke.” Tâle Tukedi 2:21, 22 ko sho mbolembetshiya ɔnɛ Jehowa akatolake andja wele la wɔladi wa pondjo.
6 Etena katatende anto nto la Nkumu ya Diolelo, todje yimba dia mbisha anto tshɛ wahatayilongola. Oko akadiatama l’Olimu Aso wa Diolelo, sho kokaka tetemala la mɛnyanya tokatshikatshi tɔsɔ edja ndo tamboshila tshɛ lo lɔkɔtɔ ndo ndjikahɛ anto wele kema l’akoka wa mbɔsa periodikɛ.
7 Nɛ dia Dui dia Nzambi diekɔ la wolo, sho pombaka pemba dia kambaka ladiɔ lo mbɔtwɛlɔ yaso ya l’asawo. (Heb. 4:12) Katoleke keketsha ɔtɛkɛtshi aso dia nde mbala Bible. (Enda lo Etsha 17:11.) Naka sho sala kɛnɛ kahombaso sala l’ohetoheto, kete Jehowa ayɔtshɔkɔla weolo aso.