Tshɛ Ekɔ Dimɛna Efula Lo Nyuma!
1 Anto efula mɛnaka dɔ dia lushi layowokoka mbuta ɔnɛ: “Tshɛ ekɔ dimɛna efula!” Le wɔ, lushi lɔsɔ layoya l’etena kayowokondja diangɔ dia l’emunyi efula woho wa vɔ ‘mbidjasɛ ki, ndɛ, nnɔ ndo ngɛnangɛna.’ (Luka 12:19) Ko tete le, sho kokaka mbuta oma kakianɛ ɔnɛ sho hatohombe ndoko ema, lo yoho ya lo nyuma. (Osam. 34:10) Woho akɔna?
2 Sho mbalaka lo Tukedi 10:22 ɔnɛ: “Otshoko wa [Jehowa, NW] mbatongonya[n]yaka.” Sho wanɛ wakondja ɛlɔlɔ wa Nzambi, sho kokaka mbuta l’ɔlɔlɔ tshɛ ɔnɛ Nzambi “tɔngɔnyaka la diangɔ tshɛ dia sho ngɛnangɛna la diɔ.” (1 Tim. 6:17, NW) Dikambo sɔ tetɛka anto woleki ɛngɔnyi lo nkɛtɛ k’otondo!
3 Tokane Yimba lo Ɛlɔlɔ Wele la So: Atɔi amɔtshi l’atei aso wekɔ la mbo ya l’emunyi efula. Koko, sho tshɔkwamaka nɛ dia hatoyakiyanya ɔtɛkɔya dia ehomba aso wa lushi la lushi. Jehowa mbeyaka diangɔ diele ohomba le so ndo tolakaka dia toshadiɔ. (Mat. 6:31-33) Daka sɔ toshaka ki ka lo yimba, kahakoke sombama.
4 Koko ɛlɔlɔ wa lo nyuma wakondjaso hakomɛ lâsɔ. Lɔsɛnɔ laso nemanɛka la mbo ya ndɛ ya lo nyuma y’oma le Jehowa. (Mat. 4:4) Wanɛ wayanga olelo wa lo nyuma oma le andja ɔnɛ wekɔ la ndjala koko sho tekɔ lo ndɛ ndo nnɔ woho walangaso. (Is. 65:13) “Ɔhɔmbɔ wa kɔlamelo” toshaka diaaso dia kondja ewo kahakoke mbɛdika katɔla otsha lo lɔsɛnɔ la pondjo.—Mat. 24:45, NW; Joa. 17:3.
5 Diwotɔ diaso di’oshika dia l’andja w’otondo toshaka diaaso dia sho mbɔtɔnganɛ l’ɔngɛnɔngɛnɔ l’anangɛso ndo l’akadiyɛso woludi la ngandji wodjashi l’atshuku anɛi wa nkɛtɛ. (Joa. 13:35) Etshumanelo kaso ekɔ eshamelo ka wɔladi, l’atei atɔ mbakokaso kondja esambelo ndo ekeketshelo. Dikumanyi kokɛka anima aso ndo tokimanyiyaka dia sho ntokomɛ weoho tshɛ w’ekakatanu. (Heb. 13:17) Lam’atshikalaso suke l’anangɛso, sho keketshanaka l’asaso, kɛsɔ toshaka wolo ndo tokimanyiyaka dia tetemala.—Romo 1:11, 12.
6 Kânga olimu aso ekɔ ɔtshɔkɔ. Elimu efula soyaka anto ndo hasha ndoko yema y’ɔngɛnɔngɛnɔ. Lam’ewoyaso onto lokumu l’ɔlɔlɔ, sho mbôtshaka ɔlɔ, ko dikambo sɔ tɔngɛnyangɛnyaka. (Etsha 20:35) Sho kokaka mɛtɛ mɛna ɔlɔ l’olimu aso a wolo.—Und. 2:24.
7 Lâdiko dia tshɛ, tekɔ l’elongamelo ka diambo. (Romo 12:12) Tekɔ lo kongɛ andja w’oyoyo wa kokele ndo wa losembwe, lɛnɛ ayotodjasɛ pondjo la wanɛ walangaso l’ɔngɛnɔngɛnɔ ndo lo wɔladi. Elongamelo kɛsɔ ekɔ oshinga wolo efula oleki oseka ɛngɔ tshɛ kokoki andja ɔnɛ tosha.—1 Tim. 6:19.
8 Ngande Wokokiso Mɛnya Lowando Laso? Hatokokaki pondjo kaloya Jehowa kɛnɛ tshɛ kakandatosalɛ. Tɛnya ko lowando laso loto (1) lo mbôkaka losaka nshi tshɛ lo ngandji kande ka mamba (Ef. 5:20), (2) lo mɛnyaka ngandji kaso oma l’okitanyiya aso (1 Joa. 5:3), (3) lo ntombolaka lokombo lande lam’asambishaso lokumu l’ɔlɔlɔ (Osam. 83:18) ndo (4) lo sukɛka etshumanelo k’Akristo oma lo kambaka kâmɛ.—1 Tim. 3:15.
9 Sho sunganaka mɛtɛ monga anto wangɛnangɛna otamanya la nkɛtɛ. (Osam. 144:15b) Totshike dionga diaso, lɔkɛwɔ laso ndo olimu aso wɛnya ɔngɛnɔngɛnɔ wele la so lo paradiso ka lo nyuma! Tshɛ ekɔ dimɛna efula!