Tena Tshikitanaka
1 Bible ekɔ lo totɛ ɔnɛ “andja ɔnɛ wɛnaso wekɔ lo tatshikitana.” (1 Kor. 7:31, NW) Ande mɛtɛ kediɔ ɛlɔ lee! Hasambe dia lo lɔsɛnɔ laso, takɛnyi etshikitanu wa mamba lo woho wa kanyiya anto ndo lo lɔkɛwɔ l’anto wa weoho w’atshunda tshɛ. Naka sho nangaka ɔnɛ losango la Diolelo lawanande, kete sho pombaka liewoya, teya ɔnɛ tena tshikitanaka. Sho nangaka mɛmba lokumu l’ɔlɔlɔ woho wa saki k’anto nomialomiama ndo etema awɔ munandema.
2 Ambeta kanda y’ɛnɔnyi, olimu w’esambishelo aki woho okina lo wedja efula, nɛ dia anto efula waki la lɔsɛnɔ la ki ndo wakayaokaka lo lotui tshitshi. Ɔtɛmwɛlɔ aki la dihole dia dimɛna lo nsɛnɔ yawɔ; Bible akalangemaka efula. Tena efula, takahombaka sawola akambo w’endana la wetshelo l’esambishelo. Ɛlɔ kɛnɛ, lɔsɛnɔ l’anto lambosukasuka. Ɔtɛmwɛlɔ wambɔkɔ. Anto yema tshitshɛ tsho mbetawɔ Bible, ndo wetshelo w’ohilwelo ambodiaka mbetawɔ k’anto efula le Nzambi.
3 Omendji ɔmɔtshi weteta akalembetɛ ate: “Ɛlɔ kɛnɛ, anto wekɔ la tokanyi ndo ekakatanu efula diɔ diakɔ diahombaso, ondo, mbaetsha woho wa vɔ nɔmbɔla nsɛnɔ yawɔ.” Okandanu a ntondo w’anto mendanaka paka l’akambo awɔ vamɛ, nkumbo kawɔ ndo ekiyanu awɔ. Akambo asɔ mbalekawɔ tɛkɛta etena kewɔ kâmɛ. Sho pombaka mbaohɔ l’olimu aso w’esambishelo.
4 Diolelo Diaki Nzambi Mbele Tshɔi Yakɔ y’Elongamelo k’Oshika lo Nshi Yayaye: Anto efula hawoyaɛkɛ le mandji y’anto. Vɔ kanaka ɔnɛ vɔ bu la mpao ka mɛna andja w’ɔlɔlɔ lo lɔsɛnɔ lawɔ. Ɛtɛmwɛlɔ wa kashi atawasha ɔkɔkɔ ɔmɔtshi wa vɔ monga l’elongamelo. Omalɔkɔ, kɛnɛ kele l’anto ohomba ele mboka lokumu l’ɔlɔlɔ la Diolelo diaki Nzambi. Tokotole yambalo y’anto lo Diolelo sɔ ndo tɛnya ɔnɛ diɔ diayokandola ekakatanu tshɛ w’anto.
5 Bible Mbele Tshɔi Yakɔ ya Kiɔkɔ y’Alako Wakokaso Mbidjɛ Otema: Ɛlɔ kɛnɛ, nyemba y’anto yambokesama oma le ɛlɔmbɔdi wayaɛkɛ lo lomba l’anto ndo lo filɔzɔfi ya l’andja ɔnɛ. Lâsɔ anto kokaka mbetawɔ dia ‘lam’atɔkɛndakɛndaka onto, nde heye nɔmbɔla ekolo ande.’ (Jer. 10:23) Dikambo dioleki dimɛna diakokawɔ mbeya, ele vɔ pombaka ‘mbɛkama Jehowa l’otema awɔ tshɛ ndo watoyaɛkɛke lo timba tawɔ.’ (Tuk. 3:5) Tena tshikitanaka, koko aha Bible. Ɔnkɔnɛ, sho pombaka mbidjaka Dui dia Nzambi la ntondo nshi tshɛ l’olimu aso ndo mbewoya anto akina dia vɔ mbeya ohomba w’ɛlɔmbwɛlɔ ka Nzambi kashadiɔ. (2 Tim. 3:16, 17) Lo dikambo sɔ, sho pombaka mɛnya anto ohomba wa Bible lo takishilaka l’asawo aso, lo kambaka latɔ lo kadimola wembola awɔ ndo lo mbikaka epole ɔsɛkɛ l’ohomba wa kieka ndo wa kamba la lomba l’oshika lele lɔkɔ.
6 Kânga mbatatshikitana tena nshi nyɛ, eyango aso l’olimu hawotshikitana. Sho pombaka sambisha lokumu l’ɔlɔlɔ la Diolelo, keketsha wɛkamu aso lo Dui dia Nzambi ndo kimanyiya anto akina dia vɔ mbeya ohomba wa mbeka la so Bible. Kɛnɛ kataso pombaka mendana l’ehomba wa nshi nyɛ wa wanɛ wasambishaso. Lo yoho shɔ, tayokoka koma ekambi wa lokumu l’ɔlɔlɔ kâmɛ l’akina, lâsɔ kayotoshimbɛ anto efula.—1 Kor. 9:19, 23.